‘Udi undombola pepi ne mâyi adi talalaa’

MU MATUNGA a luya adibu batele mu Bible, mikoko idi dijinga ne kunua mâyi matuku onso. Pa nanku, mulami wa mikoko udi ne mudimu munene wa kukebela mikoko yende mâyi. Misangu mikuabu balami batu banuisha mikoko mâyi ku tshina tshia mâyi. Batu bela mâyi mu bintu bua mikoko inue. (Genese 29:1-3) Kadi, nangananga mu tshikondo tshia mvula, kumpenga kua tusulu tukese kutu miaba mitalale ya “kuikishila.”​—Musambu 23:2, Mukenji Mulenga.

Mulami muimpe udi ne bua kumanya miaba idi mâyi ne mpata mikumbane bua mikoko yende. Padi mulami mumanye bimpe tshitupa tshia buloba kampanda, mikoko kayakukenga to. Davidi (uvua mupitshishe bidimu bia bungi mu mudimu wa dilama mikoko mu tukunakuna tua mu Yudeya) wakafuanyikija mushindu udi Nzambi ulombola bantu mu nyuma ne udi mulami wa mikoko ulombola mikoko yende ku mâyi ne mu mpata mimpe. Wakamba ne: ‘Udi undombola pepi ne mâyi adi talalaa.’​—Musambu 23:1-3.

Panyima pa bidimu, ku butuangaji bua muprofete wende Yehezekele, Yehowa wakenza mudimu ne mufuanu wa muomumue. Wakalaya bua kukunguija bantu bende mu matunga muvuabu babatangalaje, anu bu mutu mulami ukunguija mikoko yende. Yehowa wakabajadikila ne: ‘Nembapatule nendue nabu mu buloba buabu; nembadishe pa mikuna ya mu Isalele, pepi ne mishimi ya mâyi.’​—Yehezekele 34:13.

Yehowa Nzambi udi kabidi uditatshisha bikole bua kufila mâyi a mu nyuma. Mukanda wa Buakabuluibua udi wakula bua ‘musulu wa mâyi a muoyo’ udi upatukila ku nkuasa wa bumfumu wa Nzambi. (Buakabuluibua 22:1) Badi babikila bantu bonso bua kunua mâyi ku musulu eu, babambila ne: ‘Udi musue, angate mâyi a muoyo tshianana.’​—Buakabuluibua 22:17.

Mâyi a mu tshimfuanyi aa adi aleja malu adi Nzambi mulongolole bua bantu kumonabu mua kupeta muoyo wa kashidi. Muntu yonso udi mua kutuadija kunua mâyi aa padiye ubanga kulonga mua ‘kumanya Nzambi umuepele mulelela, ne yeye wakatumaye, Yezu Kristo.’​—Yone 17:3.