‘Udienzeje’

BANAYI ba mu ditunga dia Grèce ne dia Lomo pa kale bavua ne bipatshila ebi: kunyema lubilu lukole, kutumpika mulu mule ne kuikala ne bukole bua bungi. Munkatshi mua nkama ya bidimu, bavua benza manaya manene mu mpata wa Olympie, mu tshimenga tshia Delphes, ne tshia Némée ne mu tshitupa tshia Isthme tshivua mu Kolinto ne “dibenesha” dia banzambi, ne bavua baabandila kudi bantu binunu ne binunu. Bua kupeta diakalenga dia kutembangana mu manaya aa bivua bikengela kudienzeja bikole munkatshi mua bidimu bivule. Aba bavua bapatuka ba kumpala bavua bapeta butumbi ne bapetesha kabidi bimenga biabu butumbi bua bungi.

Tudi tumvua bua tshinyi mu nsombelu wa nunku bafundi ba Mikanda ya tshiena-Gelika ya bena Kristo bakafuanyikija dinyema lubilu lua mu nyuma lua bena Kristo ne manaya a ditembangana. Bua kulongesha malu manene a mushinga, mupostolo Petelo ne mupostolo Paulo bakafila mifuanu mimpe menemene mishindamene pa manaya aa. Lelu, bena Kristo batshidi banyema lubilu lukole lua muomumue. Bena Kristo ba mu bidimu lukama bia kumpala bavua ne bua kuluangana ne malu a ndongoluelu wa bena Yuda; tuetu petu lelu tudi ne bua ‘kuluangana’ ne ndongoluelu eu wa buloba bujima ukadi pa kubutuka. (2 Timote 2:5; 3:1-5, NW) Bamue badi mua kumona ne: yabu ‘mvita ya ditabuja’ (anyi lubilu lua ditabuja) idi anu mitungunuke ne idi itshiokesha. (1 Timote 6:12) Dikonkonona amue malu a mu manaya adi mafuanangane ne lubilu lua bena Kristo ludi Bible wamba nedituambuluishe bikole.

Mulongeshi wa dilambu

Dinaya bimpe dia muenji wa manaya ditu nangananga dilondeshila ku muntu udi umulongesha. Mukanda mukuabu udi wamba bua manaya a kale ne: “Batembianganyi bavua ne bua kuditshipa bua kujadika ne: bavua benze ngondo dikumi mijima mu dibidija dia mubidi bua kudilongolola.” (Archaeologia Graeca) Bena Kristo pabu badi ne bua kudienzeja bikole. Paulo wakabela Timote, uvua mukulu muena Kristo ne: ‘Udienzeje bua [kulamata] Nzambi.’ (1 Timote 4:7) Nnganyi udi mulongeshi wa muena Kristo udi bu munayi? N’Yehowa Nzambi nkayende, ki mmunga muntu to. Mupostolo Petelo wakafunda ne: ‘Nzambi wa [bulenga buonso bukena butuakanyine] muine neanuakaje tshishiki, neanujadike, neanukoleshe.’​—1 Petelo 5:10.

Tshiambilu tshia se: ‘neanuakaje tshishiki’ tshidi tshifumina ku muaku wa pa muanda wa mu tshiena-Gelika udi bilondeshile nkonga-miaku kampanda umvuija “kuvuija tshintu [anyi muntu] tshikumbane bua tshipatshila tshiatshi, kutshilongolola ne kutshivuija tshikumbanyine mudimu watshi.” (Theological Lexicon of the New Testament) Bia muomumue, nkonga-miaku wa Liddel ne Scott udi wamba ne: muaku wa pa muanda eu udi mua kumvuija “kulongolola, kulongesha anyi kupaya menemene.” (Greek-English Lexicon) Mmu mishindu kayi mudi Yehowa ‘utulongolola, utulongesha anyi utupaya menemene’ bua lubilu lukole lua bena Kristo? Bua tuetu kumvua difuanangana edi, tumonayi imue ya ku mishindu ivua balongeshi balongesha nayi.

Mukanda kampanda udi wamba ne: “Aba bavua balongesha bansonga bavua babalongesha ne mishindu minene ibidi: wa kumpala uvua ne tshipatshila tshia kukankamija mulongi bua kudienzejaye bikole ne mubidi wende wonso bua kupatula bipeta bimpe, muibidi uvua ne tshipatshila tshia kushikulujaye bimpe menemene dimanya ne nnayilu wende.”​—The Olympic Games in Ancient.

Bia muomumue, Yehowa udi utukankamija ne utukolesha bua tuetu kukumbana bimpe menemene ne kulengeja ngenzelu wetu wa mudimu wende. Nzambi wetu udi utupesha bukole ku diambuluisha dia Bible, dia bulongolodi buende bua pa buloba, ne dia bena Kristo netu bapie mu nyuma. Imue misangu utu utulongesha ku diambuluisha dia mibelu. (Ebelu 12:6) Misangu mikuabu udi mua kulekela ntatu ne makenga kabukabu bitukuata bua tuetu kumona mua kupeta ditantamana. (Yakobo 1:2-4) Udi kabidi utupesha bukole butudi  nabu dijinga. Muprofete Yeshaya udi wamba ne: ‘Badi bindila Yehowa nebasangaje bukole buabu; nebabande mulu ne mapuapua bu nyunyu ya mukanku, nebanyeme lubilu ne kabena bapungila, nebende ne kabena bateketa.​—Yeshaya 40:31.

Tshidi ne mushinga mutambe ntshia se: Nzambi udi utupesha nyuma muimpe wende, ne nyuma eu udi utukolesha bua kutungunuka ne kumuenzela mudimu udi umusankisha. (Luka 11:13) Basadidi ba Nzambi batu bakadi batantamene mateta makole a ditabuja a munanunanu. Aba bavua baatantamene nunku bavua balume ne bakaji betu aba, bikale anu bu yonso wa kutudi. Kadi dieyemena Yehowa ne muoyo mujima diakabambuluisha bua kutantamena mateta aa. Bushuwa, “bukole ebu bupite mbua kudi [Nzambi], kabuena bufuma kudibu to.”​—2 Kolinto 4:7, MMM.

Mulongeshi wa luse

Mumanyi mukuabu udi wamba ne: umue wa ku midimu ya mulongeshi wa kale uvua wa “kusunguluja mishindu ne bungi bua ngibidijilu ya mubidi ivua ikengedibua bua muenji wa manaya yonso ne bua dinaya kampanda disunguluke.” Padi Nzambi utulongesha, udi utangila nsombelu wa muntu ne muntu, mamanya, bukole buende, mushindu udiye ne mikalu yende. Misangu yonso idi Yehowa utulongesha, tudi tumulomba anu bu Yobo ne: ‘Ndi nkutendekena ne: uvuluke ne: wewe wakamfumba [ne] dima.’ (Yobo 10:9) Ntshinyi tshidi mulongeshi wetu wa luse wamba bua bualu ebu? Davidi wakafunda bua Yehowa ne: ‘Yeye udi mumanye buntu buetu, udi uvuluka ne: tudi dimfuenkenya.’​—Musambu 103:14.

Udi mua kuikala ne disama dikole didi dikupangisha bua kuenza mudimu wa buambi muudi musue, anyi udi mua kuikala uluangana bua kudipesha mushinga udi muakanyine. Pamu’apa udi udienzeja bua kulekela tshibidilu tshibi kampanda, peshi udi mua kuikala umona ne: kuena ne bukole bua kukandamena bilele bibi bia bena mutumba nebe, bena mudimu nebe anyi balongi benu. Nansha wewe muikale mu nsombelu kayi, kupu muoyo bua se: Yehowa udi mumanye ntatu yebe bimpe kupita muntu mukuabu yonso, ne wewe muine kabidi! Bu mudiye mulongeshi udi uditeka pa muaba wetu, udi anu pabuipi bua kukuambuluisha biwasemena pabuipi nende.​—Yakobo 4:8.

 Balongeshi ba kale “bavua mua kutapulula dipungi ne butekete bivua kabiyi bifumina ku dibidija dia mubidi, kadi ku malu makuabu a mu lungenyi bu mudi luidi lubi anyi tshilunji tshibi, dibungama ne bikuabu. . . . Bukokeshi bua [balongeshi] abu buvua bualabale bikole, bualu bavua balondakaja ne malu a mu nsombelu wa benji ba manaya ne bavua benza tshivuabu bamona tshimpe.”

Utuku imue misangu udiumvua mupungile anyi mutekete bua ntatu ne mateta bidi anu bitungunuke panu anyi? Bu mudi Yehowa muikale mulongeshi webe, mmusue bikole bua wikale ne disanka. (1 Petelo 5:7) Udi ujingulula ne lukasa tshimanyinu tshionso tshiudi natshi tshia butekete anyi dipungi dia mu nyuma. Nansha mudi Yehowa kayi utuenzeja malu ku bukole, udi utupesha diambuluisha ne mibelu bikumbane padibi bikengedibua bua diakalenga dietu dia tshiendelele. (Yeshaya 30:21) Mushindu kayi udiye wenza nunku? Ku diambuluisha dia Bible ne mikanda yetu idi yakula malu a mu Bible, bakulu ba tshisumbu ne bana betu ba dinanga.

‘Didikanda mu malu onso’

Bushuwa, bua munayi kunaya bimpe kabivua bilomba mulongeshi muimpe patupu to. Munayi nkayende ke uvua ne bualu menemene ne bivua bilondeshila kabidi ku didifila diende mu malu makole avuabu bamulongesha. Bavua ne mikandu mikole bualu mu malu avuabu babalongesha bavua babalomba bua kudikanda ku amue malu ne ku bimue biakudia. Horace, mufundi wa tusala wa mu bidimu lukama bia kumpala wakamba ne: banayi “bavua badikanda ku bakaji ne mvinyo” bua “kukumbaja tshipatshila tshivuabu bipatshile mutantshi mule.” Ne bilondeshile mumanyi wa malu a Bible Frederic Cook, benji ba manaya bavua ne bua “kudikanda [ne] kubenga biakudia bivua bidiundishangana . . . munkatshi mua ngondo dikumi.”

Paulo wakafila tshimfuanyi etshi pakafundilaye bena Kristo ba mu Kolinto, tshimenga tshivua benamu bamanye manaya avua enzekela pabuipi nabu mu Isthme, wamba ne: ‘Muntu yonso udi utetangana bukole ne bakuabu mu manaya udi udikanda mu malu onso.’ (1 Kolinto 9:25) Bena Kristo balelela badi bepuka nsombelu wa lukuka lua biuma, wa buendenda, ne wa bukoya bua mu nyuma udi nende bena panu. (Efeso 5:3-5; 1 Yone 2:15-17) Badi ne bua kulekela kabidi bibidilu bibi bidi kabiyi bipetangana ne Mukanda wa Nzambi ne kupingajapu ngikadilu ya buena ya Kristo.​—Kolosai 3:9, 10, 12.

Mmunyi mutudi mua kukumbaja bualu ebu? Tshilejilu, tangila diandamuna didi Paulo ufila ku diambuluisha dia mufuanu mulenga eu: ‘Ndi ndikuma too ne pangavuija mubidi wanyi mabuba, ndi ngubueja mu bupika; bua bumue, pangamana kuambila bakuabu bualu bua Nzambi, meme tshikadi mubengibue.’​—1 Kolinto 9:27.

Muaba eu Paulo wakaleja bualu bua mushinga! Kakamba bua kubanga kudikengesha ku bukole to. Kadi wakaleja ne: uvua uluangana mvita munda muende. Misangu mikuabu uvua wenza malu avuaye kayi musue kuenza ne ubenga kuenza malu avuaye musue kuenza. Kadi kakalekela bua butekete buende bumupite dikanda nansha. ‘Wakakuma mubidi wende,’ mbuena kuamba ne: wakatshimuna majinga ne bikadilu bibi bia mubidi.​—Lomo 7:21-25.

Ke tshidi bena Kristo bonso ne bua kuenza. Paulo wakakula bua malu avua bamue bena Kolinto balekele, bavua kumpala baditue mu masandi, ditendelela dia mpingu, diangatangana dia balume ne balume ne bakaji ne bakaji, buivi, ne mu malu makuabu kabidi. Ntshinyi tshiakabambuluisha bua kushintuluka? Bukole bua Dîyi dia Nzambi ne nyuma muimpe kusangisha ne dipangadika diabu dikole dia kuenza malu avua umvuangana nende. Paulo wakamba ne: ‘Kadi, nuakuvuibua, nuakajidibua, nuakabingishibua mu dîna dia Mukalenge Yezu Kristo, ne mu nyuma wa Nzambi wetu.’ (1 Kolinto 6:9-11) Petelo wakafunda bia muomumue bua aba bavua balekele bibidilu bibi ebi. Bu muvuabu bena Kristo, buonso buabu bakavua bashintuluke  bulelela.​—1 Petelo 4:3, 4.

Didienzeja ne kipatshila kimpe

Paulo wakafila tshilejilu tshia mushindu uvuaye mutangije meji ende anu ku dikumbaja bipatshila bia mu nyuma, wamba ne: “Mu yanyi mvita tshiena ngela mbata panshi nansha.” (1 Kolinto 9:26, MMM) Mmunyi mudi muluanganyi mua kuela mbata yende? Mukanda kampanda udi ufila diandamuna edi ne: “Kabivua anu bikengela kuikala ne bukole bua bungi to, kadi bivua bilomba kabidi lumonu lutue bua kumona miaba ivua muluishi ne butekete. Imue mishindu ya diela mbata bimpe milonga mu tulasa tua malu a diluangana mvita ne diya kumpala kua meji a muluishi bivua ne mushinga kabidi.”​—The Life of the Greeks and Romans.

Mubidi wetu mupange bupuangane udi umue wa ku baluishi betu. Tukadiku bajingulule ‘miaba ya butekete’ itudi nayi anyi? Tudiku basue kudimona mushindu udi bakuabu batumona, mudi nangananga Satana utumona anyi? Ebi bidi bilomba bua kudikonkonona ne muoyo mujima ne kuikala ne dijinga dia kushintuluka. Bitu bipepele bua muntu kudidinga. (Yakobo 1:22) Mbipepele be bua muntu kubingisha bualu bubule meji budiye muenze! (1 Samuele 15:13-15, 20, 21) Ebi bidi muomumue ne ‘diela mbata panshi.’

Mu matuku a ku nshikidilu aa, aba badi basue kusankisha Yehowa ne kupeta muoyo kabena ne bua kuelakana bua kusungula tshidibu basue pankatshi pa tshimpe ne tshibi, pankatshi pa tshisumbu tshia Nzambi ne bukua-panu ebu bubi. Badi ne bua kuepuka ditua eku ditua kuaka, dikala ‘bantu ba mitshima ibidi badi batatakana mu njila yabu yonso.’ (Yakobo 1:8) Kabena ne bua kujikijila bukole buabu ku malu adi kaayi ne mushinga to. Muntu yeye mulonde njila eu ne meji ende matangija anu ku tshipatshila, neikale ne disanka ne ‘kudiunda kuende nekumueneke kudi bonso.’​—1 Timote 4:15.

Bushuwa, lubilu lua bena Kristo ludi anu lutungunuka. Yehowa, Mulongeshi wetu Munene udi utupesha mibelu ne dikuatshisha ne dinanga dionso bua tuetu kumona mua kutantamana too ne ku ditshimuna dia ndekelu. (Yeshaya 48:17) Anu bu benji ba manaya ba pa kale, tudi ne bua kudijidika amue malu, kudikanda, ne tudi ne bua kudifila ne muoyo mujima mu mvita yetu ya ditabuja. Didienzeja dietu ne kipatshila kimpe neditupeteshe masanka a bungi.​—Ebelu 11:6.

[Kazubu mu dibeji 31]

‘Numulabe manyi’

Tshitupa tshia malu avuabu balongesha muenji wa manaya mu ditunga dia Grèce wa kale bavua batshikumbaja kudi mulabianganyi wa manyi. Mudimu wende uvua wa kulaba bantu bavua ne bua kudibidija manyi pambidi. Mukanda mukuabu udi wamba ne: balongeshi “bavua bamona ne: dikamata mifungu ya mubidi bimpe bimpe kumpala kua kutuadija didibidija divua diambuluisha, ne bavua bamona kabidi ne: dilaba manyi bimpe bimpe ne lubatshi divua diambuluisha muena manaya uvua mudibidije mutantshi mule bua kubenga kuzengela ne bua kupetulula makanda.”​—The Olympic Games in Ancient Greece.

Anu mudi dilaba mafuta pa mubidi wa muntu mua kumukuatshisha ne kumuondapa, dibadila muena Kristo udi pende bu muenji wa manaya Dîyi dia Nzambi didi mua kumulengeja, kumukolesha ne kumuondapa. Ke bualu kayi mbalombe bakulu ba tshisumbu bua kusambidila muntu wa mushindu’eu ku bulombodi bua Nzambi bua ‘bamulabe manyi mu dîna dia [Yehowa].’ Eu mmushindu muimpe menemene wa kuondapa muntu mu nyuma.​—Yakobo 5:13-15, MMM; Musambu 141:5.

[Tshimfuanyi mu dibeji 31]

Kunyima kua didifila, benji ba manaya bavua baditshipa ne: bavua badibidije munkatshi mua ngondo dikumi

[Mêyi a dianyisha]

Musée du Louvre, Paris

[Mêyi a dianyisha bua tshimfuanyi mu dibeji 29]

Bukenji buonso mbua British Museum