Bua tshinyi bitu bikole bua kulomba luse?

MU NGONDO wa muanda-mutekete 2000, Kasumbu ka Bafundi ba Mikenji ya Mbulamatadi ka mu Californie (mu États-Unis) kakapatula mukenji kampanda bua kubingisha bantu bavua babunde bilumbu pavuabu baleja luse kudi muntu uvua mutapike mu njiwu kampanda ivuabu bakebeshe. Bua tshinyi mbulamatadi wakela mukenji eu? Bualu bavua bamone ne: patu njiwu ifikisha bantu ku ditapika mputa anyi ku dinyanga bintu kampanda, bantu batu belakana bua kulomba luse bualu batu batshina ne: badi mua kuangata dilomba diabu dia luse bu ditaba dia tshilema. Ku lukuabu luseke, aba badi bamona ne: badi ne bua kubalomba luse pa lukasa badi mua kumvua bibi, ne njiwu mikese itu mua kukebesha matandu makole.

Bushuwa, kabiena bikengela kulomba luse bua njiwu kampanda idi mienzeke kabiyi ku tshilema tshiebe to. Ne kabidi kudi bikondo bidi bilomba bua tuetu kuikala ne budimu mu bitudi tuamba. Lusumuinu kampanda lua kale ludi luamba ne: ‘Pavulangana mêyi, kushipa kua mikenji kudiku, kadi udi ukanda mishiku yende udi ne meji.’ (Nsumuinu 10:19; 27:12) Kadi ebi kabiena ne bua kukupumbisha bua kuikala ne malu malenga ne kuikala muambuluishi wa bakuabu nansha.

Kadi ki mbulelela bua se: bantu bavule lelu kabatshitu kabidi balombangana  luse nansha padibi kabiyi bilomba diya ku tubadi anyi? Kumbelu mukaji udi mua kudilakana ne: ‘Bayanyi katuku ulomba luse to.’ Ku mudimu kapita ka mudimu kadi mua kudiabakena ne: ‘Bena mudimu banyi kabatu bitaba bilema biabu to, ne batu balomba luse anu ku mpukapuka.’ Mu kalasa mulongeshi udi mua kuamba ne: ‘Ki mbalongeshe bana bua kuamba ne: mfuileku luse to.’

Bumue bualu budi bufikisha bantu ku dielakana bua kulomba luse budi mua kuikala buôwa bua diandamuna dibi. Muntu udi mua kubenga kuleja tshidiye umvua menemene bualu badi mua kulua kumuandamuna ne mashika. Pamuapa muntu udibu benzele bibi udi mua kukosa makasa kudi muntu udi mumuenzele bibi au, kakuyi mushindu wa bobu kupetangana to.

Dibenga kuangata majinga a banga bantu ne mushinga kudi mua kuikala bualu bukuabu budi bufikisha bamue ku dielakana bua kulombangana luse. Badi mua kudiambila munda ne: ‘Kulomba luse kakutu kumisha mputa to.’ Kudi ne bakuabu badi batshina bua kulomba luse bua bipeta bidi mua kumueneka. Badi badiebeja ne: ‘Bantu kabakulua kuamba ne: meme ke mukebeshi wa njiwu eyi ne kumfundilabu tshibawu anyi?’ Kadi, lutambishi ke bualu bunene budi bupumbisha bantu bua kuitaba tshilema. Muntu udi uditambisha bikole ubenga bua kuamba ne: “Mfuileku luse” udi mua kudiambila mundamunda ne: ‘Tshiena mua kuitaba tshilema tshianyi bualu bidi mua kumvuija bu kantu tshianana. Aku si nkudipuekeshisha milongo tshianana.’

Bantu ba bungi batu bamona miaku ya dilomba nayi luse mikole mua kupatula bua bualu kayi buonso. Kadi bidi anu bikengela kulombangana luse anyi? Mmalu kayi mimpe atu dilombangana luse dilela?

[Tshimfuanyi mu dibeji 3]

“Ki mbalongeshe bana bua kuamba ne: mfuileku luse to”

[Tshimfuanyi mu dibeji 3]

“Bena mudimu banyi kabatu bitaba bilema biabu”

[Tshimfuanyi mu dibeji 3]

“Bayanyi katuku ulomba luse to”