Tuetu bonso tutu basue bua batuele kalumbandi

DIVUA dituku dimpe bua muana kampanda wa bakaji mutekete. Nansha muvuabu bamunyoka manga matuku, kadi bua dituku adi uvua muenze malu bimpe menemene. Butuku bua dituku adi, kunyima kua bamane kumuladika pa bulalu, mamuende wakamumvua udila. Pakamukonkaye tshivuaye udidila, muana eu wakashikunkila ne binsonji ku mêsu wamba ne: “Lelu tshienaku muana muimpe anyi?”

Lukonko alu e kutapa mamuende ku muoyo anu bu kele. Misangu yonso uvua anu ne lukasa lua kunyoka muanende eu. Kadi lelu, nansha mudiye mumone mudi muanende wa bakaji mutekete eu mudienzeje bua kuenza malu mimpe, mamu ki mmupatule dîyi nansha dimue bua kumuela kalumbandi to.

Ki ng’anu bana ba bakaji batekete nkayabu batu basue bua babele kalumbandi ne babakoleshe ku muoyo nansha. Tuetu bonso tutu basue bua batuele kalumbandi anu mututu dijinga ne mibelu ne manyoka.

Tutu tumvua munyi patubu batuela kalumbandi ne muoyo mujima? Kabituku bisankisha mutshima wetu ne bitusanguluja dituku dijima anyi? Tutu tujingulula ne: muntu kampanda uvua mumone bualu butuvua benze anyi se: bualu abu buvua bumusankishe. Bidi bitujadikila ne: tuvua benze bualu bua mushinga, ne bidi bitukankamija bua kudifila kabidi bikole musangu udi ulonda. Ke bualu kayi kalumbandi kadibu batuela ne muoyo mujima katu misangu mivule katusemeja pabuipi ne muntu udi uditatshisha bua kutuambila mêyi adi akankamija.​—Nsumuinu 15:23.

Yezu Kristo uvua mumanye mushinga wa kuelangana kalumbandi. Mu lusumuinu lua ntalanta, mfumu (udi muikale uleja Yezu) udi wela bapika bende bonso babidi ba lulamatu kalumbandi ne musangelu wonso, wamba ne: “Mbimpe, muena mudimu muimpe ne wa lulamatu.” Biakabakolesha ku muoyo be! Nansha muvuabu ne makole mashilangane ne benze malu mashilangane, Yezu wakabela kalumbandi ka muomumue.​—Matayo 25:19-23, MML.

Nunku tuvulukayi mamuende wa muana wa bakaji mutekete au. Katuena ne bua kuindila bua kuela bakuabu kalumbandi anu patuabamona bapuekesha binsonji nansha. Tukebayi malu atudi mua kubelela kalumbandi. Bushuwa, tudi tuenza bimpe patudi tuelangana kalumbandi ne muoyo mujima dîba dionso.