Bamanyishi ba Bukalenge badi balonda

Mundadi bua kuleja mudibu banyishe Nzubu wa Bukalenge

TSHIBAMBALU tshia malu a mitshi ne mêtu tshia mu ditunga dia Finlande tshiakasungula tshidimu tshia 2000 bu “Tshidimu tshia dilengeja miaba idi bantu.” Umue wa ku bantu bavua balongolole muanda eu wakamba ne: “tshipatshila tshia tshiena-bualu tshia tshidimu etshi ntshia kutuvuluija tuetu bonso mudimu udi nawu bisonsa ne mitshi idi mitunyunguluke mu nsombelu wetu wa matuku onso ne diambuluisha didibi nabi bua diakalenga dietu.”

Mu dia matuku 12 a ngondo wa kumpala mu 2001, mukanda mufumine ku Bulongolodi bua mu ditunga dia Finlande bua malu a dilengeja miaba idi bantu, wakafika ku biro bia filiale bia Bantemu ba Yehowa bidi mu ditunga edi. Bavua bumvuije mu mukanda eu ne: Nzubu wa Bukalenge wa Bantemu ba Yehowa wa mu tshimenga tshia Tikkurila mmupete umue wa ku mindadi ya tshidimu tshia dilengeja miaba idi bantu bualu nzubu eu uvua mulengeja tshileya, mulengeja bimpe menemene ne bilongo ne mitshi biakaja bimpe be. Mukanda eu wakumvuija kabidi ne: “lupangu luonso lua Nzubu wa Bukalenge eu luvua luimpe kumona, lulongolola ne mankenda mu mvula ne mu mushipu.”

Bantemu ba Yehowa bakapeta mundadi eu ku Rosenda, nzubu wa tshilala benyi, mu tshimenga tshia Tampere (mu Finlande), kumpala kua bena mudimu ne bangenda 400 mijima. Bulongolodi ebu buakenzeja dimanyisha mu bikandakanda ne mu bimuangalaji bikuabu bia ngumu. Dimanyisha adi divua diamba ne: “Mu miaba mishilangane ya mu ditunga, Nzubu ya Bukalenge ya Bantemu ba Yehowa, pamue ne yonso itu milengeja tshileya, milongolola tshitoko. Mushindu utubu balongolola mpangu yabu utu ukoka ntema ya bapitshi ba njila pabuipi ne bonso. Nzubu wa Bukalenge wa mu Tikkurila udi tshilejilu tshimuepele patupu tshia lupangu lulenga mudi bilongo ne mitshi. Nzubu eu ne lupangu elu bidi bileja bupole ne dibenga kunekesha malu.”

Mu Finlande mudi Nzubu ya Bukalenge 233, ya bungi mikale ne mpangu ya bilongo ne mitshi milengeja bimpe bia menemene. Kadi, miaba eyi mmimpe anu bualu yoyi ke mpuila-mambu anyi miaba minene ya ntendelelu mulelela ne idibu balongeshila Bible. Bua Bantemu ba Yehowa bapite pa miliyo isambombo badi pa buloba bujima, Nzubu wa Bukalenge (nansha yeye mulengeja menemene anyi bikese) mmuaba udibu banange bikole. Ke bua tshinyi badi batabalela nzubu eyi bimpe ne muoyo mujima. Biibi bia Nzubu yetu ya Bukalenge mbiunzulula bua bantu bonso ba muaba uudi musombele.