Tuikalayi ne butumike bualu nshikidilu ukadi pabuipi

“Bantu bonso [nebatumikile Shilo].”​—GENESE 49:10.

1. (a) Kutumikila Yehowa kuvua misangu mivule kumvuija tshinyi pa kale? (b) Mmulayi kayi uvua utangila butumike wakamanyisha Yakoba?

 KUTUMIKILA Yehowa kuvua misangu mivule kumvuija kutumikila baleji-mpala bende. Munkatshi mua baleji-mpala aba muvua banjelu, bankambua, balumbuluishi, baprofete ne bakalenge. Bavua mene babikila nkuasa wa bakalenge ba mu Isalele ne: nkuasa wa Yehowa. (1 Kulondolola 29:23) Kadi bia dibungama, ba bungi ba ku bakokeshi ba mu Isalele kabakatumikila Nzambi to, e kudikebela buobu nkayabu makenga, kuakebelabu kabidi ne bantu bavuabu bakokesha. Kadi Yehowa kakalekela bena lulamatu bende kabayi ne ditekemena to; wakabakolesha ku muoyo ne mulayi uvua wakula bua diteka Mukalenge uvua kayi ne malu mabi, uvua bantu bakane ne bua kutumikila ne disanka. (Yeshaya 9:6, 7) Nkambua Yakoba ukavua ne mikolo ku tshina wakamanyisha bua mukokeshi au uvua ne bua kulua, wamba ne: ‘Dikombo dia bukalenge kadiena diumuka kudi Yuda, tshibangu tshia bukokeshi katshiena tshiumuka pankatshi pa makasa ende too ne palua Shilo, ne bantu bonso [nebamutumikile].’​—Genese 49:10.

2. “Shilo” udi umvuija tshinyi, ne bukokeshi buende buvua ne bua kuikala too ne ku mutu kua banganyi?

² “Shilo” mmuaku wa mu tshiena-Ebelu udi umvuija ne: “Yeye Udi Muenatshi.” Bulelela, Shilo uvua ne bua kupiana bukenji bua tshishiki bua kukokesha budi buleja mu tshimfuanyi kudi dikombo, ne bukole bua kutuma dîyi budi buleja mu  tshimfuanyi kudi tshibangu. Kabidi, bukokeshi buende kabuvua ne bua kuikala anu ku mutu kua ndelanganyi ya Yakoba nkayayi to, kadi buvua ne bua kuikala ku mutu kua “bantu bonso.” Bualu ebu budi bupetangana ne mulayi uvua Yehowa mumanyishe Abalahama ne: ‘Kankanunuina kebe nekapiane biibi bia bantu badi naku lukuna; bisamba bionso bia pa buloba [nebidibeneshe] bualu bua kankanunuina kebe.’ (Genese 22:17, 18) Yehowa wakaleja eu uvua ne bua kuikala “kankanunuina” aka mu tshidimu tshia 29 mu bikondo bietu ebi pakelaye Yezu wa mu Nazaleta manyi a nyuma muimpe.​—Luka 3:21-23, 34; Galatia 3:16.

Bukalenge bua kumpala bua Yezu

3. Mbukokeshi kayi buakapeta Yezu pakabandaye mu diulu?

³ Pakabanda Yezu mu diulu, kakangata diakamue dikombo dia bukalenge bua kukokesha bantu bonso ba pa buloba to. (Musambu 110:1) Kadi wakapeta ‘bukalenge’ buvua ne bantu bavua bamutumikila. Mupostolo Paulo wakaleja bukalenge abu pakafundaye ne: ‘[Nzambi] wakatupandisha [bena Kristo bela manyi a nyuma] ku bukokeshi bua mîdima, wakatubueja mu bukalenge bua Muana wa dinanga diende.’ (Kolosai 1:13) Dibapandisha edi diakatuadija mu Pentekoste wa mu 33 mu bikondo bietu ebi pakitshikijilabu bayidi ba Yezu ba lulamatu nyuma muimpe.​—Bienzedi 2:1-4; 1 Petelo 2:9.

4. Mmu malu kayi muvua bayidi ba Yezu ba kumpala baleje butumike buabu, ne mmunyi muakababikila Yezu bonso mu tshibungi?

⁴ Bu mudibu ‘milopo bua bualu bua Kristo,’ bayidi bela manyi a nyuma bakaleja butumike pakatuadijabu kusangisha bantu bakuabu bavua mua kulua “bena kuabo” mu bukalenge abu bua mu nyuma. (2 Kolinto 5:20; Efeso 2:19; Bienzedi 1:8) Kabidi, bela manyi aba bavua ne bua kushala ‘bakajibue tshishiki mu meji amue ne mu lungenyi lumue’ bua kupetabu dianyisha dia Mukalenge wabu Yezu Kristo. (1 Kolinto 1:10) Bonso mu tshibungi bavua benza “mupika wa lulamatu ne wa budimu,” anyi kasumbu ka mulami wa lulamatu.​—Matayo 24:45, NW; Luka 12:42.

Babenesha bua ditumikila “mulami” wa Nzambi

5. Mmunyi mudi Yehowa mulongeshe bantu bende katshia mu bikondo bia kale?

⁵ Yehowa utu anu upesha tshisamba tshiende balongeshi. Tshilejilu, kunyima kua bena Yuda bamane kufuma mu Babulona, Ezela ne balume bakuabu bapie kabavua anu babadila bantu Mikenji ya Nzambi patupu to, kadi bavua ‘bandamuna’ mikenji ayi ne ‘bumvuija’ Dîyi dia Nzambi divuabu babala.​—Nehemiya 8:8, MMM.

6, 7. Mmunyi mudi kasumbu ka mupika kafile biakudia bia mu nyuma mu tshikondo tshiakanyine ku diambuluisha dia Kasumbu kaku Kaludiki, ne bua tshinyi mbimpe kukokela kasumbu ka mupika?

⁶ Mu bidimu lukama bia kumpala, pakajuka tshilumbu tshia ditengula mu tshidimu tshia 49 mu bikondo bietu  ebi, kasumbu kaludiki ka mupika au wa ntuadijilu kakakonkonona tshilumbu atshi mu masambila ne kakafika ku diangata dipangadika dishindamene pa Mukanda wa Nzambi. Pakamanyishabu dipangadika diabu mu mukanda wakafundabu, bisumbu biakatumikila mibelu ivuabu bafilemu ne biakapeta mabenesha mavule a kudi Nzambi. (Bienzedi 15:6-15, 22-29; 16:4, 5) Ke mudibi kabidi lelu, ku diambuluisha dia Kasumbu Kaludiki, mupika wa lulamatu mmufile mumvuija matoke pa malu a mushinga bu mudi tshilumbu tshia ndubidilu wa bena Kristo (anyi dibenga kubuelakana mu malu a mvita), bunsantu bua mashi ne dinua dia diamba ne mfuanka. (Yeshaya 2:4; Bienzedi 21:25; 2 Kolinto 7:1) Yehowa wakabenesha bantu bende bua ditumikila Dîyi diende ne mupika wa lulamatu.

⁷ Padi bantu ba Nzambi bakokela kasumbu ka mupika, badi kabidi baleja ne: badi bakokela Mfumu Yezu Kristo. Dikokela edi ndilue kupeta diumvuija dikuabu mu bikondo bietu ebi bualu Yezu udi ne bukokeshi bunene, anu muvua Yakoba ukavua ne mikolo ku tshina mumanyishe mu mulayi.

Shilo udi ulua Mukokeshi muakane wa buloba

8. Mmunyi ne ndîba kayi diakalabala bukokeshi bua Kristo?

⁸ Mulayi wa Yakoba wakamanyisha ne: Shilo ke uvua “bantu bonso [ne bua kutumikila].” Bulelela, bukokeshi bua Kristo kabuvua ne bua kushikidila anu pa Isalele wa mu nyuma to. Buvua ne bua kufikila too ne penyi? Buakabuluibua 11:15 udi wandamuna ne: ‘Bukalenge bua pa buloba buakulua bukalenge bua Mukalenge wetu, ne bua Kristo wende, ne yeye neakokeshe too ne tshiendelele.’ Bible udi uleja ne: Yezu wakapeta bukokeshi abu ku ndekelu kua “[bikondo] muanda mutekete” bia tshiprofete bidi bikale “tshikondo [tshijadika] tshia bantu ba bisamba bia bende,” mu tshidimu tshia 1914. * (Danyele 4:16, 17; Luka 21:24) Mu tshidimu atshi ke muakatuadija “dikalaku” dia Kristo mu bumfumu kayi umueneka ne mêsu muikale Masiya Mukalenge, ne ke muakatuadija kabidi tshikondo tshivuaye ne bua ‘kukokesha munkatshi mua badi nende lukuna.’​—Matayo 24:3, NW; Musambu 110:2.

9. Ntshinyi tshiakenza Yezu pakangataye Bukalenge, ne ntshinyi tshidi bualu ebu bukebele bukua-bantu, nangananga bayidi bende?

⁹ Bualu bua kumpala buakenza Yezu kunyima kua bobu bamane kumupesha bukokeshi buvua bua kuimansha Satana ntunga-mulongo wa bupidia pamue ne ba-demon bende ‘pa buloba.’ Katshia anu pinapu, nyuma mibi eyi mmikebele bukua-bantu makenga a katshia ne katshia, ne mmikebeshe nsombelu udi muvuije ditumikila Yehowa bualu bukole. (Buakabuluibua 12:7-12; 2 Timote 3:1-5) Bushuwa, bantu badi Satana mutambe kutua mutu mu mvita yende ya mu nyuma eyi mbela manyi ba Yehowa, ‘badi batumikila mikenji ya Nzambi, ne badi ne bumanyishi bua Yezu,’ ne balunda babu “mikoko mikuabo.”​—Buakabuluibua 12:17; Yone 10:16.

10. Ndikumbana dia milayi kayi ya mu Bible didi ditupesha tshijadiki tshia se: mvita ikala Satana mua kuela bena Kristo balelela neipangile?

¹⁰ Kadi Satana udi ne bua kupangila, bualu edi ‘ndituku dia Mukalenge,’ ne kakuena tshintu tshidi mua kupangisha Yezu bua “kutshimuna kabidi”  nansha. (Buakabuluibua 1:10; 6:2, MMM) Tshilejilu, neenze bua bena Isalele wa mu nyuma 144 000 batuibue tshitampi tshia ndekelu. Neakube kabidi “musumba munene wa bantu, bungi budi muntu kayi mua kubala, ba bisamba bionso, ba bisa bionso, matunga ne miakulu yonso.” (Buakabuluibua 7:1-4, 9, 14-16, MMM) Buobu aba kabakuikala bu balunda babu bela manyi to, kadi nebalue bena butumike bikalabu mua kukokesha kudi Yezu pa buloba. (Danyele 7:13, 14) Dikala diabu pa buloba lelu didi difila tshijadiki tshinene tshia se: Shilo udi bushuwa Mukokeshi mu ‘bukalenge bua pa buloba.’​—Buakabuluibua 11:15.

Mpindieu ke tshikondo tshia ‘kutumikila lumu luimpe’

11, 12. (a) Mbanganyi nkayabu bapanduka ku nshikidilu wa tshikondo etshi tshibi? (b) Nngikadilu kayi idibu badima kudi aba badi bapeta ‘nyuma wa pa buloba’?

¹¹ Bonso badi basue kupeta muoyo wa tshiendelele badi ne bua kulonga butumike, bualu Bible udi wamba patoke ne: ‘bantu badi kabayi bamanye Nzambi ne badi kabayi batumikila lumu luimpe lua Mukalenge wetu Yezu’ kabakupanduka palua dituku dia disombuela dia Nzambi to. (2 Tesalonike 1:8) Kadi, nsombelu mubi ne lungenyi lua ditombokela mikenji ya mu Bible bidiku lelu bidi bivuija ditumikila lumu luimpe bualu bukole.

¹² Bible udi ubikila lungenyi elu lua ditombokela Nzambi ne: ‘nyuma wa pa buloba.’ (1 Kolinto 2:12) Mupostolo Paulo wakumvuija tshidi nyuma eu wenzela bantu pakafundilaye bena Kristo bena Efeso ba mu bidimu lukama bia kumpala ne: ‘Nuakendakana diambedi bu mudi tshikondo tshia buloba ebu, bu mudi mukalenge wa bukokeshi bua mu lupepele, wa nyuma udi wenzeja katataka munkatshi mua bana ba bupidia. Tuetu kabidi tuakikala munkatshi muabu diambedi, tuakalonda nkuka ya mibidi yetu, tuakalonda malu akadi mibidi yetu ne meji etu bisue, tuakaledibua bena lukuna bu mudi bakuabu.’​—Efeso 2:2, 3.

13. Mmunyi mudi bena Kristo mua kukandamena bimpe nyuma wa pa buloba, ne mmasanka kayi adibu mua kupeta?

¹³ Diakalenga, bena Kristo bena Efeso kabakashala bapika ba nyuma au wa bupidia to. Kadi bakalua bana ba Nzambi ba butumike pakakokelabu nyuma wende ne pakakuamabu mamuma ende malenga mavule. (Galatia 5:22, 23) Ke mudibi kabidi lelu, nyuma wa Nzambi eu udi muikale bukole butambe onso udi wambuluisha bantu miliyo mivule bua kutumikila Yehowa, ke tshidi tshibafikisha ku dipeta ‘tshiuwidi tshia ditekemena too ne ku nshikidilu.’​—Ebelu 6:11; Zekâya 4:6.

14. Mmunyi muvua Yezu mudimuije bena Kristo bonso badi ne muoyo mu matuku a ku nshikidilu bua amue malu masunguluke avua mua kuela butumike buabu mu diteta?

¹⁴ Ikala mumanye kabidi ne: badi batukuatshisha bikole kudi Shilo, yeye ne Tatuende kabakulekela baluishi (nansha buobu ba-demon anyi bantu) bateta butumike buetu mu mushindu utudi katuyi mua kutantamena nansha. (1 Kolinto 10:13) Bushuwa, bua kutuambuluisha mu mvita yetu ya mu nyuma eyi, Yezu wakatela ndambu wa ntatu misunguluke itudi mua kupeta mu matuku a ku nshikidilu aa. Wakaleja ntatu eyi mu mikanda muanda-mutekete yakapeshaye mupostolo Yone mu bikena-kumona. (Buakabuluibua 1:10, 11) Bushuwa, mikanda eyi ivua ne mibelu mimpe menemene bua bena Kristo ba mu tshikondo atshi, kadi idi ne mushinga mu ‘dituku dia Mukalenge’ ditudi edi, diakatuadija mu 1914. Nunku mbimpe bua tuetu kuteya ntema ku mikenji eyi! *

Tuepukayi kalengu, tshiendenda ne lukuka lua biuma

15. Bua tshinyi tudi ne bua kudimukila bualu buakafikila tshisumbu tshia mu Efeso, ne mmunyi mutudi mua kubudimukila? (2 Petelo 1:5-8)

¹⁵ Mukanda wa kumpala wa Yezu uvua mutumina tshisumbu tshia mu Efeso. Kunyima kua yeye mumane kuela tshisumbu atshi kalumbandi bua ditantamana diatshi, Yezu wakamba ne: ‘Kadi ndi nebe bualu ebu ne: wakalekela dinanga diebe dia kumudilu.’ (Buakabuluibua 2:1-4) Lelu, bamue bavua kumpala bena Kristo ba lukunukunu mbajimije pabu dinanga dikole divuabu nadi kudi Nzambi diambedi. Dijimija dia dinanga edi didi mua kutekesha malanda adi muntu mudie ne Nzambi, ne bidi bikengela kulongolola tshilumbu etshi ne lukasa. Mmunyi mutudi mua kukolesha dinanga edi tshiakabidi? Mmu dilonga Bible, dibuela mu  bisangilu, dienza masambila ne dielangana meji pa tshibidilu. (1 Yone 5:3) Bulelela, malu aa adi alomba “disuminyina dionso,” ne bidi ne mushinga bua kuenza. (2 Petelo 1:5-8) Wewe mudikonkonone ne muoyo mujima ne mumone se: dinanga diebe ndikuate mashika, longolola muanda au pa lukasa bua kutumikila mubelu wa Yezu wa se: ‘Uvuluke kuwakupona, ukudimune mutshima webe, ne enza midimu ya kumudilu.’​—Buakabuluibua 2:5.

16. Mmalu kayi avua ne njiwu ya mu nyuma avuaku mu tshisumbu tshia Pêgamo ne tshia Tuatila, ne bua tshinyi mêyi avua Yezu muambile bisumbu ebi adi ne mushinga lelu?

¹⁶ Yezu wakela bena Kristo ba mu Pêgamo ne ba mu Tuatila kalumbandi bua lulamatu, ditantamana ne lukunukunu luabu. (Buakabuluibua 2:12, 13, 18, 19) Nansha nanku bavua babanyange kudi bamue bantu bavua ne lungenyi lubi lua Belâma ne lua Izebele, bantu bakasaka bena Isalele wa kale mu tshiendenda tshia masandi ne mu ntendelelu wa Bâla. (Nomba 31:16; 1 Bakelenge 16:30, 31; Buakabuluibua 2:14, 16, 20-23) Kadi netuambe tshinyi bua tshikondo tshietu etshi tshidi mu ‘dituku dia Mukalenge’? Malu mabi a muomumue adiku amueneka anyi? Eyowa, bualu tshiendenda tshia masandi ke tshidi tshitamba kuipatshishangana munkatshi mua bantu ba Nzambi lelu. Ke bualu kayi bidi ne mushinga bua tuetu kuepuka malunda ne bantu bonso badi ne bikadilu bibi, nansha buobu munda anyi pambelu pa tshisumbu! (1 Kolinto 5:9-11; 15:33) Aba badi basue kuikala bena butumike bakokeshabu kudi Shilo badi pabu ne bua kuepuka manaya mabi ne ditangila ta dibala malu a tshiendenda mu mikanda anyi ku TV (peshi ku Internet).​—Amosa 5:15; Matayo 5:28, 29.

17. Mmunyi muvua ngikadilu wa bena mu Sâdi ne mu Laodikiya upetangana ne tshivua Yezu muambe bua nsombelu wabu wa mu nyuma?

¹⁷ Yezu kakela tshisumbu tshia mu Sâdi kalumbandi nansha kakese, pa kumbusha anu bantu babala ku minu. Tshisumbu etshi tshivua ne “dina” anyi tshimuenekelu tshia muntu udi ne muoyo, kadi bua mushindu uvuatshi tshidine mu kalengu ka mu nyuma, ku mêsu kua Yezu tshivua ‘tshifue.’ Ditumikila diatshi dia lumu luimpe divua dia tshidingishilu. Nditshiela patoke dia mushindu kayipu edi! (Buakabuluibua 3:1-3) Tshisumbu tshia mu Laodikiya tshivua patshi mu nsombelu wa muomumue. Tshivua tshiditambisha bua bubanji, tshiamba ne: ‘Ndi mubanji,’ kadi ku mêsu kua Kristo benamu bavua ‘bena dikenga ne bakengedi ba luse, ne bapele ne bafofo ne butaka.’​—Buakabuluibua 3:14-17.

18. Mmunyi mudi muntu mua kuepuka dilua ne tshiuyuya mu nyuma ku mêsu kua Nzambi?

¹⁸ Lelu, bamue bavua kumpala bena Kristo ba lulamatu mbapone pabu mu bupidia bua  muomumue. Pamu’apa mbalekele nyuma wa bena panu wenda umbusha lungenyi lua dienza malu ne mitalu mu nsombelu wabu, balua ne tshiuyuya tshia mu nyuma pa bidi bitangila dilonga dia Bible, disambila, bisangilu bia bena Kristo ne mudimu wa buambi. (2 Petelo 3:3, 4, 11, 12) Pabi bidi ne mushinga wa bungi bua bantu aba kutumikilabu Kristo mu diela mfranga yabu mu bubanji bua mu nyuma, mmumue ne: bua ‘basumbe ngolo mulengejibue mu kapia [kudi Kristo]!’ (Buakabuluibua 3:18) Bubanji bulelela bua nunku budi bumvuija kuikala ‘ne bubanji bua bienzedi bimpe; badilongolole bua kupangana bintu; basue kuikala ne bakuabu luse.’ Patudi tuela mfranga yetu mu biuma bia mushinga mukole bia nunku, tudi ‘tudibutshila bidi bitekibua bimpe bua matuku alualua, bua tuetu tulamate muoyo udi muoyo wa bushuwa mene.’​—1 Timote 6:17-19.

Bakabela kalumbandi bua butumike buabu

19. Mmêyi kayi a kalumbandi ne a dikankamija avua Yezu muambile bena Kristo ba mu Semuna ne ba mu Filadelifia?

¹⁹ Tshisumbu tshia mu Semuna ne tshia mu Filadelefia mbisunguluke bu bilejilu bia butumike, bualu Yezu kakabipisha mu mikanda yakabituminaye to. Wakambila bena mu Semuna ne: ‘Ndi mumanye dikenga diebe ne bupele buebe (kadi wewe udi mubanji).’ (Buakabuluibua 2:9) Ndishilangana kayipu ne bena mu Laodikiya, bavua baditambisha bua bubanji bua panu buvuabu nabu kadi pabu mu bulelela bikale bapele! Bushuwa, Diabolo kavua ne disanka bua kumona muntu nansha umue uleja lulamatu ne butumike kudi Kristo to. Ke bualu kayi Yezu wakadimuija ne: ‘Kutshinyi malu audi wamba kukenga nawu. Mona, Diabolo udi wamba kuela bakuabu ba munkatshi muenu mu lukanu bua nuenu nutetshibue, ne nenuikale ne dikenga dia matuku dikumi. Wikale biebe ne [lulamatu] too ne ku lufu, nunku nenkupe tshifulu tshia butumbi tshia muoyo.’ (Buakabuluibua 2:10) Bia muomumue, Yezu wakela bena mu Filadelefia kalumbandi wamba ne: ‘Wakalama dîyi dianyi [anyi wakantumikila], ne kuakapidia dîna dianyi. Ndualua lubilu, ukuate bikole tshiudi natshi, bua muntu kanyengi tshifulu tshiebe tshia butumbi.’​—Buakabuluibua 3:8, 11.

20. Mmunyi mudi bantu miliyo mivule balame dîyi dia Yezu lelu, ne mbadilame nansha mudiku nsombelu kayi?

²⁰ Mu ‘dituku dia Mukalenge’ edi diakatuadija mu 1914, bashadile bela manyi ba lulamatu ne balunda babu mikoko mikuabu (badi miliyo mivule mpindieu) mbalame pabu dîyi dia Yezu mu diyisha ne lukunukunu ne mu dishala ne lulamatu. Anu bu bana babu ba mu bidimu lukama bia kumpala, mbakengeshe bamue bualu mbatumikile Kristo, babele ne mu nzubu ya lukanu ne mu maloko manene. Bakuabu mbalame dîyi dia Yezu mu dikala ne ‘dîsu dimpe’ nansha mudibu babanyunguluke kudi bena biuma ne bena lukuka. (Matayo 6:22, 23) Bushuwa, muaba wonso ne mu nsombelu yonso, bena Kristo balelela badi batungunuka ne kusankisha mutshima wa Yehowa bua butumike buabu.​—Nsumuinu 27:11.

21. (a) Mbujitu kayi bua mu nyuma buikala kasumbu ka mupika mua kutungunuka ne kukumbaja? (b) Mmunyi mutudi mua kuleja ne: tudi basue kutumikila Shilo tshia bushuwa?

²¹ Bu mutudi tuenda tusemena pabuipi ne dikenga dinene, “mupika wa lulamatu ne wa budimu” mmudisuike anu bua kutumikila Mfumuende Kristo. Ebi bidi biumvuija kulongolola biakudia bia mu nyuma mu tshikondo tshiakanyine bua bena mu nzubu wa Nzambi. Nenku tutungunukayi ne kuanyisha bulongolodi bulenga budi Yehowa ulombola ne bintu bidibu butupesha. Patudi tuenza nenku tudi tuleja ne: tudi tukokela Shilo, eu wafuta bena butumike bende bonso bakokeshaye muoyo wa tshiendelele.​—Matayo 24:45-47; 25:40, NW; Yone 5:22-24.

[Mêyi adi kuinshi]

Udi muvuluke anyi?

• Mmudimu kayi uvua Yezu ne bua kuenza uvuabu bamanyishe mu mulayi kudi Yakoba ukavua ne mikolo ku tshina?

• Mmunyi mutudi bamanye ne: Yezu ke Shilo, ne nnyuma kayi utudi ne bua kuepuka?

• Mmibelu kayi idi ne mushinga lelu idi mu mikanda ivuabu batumine bisumbu muanda-mutekete bia mu Buakabuluibua?

• Mmu malu kayi mutudi mua kuidikija aba bavua mu tshisumbu tshia kale tshia mu Semuna ne tshia mu Filadelifia?

[Nkonko ya dilonga]

[Bimfuanyi mu dibeji 18]

Yehowa udi ubenesha bantu bende bualu badi batumikila “mulami” wa lulamatu

[Tshimfuanyi mu dibeji 19]

Malu adi Satana wenzeja ke adi avuija ditumikila Nzambi bualu bukole

[Bimfuanyi mu dibeji 21]

Kuikala mu malanda makole ne Yehowa kudi kutuambuluisha bua kuikala bena butumike