Mmushindu kayi udi bansantu balelela mua kukuambuluisha?

MU MUKANDA WA NZAMBI, muaku wa tshiena-Gelika udibu bakudimune ne: “munsantu” mu imue Bible badi mua kuukudimuna ne: “wa tshijila.” Muaku eu udi utangila nganyi? Tshibungu kampanda tshidi tshileja ne: “Padi muaku eu ku bungi, padibu bautela bua kuakula bua bena kuitabuja, udi ubatangila bonso, kadi ki nganu aba badi ne bienzedi bia pa buabi bia tshijila anyi bantu bakadi bamane kufua bavua ne bienzedi bia bunsantu bia pa buabi to.”​—An Expository Dictionary of New Testament Words.

Ke bualu kayi mupostolo Paulo wakabikila bena Kristo bonso ba kumpala bu bansantu balelela anyi bantu ba tshijila. Tshilejilu, mu bidimu lukama bia kumpala, wakafundila ‘bena [tshisumbu tshia] Nzambi ba mu Kolinto ne kudi bansantu bonso ba mu buloba buonso bua Akaya, [provense wa Lomo].’ (2 Kolinto 1:1) Pashishe, Paulo wakalua kufundila ‘bonso ba mu Lomo, banangibue kudi Nzambi, babikidibue bua kuikala bansantu.’ (Lomo 1:7) Mbimueneke patoke ne: bansantu aba kabavua dîba adi banji kufua to, ne kabavua balue bantu ba pa buabu bua ngikadilu yabu ya pa buayi, balue ku mutu kua bena Kristo bakuabu nansha. Kadi mbua bualu kayi buvuabu babangatshile bu bansantu?

Nzambi ke uvua mubavuije bansantu

Dîyi dia Nzambi didi dileja ne: kakuena muntu anyi bulongolodi budi mua kuvuija muntu munsantu to. Mukanda wa Nzambi udi wamba ne: ‘[Nzambi] wakatusungila, wakatubikila ne dibikila dia tshijila, ke mbu mudi midimu yetu mimpe, kadi bu mudi disungula diende mene ne [bulenga buende bukena butuakanyine].’ (2 Timote 1:9) Muntu udi ulua munsantu ku dibikila dia Yehowa, bilondeshile bulenga bua Nzambi bukena butuakanyine ne mu diumvuangana ne dilongolola Diende.

Bansantu ba mu tshisumbu tshia bena Kristo badi mu ‘tshipungidi tshipiatshipia.’ Mashi avua Yezu muela panshi adi avuija tshipungidi etshi tshilelela ne avuija benamu bansantu. (Ebelu 9:15; 10:29; 13:20, 24) Bantu aba mbakezuke ku mêsu a Nzambi ne badi ‘bakuidi ba tshijila, bua kufila milambu ya [mu] nyuma mitabujibue kudi Nzambi bualu bua Yezu Kristo.’​—1 Petelo 2:5, 9.

Disambila bansantu bua bakuile bantu

Bu mudi bantu miliyo mivule bitaba ne: aba badibu babikila ne: bansantu badi mua kupesha bena Kristo bukole bua pa buabu, badi babakukuila ku diambuluisha dia bishadile biabu peshi balomba bansantu abu bua babakuile kudi Nzambi. Ke tshidi Bible ulongesha anyi? Mu muyuki wende wa pa mukuna, Yezu wakalongesha bayidi  bende mushindu wa kusemena kudi Nzambi ne: ‘Nutendelele Nzambi nunku: Tatu wetu udi mu diulu, banemeke dîna diebe.’ (Matayo 6:9) Bantu badi ne bua kutuma masambila abu anu kudi Yehowa Nzambi nkayende.

Bua kutua lungenyi lua diakuilangana dia bansantu nyama ku mikolo, bamue bena malu a teoloji batu batela mêyi a mu Lomo 15:30, adi amba ne: ‘Bana betu, ndi nnusengelela bua Mukalenge Yezu Kristo ne bua dinanga dia nyuma muimpe ne: nudienzeje nanyi bikole mu dilomba dienu dia bualu buanyi kudi Nzambi.’ Paulo uvua wambila bena Kristo abu bua buobu kumusambila peshi bua kubila dîna diende bua kumonabu mua kusemena kudi Nzambi anyi? Tòo. Nansha mudi Bible wanyisha bua kusambila bua bansantu balelela, tshidibi kakuena muaba nansha umue udi Nzambi utulomba bua kusambila bansantu anyi kumusambila ku butuangaji buabu nansha.​—Filipoi 1:1, 3, 4.

Kadi Nzambi mmututekele mutuangaji bua masambila etu. Yezu wakamba ne: ‘Meme ndi njila ne bulelela ne muoyo; kakuena muntu udi ulua kudi Tatu, kayi muanji kulua kundi diambedi.’ Wakamba kabidi ne: ‘Nengenze malu onso anualomba mu dîna dianyi, bua Tatu atumbishibue bua Muana. Binualomba bualu bonso mu dîna dianyi, nembuenze.’ (Yone 14:6, 13, 14) Tuikalayi batuishibue ne: Yehowa mmusue bua kuteleja masambila adi bantu benza mu dîna dia Yezu. Pa bidi bitangila Yezu, Bible udi wamba ne: “Udi ne bukole bua kupandisha bonso badi bapitshila kudiye bua kuya kudi [Nzambi], bualu yeye udi ushala ne muoyo kashidi bua kubakuila.”​—Ebelu 7:25, Mukanda wa Mvidi Mukulu [Katolike, MMM].

Bu mudi Yezu mudiakaje bua kutuakuila, bua tshinyi batendeledi ba mu Bukua-buena-Kristo badi balomba “bansantu” mu masambila bua kubakuilabu? Mumanyi mukuabu wa malu a kale Will Durant udi uleja ntuadijilu wa ngenzelu eu mu mukanda wende kampanda. Durant mumane kuleja ne: bavua batshina Nzambi Wa-Bukole-Buonso, ne Yezu uvua umueka muikale pabuipi bua kuakula ne bantu, udi wamba ne: “Bivua bikole bua muntu kuteta bua kuakula ne Yezu mpala ne mpala panyima pa yeye mumane kulengulula mêyi Ende a diakalenga akatelaye mu muyuki wa pa mukuna. Bivua bimueneka bia meji menemene bua muntu kutuma disambila diende kudi muntu kampanda udibu bateke munsantu mu diulu, ne bua kulomba bua amuakuile popamue ne Kristo.” (The Age of Faith) Ditshina bua kusambila Nzambi buludiludi ku butuangaji bua Yezu ndimpe anyi?

Bible udi utulongesha ne: ku butuangaji bua Yezu tudi ne ‘dikima dia kusemena kudi [Nzambi]  ne ditekemena dionso’ mu disambila. (Efeso 3:11, 12, MMM) Nzambi Wa-Bukole-Buonso kêna kule ne bukua-bantu bua kumbengaye kumvua masambila etu to. Mufundi wa Misambu Davidi wakasambila ne dieyemena dionso ne: ‘Wewe udi umvua milombu, bukua-bantu buonso nebufike kuudi.’ (Musambu 65:2) Pamutu pa Yehowa kufila bukole ku diambuluisha dia bishadile bia “bansantu” bakadi mene bamane kufua, udi upesha aba bonso badi bamulomba nyuma muimpe wende ne ditabuja dionso. Yezu wakamba ne: ‘Nuenu bantu babi, binuamanya mua kupa bana benu bintu bimpe, Tatu wenu wa mu diulu kêna upa batu bamulomba nyuma muimpe anyi?’​—Luka 11:13.

Mudimu wa Bansantu

Bansantu bavua mupostolo Paulo mufundile mikanda bakafua kukadi nkama ya bidimu ne mu kupita kua bidimu bavua ne bua kupeta “tshifulu tshia butumbi tshia muoyo,” mbuena kuamba ne: bavua ne bua kubishibua ne kuya mu diulu. (Buakabuluibua 2:10) Nansha batendeledi ba lulamatu ba bungi ba Nzambi batu bamanye bimpe ne: dikukuila bansantu balelela aba kadiena mua kukuba muntu ku masama, bipupu, dipangila dia mfranga, bukulakaje anyi lufu to. Nanku udi mua kudiebeja ne: ‘Bansantu ba Nzambi batu batutabalelaku anyi? Tudi mua kutekemena bua batuambuluishe anyi?

Mulayi wa Danyele udi wakula patoke bua bansantu. Mu bidimu bia 500 kumpala kua bikondo bietu, Danyele wakamona tshikena-kumona tshia dikema tshidi tshitangila too ne matuku etu aa. Nyama inayi idi ikuatshisha buôwa yakapatuka mu mâyi manene, idi mikale tshimfuanyi tshia mbulamatadi ya bantu idi kayiyi mua kukumbaja majinga malelela a bantu. Pashishe Danyele kuamba ne: ‘Kadi bansantu ba Nzambi Mutambe Bunene wa mu diulu nebangate bukalenge, bukalenge nebuikale kudibu tshiendelele, lapalapa.’​—Danyele 7:17, 18.

Paulo wakajadika bualu bua ‘bumpianyi bua bansantu’ ebu ne: nebikale bapianyi pamue ne Kristo mu diulu. (Efeso 1:18-21) Mashi a Yezu akunzulula njila bua bansantu aba 144 000 kubishibuabu ku lufu ne kusomba mu butumbi bua mu diulu. Mupostolo Yone wakamba ne: ‘Udi ne luseke luende mu dibika dia ku lufu dia kumudilu udi ne disanka ne udi wa tshijila; lufu luibidi kaluena ne bukokeshi ku mutu kuabu; kadi nebikale bakuidi ba Nzambi ne ba Kristo, ne nebakokeshe nende bidimu tshinunu.’ (Buakabuluibua 20:4, 6; 14:1, 3) Yone wakumvua mu tshikena-kumona tshiakamonaye tshisumbu tshia bifukibua bia mu diulu bimba kumpala kua Yezu mutumbishibue: ‘Wakasumbila Nzambi ba mu tshisamba tshionso, ne ba mu muaku wonso, ne ba munkatshi mua bantu bonso, ne ba munkatshi mua ditunga dionso, ku mashi ebe. Ne wakabavuija bukalenge ne bakuidi kudi Nzambi wetu; ne bobu badi bakokesha pa buloba.’ (Buakabuluibua 5:9, 10) Mêyi aa kaenaku akankamija anyi? Yehowa Nzambi nkayende musungule ne lubatshi luonso balume ne bakaji aba. Bobu aba mbenze kabidi mudimu ne lulamatu pa buloba, bapete pabu ntatu yonso itu ikuata bantu. (1 Kolinto 10:13) Pa nanku, tudi ne bua kuikala ne dieyemena dia se: pabishibua bansantu anyi bantu ba tshijila aba ku lufu, nebikale bena luse ne bakokeshi badi bamanye bimpe mateketa ne mikalu yetu.

Mabenesha ikalaku pakokesha Bukalenge bua Nzambi

Mu katupa kîpi emu, mbulamatadi anyi Bukalenge bua Nzambi nebumbushe malu mabi onso ne ntatu pa buloba. Mu tshikondo atshi, bantu nebasemene pabuipi menemene ne Nzambi kupita muvuabi kumpala. Yone wakafunda ne: ‘Ngakumvua dîyi dikole difuma mu nkuasa wa butumbi diamba ne: Tangilayi, nzubu wa tshilulu wa Nzambi udi munkatshi mua bantu, ne yeye neikale nabu, ne bobu nebikale bantu bende; ne Nzambi muine neikale nabu, neikale Nzambi wabu.’ Nsombelu eu neatuadile bukua-bantu mabenesha a kaayi kuamba, bualu mulayi udi utungunuka ne: ‘Yeye neakupule tshinsonji tshionso ku mesu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi;  malu a kumudilu akumuka.’​—Buakabuluibua 21:3, 4.

Netshikale tshikondo tshia disanka dia bungi be! Bipeta bimpe bia bukokeshi bupuangane bua Kristo Yezu ne bansantu 144 000 mbileja kabidi mu mêyi aa adi mu Mika 4:3, 4: ‘[Yehowa] nealumbulule bilumbu bia munkatshi mua bantu ba bungi, neakose bilumbu bia bisamba binene bia bantu bidi kule; bobu nebangate miele yabo ya mvita, nebayifule nkasu ya kudima nayi; nebangate mafuma abu, nebaafule miele ya kulengeja nayi matamba a mionji ya tumuma tua mvinyo. Tshisamba tshikuabu tshia bantu katshiena tshibisha muele wa mvita bua kuluisha nawu tshinga tshisamba; kabena mua kuyila lungenyi lua kuluangana nalu mvita kabidi. Kadi nebashikame, muntu ne muntu, muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa; bualu bua mukana mua Yehowa wa misumba muakuamba nunku.’

Bansantu badi bela lubila babikila bantu bonso bua kulua kupeta mabenesha aa. Bansantu balelela bafuanyikija ne mukaji musela wa mu tshifuanyi, badi batungunuka ne kuamba ne: ‘Lua.’ Mvese eu udi utungunuka ne: ‘Udi umvua ambe biende ne: Lua. Ne udi ne nyota alue biende; udi musue, angate mâyi a muoyo tshianana.’ (Buakabuluibua 22:17) ‘Mâyi a muoyo’ aa ntshinyi? Pa kumbusha bintu bikuabu, mâyi aa ndimanya dijalame dia malongolola a Nzambi. Yezu wakasambila Nzambi nunku: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ (Yone 17:3) Tudi mua kupeta dimanya edi patudi tulonga Bible pa tshibidilu. Tudi ne disanka dia bungi bua mutudi bajingulule bansantu balelela ku diambuluisha dia Dîyi dia Nzambi, ne bafike ku dimanya mushindu wakuata Nzambi nabu mudimu bua kupesha bantu diakalenga dia kashidi!

[Tshimfuanyi mu dibeji 4]

Paulo wakafundila bansantu balelela mikanda ku diambuluisha dia nyuma muimpe

[Tshimfuanyi mu mabeji 4, 5]

Bapostolo ba lulamatu ba Yezu bakalua bansantu balelela anyi bantu ba tshijila

[Tshimfuanyi mu dibeji 6]

Tudi mua kusambila Nzambi ku butuangaji bua Yezu Kristo ne dieyemena dionso

[Tshimfuanyi mu dibeji 7]

Bantu ba tshijila anyi bansantu babishibua ku lufu nebikale bakokeshi bena luse pa buloba