Nkonko ya babadi

• Bible utu ubikila Satana ne: Lusifere anyi?

Dîna edi Lusifere didi anu muaba umuepele tshianana mu Bible, ne ki mmu Bible yonso to. Tshilejilu, Bible kampanda wa mu Anglais udi ukudimuna Yeshaya 14:12 nenku: “Mona muudi mukuluke mu diulu, wewe Lusifere, muana wa lunkelu!”​—King James Version.

Muaku wa mu tshiena-Ebelu udibu bakudimune ne: “Lusifere” udi umvuija ne: “eu udi ukenka.” Bible wa Septante udi ne muaku wa tshiena-Gelika udi umvuija ne: “mutuadi wa lunkelu.” Ke bua tshinyi imue Bible idi ikudimuna muaku wa mu tshiena-Ebelu tshia kale ne: “mutoto wa dinda” ta “mutoto wa nkesha.” Kadi Bible wa mu Latin wa Vulgate (wa Jérôme) udi ne muaku “Lusifere” (mutuadi wa butoke), ne ke bualu kayi muaku eu udi mu Bible kabukabu.

Lusifere eu nnganyi? Miaku eyi “eu udi ukenka” anyi “Lusifere” idi mu mêyi a mulayi avua Yeshaya muambile bena Isalele bua kuambabu bu ‘musambu wa kutshimbisha nawu mukalenge wa mu Babulona.’ Nunku, dîna edi didi munkatshi mua mêyi akambilabu bangabanga bamfumu bavua badia bukalenge mu Babulona. Tshidi tshileja kabidi ne: miaku eyi: “eu udi ukenka” mmiamba bua muntu ne ki mbua tshifukibua tshia mu nyuma mmêyi a se: ‘Neupuekeshibue too ne ku Muaba wa bafue [anyi Sheol].’ Sheol ndukita mutu bantu bonso baya, kadi ki mmuaba kampanda udi Satana Diabolo nansha. Bualu bukuabu budi se: aba badi bamona mudibu bafikisha Lusifere too ne lufu nunku badi badikonka ne: ‘Eu mmuntu wakazakeja buloba anyi?’ Bulelela, muaku “Lusifere” udi wakula bua muntu, kadi ki mbua tshifukibua kampanda tshia mu nyuma to.​—Yeshaya 14:4, 15, 16.

Bua tshinyi badi babikila bamfumu ba mu Babulona nunku? Tumanyayi ne: bavua ne bua kubikila mukalenge wa Babulona ne: eu udi ukenka anu panyima pa dikuluka dia bukokeshi buende ne bua kumutshimbisha. (Yeshaya 14:3) Lutambishi luakasaka bakalenge ba mu Babulona bua kudibandisha ku mutu kua bakalenge bavua nabu mutumba. Diambu dia bakalenge abu divua dipite bungi, ke bualu kayi badi babaleja mudibu baditumbisha, badiamba ne: ‘Nembande mu diulu, nembandishe nkuasa wanyi wa bukalenge mulu pa mutu pa mitoto ya Nzambi; nenshikame bianyi pa mutu pa mukuna wa disangisha kumfudilu kua luseke lua nôde. Nendivuije bu Nzambi Mutambe wa Mulu.’​—Yeshaya 14:13, 14.

“Mitoto ya Nzambi” mbakalenge ba mu ndelanganyi ya Davidi. (Nomba 24:17) Kubangila anu mu tshikondo tshia Davidi, “mitoto” eyi ivua ikokesha pa Mukuna wa Siona. Kunyima kua Solomo mumane kuibaka ntempelo wa mu Yelushalema, bakalua kupesha tshimenga etshi tshijima dîna dia Siona. Mu tshikondo tshia Mikenji ya Mose, balume bonso bena Isalele bavua balombibue bua kuikala kuya ku Siona misangu isatu ku tshidimu. Ke bualu kayi tshimenga etshi tshiakalua “mukuna wa disangisha.” Mu dikana bua kutshimuna bakelenge ba Yuda ne bua kubumusha pa mukuna au, Nebukadenesâ udi umanyisha dijinga diende dia kudibandisha ku mutu kua “mitoto” eyi. Pamutu pa kupesha Yehowa lumu bua mudiye mutshimune bakalenge ba Yuda, yeye udi uditeka pa muaba wa Yehowa ne diambu dionso. Nunku nkunyima kua dikuluka dia bamfumu ba mu Babulona bakalondangana padibu bababikila ne: “eu udi ukenka” bua kubaseka.

Lutambishi lua bakalenge ba mu Babulona luakaleja lungenyi lua “nzambi wa tshikondo etshi” udi muikale Satana Diabolo. (2 Kolinto 4:4) Yeye pende udi ukeba kupeta bukokeshi bua Yehowa Nzambi ne udi ukeba kuditeka ku mutu kuende. Kadi Lusifere ki ndîna didi Mukanda wa Nzambi upesha Satana to.

 • Bua tshinyi 1 Kulondolola 2:13-15 udi wamba ne: Davidi mmuana wa muanda-mutekete wa Yishai, eku 1 Samuele 16:10, 11 uleja ne: uvua muana wa muanda-mukulu?

Kunyima kua Shaula Mukalenge wa Isalele wa kale mumane kuela ntendelelu mulelela nyima, Yehowa Nzambi wakatuma muprofete Samuele bua kuela umue wa ku bana ba Yishai manyi bua alue mukalenge. Muyuki mufundisha ku nyuma wa Nzambi (mufunda kudi Samuele nkayende mu bidimu bia 1000 K.B.B.) udi ulonda bualu ebu wamba ne: Davidi uvua muana wa muanda-mukulu wa Yishai. (1 Samuele 16:10-13) Kadi, eu uvua Ezela (muakuidi panyima pa bidimu bitue ku 600) mufunde udi wamba ne: ‘Yishai wakalela muan’a bute wende Eliaba ne Abinadaba muana muibidi ne Shimea muana muisatu, Netanele muana muinayi ne Ladai muana muitanu. Osema muana muisambombo ne Davidi muana wa muanda-mutekete.’ (1 Kulondolola 2:13-15) Ntshinyi tshivua tshienzekele muanabu ne Davidi mukuabu ne bua tshinyi Ezela kêna utela dîna diende?

Bible udi wamba ne: Yishai “wakadi ne bana ba balume muanda mukulu.” (1 Samuele 17:12) Bidi bimueneka ne: muanende umuepele kavua mushale ne muoyo matuku a bungi bua kumona mua kusela ne kulela bana to. Bu muvuaye kayi ne ndelanganyi, kavua mua kupeta bumpianyi mu dîku anyi kuikala ne muaba mu miyuki ya ndelanganyi ya Yishai.

Mpindieu tuakulayi bua mu tshikondo tshia Ezela. Tangila nsombelu uvuaku pakasangishaye malu adi mu mikanda ya Kulondolola. Bupika bua mu Babulona buvua bujike kukavua bidimu bitue ku 77, ne bena Yuda bakavua bapingane mu ditunga diabu. Mukalenge wa Pelasa uvua mupeshe Ezela bukokeshi bua kuteka balumbuluishi ne balongeshi ba Mikenji ya Nzambi ne bukenji bua kulengeja nzubu wa Yehowa. Bavua dijinga ne mikanda mijalame ya kulondolola anyi ya dilondangana dia ndelanganyi bua kujadika bumpianyi bua tshisamba ne tshisamba, ne bua kuikala bamanye ne: anu bantu bavua ne bukenji ke bavua mua kuenza mudimu wa buakuidi. Nunku Ezela wakalongolola muyuki mujima wa malu a tshisamba, pamue ne muyuki mujalame ne wa kueyemena wa ndelanganyi ya Yuda ne ya Davidi. Dîna dia muana wa Yishai uvua mufue mutshikale muana au kadivua mua kuikala ne mushinga to. Ke bualu kayi Ezela kakatela dîna diende nansha.