Tudi dijinga ne miaba ya ntendelelu anyi?

‘Binunu ne binunu bia bantu bavua baye kutendelela mu muaba munsantu bavuale bilamba bia mekala ne mekala, bafumine mu bitupa bishilangane bia ditunga, bisumbu bia bena Inde benda bimba ngoma ne baja maja avuabu bela meji ne: nga mu tshikondo tshia kumpala kua bena Espagne kukuatabu ku bupika bitupa bia Amerike wa ku Sud, ne bena kuitabuja benda benda bakalaba ku binu ne lutatu luonso munkatshi mua musumba wa bantu batangile ku nzubu wa masambila bavua bûle tente mu nzubu munene wa bisasa ne mu njila ivua minyunguluke nzubu munene wa disambila.’

AU KE mushindu uvua tshikandakanda tshikuabu tshiakule bua bantu musumba munenanenayi mu ngondo wa 12 tshidimu tshia 2001. (El Economista) Mu tshikondo atshi bantu batue ku miliyo isatu mijima bakaya ku nzubu wa masambila wa mu tshimenga tshia Mexico bua kuleja muvuabu bitabuja Virgo wa mu Guadalupe. Nzubu mikuabu ya masambila bu mudi wa Saint-Pierre mu Rome, itu payi ikoka misumba ya bantu.

Nzubu ya masambila itu ne muaba wa pa buawu mu mitshima ya bantu ba bungi badi basue kutendelela Nzambi. Maria wa mu ditunga dia Brésil udi wamba ne: “Buanyi meme, tshitanda [tshietu tshia nzambi] tshivua muaba uvua mua kunsemeja pabuipi ne Nzambi. Uvua muaba munsantu. Mvua ngitaba ne: kuya mu tshitanda tshia Nzambi kuvua kukezula anyima wa muntu ne kabidi se: kubenga kuya mu misa ne ku konfesiyo wa mu dia Lumingu dionso kuvua mpekatu.” Consuelo wa mu ditunga dia Mexique udi ulonda ne: “Nzubu wa nzambi uvua umvuayija mubidi bikole; mvua muangata ne mushinga wa bungi. Dîba dionso dimvuamu mvua ndiumvua ne: mvua mu diulu.”

Nansha mudi bamue bantu bangata nzubu ya nzambi ne mushinga wa bungi, bakuabu pabu kabena bitaba ne: idi ne mushinga bua kuikalayi miaba ya ntendelelu nansha. Peter Sibert, nsaserdose mukuabu muena Katolike wa mu ditunga dia Angleterre, udi wamba bua dikepela dia bungi bua bantu badi babuela mu nzubu ya masambila ne: “[Bantu] badi basungula bitendelelu bidibu basue. Bantu bakulumpe ba bungi mbena Katolike ne badi batumikila malu a ditabuja diabu; kadi bansonga buobu kabena ne lungenyi lua didifila nansha.” Tshinga tshikandakanda tshia mu Londres tshia mu dia 20 Kasuabanga 1998 tshidi tshileja ne: “Kubangila  mu 1979 mbakange bitanda bitue ku 1 500 mu Angleterre pa kufuanyikija ne bikuabu 495 bivuabu bunzulule ne 150 bivuabu bibakulule.”​—Daily Telegraph.

Mu 1997 tshikandakanda tshikuabu tshia mu tshimenga tshia Munich (Allemagne) tshiakamba ne: “Nzubu ya nzambi ikadi miandamuke nzubu ya kulejila filme ne ya bantu kufutshila: Bena kuitabuja kabatshiena babuela mu masangisha, miaba ya ntendelelu idi yenda yandamuka bintu bia tshianana. . . . Bualu bukadi bulue tshilele mu ditunga dia Pays-Bas anyi mu Angleterre budi buenzeka mu Allemagne.” Tshikandakanda etshi tshiakamba kabidi ne: “Nudi mua kumona nzubu ya nzambi 30 anyi 40 mimpe menemene idibu basumbishe mu Allemagne mu bidimu bikese bishale ebi.”​—Süddeutsche Zeitung.

Nzubu ya masambila idiku ne mushinga menemene bua kutendelela Nzambi anyi? Bible udiku wakula bualu bua nzubu minene ya masambila ne bitanda bilengeja bimpe anyi? Ntendelelu wa Nzambi mulelela ne wa muoyo bavua bamuenzele mu nzubu ya mushindu kayi? Ntshinyi tshidi nzubu eyi mua kutulongesha pa bidi bitangila dijinga dia miaba ya ntendelelu ne bua malu adi ne bua kuenzekelamu?