Ntatu ne masanka a dikoleshila bana ku ba-bende

BANTU miliyo mivule badi baya mu matunga menyi ne ditekemena dia kupetamu nsombelu mupiamupia. Lelu kudi bantu bapite pa miliyo 20 badi baye kusombela ku Mputu, benyi bapite pa miliyo 26 badi basombele mu États-Unis bavua baledibue mu matunga makuabu, ne bantu bapite pa 21 pa lukama badi mu ditunga dia Australie bavua baledibue mu matunga makuabu. Misangu ya bungi, mêku a benyi aba adi ne bua kuluangana bua kumanya muakulu mupiamupia ne bua kuibidilangana ne bilele bipiabipia.

Pa tshibidilu, bana batu bamanya lukasa muakulu wa mu ditunga dipiadipia mudibu ne batu babangisha kuela meji mu muine muakulu au. Bua baledi babu bidi mua kulomba matuku a bungi. Padi bana bakolela mu ditunga dienyi kudi baledi babu, ntatu ya muakulu idi mua kupangisha bana bua kuyukilanganabu bimpe ne baledi, ne bidi mua kulua bikole bua kujikija lutatu elu bipepele.

Ki ng’anu muakulu muenyi udi ushintulula ngelelu wa meji wa bana to, kadi bilele bia mu ditunga dienyi bidi pabi mua kushintulula mushindu udibu bumvua malu. Baledi badi mua kumona bibakolele bua kumvua mushindu udi bana babu benza malu. Nunku, baledi badi baye kusombela mu ditunga dienyi badi badienzeja bua kukolesha bana babu mu “dilongesha ne mu mibelu bia kudi [Yehowa]” badi bapeta ntatu ya pa buayi.​—Efeso 6:4, MML.

Lutatu lua kulenga lungenyi ne mutshima

Baledi bena Kristo badi ne dijinga ne bujitu bua kulongesha bana babu “muakulu mukezuke” wa bulelela bua mu Bible. (Sefanya 3:9, NW) Kadi, bana buobu bikale anu ne dimanya dikese dia muakulu wa baledi babu ne baledi babu buobu kabayi bakokesha bua kuakula bimpe muakulu udi bana babu bibidile nawu, mmushindu kayi udi baledi mua kubueja mikenji ya Yehowa mu mitshima ya bana babu? (Dutelonome 6:7) Bana badi mua kumvua miaku idi baledi babu bakula kadi bikale bidibu bamba kabiyi bilenga mutshima, bana badi mua kulua bu benyi mu nzubu muabu.

Pedro ne Sandra bakumbuka mu Amerike wa ku Sud kuyabu kusombela mu ditunga dia Australie, ne badi ne lutatu elu mu dikolesha dia bana babu ba balume babidi ba mvula dikumi ne pamutu. * Pedro udi wamba: “Patudi tuakula malu a mu nyuma, bidi bikengela kulenga mutshima ne lungenyi. Udi ne bua kumvuija ngenyi miondoke ya mushinga, ke bualu kayi mbimpe kumanya miaku ya bungi.” Sandra udi usakidila pende ne: “Bana betu buobu kabayi bumvua bimpe muakulu wetu wa ku tshilelelu, nsombelu wabu wa mu nyuma udi mua kunyanguka bikole. Badi mua kujimija dianyisha bua bulelela, ne badi mua kupangila bua kumvua mêyi adi mu adibu balonga. Bujinguludi buabu bua mu nyuma budi mua kukepela ne malanda abu ne Yehowa adi mua kunyanguka.”

 Gnanapirakasam ne Helen bakumbuka mu ditunga dia Sri Lanka bua kuya kusombela mu ditunga dia Allemagne, ne mpindieu badi ne bana babidi. Badi bitaba ne: “Tudi tuela meji ne: bidi ne mushinga wa bungi bua bana betu bakule muakulu wa kuetu padibu balonga tshiena-Allemagne. Mbimpe bikale bamanye mua kutumvuija ngenyi yabu, bua kutuambila yabu ya munda.”

Miguel ne Carmen, bakaya kusombela mu Australie bafumine mu ditunga dia Uruguay, badi bamba ne: “Baledi badi mu nsombelu wetu badi ne bua kudienzeja bikole. Badi ne bua kulonga muakulu muenyi bimpe menemene bua kuikalabu bumvua ne bumvuija malu a mu nyuma mu muakulu au, anyi badi ne bua kulongesha bana babu bua kushikuluja muakulu wa baledi.”

Dipangadika dia dîku

Bualu bua mushinga budi mua kuambuluisha dîku bua kuikala ne makanda a mu nyuma ku ba-bende nkusungula muakulu wikala bena dîku mua kuakula bua ‘kuikala balongi ba [Yehowa].’ (Yeshaya 54:13, MMM) Bikala tshisumbu tshidibu bakula muakulu wa ku tshilelelu wa bena mu dîku tshikale pabuipi, dîku didi mua kusungula bua kuya kuambuluisha mu tshisumbu atshi. Ku lukuabu luseke, badi mua kusungula bua kutantshila tshisumbu tshidibu bakula muakulu munene wa mu ditunga mudibu baye. Malu kayi adi mua kulombola dipangadika edi?

Demetrios ne Patroulla, bavua bumbuke mu ditunga dia Chypre bua kuya kusombela mu ditunga dia Angleterre bikale ne bana batanu, badi bumvuija tshivua tshibasake bua kuangata dipangadika diabu ne: “Kumpala, dîku dietu divua ditantshila tshisumbu tshivuabu bakula tshiena-Gelika. Nansha muvuabu bualu ebu butuambuluishe tuetu baledi bikole, buakapangisha bana bua kudiunda mu nyuma. Nansha muvuabu bumvua tshiena-Gelika bimpe, bavua ne lutatu lua kumvua malu mondoke a mu nyuma. Bualu ebu buakamuekela patoke ku didiunda diabu dia mu nyuma ne majetete. Dîku dijima tuakaya mu tshisumbu tshivuabu bakula muakulu wa Anglais, ne bipeta bimpe bua bana betu biakamueneka diakamue. Bakakola mu nyuma. Dipangadika dia kushintulula tshisumbu kadivua anu ditekete to, kadi buetu tuetu baledi diakamueneka dia meji.”

Bena mu dîku bavua anu bamanye muakulu wa baledi ne bakapeta mabenesha a bungi. Bana babu badi bumvuija: “Kumanya miakulu ya bungi kudi kuambuluisha. Nansha mudi Anglais muikale muakulu wetu wa ku tshilelelu, tudi bamone ne: dimanya dia tshiena-Gelika ndituambuluishe bua kuikala mu malanda mashême ne makole mu dîku, nangananga ne bakakuetu. Dimanya edi ndituambuluishe kabidi bua kutamba kuditeka pa muaba wa benyi bakuabu, ne nditupeshe dishindika dia ne: tudi mua kulonga muakulu mukuabu. Nanku patuakakola, dîku dietu diakaya mu tshisumbu tshivuabu bakula tshiena-Albanie.”

Christopher ne Margarita bobu pabu bakumbuka mu Chypre bua kuya kusombela mu Angleterre, ne bavua ne bana basatu. Bakasungula bua kutantshila tshisumbu tshivuabu bakula tshiena-Gelika. Muanabu wa balume Nikos, udi  mpindieu mukulu mu tshisumbu tshia muakulu wa tshiena-Gelika, udi uvuluka ne: “Bavua batukankamije bua kuya mu tshisumbu tshipiatshipia tshia muakulu wa tshiena-Gelika. Dîku dietu diakamona bualu ebu bu mudimu mutupesha kudi Nzambi.”

Margarita udi wamba ne: “Pakakumbaja bana betu ba balume bidimu eu muanda-mutekete ne eu muanda-mukulu, bakadifundisha mu Kalasa ka Mudimu wa Teokrasi. Tuetu baledi babu tuvuaku ne kanyinganyinga bua muvua dimanya diabu dia tshiena-Gelika dishadile. Kadi, mudimu onso uvua muntu upeta uvua utangila bena mu dîku bonso, ne tuvua tubambuluisha munkatshi mua mêba a bungi bua kulongolola miyuki yabu.”

Muanabu wa bakaji Joana udi wamba: “Ndi mvuluka muvua Tatu utulongesha tshiena-Gelika pavuaye ufundila maleta ku tshibasa kumbelu, ne tuvua ne bua kualonga ne ntema yonso. Bantu ba bungi batu benza bidimu bia bungi bua kulonga muakulu kampanda, kadi Mamu ne Tatu bakatuambuluisha bua kulonga tshiena-Gelika mu matuku makese.”

Mêku makuabu adi mua kutantshila tshisumbu tshidibu bakula muakulu wa ku ba-bende bualu baledi mbamone ne: bua kukolesha ‘dijingulula dia mu nyuma’ dia bana ne bua kulubulukabu, badi ne bua kubalongesha mu muakulu wabu wa ku tshilelelu. (Kolosai 1:9, 10; 1 Timote 4:13, 15) Anyi bena mu dîku badi mua kumona dimanya diabu dia muakulu bu tshiuma tshia kuambuluisha natshi benyi bakuabu bua kulonga bulelela.

Ku lunga luseke, bena mu dîku badi mua kumona ne: nebibambuluishe bu mua kutantshila  tshisumbu tshia muakulu udibu batambe kuakula mu ditunga dienyi mudibu bobu baye kusombela. (Filipoi 2:4; 1 Timote 3:5) Kunyima kua bamane kuyukila bualu ebu mu dîku dijima, mfumu wa dîku ke udi ne bua kuangata dipangadika panyima pa yeye mumane kuenza disambila. (Lomo 14:4; 1 Kolinto 11:3; Filipoi 4:6, 7) Nngenyi kayi idi mua kuambuluisha mêku aa?

Imue ngenyi mimpe

Pedro ne Sandra batudi batele ku ntuadijilu eku badi bamba: “Tudi bele mukenji wa kuakula anu tshiena-Espagne kumbelu bua kutupu muoyo muakulu wetu wa ku tshilelelu. Mmukenji mukole bua kuutumikila bualu bana mbamanye ne: tudi tumvua Anglais. Kadi bu tuetu katuyi balame mukenji eu, bavua ne bua kuikala kabatshiyi bumvua kabidi tshiena-Espagne.”

Miguel ne Carmen, batudi batele kabidi ku ntuadijilu, badi bafila mubelu eu ne: “Baledi buobu balombola pa tshibidilu dilonga dia mu dîku ne bakonkonona mvese wa ku dituku dionso mu muakulu wabu wa ku tshilelelu, bana kabakumanya anu malu a nshindamenu a muakulu, kadi nebamanye kabidi mua kumvuija ngenyi ya mu nyuma mu muakulu au.”

Miguel udi ufila lungenyi lukuabu ne: “Nudienzeje bua kuvuija mudimu wa buambi muanda udi usankisha. Teritware wetu udi wangata tshitupa tshinene tshia tshimenga tshinene, ne tutu tuenza mêba a bungi mu mashinyi tuenda tukeba bantu badi bakula muakulu wetu. Patudi tuenda tuya apu tutu tunaya manaya a mu Bible ne tuakula malu a mushinga. Ntu ndongolola ngendu ya diya mu buambi bua ne: tuenze makumbula mimpe. Pashishe, ku ndekelu kua dituku, bana mbayikile kuoku malu a mushinga.”

Mushindu wa kupita ne bilele bikuabu

Dîyi dia Nzambi didi dikankamija bansonga ne: ‘Muananyi, umvue diyisha dia tatu webe, kupidi [mukenji] wa mamu webe.’ (Nsumuinu 1:8) Kadi ntatu idi mua kujuka padi diyisha dia tatu ne “mukenji” wa mamu bilonda bilele bishilangane ne bia bantu badi banyunguluke bana babu.

Bushuwa, mfumu wa dîku dionso ke udi ne bua kujadika mushindu wikalaye mua kulombola nzubu wende, ne kêna ne bua kuidikija patupu mêku makuabu to. (Galatia 6:4, 5) Nansha nanku, diyukidilangana dimpe pankatshi pa baledi  ne bana didi mua kufikisha baledi ku ditaba bilele bienyi kakuyi lutatu to.

Kadi bilele ne bibidilu bia bungi bia mu matunga mashidimuke bitu binyanga makanda a mu nyuma a bena Kristo. Mijiki ne manaya bidi bantu batambe kusua bitu misangu mivule bikankamija buendenda, lukuka ne buntomboji. (Lomo 1:26-32) Baledi bena Kristo kabena ne bua kubenga kuenza mudimu wabu wa kutangila mijiki ne manaya bidi bana babu basungula anu bualu baledi badi ne lutatu lua kumvua muakulu nansha. Badi ne mua kuela mikenji ne dîsu dikole. Kadi bualu ebu budi mua kulela lutatu.

Carmen udi wamba: “Misangu ya bungi katutu tumvua mêyi a misambu idi bana betu bateleja to. Tshikuma tshidi mua kumvuika tshimpe, kadi miaku yoyi mikale ne mumvuija abidi anyi muomu muikale ngakuilu mubole wa mu njila, katuena mua kumanya to.” Ntshinyi tshidibu benze bua kupita ne nsombelu eu? Miguel udi wamba: “Tutu tusomba mutantshi mule ne bana betu bua kubalongesha njiwu idi mu mijiki mibi, ne tutu tudienzeja bua kubambuluisha bua kusungula mijiki idi Yehowa mua kuanyisha.” Bushuwa, budimu ne nkatshinkatshi bidi ne mushinga bua kumanya tshia kuenza ne bilele bienyi.​—Dutelonome 11:18, 19; Filipoi 4:5.

Masanka

Kukoleshila bana mu ditunga dienyi kudi kulomba dîba ne didienzeja dia bungi. Kakuena dielakana bua bualu ebu to. Kadi baledi ne bana badi mua kupeta masanka makuabu bua didienzeja diabu.

Azzam ne mukajende Sara, bakumbuka mu Turquie bua kuya kusombela mu Allemagne muvuabu ne bana basatu. Muanabu muanabute udi mpindieu wenza mudimu ku biro bia Bantemu ba Yehowa ku Selters, mu Allemagne. Azzam udi wamba: “Disanka dinene bua bana didi se: badi mua kupeta ngikadilu idi yambuluisha mu bilele bia miaba yonso ibidi.”

Antonio ne Lutonadio bakumbuka mu Angola bua kuya kusombela mu Allemagne, ne badi ne bana tshitema kuinaku. Bena mu dîku badi bakula Lingala, Mfualansa ne tshiena-Allemagne. Antonio udi wamba: “Kumanya mua kuakula miakulu mishilangane kudi kutuambuluisha bua kuyisha bantu ba mu matunga a bungi. Bualu ebu budi butupetesha disanka dinene.”

Bana babidi ba baledi bena mu ditunga dia Japon bavua baye kusombela mu Angleterre badi bamona ne: kumanya tshiena-Japon ne Anglais kudi kubambuluisha bikole. Muanabu wa mukala udi wamba: “Dimanya miakulu ibidi diakatuambuluisha bua kupeta mudimu. Tudi bapete malu mimpe mu mpungilu minene mienza mu muakulu wa Anglais. Tudi kabidi ne diakalenga dia kuikala mu tshisumbu mudibu bakula tshiena-Japon, mudi muikale dijinga dinene.”

Udi mua kukokesha

Kukoleshila bana munkatshi mua bantu badi kabayi ne bilele biabu ndutatu ludi basadidi ba Nzambi bapete katshia mu bikondo bia kale. Baledi ba Mose bakakokesha, nansha muvuaye mukolele mu Ejipitu. (Ekesode 2:9, 10) Bena Yuda ba bungi bapika mu Babulona bakakolesha bana bakitaba bua kupingana mu Yelushalema bua kujadika tshiakabidi ntendelelu mulelela.​—Ezela 2:1, 2, 64-70.

Bia muomumue lelu’eu, baledi bena Kristo badi mua kukokesha. Badi mua kupeta disanka dia kumvua bana babu bamba tshivua mulume mukuabu ne mukajende bumvue kudi bana babu ne: “Dîku dietu ndisuikakane bikole bua diambuluisha dia dinanga dia Tatu ne Mamu, batutu tuyukila nabu ne disanka misangu yonso. Tudi ne disanka dia kuikala mu dîku didi ditangalake pa buloba bujima didi disadila Yehowa.”

[Mêyi adi kuinshi]

[Tshimfuanyi mu dibeji 24]

Kuakula anu muakulu wenu wa ku tshilelelu kumbelu kudi kupesha bana dimanya dia nshindamenu dia muakulu au

[Tshimfuanyi mu dibeji 24]

Muakulu umuepele udi wambuluisha bua kulama buobumue pankatshi pa bakaku ne bikulu babu

[Tshimfuanyi mu dibeji 25]

Kulonga Bible ne bana benu kudi kukolesha ‘dijingulula diabu dia mu nyuma’