Nkonko ya babadi

Bidi mua kuikala dibuelakana mu bukua-bitendelelu patudi tusumba nzubu wa ekeleziya mukuabu ne tumukudimuna ulua Nzubu wa Bukalenge anyi?

Pa tshibidilu, Bantemu ba Yehowa batu bepuka dibuelakana dia nunku ne bitendelelu bikuabu. Kadi nansha nanku, bualu ebu ki ndidibuejakaja mu bukua-bitendelelu to. Tudi ne bua kubumona anu bu bualu bua bungenda patupu. Tshisumbu tshia Bantemu ba Yehowa ba muaba kampanda katshiena tshiibaka ne tshienzela bisangilu mu nzubu umue ne ekeleziya mukuabu to.

Tshidi Yehowa umona bu dibuelakana ne bukua-bitendelelu ntshinyi? Tangila mubelu wa mupostolo Paulo: ‘Lekelayi kulamakajibua ne badi kabayi bena ditabuja bu badi kabayi bakanangane; bua buakane budi ne bulunda kayi ne bualu bubi; anyi munya udi ne buobumue kayi ne mîdima? Ne Kristo udi ne dîyi dimue ne Beliyala munyi; anyi muena ditabuja udi ne tshitupa kayi ne udi kayi ne ditabuja? Ntempelo wa Nzambi udi upunga dîyi kayi ne mpingu? Nunku umukayi munkatshi muabu, nuikale batapuluke, bu mudi Mukalenge wamba, kanulengi tshintu tshibipa, ne meme nennuitabuje.’ (2 Kolinto 6:14-17) Paulo uvua musue kumvuija tshinyi pa kutela miaku “bulunda” ne “buobumue”?

Bulunda budi Paulo utela budi buleja patoke kuenza midimu ya ntendelelu ne ya malu a mu nyuma pamue ne batendeledi ba mpingu ne aba badi kabayi bena kuitabuja. Wakadimuija bena Kolinto bua kubenga ‘kudisanga ku mêsa a bademon popamue.’ (1 Kolinto 10:20, 21) Nanku, kubuelakana mu bukua-bitendelelu nkudisanga mu ditendelela anyi kuikala ne buobumue mu malu a mu nyuma ne bitendelelu bikuabu. (Ekesode 20:5; 23:13; 34:12) Pikalabu basumbe nzubu kampanda uvua bena ekeleziya mukuabu badisangishilamu, kipatshila kadi anu ka kupeta nzubu udi ukengedibua bua Nzubu wa Bukalenge. Kumpala kua kuenzelamu mudimu bu Nzubu wa Bukalenge, badi banji bumbusha bintu bionso bia ntendelelu wa dishima bidi mua kuikalamu. Bamane kubiumusha nanku, badi bamushiya mu bianza bia Yehowa bua kumutendelelamu anu yeye nkayende. Kakuena bulunda anyi buobumue pankatshi pa ntendelelu mulelela ne wa dishima to.

Mu dienda diumvuangana anyi dikumbaja malu bua disumba dia nzubu wa nunku, kupetangana ne bena tshitendelelu tshikuabu atshi kudi ne bua kuikala kukese, kushikila anu ne diumvuangana dia mishinga ne malu makuabu a kukumbaja bua disumba nzubu au. Bena tshisumbu tshia bena Kristo badi ne bua kulama mu lungenyi didimuija dia Paulo dia kubenga ‘kulamakajibua ne badi kabayi bena kuitabuja.’ Nansha mutudi katuyi tudiumvua bapite bantu badi mu bitendelelu bikuabu, tudi tuepuka kulamatangana nabu anyi kudibuejakaja mu ntendelelu wabu. *

Kadi netuambe tshinyi bua tshisumbu tshidi tshifutshila nzubu wa tshitendelelu tshikuabu? Difutshila ditu misangu ya bungi difikisha ku dipetangana pa tshibidilu, muanda utudi ne bua kuepuka. Nansha bua kufutshila nzubu bu nunku anu bua tshibilu kampanda, kasumbu ka bakulu kadi ne bua kutangila malu adi alonda aa: Nekuikaleku mpingu ne bimfuanyi bikuabu munda ne pambelu pa nzubu au anyi? Mmunyi muikala bantu ba tshitupa atshi mua kumona dibuela dietu mu nzubu eu? Kudiku muena mu tshisumbu udi mufuane kulenduka bualu tudi tuenzela bisangilu mu nzubu eu anyi? (Matayo 18:6; 1 Kolinto 8:7-13) Bakulu badi batangila malu aa ne pashishe bangata dipangadika dikumbanyine. Badi ne bua kutangila tuondo tuabu tua muoyo ne tua bena tshisumbu bonso bangabanga ne kuitaba bua kusumba ne kuandamuna nzubu wa nunku bua kuluaye Nzubu wa Bukalenge.

[Mêyi adi kuinshi]

[Tshimfuanyi mu dibeji 27]

Bakasumba nzubu eu uvua nsunagoga, e kumuvuijabu Nzubu wa Bukalenge