Bansonga badi banange bulelela

KUKADI bidimu bipite pa 2 400, mufundi wa Misambu kampanda (muena Ebelu) wakakonka ne: ‘Nsongalume nealengeje bienzedi biende munyi?’ (Musambu 119:9) Lukonko elu lutshidi anu ne mushinga nansha ne mu matuku etu aa bualu bansonga badi bapetangana ne ntatu ya bungi lelu’eu. Buendenda budi bufikisha bansonga ba bungi ku dipia disama dia SIDA ne tshia bibidi tshia aba badi bakuatshike disama edi dibiadibi badi munkatshi mua bidimu 15 ne 24. Dinua dia bintu bidi bikuata bu mfuanka wa diamba didi padi dituala ntatu ya bungi, difikisha bansonga ba bungi ku lufu lua tshikoso. Mijiki mibi; filme ya bantu baluangana ne benda tshiendenda, bindidimbi bia ku televizion ne ku video; bimfuanyi bia bantu kabayi bilamba ku Internet bidi binyanga bansonga. Ke bualu kayi, lukonko luakela mufundi wa Misambu ludi ne mushinga wa bungi lelu’eu kudi baledi ne bansonga.

Bua kuandamuna lukonko luende nkayende luvuaye mujule elu, mufundi wa Misambu au wakamba ne: ‘Adimuke biende bu mudi dîyi diebe diamba.’ Bushuwa, Dîyi dia Nzambi didi diludika bansonga bimpe ne padi bansonga balonda mibelu idimu, ba bungi badi bapeta diakalenga mu nsombelu wabu. (Musambu 119:105) Tuanjayi kukonkonona bimue bilejilu bia bansonga badi banange Nzambi ne badi badienzeja bua kushala bakole mu nyuma mu buloba ebu budi bûle tente ne dikeba dia masanka ne dia bintu.

Badi banyisha buludiki bua baledi

Jacob Emmanuel uvua mpanda-njila wa ku dîba ne ku dîba kumpala kua kutuadijaye kuenza mudimu ku biro bia Bantemu ba Yehowa bidi mu ditunga dia Mexique. Udi uvuluka ne dianyisha ku muoyo mushindu uvua dinanga diende dia mudimu wa Nzambi didiunde wamba ne: “Baledi banyi ke bavua ba kumpala mu dinsaka bua mudimu eu nansha muvua bana betu bakuabu bakole mu nyuma bamvua mudie nabu bulunda bangambuluishe pabu bikole. Bakanfikisha ku dinanga mudimu wa kuamba lumu luimpe bikole. Bavua bandombola ne bulenga buonso mu njila muakane; tshituku muanji kudiumvua bu bavua bangenzeja malu ku bukole to.”

David (ukadi ne bidimu bia bungi mu mudimu wa ku dîba ne ku dîba) udi uvuluka mushindu uvuabi bimulenge ku muoyo pavua baledi bende batuadije mudimu wa bumpanda-njila bua pa buabu yeye ne muanabu wa balume batshikale batekete. Pakafua tatuende, mamuende wakatungunuka ne kuikala mpanda-njila wa pa buende. Uvua anu ubatabalela nansha muvuaye ne mudimu wa kuamba kua lumu luimpe. David udi wamba ne: “Kabavuaku bangenzeje nansha dituku dimue bua kulua mpanda-njila to, kadi bu mutuvua tumona masanka a bungi patuvua tuenza mudimu eu mu dîku, muoyo wanyi wakansaka bua kuwenza.” David wakamba bua mushinga mukole udi nawu buludiki ne ditabalela dimpe dia baledi ne: “Mamu uvua utubadila miyuki ya mu mukanda wa Du paradis perdu au paradis reconquis * butuku buonso. Mushindu uvuaye utulondela miyuki eyi wakatuambuluisha bua kunanga biakudia bia mu nyuma.”

Dianyisha dia bisangilu

Bitu bikolele bansonga bakuabu bua kuanyisha bisangilu bia bena Kristo. Badi babuelamu anu bualu baledi babu badi bayamu nabu. Kadi, bu buobu mua kutungunuka ne dibuela mu bisangilu, nekufike tshikondo tshidibu mua kulua kunanga bisangilu. Angata tshilejilu tshia Alfredo, wakabangisha mudimu wa ku dîba ne ku dîba mutshikale ne  bidimu 11. Udi wamba ne: patshivuaye ne bidimu bu bitanu nanku, uvua ukeba kubenga bua kubuela mu bisangilu bualu uvua ubungilamu kadi eku baledi bende kabayi bamulekela bua kulalaye to. Udi ulonda ne: “Pamvua ngenda nkola, ngakalua kunanga bisangilu kakese kakese, nangananga pangakamanya kubala ne kufunda bualu nkavua mfila mandamuna mu miaku yanyi nkayanyi.”

Cintia (nsongakaji wa bidimu 17 udi mpanda-njila wa pa tshibidilu) udi uleja muvua kudia malanda ne bantu ba ngikadilu mimpe kumuambuluishe bikole bua kunanga mudimu wa Nzambi. Udi wamba ne: “Malanda mimpe ne bana betu ne dibuela mu bisangilu pa tshibidilu biakangambuluisha bua balunda banyi bavua kabayi Bantemu kabikadi bansamina muoyo ne nansha malu atu bansonga ba bungi banange bikole, tshilejilu kuya miaba ya dijila maja anyi mu bare. Diteleja mandamuna ne malu avua bakuabu bamone avuabu balondelangana mu bisangilu bia tshisumbu biakajula munda muanyi dijinga dia kupesha Yehowa bianyi bionso bimvua nabi ne ndi ngela meji ne: tshianyi tshia mushinga menemene tshindi natshi mbunsonga buanyi. Ke bualu kayi, ngakangata dipangadika dia kuenza mudimu wende mu bunsonga buanyi.”

Kadi, udi wamba ne: “Kuvua tshikondo tshikuabu (kumpala kua meme kutambula) tshimvua mpumbisha bisangilu kakuyi bualu, ngamba bia mafi ne: ndi ne midimu ya mu kalasa ya kuenza kumbelu anyi ne: ndi ne malu makuabu a mu kalasa a kuenza. Ngakapumbisha bisangilu bia bungi ne bualu ebu buakabanga kunyanga nsombelu wanyi wa mu nyuma. Ngakatuadija kuendakana ne nsongalume kampanda uvua kayi ulonga Bible. Ku diambuluisha dia Yehowa, ngakalua kulekela malu au.”

Dipangadika dia muntu pa nkayende

Pakebejabu Pablo (nsonga udi wenzela Yehowa mudimu ku dîba ne ku dîba) bua aleje tshintu tshia mushinga mukole tshidi mua kuambuluisha muntu bua kukolesha dinanga dia Dîyi dia Nzambi, wakamba ne: “Ndi ngela meji ne: kudi malu abidi: didilongela dia pa tshibidilu ne tshisumi mu mudimu wa kuyisha. Ndi ngela baledi banyi tuasakidila bua mudibu bandongeshe bulelela bua Yehowa, ne ndi ngela meji ne: kakuena tshintu tshikuabu tshia mushinga tshivuabu mua kungezela kupite dindongesha bulelela didibu bandongeshe edi to. Nansha nanku, bidi bikengela bua meme nkayanyi ntuishibue ne ngikale mumanye bua tshinyi ndi munange Yehowa. Nanku bua tuetu kutuishibua bidi bikengela kumanya ‘butshiama ne bondoke’ bua malongesha malelela a mu Bible. Anu tuetu benze nunku ke tuetu kumvua dinanga dikole dia Dîyi dia Yehowa, didi diela ‘kapia kadi kosha’ munda muetu bua tuambile bakuabu Dîyi edi. Tshisumi tshia mudimu wa kuyisha atshi netshikoleshe dianyisha dietu bua bulelela bikole.”​—Efeso 3:18; Yelemiya 20:9.

Jacob Emmanuel (utukadi batele) udi pende uvuluka mudibi ne mushinga bua muntu kudisunguilaye nkayende bua kusadila Yehowa. Wakamba ne: baledi bende kabavua bamuele mutoyi bua ne: atambule nansha. “Ndi ngela meji ne: ke tshivua tshimpe tshia kuenza bualu mpindieu ndi mmona bipeta bilenga bia bualu ebu. Tshilejilu, bansonga kampanda bamvua mudie nabu bulunda bikole bakangata dipangadika dia kutambula bonso diatshimue. Nansha muvua bualu ebu buimpe, ngakamona ne: bakuabu bavua batambule anu bualu bavua bamone bakuabu batambule; kadi matuku makese panyima, tshisumi tshiabu bua midimu  ya Bukalenge tshiakakepela. Buanyi meme, baledi kabavua bangenzeje ku bukole bua kuangata dipangadika dia kudilambula kudi Yehowa to. Ngakangata dipangadika adi meme nkayanyi.”

Mudimu wa tshisumbu

Bansonga bakuabu mbalonge bulelela bua Dîyi dia Nzambi mu buobu nkayabu, kakuyi diambuluisha dia baledi babu to. Ki mbualu bupepele mu nsombelu ya nunku bua kulonga bua kuenza tshidi tshimpe ne kunanukila mu ditshienza to.

Noé udi uvuluka mushindu udi bulelela bumuambuluishe. Uvua muntu wa tshiji tshikole ne wa tshikisu katshia ku buana buende. Pakabangaye kulonga Bible ne bidimu 14, ngikadilu wende kubangishaye kushintuluka, ne baledi bende bavua kabayi basankidila dilonga diende dia Bible tshine tshikondo atshi kuanyishabu dishintuluka edi bikole. Pakakola Noé mu nyuma, wakajinga kuenzela Nzambi mudimu bikole. Udi mpindieu mu mudimu wa ku dîba ne ku dîba.

Bia momumue, Alejandro wakabanga kuteya ntema ku bulelela bua Buena-Kristo patshivuaye mupuekele menemene, nansha muvuabu kabuyi bulenga mutshima wa baledi bende. Udi uleja dianyisha diende bua bulelela wamba ne: “Ntu mukolele mu dîku dia bena Katolike. Kadi, bu muvua Ekeleziya Katolike kayi wandamuna nkonko ivua indubakaja katshia ku buana, ngakabanga kuitaba dilongesha dia ne: Nzambi katuku didi bena Kominisme balongesha. Bulongolodi bua Yehowa buakangambuluisha bua kupeta dimanya dia Nzambi. Buakampandisha mene bualu bu meme tshiyi mulonge Bible, mvua mua kuikala mubuelakane mu buendenda, dikuatshika dia maluvu makole anyi mu dinua dia bintu bitu bikuata bu diamba. Mvua nansha mua kuikala mubuelakane ne bisumbu bia bantombonji bifuana kunkebela diakabi.”

Mmushindu kayi udi nsonga mua kutungunuka ne kukeba bulelela ne kushala mubulamate kakuyi diambuluisha dia baledi bende? Kabiyi mpata, bakulu ne bantu bakuabu mu tshisumbu badi ne mudimu munene udibu bakuata. Noé udi wamba ne: “Tshitu muanji kudiumvua nkayanyi, bualu Yehowa utu anu pabuipi nanyi dîba dionso. Bana betu ba balume ne ba bakaji bakavua balue bu batatu, bu bamamu, bu bakulu ne bu bakunyi banyi ba mu nyuma, bakangambuluisha pabu ne dinanga dionso.” Noé udi wenza mpindieu mudimu ku Betele ne ukuata mudimu ne dîba didiye nadi mu mudimu wa Nzambi. Bia muomumue, Alejandro udi wamba ne: “Tshintu tshikuabu tshintu tshiyi mua kupua muoyo bua kuleja dianyisha ntshia ne: ngakapeta diakalenga dia kuikala mu tshisumbu muvua bakulu bannange ne bantabalela bikole. Ndi kabidi ne dianyisha dia pa buadi dia muanda eu bualu pangakatuadija kulonga Bible ne bidimu 16, ntshivua mu lukutukutu lutu nalu bansonga. Mêku a mu tshisumbu kaakandekela nansha. Kuvuaku anu muntu kampanda uvua umbikila kuende, ne pa kumbusha mu nzubu muvuaye ungakidila ne biakudia bivuaye umpesha, uvua kabidi undeja dinanga dia mu mutshima wende.” Alejandro ukadi mpindieu ne bidimu bipite pa 13 mu mudimu wa ku dîba ne ku dîba.

Bantu bakuabu batu bela meji ne: malu a ditendelela mmatangile anu bantu bakole. Kadi, bansonga ba bungi mbalonge Bible batshikale bapuekele ne mbafike ku dinanga Yehowa ne kushala bamulamate. Mêyi a Davidi adi mu Musambu wa 110:3 aa mmakumbanyine bansonga aba: ‘Bantu bebe badi badifila kuudi ne disanka mu dituku diudi ukunguija misumba ya masalayi ebe. Bansongalume bebe badi balua kuudi bu mume, baluate biabo bilenga bia tshijila, bapatuke munda mua lunkelu.’

Bua bansonga kulongabu bulelela ne kushalabu babulamate bikole, bidi bikengela badienzeje ne tshisumi tshionso. Ndisankapu kayi ditudi nadi pa kumona bavule bashala balamate bulongolodi bua Yehowa, babuela mu bisangilu pa tshibidilu ne balonga Bible ne tshisumi! Mu dienza nunku, mbafike ku dinanga Dîyi dia Nzambi ne mudimu wende bikole.​—Musambu 119:15, 16.

[Mêyi adi kuinshi]