‘Luayi kundi, meme nennupe dikisha’

“Nulame tshisumbu tshia mikoko ya Nzambi”

“Nutu pabuipi misangu yonso bua kututeleja ne kutubadila mêyi a mu Bible adi atukankamija.”​—Pamela.

“Tuasakidilayi bua bionso binudi nutuenzela. Bidi bituambuluisha bikole.”​—Robert.

PAMELA ne Robert bakumvua muoyo mubasake bua kufundila bakulu bena Kristo ba mu bisumbu biabu bishilangane mêyi a dianyisha aa. Bakuabu munkatshi mua basadidi ba Nzambi badi pa buloba bujima badi ne dianyisha bua dikuatshisha ne diambuluisha bidibu babapesha kudi aba badi ‘balama tshisumbu tshia mikoko ya Nzambi.’ (1 Petelo 5:2) Bushuwa, bantu ba Yehowa badi ne dianyisha bua malu a bungi adi bakulu babenzela ne bua mushindu udibu baenza.

“Bikale ne bivule bia kuenza”

Bakulu bena Kristo mbuomekela majitu a bungi. (Luka 12:48) Badi balongolola miyuki ya kuenza mu bisangilu bia tshisumbu ne badi benza mudimu wa diyisha lumu luimpe lua Bukalenge bua Nzambi. Badi kabidi ne bujitu bua kukumbula bena Kristo nabu. Bakulu badi bafila dîba diabu bua kukuatshisha aba badi dijinga ne diambuluisha dia pa buadi bu mudi bakulakaje ne bakuabu, ne badi benza bionso ebi eku kabayi balengulula mêku abu mu nyuma ne ku mubidi. (Yobo 29:12-15; 1 Timote 3:4, 5; 5:8) Bamue bakulu badi bambuluisha bua kuibaka Nzubu ya Bukalenge. Bakuabu badi mu Komite wa Diumvuangana ne Mpitadi anyi badi mu tusumbu tua bawetu badi bakumbula babedi mu mpitadi. Ne bavule ba kudibu batu benza midimu ya budisuile mu mpuilu ne mu mpungilu. Bushuwa, bakulu badi ne “bivule bia kuenza mu mudimu wa Mukalenge.” (1 Kolinto 15:58, NW) Nunku tudi tumvua bua tshinyi aba badibu ne bua kulama batu baleja bakulu aba benji ba mudimu mukole dianyisha divule!​—1 Tesalonike 5:12, 13.

Bakulu badi ne tshibidilu tshia kukumbula bena Kristo nabu kumbelu anyi muaba mukuabu bua kubakolesha mu nyuma badi bikale mpokolo wa dikankamija. Thomas (wakakola kayi ne tatuende kumbelu) wakamba ne: “Bu kabiyi bua dikuatshisha dia dinanga ne dinkankamija dia kudi bakulu, tshiena ngela meji ne: mvua mua kuikala ngenzela Yehowa mudimu wa ku dîba ne ku dîba lelu to.” Bansonga ba bungi badibu bakoleshe kudi muledi umue badi bitaba ne: diambuluisha dia bakulu ndimpeteshe mushindu wa kudia malanda a nsungasunga ne Nzambi.

Bantu bakulakaje badi mu tshisumbu batu pabu banyisha bikole makumbula a bulami. Panyima pa bakulu babidi bamane kubakumbula, muanetu mukuabu ne mukajende ba-misionere bakafunda ne:  “Tudi basue kunuleja dianyisha bua dikumbula dienu divua ditusankishe bikole. Panyima pa nuenu bamane kuya, tuakashala kubalulula mvese inuvua babale netu. Katuakupua muoyo mêyi anudi batukankamije nau aa to.” Mukaji mukamba mukuabu wa bidimu 70 wakafundila bakulu ne: “Mvua nsambila Yehowa bua kulomba diambuluisha, ne yeye kunutuma nuenu bana betu babidi ku nzubu kuanyi. Dikumbula dienu divua dibenesha dia kudi Yehowa!” Udiku mupete malu mimpe mu dikumbula dia bakulu ba mu tshisumbu tshienu matuku adi panshi aa anyi? Bushuwa tuetu buonso tudi tuanyisha mudimu udibu benza bua kulama tshisumbu tshia mikoko tshidibu babapeshe bua kulama!

Balami badi bidikija Nzambi ne Kristo

Yehowa udi Mulami wa dinanga. (Musambu 23:1-4; Yelemiya 31:10; 1 Petelo 2:25) Yezu Kristo pende udi Mulami wa mu nyuma wa pa buende. Bulelela, badi bamubikila ne: “mulami muimpe”, “mulami munene” ne “Mfumu wa balami.” (Yone 10:11; Ebelu 13:20; 1 Petelo 5:4, MML) Mmunyi muvua Yezu wangata aba bavua bajinga kulua bayidi bende? Wakababikila ne musangelu ne: ‘Luayi kundi, bonso badi ne mudimu mukole, badi ne bujitu bunene, meme nennupe dikisha.’​—Matayo 11:28.

Lelu bakulu badi badienzeja bia muomumue bua kuikala bakolesha tshisumbu tshia mikoko ku muoyo ne batshikuba. Balume aba badi ‘bu tshisokomenu ku tshipepele, ne tshinyemenu tshia ku tshipupu, [badi] bu misulu ya mâyi mu muaba mûme, bu dileji dia dibue dinene mu buloba budi butondesha bantu.’ (Yeshaya 32:2) Bakubi balenga ba nunku badi bakolesha mikoko, badi babanemeka kudi mikoko ne babanyisha kudi Nzambi.​—Filipoi 2:29; 1 Timote 5:17.

Dikuatshisha dia mushinga dia bakaji babu

Bantu ba Nzambi badi ne dianyisha bua bakulu bena Kristo ne bua mushindu udi bakaji babu babakuatshisha ne dinanga. Bua bakaji aba kukuatshisha babayabu bitu misangu mivule bibalomba bua kudipangisha amue malu. Imue misangu, batu kumbelu padi babayabu bikale benza malu mu tshisumbu anyi bakumbula mikoko. Binga bikondo, batu bashintulula malu akavuabu balongolole bimpe menemene bualu nkumueneke muanda kampanda wa lukasa lukasa wa kukumbaja mu tshisumbu. Michelle udi wamba ne: “Nansha nanku, pandi mmona bayanyi muikale ne mudimu wa bungi wa kulongolola bisangilu peshi wa kukumbula mikoko, ndi mvuluka ne: udi wenza mudimu wa Yehowa, ne ndi ngenza muanyi muonso bua kumukuatshisha.”

Cheryl (udi pende mukaji wa mukulu) wakamba ne: “Ndi mumanye ne: bana betu ba balume ne ba bakaji ba mu tshisumbu badi dijinga ne bakulu bua kuyukila nabu, ne ndi musue bua bamone se: badi mua kulua kudi bayanyi dîba dionso didibu nende dijinga.” Bakaji badi bakuatshisha babayabu bu mudi Michelle ne Cheryl badi badipangisha amue malu bua babayabu bamone mua kuambuluisha mikoko ya Nzambi. Tudi tuanyisha bakaji ba bakulu bua lungenyi luabu lua dikuatshishangana elu.

Nansha nanku, mukulu udi ne midimu ya bungi kêna ne bua kulengulula majinga a mu nyuma ne malu makuabu a mukajende ne bana bende to. Mukulu musela udi ne bua kuikala ‘muntu udi kayi mua kubandibua, udi ne mukaji umue, udi ne bana bende badi bena ditabuja, badi kabayi babandibua bua dinyanguka dia muoyo anyi bua bupidia.’ (Tito 1:6) Udi ne bua kulama dîku diende mu mushindu muimpe udi Bible ulomba batangidi bena Kristo.​—1 Timote 3:1-7.

Bua mukulu udi ne mudimu wa bungi, mukaji udi umukuatshisha udi ne mushinga kayi kuamba! Ke mushindu udi bakulu basela ba malu malenga bumvua nanku. Bidi anu bu mudi Bible wamba ne: ‘Udi upeta mukaji [muimpe] udi upeta disanka.’ (Nsumuinu 18:22) Mu miaku ne mu bienzedi, bakulu aba badi baleja bakaji babu dianyisha ne muoyo mujima. Pa kumbusha disambila ne muoyo mujima ne dilonga pamue ne disanka, balume bena Kristo aba ne bakaji babu badi badilamina tshikondo tshia kuendakana pamue. Bulelela, bakulu badi bumvua disanka padibu bambuluisha bakaji babu ne dinanga.​—1 Petelo 3:7.

Bakulu badi balama tshisumbu tshia mikoko ya Nzambi kabiyi bua kupeta disanka diabu nkayabu badi mpokolo wa dikankamija dia mu nyuma bua bantu ba Yehowa. Bakulu aba badi bushuwa “mapa mikale bantu,” badi dibenesha bua tshisumbu!​—Efeso 4:8, 11-13, NW.