Mudimu udi ukankamija bantu bua kuikala ne bikadilu bimpe

Bantu bavua bateleje ngumu ya ku tshisanji tshia mu ditunga dia Mozambique ku ndekelu kua tshidimu tshia 2001 bakumvua dimanyisha edi:

“Mukalenge wa ditunga uvua muye kumona nzubu ya Betele wa Bantemu ba Yehowa mu tshimenga tshia Maputo. Uvua muambile bena mu tshisumbu etshi tshia Nzambi bua kuvudijabu mudimu udibu benza bua bantu bikale anu ne bikadilu bimpe mu mêku, ne wakabambila kabidi bua kutungunukabu ne kulongesha bakulumpe ku diambuluisha dia tulasa tuabu tua dilongesha bantu mua kubala ne kufunda. Bantu batue ku 10 000 bakadi balonge mua kubala ne kufunda mu tulasa etu. Bilondeshile Mukalenge Chissano, malu a buena aa mmakanyine kalumbandi, bualu adi ambuluisha bua kujikija ntatu ya dipanga mukanda itshidi mu ditunga edi.”

Dimanyisha edi diakatungunuka ne mêyi adi alonda aa masobola mu muyuki wa Mukalenge wa ditunga edi: “Bidi bitukankamija bikole patudi tumona mudi bantu ba bungi bajinga bua kumanya kubala ne kufunda. Bidi bituleja ne: ba muena-muabu aba nebikale mua kutuambuluisha bua kuvudija bungi bua bantu badi bamanye mua kubala ne kufunda. Ke bualu kayi, ndi ndomba Bantemu ba Yehowa bua buobu kuvudija mudimu wabu eu wa dilongesha bantu mua kubala ne kufunda mu muakulu kayi wonso. Tshitudi tukeba menemene ntshia kumona bantu ba bungi bamanya mua kubala ne kufunda, bamanya mua kuyukila ne kufundilangana kakuyi lutatu, ne mu matuku atshilualua baditua pabu bikole mu dilongesha bakuabu mua kubala ne kufunda.”

Bantemu ba Yehowa ba mu Mozambique badi ne tulasa tua dilongesha bantu mua kubala ne kufunda mu miaba 850 mu ditunga dijima bua bantu kumanyabu mua kudibadila nkayabu Dîyi dia Nzambi. Badi balombola kabidi malonga a Bible matue ku 50 000 ku lumingu luonso kabayi balomba badibu balongesha aba mfranga to. Bionso ebi bidi munkatshi mua programe wa dilongesha dia malu a mu Bible pa buloba bujima didi dienzeka mpindieu mu matunga 235. (Matayo 24:14) Dilongesha edi didi mua kukuambuluisha pebe. Suaku umonangane ne Bantemu ba Yehowa ba muaba uudi.