Tutungunuke ne kusadila Yehowa diapa dionso muinshi mua bujitu

‘Nenkudimune [muakulu] wa bantu ba bende bua wikale [muakulu mukezuke]; bua bobu bamanye mua kubikila dîna dia Yehowa, bamukuatshile mudimu ne diapa dionso muinshi mua bujitu.’​—SEFANYA 3:9.

1. Mbualu kayi budi buenda buenzeka budi bukumbaja Sefanya 3:9?

 LELU pa buloba bujima bantu badi bakula miakulu mitue ku 6 000. Pa kumbusha miakulu eyi, kudi tu-miakulu tukese kabukabu anyi minga mishindu ya miakulu idibu bakula anu imue miaba. Nansha bantu bobu bikale bakula miakulu mishilangane bu mudi tshiena-Arabe ne tshiena-Zulu, Nzambi mmuenze bualu kampanda bua dikema menemene. Mmuenze bua bantu ba miaba yonso balonge ne bakule anu muakulu umuepele: muakulu mukezuke. Bidi bienzeka nunku bua kukumbaja mulayi wakamanyisha Nzambi mukana mua muprofete Sefanya ne: ‘[Meme Yehowa Nzambi] nenkudimune [muakulu] wa bantu ba bende bua wikale [muakulu mukezuke anyi] wa ku mishiku milengejibue; bua bobu bamanye mua kubikila dîna dia Yehowa, bamukuatshile mudimu ne diapa dionso muinshi mua bujitu.’​—Sefanya 3:9.

2. “Muakulu mukezuke” ntshinyi, ne mmuambuluishe bantu bua kuenza ntshinyi?

² “Muakulu mukezuke” eu mbulelela bua Nzambi budi mu Bible, Dîyi diende. Udi nangananga bulelela budi butangila Bukalenge bua Nzambi, buikala mua kuvuija dîna dia Yehowa dinsantu, kubingisha bumfumu buende ne kutuadila bukua-bantu mabenesha. (Matayo 6:9, 10) Bu mudi muakulu mukezuke muikale muakulu umuepele wa mu nyuma udi pa buloba, badi bawakula kudi bantu ba matunga onso ne ba makoba onso. Udi ubambuluisha bua kusadila Yehowa  ‘diapa dionso muinshi mua bujitu.’ Nunku badi bamusadila mu buobumue anyi “ne muoyi umue.”​—Mukanda wa Mvidi Mukulu [Mishonyi, MMV].

Kansungansunga kakena ne muaba munkatshi muetu to

3. Ntshinyi tshidi tshituambuluisha bua kusadila Yehowa mu buobumue?

³ Tudi ne dianyisha bua mudiku diumvuangana munkatshi muetu ne bena Kristo netu nansha mutudi tuakula miakulu mishilashilangane. Nansha mutudi tuyisha lumu luimpe lua Bukalenge mu miakulu ya bungi, tudi tusadila Nzambi mu buobumue. (Musambu 133:1) Bidi bienzeka nunku bualu nansha tuetu basombele muaba kayi pa buloba, tudi tuakula muakulu umue mukezuke bua kutumbisha Yehowa.

4. Bua tshinyi kansungansunga kakena ne bua kuikala munkatshi mua bantu ba Nzambi?

⁴ Kakuena ne bua kuikala kansungasunga munkatshi mua bantu ba Nzambi to. Mupostolo Petelo wakaleja bualu ebu patoke pakayishaye mu nzubu mua Kônelio mfumu wa basalayi muena bisamba bia bende mu tshidimu tshia 36 mu bikondo bietu ebi, ne kufikaye ku diamba ne: ‘Bulelela, ndi njingulula ne: Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bienzedi 10:34, 35) Bu mudi bualu ebu bulelela, kansungansunga, mangumba ne disungulujangana kabiena ne muaba mu tshisumbu tshia bena Kristo nansha.

5. Bua tshinyi mbibi bua kuenza mangumba mu tshisumbu?

⁵ Mulongi mukuabu wa mu iniversite wakamba bua malu akamonaye ku Nzubu wa Bukalenge ne: “Pa tshibidilu, bitendelelu bitu bikoka bantu ba dikoba anyi tshisa kampanda. . . . Bantemu ba Yehowa bavua basombe bonso pamue, ki mmu mangumba kampanda to.” Nansha nanku, bamue bena mu tshisumbu tshia mu Kolinto wa kale bavua bakeba matapuluka. Mu dijula matapuluka nunku, bavua baluisha nyuma muimpe wa Nzambi, bualu udi ukeba buobumue ne ditalala. (Galatia 5:22) Tuetu bikale tuenza mangumba mu tshisumbu, tudi tubenga bua kulonda bulombodi bua nyuma muimpe. Kadi tuikale bavuluke mêyi  avua mupostolo Paulo muambile bena Kolinto a se: ‘Bana betu, ndi nnusengelela bua dîna dia Mukalenge Yezu Kristo, bua buonso buenu nuambe dîyi diodimue, ne bua kakuikadi matapuluka munkatshi muenu; kadi bua nuenu nuikale bakajibue tshishiki mu meji amue ne mu lungenyi lumue.’ (1 Kolinto 1:10) Paulo wakakula kabidi bua buobumue mu mukanda wakafundilaye bena Efeso.​—Efeso 4:1-6, 16.

6, 7. Mmubelu kayi wakafila Yakobo pa bidi bitangila disungulujangana, ne mmunyi mutudi mua kutumikila mêyi ende aa?

⁶ Bena Kristo mbalombibue misangu yonso bua kuepuka kansungasunga. (Lomo 2:11) Bu muvua bamue bawetu ba mu tshisumbu tshia mu bidimu lukama bia kumpala batamba kuanyisha bantu babanji, muyidi Yakobo wakafunda ne: “Bana betu, lekelayi kusunguluja bantu mu ditaba dia Mfumu wetu Yezu Kristo muena lumu. Nufuanyikije muntu ubuela mu tshisangilu tshienu muele kakanu ka mpawungi ku munu, muvuale bilamba bibalakana; mupele pende ubuela muvuale bilamba bia manyanu. Nudi nutangila muena bilamba bidi bibalakana awu, numuambila ne: ‘Sombela wewe apa, pa muaba wa buneme’; kadi mupele, nudi numuamba yeye ne: ‘Wewe imana kulu papa,’ nansha ne: ‘Sombela ku makasa anyi eku.’ Kanuena nubueja ditapulukangana munkatshi muenu anyi? Kanuena benze bu bandumbulula ba meji mabi anyi?”​—Yakobo 2:1-4, MMM.

⁷ Pavua babanji bavua kabayi bena Kristo balua mu tshisangilu tshia bena Kristo, bavuale mpeta ya ngolo ne bilamba bibalakana, pamue ne bapele bavua kabayi bena Kristo bavuale bilamba bia manyanu, bavua bangata babanji mu mushindu wa pa buawu. Bavua babapesha “muaba wa buneme” bua kusombabu, kadi bavua bambila bapele bua kuimana kulu anyi kusomba panshi ku makasa a muntu mukuabu. Pabi Nzambi wakafila mulambu wa Yezu Kristo bua kupikula babanji ne bapele kayi ubasunguluja to. (Yobo 34:19; 2 Kolinto 5:14) Nunku tuetu basue kusankisha Yehowa ne kumusadila diapa dionso muinshi mua bujitu, katuena ne bua kusungulujangana anyi ‘kulabidila bantu bua kupeta bintu’ to.​—Yuda 4, 16, MMM.

Tuepuke manunganyi

8. Ntshinyi tshiakenzekela bena Isalele bua manunganyi abu?

⁸ Bua tuetu kumona mua kulama buobumue buetu, ne bua Nzambi kutungunukaye ne kutuanyisha, tudi ne bua kutumikila mubelu wa Paulo wa se: “Enzayi malu onso kanuyi ne manunganyi.” (Filipoi 2:14, 15, MML) Pakapatulabu bena Isalele bapange lulamatu mu bupika mu Ejipitu, bakanungena Mose ne Alona, ne nanku Yehowa Nzambi ke wakanungenabu. Bua bualu ebu, balume bonso ba bidimu 20 too ne pa mutu, pa kumbusha Yoshua ne Kaleba ne bena Lewi, kabakabuela mu Buloba Bulaya nansha, kadi bakafuila mu luendu luakenza bena Isalele bidimu 40 mu tshipela. (Nomba 14:2, 3, 26-30; 1 Kolinto 10:10) Ndifutu kayipu diakapetabu bua manunganyi abu!

9. Ntshinyi tshiakafikila Mîyama bua manunganyi ende?

⁹ Muanda eu udi uleja tshidi mua kuenzekela tshisamba tshijima tshia bena manunganyi. Netuambe tshinyi bua bantu bena manunganyi? Bushuwa, Mîyama yayende wa Mose ne muanabu Alona bakanungana bamba ne: “[Yehowa] mmuyukile anu ne Mozese nkayende anyi? Kena muyukile netu kabidi anyi?” Muyuki eu udi utungunuka wamba ne: “[Yehowa] kumvuaye.” (Nomba 12:1, 2, MMM) Ntshinyi tshiakenzeka? Bu muvua Mîyama umueneka muikale ntunga-mulongo wa didiabakena edi, Nzambi wakamupuekesha milongo. Mmushindu kayi? Wakapia disama dia nsudi ne kushalaye pambelu pa tshitudilu matuku muanda-mutekete too ne pakumvuaye bimpe.​—Nomba 12:9-15.

10, 11. Dibenga kudimukila manunganyi didi mua kufikisha ku tshinyi? Fila tshilejilu.

 ¹⁰ Dinungana kadiena anu didiabakena bua bualu kampanda bubi to. Bantu badi basombele anu manunganyi batu batamba kuangata ngenyi yabu anyi muanzu wabu ne mushinga mupite bungi, badifileja buobu kumpala pamutu pa kufileja Nzambi. Bobu kabayi badimukile lungenyi elu, ludi mua kukebesha matapuluka munkatshi mua bena Kristo nabu ne ludi mua kubapangisha bua kusadila Yehowa diapa dionso muinshi mua bujitu. Bidi nanku bualu bena manunganyi batu misangu mivule badiabakena patoke bela meji ne: bakuabu nebakuate ku tshiabu.

¹¹ Tshilejilu, muanetu kampanda udi mua kubipisha ngenzelu wa miyuki wa mukulu kansanga mu tshisumbu peshi mushindu udiye ukumbaja midimu yende. Tuetu bateleje mudiabakenyi eu, tudi mua kubanga kuela meji bu yeye. Pamu’apa kumpala malu avua mukulu eu wenza kaavua atutonda to, kadi katshia anu batunyanga lungenyi adi atutonda mpindieu. Ndekelu wa bionso, kakuena bualu nansha bumue budi mukulu eu wenza buikala buimpe ku mêsu kuetu to, ne tuetu petu tudi mua kubanga kudiabakena bua bualu buende. Ngikadilu wa mushindu’eu ki mmukumbanyine tshisumbu tshia bantu ba Yehowa to.

12. Ntshinyi tshidi manunganyi mua kuenzela malanda etu ne Nzambi?

¹² Kunungena bantu badi ne mudimu wa kulama tshisumbu tshia mikoko ya Nzambi kudi mua kutufisha ku dibapenda. Manunganyi a nunku anyi dibasendeka bidi mua kunyanga malanda etu ne Yehowa. (Ekesode 22:28) Bapendianganyi badi kabayi badilengeja kabakupiana Bukalenge bua Nzambi to. (1 Kolinto 5:11; 6:10) Muyidi Yuda wakafunda bua bena manunganyi bavua “bapetula bukokeshi . . . , bapenda [bena] butumbi” anyi balume badi balombola tshisumbu. (Yuda 8, MML) Nzambi kakanyisha bena manunganyi aba to, ne tuetu petu tudi tuleja meji patudi tuepuka njila wabu mubi eu.

13. Bua tshinyi midiabakenu yonso ki mmibi?

¹³ Bushuwa, midiabakenu yonso ki mmibi ku mêsu kua Nzambi to. Yehowa kakalengulula “muadi” uvuabu badila bua Sodoma ne Amola to, kadi wakabutula bimenga ebi bibi. (Genese 18:20, 21; 19:24, 25) Mu Yelushalema, matuku makese kunyima kua Pentekoste wa mu 33 bikondo bietu ebi, ‘bena Yuda bakadi bakula muakulu wa bena Gelika [bakanungana] bakajana bena Ebelu ne: pa kuabanyangana kua bintu ku dituku ku dituku, badi bapua muoyo bua bakaji betu ba mu lufuila.’ Nunku “bapostolo dikumi ne babidi” bakalongolola muanda eu pakatekabu “balume muanda mutekete [bavua] ne lumu luimpe” bua kutangilabu “[mudimu wa mushinga, NW]” eu wa diabanya biakudia. (Bienzedi 6:1-6) Bakulu ba mu tshikondo tshietu etshi kabena ne bua ‘kujibika mu matshi abu’ bua kubenga kuteleja midiabakenu miakane to. (Nsumuinu 21:13) Ne pamutu pa kubipisha bena Kristo nabu, bakulu badi ne bua kuikala babakankamija ne babakolesha ku muoyo.​—1 Kolinto 8:1.

14. Bua tuetu kuepuka manunganyi, nngikadilu kayi utudi ne bua kutamba kuikala nende?

¹⁴ Tuetu bonso tudi ne bua kuepuka manunganyi, bualu lungenyi lua kudiabakena ludi mua kunyanga muntu mu nyuma. Ludi mua kunyanga buobumue buetu. Pamutu pa kuikala ne lungenyi lua nunku, tuenze misangu yonso bua nyuma muimpe apatule dinanga munda muetu. (Galatia 5:22) Kutumikila ‘mukenji wa butumbi wa dinanga’ nekutuambuluishe bua kutungunuka ne kusadila Yehowa diapa dionso muinshi mua bujitu.​—Yakobo 2:8; 1 Kolinto 13:4-8; 1 Petelo 4:8.

Tuepuke dishiminyinangana malu

15. Ndishilangana kayi didi pankatshi pa bijanu ne dishiminyinangana malu?

¹⁵ Bu mudi manunganyi mua kufikisha muntu ku bijanu bibi, tudi ne bua kudimukila malu atudi tuamba. Bijanu ndilola malu a bantu bua dipanga tshia kuenza. Kadi dishiminyinangana malu ndiamba malu a mafi ne tshipatshila tshia kunyangila muntu mukuabu lumu. Miyuki ya mushindu’eu mmibi ne ki nya buena Kristo to. Ke bualu kayi Nzambi wakambila bena Isalele ne: “Kanuendakanyi bu bena mukoso munkatshi mua bantu benu.”​—Lewitiki 19:16.

16. Ntshinyi tshiakamba Paulo bua bamue bena bijanu, ne mmunyi mutudi ne bua kutumikila mubelu wende?

¹⁶ Bu mudi dilokota mianda ya bende mua kufikisha muntu ku dishiminyinangana malu, Paulo wakatandisha patoke bamue bena bijanu ba-kashiku pepepe. Kunyima kua yeye mumane kuakula bua bakamba bavua bakanyine bua tshisumbu tshibambuluishe, wakamba bua bakamba bavua  balonge mua ‘kuikala bafuba, bendakana ku nzubu ne ku nzubu; ne kabayi bayila mua kuikala anu ne bufuba nkayabu, kadi mua kuikala bena mukoso ne bena bienzenza, bakula mêyi adi kaayi mimpe bua kuakula.’ (1 Timote 5:11-15) Mukaji muena Kristo yeye mumone ne: udi ne butekete pa bidi bitangila miyuki idi mua kumufikisha ku dishiminyinangana malu, udi ne bua kuteleja mubelu wa Paulo wa ‘kuikala muena kanemu, kayi ne bunsonge.’ (1 Timote 3:11) Nansha balume bena Kristo badi pabu ne bua kuepuka bijanu bibi.​—Nsumuinu 10:19.

Tulekele kutuila bakuabu mushinga!

17, 18. (a) Ntshinyi tshiakamba Yezu bua dituila bana betu mushinga? (b) Mmunyi mutudi mua kutumikila mêyi a Yezu adi atangila dituila bakuabu mushinga?

¹⁷ Nansha tuetu katuyi tushiminyinangana malu, pamu’apa tudi ne bua kudienzeja muetu muonso bua kuepuka dituila bakuabu mushinga. Yezu wakabenga tshilele etshi pakambaye ne: “Kanutuidi bakuabo mushinga, bua kabanutuidi penu. Mushinga unuikala batuilangane ke wanutuilabo kabidi, tshipimu tshinuikala bapime natshio bakuabo ke tshianupimabo natshio penu. Mmunyi muudi umona tshisosa tshidi mu disu dia muanenu, kuyi umona mukamba udi mu disu diebe? Kabidi, mmunyi muudi mua kuamba muanenu ne: ‘Lekela nkupatule kasosa mu disu,’ wewe pebe ne mukamba mu diebe disu! Wewe mudingidiji wa malu, anji kumbusha mukamba udi mu diebe disu, pashishe neumone bimpe mua kupatula kasosa kadi mu disu dia muanenu.”​—Matayo 7:1-5, MMM.

¹⁸ Katuena ne bua kudidinga bua kumbusha “kasosa” mu dîsu dia muanetu bua kumuambuluisha patutshidi tuetu bine bikale ne “mukamba” wa mu tshimfuanyi udi utupangisha bua kumona bimpe nansha. Tuetu bikale tuanyisha menemene luse lua Nzambi, katuakuikala ne tshilele tshia kutuila bana betu ba mu nyuma balume ne bakaji mushinga to. Mmunyi mutudi mua kufika ku dibanyisha mudi Tatu wetu wa mu diulu ubanyisha? Ke bualu kayi Yezu wakatudimuija bua kubenga ‘kutuila bakuabu mushinga bua kabatutuidi petu’! Dikonkonona bilema bietu bimpebimpe didi ne bua kutukanda bua kutuila bakuabu mushinga wikala Nzambi kayi mua kuanyisha.

Batekete kadi bikale ne bunême

19. Mmunyi mutudi ne bua kumona bena Kristo netu?

¹⁹ Bituikala badisuike bua kusadila Nzambi diapa dionso muinshi mua bujitu ne bena Kristo  netu, katuakuepuka anu dituilangana mushinga patupu to. Netuikale ba kumpala mu dibambika bunême. (Lomo 12:10) Netukebe disanka diabu pamutu pa dietu tuetu, ne netubenzele malu adi mua kubambuluisha. (Yone 13:12-17; 1 Kolinto 10:24) Mmunyi mutudi mua kulama lungenyi luimpe lua nunku? Mmu dishala bavuluke ne: muena Kristo yonso udi ne mushinga wa bungi ku mêsu kua Yehowa, ne se: tudi dijinga ne bana betu, anu mudi tshitupa tshionso tshia mubidi wa muntu tshikale dijinga ne bitupa bikuabu.​—1 Kolinto 12:14-27.

20, 21. Ntshinyi tshidi mêyi a mu 2 Timote 2:20, 21 umvuija buetu tuetu?

²⁰ Bushuwa, bena Kristo mmabungu matekete a dîma adibu bapeshe mudimu wa buambi udi muikale tshiuma tshia butumbi. (2 Kolinto 4:7) Tuetu basue kukumbaja mudimu wa tshijila eu bua kutumbisha Yehowa, tudi ne bua kuikala ne ngikadilu muimpe ku mêsu kuende ne kua Muanende. Tudi mua kushala dibungu dia bunême dienza Nzambi nadi mudimu anu tuetu bikale bakezuke mu nyuma ne bashale ne bikadilu bilenga. Paulo wakafunda bua muanda eu ne: “Mu nzubu munene kamutu amu ngesu ya mpawungi ne ya tshiamu tshitoke, mudi kabidi ya mitshi ne ya dibumba. Imue nya kuenza nayo midimu ya pa buayo, mikuabo nya midimu ya tshianana. Nenku, pikala muntu udilama ku bilema bindi muambe abio, neikale bu luesu lua buneme, lua tshijila, lulengelela Mfumu, lua kuenza nalu mudimu mulenga wonso.”​—2 Timote 2:20, 21, MMM.

²¹ Bantu badi kabayi ne ngikadilu udi umvuangana ne malu adi Nzambi ulomba badi ‘ngesu ya mudimu wa tshianana.’ Kadi patudi tulonda njila udi Nzambi musue, tudi tulua ‘ngesu ya buneme, ya tshijila, ilengelela Mfumu, ya kuenza nayi mudimu mulenga wonso.’ Nunku tudi ne bua kudiebeja ne: ‘Ndiku “luesu lua buneme” anyi? Ndiku nsaka bena Kristo nanyi ku malu mimpe anyi? Ndiku ngenza mudimu diapa dionso muinshi mua bujitu ne batendeledi nanyi badi mu tshisumbu tshietu anyi?’

Tutungunukayi ne kusadila Yehowa diapa dionso muinshi mua bujitu

22. Ntshinyi tshitudi mua kufuanyikija ne tshisumbu tshia bena Kristo?

²² Tshisumbu tshia bena Kristo tshidi bu dîku. Padi bena mu dîku bonso batendelela Yehowa, mu dîku mudi nsombelu wa dinanga ne wa musangelu ne lungenyi lua diambuluishangana. Mu dîku mudi mua kuikala bantu ba ngikadilu mishilangane, kadi yonso wa kudibu udi ne wende muaba wa bunême. Ke mudibi kabidi mu tshisumbu. Nansha mutudi tuetu bonso bashilangane ne bapange bupuangane, Nzambi mmutukoke kudiye ku butuangaji bua Kristo. (Yone 6:44; 14:6) Yehowa ne Yezu mbatunange, ke bualu kayi tudi ne bua kulejangana dinanga anu bu mutu mu dîku mudi buobumue.​—1 Yone 4:7-11.

23. Ntshinyi tshitudi ne bua kuvuluka ne tshitudi ne bua kuikala badisuike bua kuenza?

²³ Tshisumbu tshia bena Kristo (tshidi tshifuane dîku) mmuaba utudi tutekemena bua kusangana bantu ba lulamatu. Mupostolo Paulo wakafunda ne: “Ndi musue bua bantu balume basambile miaba yonso, bele bianza [bia lulamatu] mulu bua kusambila, kabayi ne tshiji nansha matandu.” (1 Timote 2:8, MMM) Nunku Paulo wakaleja diumvuangana didi pankatshi pa lulamatu ne masambila a patoke “miaba yonso” idi bena Kristo badisangisha. Anu balume ba lulamatu ke badi ne bua kuimanyina tshisumbu mu masambila a patoke. Bushuwa, Nzambi mmusue bua tuetu buonso tulejangane lulamatu. (Muambi 12:13, 14) Nunku tuikalayi badisuike bua kuenza mudimu mu diumvuangana, anu bu bitupa bia mubidi wa muntu. Tusadilayi kabidi Nzambi mu buobumue mu dîku dia batendeledi ba Yehowa. Tshidi ne mushinga menemene ntshia se: tuikalayi anu bavuluke se: tudi dijinga ne bana betu, ne tuetu batungunuke ne kusadila Yehowa diapa dionso muinshi mua bujitu, neatuanyishe ne ku ndekelu neatupeshe mabenesha.

Newandamune munyi?

• Ntshinyi tshidi tshiambuluisha bantu ba Yehowa bua kumusadila diapa dionso muinshi mua bujitu?

• Bua tshinyi bena Kristo badi bepuka kansungasunga?

• Ntshinyi tshidi tshikuambishisha ne: manunganyi mmabi?

• Bua tshinyi tudi ne bua kuambika bena Kristo netu bunême?

[Nkonko ya dilonga]

[Tshimfuanyi mu dibeji 15]

Petelo wakajingulula ne: ‘Nzambi kêna ne kansungasunga’

[Tshimfuanyi mu dibeji 16]

Udi mumanye tshivua Nzambi mupuekeshile Mîyama milongo anyi?

[Tshimfuanyi mu dibeji 18]

Bena Kristo ba lulamatu badi basadila Yehowa ne disanka diapa dionso muinshi mua bujitu