Tungunukayi ne kutumikila malu anudi balonge

‘Malu aa kabidi anuakayila ne [anuakitaba] ne anuakumvua ne anuakatangila kundi, nuikale nuenza malu aa; ne Nzambi wa ditalala neikale nenu.’​—FILIPOI 4:9.

1, 2. Bible udiku ushintulula nsombelu wa bantu badi bamba mudibu batendeledi anyi? Umvuija.

 MU TSHIBEJIBEJI kampanda muvua mutu wa bualu wamba ne: “Bitendelelu bidi bienda bitangalaka, kadi bikadilu bimpe bidi bienda bijimina.” (Emerging Trends) Mutu wa bualu eu wakumvuija mu tshikoso bipeta bia nkonko ivuabu bele bantu mu ditunga dijima dia États-Unis. Bidi bimueneka ne: bantu batu baya mu bitanda bia Nzambi ne batu bamba mudi tshitendelelu tshikale ne mushinga mu nsombelu wabu mbalue kuvula bikole mu ditunga edi. Kadi mulubu au udi wamba ne: “Nansha mudiku bishiferi ebi bidi bikemesha, bena mu Amerike ba bungi kabena bitaba ne: bitendelelu bidi mua kulengeja nsombelu wa muntu ne muntu ne wa bukua-bantu mu kabujima nansha.”

² Nsombelu eu kêna anu mu ditunga dimuepele to. Pa buloba bujima, bantu ba bungi badi bamba ne: badi bitabuja Bible ne badiamba mudibu batendeledi kabatu balekela Mukanda wa Nzambi ushintulula nsombelu wabu menemene to. (2 Timote 3:5) Mulombodi wa tshimue tshisumbu tshia bakebuludi wakamba ne: “Tutshidi tuangata Bible ne mushinga wa bungi, kadi pa bidi bitangila kupeta dîba dia kumubala, kumulonga ne kutumikila malu adimu, katutshiena tuenza nanku to.”

3. (a) Mmunyi mudi Bible ushintulula aba badi balua bena Kristo balelela? (b) Mmunyi mudi bayidi ba Yezu batumikila mubelu wa Paulo udi mu Filipoi 4:9?

 ³ Kadi kabiena nanku bua bena Kristo balelela to. Ditumikila mibelu ya mu Dîyi dia Nzambi ndishintulule malu a bungi mu ngelelu wabu wa meji ne mu ngikadilu wabu. Nansha bantu bakuabu ba tshianana batu bamona bumuntu bupiabupia budibu baleja. (Kolosai 3:5-10) Bua bayidi ba Yezu, Bible ki mmukanda udibu balekele ukuata lupuishi mu tshitekelu tshia mikanda nansha. Kadi mupostolo Paulo wakambila bena Kristo ba mu Filipoi ne: ‘Malu aa kabidi anuakayila ne [anuakitaba] ne anuakumvua ne anuakatangila kundi, nuikale nuenza malu aa; ne Nzambi wa ditalala neikale nenu.’ (Filipoi 4:9) Bena Kristo kabena anu bitaba bulelela bua mu Dîyi dia Nzambi patupu to. Kadi badi kabidi batumikila malu adibu balonga, batungunuka ne kulonda mibelu ya mu Bible mu dîku, ku mudimu, mu tshisumbu ne mu malu makuabu onso a mu nsombelu wabu.

4. Bua tshinyi mbikole bua kutumikila mikenji ya Nzambi?

⁴ Kutumikila mikenji ne mêyi a Nzambi ki mbualu bupepele to. Buloba butudi basombele budi ku bukokeshi bua Satana Diabolo, udi Bible ubikila ne: “nzambi wa tshikondo etshi.” (2 Kolinto 4:4; 1 Yone 5:19) Ke bualu kayi mbimpe kudimukila tshintu tshionso tshidi mua kutupangisha bua kutungunuka ne kuleja lulamatu kudi Yehowa Nzambi. Mmunyi mutudi mua kushala anu bena lulamatu?

Lamata ku ‘tshidikijilu tshia mêyi malenga’

5. Mêyi a Yezu a se: ‘Atungunuke ne kundonda’ adi umvuija tshinyi?

⁵ Umue mushindu wa kutumikila malu atudi balonge ngua kulamata bikole ku ntendelelu mulelela nansha bantu ba tshianana buobu kabayi basue. Ditantamana didi dilomba didienzeja. Yezu wakamba ne: ‘Biasua muntu kundonda, adipidie, ambule mutshi wende [wa makenga ne atungunuke ne] kundonda.’ (Matayo 16:24) Yezu kakamba ne: tudi ne bua kumulonda munkatshi mua lumingu lumue, ngondo umue anyi tshidimu tshimue to. Kadi wakamba ne: ‘Atungunuke ne kundonda.’ Mêyi ende adi aleja ne: tudi bayidi ki mbua lupolo lukese lua matuku etu a muoyo peshi lulamatu luetu ndua matuku mabala ku minu nansha. Kulamata ntendelelu mulelela ne muoyo mujima kudi kulomba bua tutungunuke ne lulamatu mu njila utudi basungule, nansha kuoku mua kuenzeka bualu kayi. Mmunyi mutudi mua kutungunuka mu njila eu?

6. Tshidikijilu tshia mêyi malenga avua Paulo mulongeshe bena Kristo ba mu bidimu lukama bia kumpala ntshinyi?

⁶ Paulo wakabela muinende wa mudimu Timote ne: ‘Ulamate tshidikijilu tshia mêyi malenga awakumvua kundi mu ditabuja ne mu dinanga dia mu Kristo Yezu.’ (2 Timote 1:13) Ntshinyi tshivua Paulo musue kuamba? Muaku wa mu tshiena-Gelika udibu bakudimune muaba eu ne: ‘tshidikijilu,’ udi umvuija plan. Nansha mudi plan eu kayi uleja bintu bionso, udi ne mikalu mileja bimpe bua se: muntu udi utangila ne lubatshi amumone yonso mujima. Bia muomumue, tshidikijilu tshia bulelela buvua Paulo mulongeshe Timote ne bantu bakuabu katshivuaku bua kufila diandamuna disunguluke dia lukonko luonso luvua mua kujuka nansha. Kadi, nsangilu wa malongesha aa udi ufila bulombodi bukumbane (budi buenze bu plan) bua bantu badi basue kushintuluka bamone malu adi Yehowa ubalomba. Bushuwa, bua kusankisha Nzambi bavua ne bua kulamata ku tshidikijilu atshi tshia bulelela mu ditumikila malu avuabu balonge.

7. Mmunyi mudi bena Kristo mua kulamata ku tshidikijilu tshia mêyi malenga?

⁷ Mu bidimu lukama bia kumpala, bantu bu mudi Humenayo, Alesandelo ne Fileto bavua babingisha ngenyi ivua kayiyi ipetangana ne ‘tshidikijilu tshia mêyi malenga.’ (1 Timote 1:18-20; 2 Timote 2:16, 17) Ntshinyi tshivua bena Kristo ba kumpala mua kuenza bua kababapambuishi kudi batontolodi? Bavua ne bua kulonga ne tshisumi ne kutumikila mifundu mifundisha ku nyuma muimpe. Aba bavua benda biumvuangane ne tshilejilu tshivuabu bamone kudi Paulo ne kudi bena lulamatu bakuabu bavua ne mushindu wa kujingulula ne kubenga tshintu tshionso tshivua katshiyi tshipetangana ne tshidikijilu tshia bulelela buvuabu babalongeshe. (Filipoi 3:17; Ebelu 5:14) Pamutu pa ‘kusama muoyo bua kukonkangana ne kuelangana mpata [bua miaku],’ bakatungunuka ne kuya kumpala mu njila wabu muimpe wa dilamata Nzambi. (1 Timote 6:3-6) Tudi tuenza bia muomumue patudi tutungunuka ne  kutumikila malongesha malelela atudi balonge. Bidi bikolesha ditabuja bua kumona se: bantu miliyo mivule badi basadila Yehowa pa buloba bujima mbalamate bikole ku tshidikijilu tshia bulelela bua mu Bible budibu babalongeshe.​—1 Tesalonike 1:2-5.

Epuka “nsumuinu ya dishima”

8. (a) Mmushindu kayi udi Satana ukeba bua kunyanga ditabuja dietu lelu? (b) Ndidimuija kayi diakafila Paulo mu 2 Timote 4:3, 4?

⁸ Satana udi ukeba kunyanga lulamatu luetu mu dijula mpata munda muetu bua malu adibu batulongeshe. Lelu, anu muvuabi mu bidimu lukama bia kumpala, batontolodi ne banga bantu badi bakeba bua kunyanga ditabuja dia aba badi kabayi badimuke. (Galatia 2:4; 5:7, 8) Imue misangu batu banyemena ku tudiomba anyi ku bikandakanda bua kutangalaja ngenyi yabu mikonyangale peshi mashimi a patoke pa bidi bitangila ngenzelu ya mudimu ne bipatshila bia bantu ba Yehowa. Paulo wakamanyisha ne: bamue bavua ne bua kuela bulelela nyima. Wakafunda ne: “Dinga diba, bantu kabakuikala kabidi bateleja dilongesha dimpe, nebikale badikebela amu balongeshi bavule patupu ba pa diabo dijinga, bikale babafunya ku matshio; nebele bulelela nyima bua kuya kuteleja nsumuinu [ya dishima].”​—2 Timote 4:3, 4, MMM.

9. Ntshinyi tshivua Paulo usua kuamba pakakulaye bua “nsumuinu ya dishima”?

⁹ Pamutu pa kulamata ku tshidikijilu tshia mêyi malenga, bamue bavua basue “nsumuinu ya dishima.” Nsumuinu ya dishima eyi ivua binganyi? Pamu’apa Paulo uvua wakula bua mianu mifuikakaja, bu mudi eyi idi mu mukanda wa Tobiya udi kauyi mufundisha ku nyuma muimpe. * Nsumuinu ya dishima eyi ivua mua kuikala kabidi yumvuija malu a biambamba avua matangalake avua asankisha bantu. Nunku kabidi, bamue, “pa diabo dijinga,” bavua mua kuikala babashime kudi aba bavua kabayi banyisha mikenji ya Nzambi peshi bavua bajana bawetu bavua balombola mu tshisumbu. (3 Yone 9, 10; Yuda 4) Nansha bikalaku kuvua bilenduishi bia mushindu kayi, bidi bimueneka ne: bamue bavua basue mashimi pamutu pa malongesha a bulelela bua mu Dîyi dia Nzambi. Mpindieu buobu kulekela kutumikila malu avuabu balonge, kudienzelabu bibi mu nyuma buobu nkayabu.​—2 Petelo 3:15, 16.

10. Ng’imue nsumuinu ya dishima idiku lelu, ne mmunyi muakaleja Yone ne: mbimpe kuikala badimuke?

¹⁰ Tudi mua kuepuka nsumuinu ya dishima idiku lelu bituikala tukonkonona ne tusunguluja malu atudi tuteleja ne bintu bitudi tubala. Tshilejilu, misangu mivule batu batumbisha tshiendenda tshia masandi ku tudiomba ne mu bikandakanda. Bantu ba bungi badi basakangana ku dibenga kuitabuja ne: Nzambi udiku. Bedi ba Bible mpata badi bamba bua se: Bible ki mmufundisha ku nyuma wa Nzambi to. Ne batontolodi ba  matuku etu aa badi batungunuka ne kukeba bua kukuna ntete ya mpata munda mua bena Kristo bua kumona mua kunyanga ditabuja diabu. Mupostolo Yone wakamba bua kudimukila baprofete ba mashimi ba mu bidimu lukama bia kumpala bavua ne njiwu ya muomumue ne: ‘Bananga, kanuitabuji [mêyi onso mamba ku nyuma], kadi nutete [mêyi mamba ku] nyuma ne: nga Nzambi anyi; bualu bua baprofete ba bungi ba mashimi bakamuangalaka pa buloba.’ (1 Yone 4:1) Nunku tudi ne bua kuikala badimuke.

11. Ng’umue mushindu kayi utudi mua kuditeta munda muetu bua kumona ni tudi mu ditabuja?

¹¹ Bua muanda eu, Paulo wakafunda ne: ‘[Nutungunuke ne] kuditeta munda muenu ni nudi ne ditabuja.’ (2 Kolinto 13:5) Mupostolo Paulo wakatubela bua tutungunuke ne kuditeta munda muetu bua kujadika bituikala balamate ku malongesha onso a bena Kristo. Bituikala ne tshibidilu tshia kuteleja aba badi kabayi basue mushindu udi malu enda, tudi ne bua kudikonkonona mu masambila. (Musambu 139:23, 24) Tutuku ne tshibidilu tshia kutalula bantu ba Yehowa bilema anyi? Bituikala natshi, mbua tshinyi? Mbatubungamijeku kudi mêyi anyi bienzedi bia muntu kampanda anyi? Bikalabi nanku, tudiku tukonkonona malu mu mushindu muakanyine anyi? Dikenga dionso ditudi tupeta mu tshikondo etshi ndia ntshitupa tshîpi. (2 Kolinto 4:17) Nansha tuetu bapete lutatu kampanda mu tshisumbu, bua tshinyi kulekela disadila Nzambi? Bikala bualu kampanda butubungamije, kabienaku bitambe buimpe bua tuetu kuenza muetu muonso bua kujikija tshilumbu atshi ne kutshishiya mu bianza bia Yehowa anyi?​—Musambu 4:4; Nsumuinu 3:5, 6; Efeso 4:26.

12. Ntshilejilu kayi tshilenga tshidi bena Beloya batushile?

¹² Pamutu pa kuikala babipishi ba malu, tuikalayi tuanyisha malu atudi tupeta mu dilonga dia pa nkayetu ne mu bisangilu bia tshisumbu. (1 Kolinto 2:14, 15) Ne pamutu pa kuelesha Dîyi dia Nzambi mpata, mbitambe kuikala bia meji bua kuidikija bena Beloya ba mu bidimu lukama bia kumpala bavua bakonkonona Mukanda wa Nzambi bimpebimpe! (Bienzedi 17:10, 11) Nunku, tutumikilayi malu atudi tulonga, tuepuke nsumuinu ya dishima ne tulamate ku bulelela.

13. Mmunyi mutudi mua kufika ku ditangalaja miyuki ya dishima katuyi bamanye?

¹³ Kudi mushindu mukuabu wa nsumuinu ya dishima itudi ne bua kudimukila. Kudi tu-miyuki tuvule tudi tusankisha tudi tutangalaka misangu mivule ku diambuluisha dia E-mail (ku Internet). Mbimpe kudimukila tu-miyuki tua nunku, nangananga patudi katuyi bamanye muaba udibu batuangatshile. Nansha bikalabu batutumine bualu bumona kampanda anyi muyuki kansanga kudi muena Kristo wa kueyemena, muanetu eu uvua mua kuikala kayi mudimuene bualu ebu ne ende abidi. Ke bua tshinyi bidi ne mushinga bua kudimuka bua kubenga kuambulula anyi kutuminangana miyuki itudi katuyi bakonkonone to. Katuena basue bua kuambuluilangana ‘nsumuinu ya malu a patupu’ anyi “idi kayiyi yumvuangana ne ditabuja” nansha. (1 Timote 4:7, Muanda  Mulenga Lelu) Bu mutudi kabidi benzejibue bua kuambilangana malu malelela, netuleje meji bituepuka tshintu tshionso tshidi mua kutufikisha ku ditangalaja malu adi kaayi malelela nansha katuyi bamanye.​—Efeso 4:25.

Masanka adi afumina ku ditumikila bulelela

14. Mmasanka kayi adi afumina ku ditumikila malu atudi balonge mu Dîyi dia Nzambi?

¹⁴ Kutumikila malu atudi tulonga mu dilonga dia Bible pa nkayetu ne mu bisangilu bia bena Kristo nekutupeteshe masanka a bungi. Tshilejilu, malanda etu ne bana betu adi mua kulengela. (Galatia 6:10) Ngelelu wetu wa meji nealengele patudi tutumikila mêyi a mu Bible. (Musambu 19:8) Kabidi, patudi tutumikila malu atudi tulonga, tudi ‘tutumbisha diyisha dia Nzambi’ ne tudi mua kukoka bantu bakuabu mu ntendelelu mulelela.​—Tito 2:6-10.

15. (a) Mmunyi muakapeta nsonga mukuabu dikima dia kuyisha mu kalasa? (b) Bualu ebu mbukulongeshe tshinyi?

¹⁵ Munkantshi mua Bantemu ba Yehowa mudi bansonga bavule badi batumikila malu adibu balonge mu didilongela dia Bible ne mikanda ya bena Kristo ne mu bisangilu bia tshisumbu kabidi. Ngikadilu wabu mulenga mmushindu munene udibu bayisha balongeshi ne balongi babu mu kalasa. (1 Petelo 2:12) Angata tshilejilu tshia Leslie, nsongakaji wa bidimu 13 wa mu ditunga dia États-Unis. Udi wamba se: uvua umona bimukolele bua kuakula ne balongi babu bua ditabuja diende, kadi dimue dituku malu akashintuluka. “Balongi bavua bakula bua bantu batu basumbishangana bintu. Nsongakaji mukuabu wakela tshianza mulu ne kufilaye tshilejilu tshia Bantemu ba Yehowa.” Bu muvua Leslie muikale Ntemu, ntshinyi tshiakenzaye? Udi wamba ne: “Ngakabingisha ditabuja dianyi, ne ndi mujadike ne: bualu ebu buakakemesha balongi bonso, bualu ntu anu mupuwe mu kalasa.” Dikima dia Leslie diakapatula tshipeta kayi? Udi wamba ne: “Ngakapesha mulongi mukuabu broshire umue ne trakte umue, bualu uvua ne nkonko mikuabu.” Yehowa udi usanka bikole padi bansonga badi batumikila malu adibu balonge bapeta dikima dia kuyisha mu kalasa!​—Nsumuinu 27:11; Ebelu 6:10.

16. Mmunyi mudi Kalasa ka Mudimu wa Teokrasi kambuluishe nsonga mukuabu Ntemu?

¹⁶ Tshilejilu tshikuabu ntshia Elizabeth. Kubangila pavuaye ne bidimu muanda-mutekete ne munkatshi mua bidimu bionso bivuaye mu tshilongelu tshipuekele, nsongakaji eu uvua ubikila balongeshi babu ku Nzubu wa Bukalenge dîba dionso divuaye ne mudimu wa kuenza mu Kalasa ka Mudimu wa Teokrasi. Pavua mulongeshi nansha umue kayi upeta mushindu wa kulua, Elizabeth uvua ushala panyima pa kalasa kamane kupatuka ne umuenzela muyuki au. Mu tshidimu tshiende tshia ndekelu mu tshilongelu tshibandile, Elizabeth wakafunda mulubu wa mabeji dikumi umvuija masanka adi Kalasa ka Mudimu wa Teokrasi kapetesha, ne wakabala mulubu eu kumpala kua balongeshi banayi. Bakamulomba kabidi bua kuenza muyuki wa tshilejilu wa mu Kalasa ka Mudimu wa Teokrasi, yeye kusungula tshiena-bualu tshia se: “Bua tshinyi Nzambi mmulekele malu mabi?” Elizabeth mmupete masanka a bungi mu malongesha adibu bafila kudi Bantemu ba Yehowa mu Kalasa ka Mudimu wa Teokrasi. Elizabeth ng’umue wa ku bansonga bavule bena Kristo badi batumbisha Yehowa padibu batumikila malu adibu balonge mu Dîyi diende.

17, 18. (a) Mmibelu kayi idi Bible ufila pa bidi bitangila diamba bulelela? (b) Mmunyi muvua muntu mukuabu mukeme bua ngikadilu muimpe wa Bantemu wa Yehowa?

¹⁷ Bible udi ubela bena Kristo bua kuamba  bulelela mu malu onso. (Ebelu 13:18) Mashimi adi mua kunyanga malanda etu ne bantu bakuabu, nangananga malanda etu ne Yehowa. (Nsumuinu 12:22) Dikala dietu bantu ba kueyemena didi difila tshijadiki tshia se: tudi tutumikila malu atudi balonge, ne ndifikishe bavule ku dinemeka Bantemu ba Yehowa bikole.

¹⁸ Angata tshilejilu tshia musalayi mukuabu diende Phillip. Uvua mujimije sheke wa ku banke mutua tshiala kayi mufunda kantu nansha kamue, ne wakashala kayi mumanye bualu ebu anu pakaluabu kumutumina nende ku poste. Ntemu wa Yehowa ke uvua muangule sheke eu, ne wakamupingajilaye ne ka-mukanda kamba ne: malongesha a ntendelelu wa muntu udi muangule sheke eu ke adi mamusake bua kumupingaja. Phillip wakakema bikole. Wakamba ne: “Bavua mua kuikala bangibe dolare 9 000!” Wakabungama umue musangu pavuabu bamuibe tshifulu tshiende mu tshitanda tshia Nzambi. Bidi bimueneka ne: mumanyangana nende kampanda ke uvua muangate tshifulu atshi, pavua eku muntu uvua kayi mumumanye mumupingajile sheke uvua ne mushinga wa dolare binunu bivule! Bulelela, bena Kristo bena malu malelela badi batumbishisha Yehowa Nzambi!

Tungunuka ne kutumikila malu audi mulonge

19, 20. Mmasanka kayi atuapeta bua ditumikila malu atudi tulonga mu Mukanda wa Nzambi?

¹⁹ Aba badi batumikila malu adibu balonge mu Dîyi dia Nzambi badi bapeta masanka mavule. Muyidi Yakobo wakafunda ne: ‘Kadi udi utangila-tangila mikenji miakane tshishiki ya budishikaminyi, ne udi ushalamu, kayi muikale mumvui udi upua muoyo, kadi muikale muenji wa mudimu udi uwenza, muntu eu neikale ne disanka mu kuenza kuende.’ (Yakobo 1:25) Bulelela, tuetu tuenza malu umvuangana ne bitudi tulonga mu Mukanda wa Nzambi, netupete disanka dia bushuwa ne netupete mushindu wa kutantamena ntatu ya mu nsombelu. Tshidi nangananga ne mushinga ntshia se: Yehowa neatubeneshe ne netuikale ne ditekemena dia kupeta muoyo wa tshiendelele.​—Nsumuinu 10:22; 1 Timote 6:6.

²⁰ Nunku enza muebe muonso bua kutungunuka ne kudifila mu dilonga dia Dîyi dia Nzambi. Ikala udisangisha pa tshibidilu ne batendeledi ba Yehowa, ne ikala uteya ntema ku malu adibu balongesha mu bisangilu bia bena Kristo. Tumikila malu audi ulonga, utungunuke ne kuenza, ne ‘Nzambi wa ditalala neikale nebe.’​—Filipoi 4:9.

[Mêyi adi kuinshi]

Udi muvuluke anyi?

• ‘Tshidikijilu tshia mêyi malenga’ ntshinyi, ne mmunyi mutudi mua kutungunuka ne kutshilamata?

• ‘Nnsumuinu ya dishima’ kayi itudi ne bua kuepuka?

• Mmasanka kayi adibu bapeta kudi aba badi batumikila malu adibu balonga mu Dîyi dia Nzambi?

[Nkonko ya dilonga]

[Tshimfuanyi mu dibeji 17]

Ntshinyi tshivua bena Kristo ba kumpala mua kuenza bua kababapambuishi kudi batontolodi?

[Bimfuanyi mu dibeji 18]

Badi mua kukuna ntete ya mpata munda muetu ku diambuluisha tudiomba ne bikandakanda, Internet ne batontolodi ba lelu

[Tshimfuanyi mu dibeji 19]

Ki mbia meji bua kutangalaja malu atudi katuyi bakonkonone to

[Bimfuanyi mu dibeji 20]

Ku mudimu, mu kalasa ne miaba mikuabu, Bantemu ba Yehowa badi batumikila malu adibu babala mu Dîyi dia Nzambi