Malu a mu nsombelu

Ditunga dituvua tuenzela mudimu wa bu-misionere diakalua bu dietu

MALONDA KUDI DICK WALDRON

Bivua mu Dia lumingu mu mapingaja mu ngondo wa tshitema, tshidimu tshia 1953. Tutshivua tufikilaku mu ditunga dia Sud-Ouest africain (lelu Namibie). Katuyi banji kukumbaja lumingu mu ditunga edi, tuvua ne bua kulombola tshisangilu tshia patoke mu Windhoek, tshimenga tshikulu tshia ditunga. Ntshinyi tshiakatusaka bua kumuka mu ditunga dia Australie ne kuya mu ditunga edi dia mu Afrike? Meme ne mukajanyi, popamue ne bansongakaji bakuabu basatu tuakafikamu bikale ba-misionere ba lumu luimpe lua Bukalenge bua Nzambi.​—Matayo 24:14.

NGAKALEDIBUA mu tshitupa tshia buloba tshia kulekule mu Australie, mu tshidimu tshia 1914 tshiakenzeka malu makuate buôwa. Mvua ne bidimu dikumi ne pamutu pavua malu a mpetu manyanguke bikole, ne mvua panyi ne bujitu bua kudisha dîku dietu. Kakuvua mudimu to, kadi ngakadienzela wanyi mushindu wa kuikala kukuata nyama ya nsenji, ivua bungi tshianana mu Australie. Nunku, munyinyi wa nsenji uvua tshimue tshia ku biakudia bimvua panyi ngambuluisha nabi dîku dietu pa tshibidilu.

Pakabanga Mvita Mibidi ya Buloba bujima mu 1939, ngakaditatshisha meme e kubanga kuenza mudimu mu kumpanyi wa diambula bantu mu tuwulu ne mu bise mu tshimenga tshia Melbourne. Kuvua bantu batue bu ku 700 mijima bavua benza mudimu mu bise bashitulukangana, ne musangu onso umvua nshintuluka, mvua mpetangana ne kanyemesha anyi mufutshishi mukuabu wa tike mu kawulu. Mvua ne tshibidilu tshia kubebeja ne: “Utu mu nzambi kayi?” ne mbalomba bua kungumvuijabu malongesha a mu tshitendelelu tshiabu. Muntu umuepele wakampesha mandamuna mimpe uvua Ntemu wa Yehowa mukuabu nunku. Wakangumvuija mukenji wa mu Bible wa mparadizu wa pa buloba, muikala bantu  badi batshina Nzambi ne bua kusombela bua kashidi.​—Musambu 37:29.

Anu mu tshikondo tshimue tshimue atshi, Mamu wakapetangana pende ne Bantemu ba Yehowa. Misangu ya bungi, pamvua mfuma ku mudimu ngalukila ku nzubu, mvua nsangana biakudia ne tshibejibeji tshia Consolation (Réveillez-vous! lelu) bingindile. Malu amvua mbalamu avua ansankisha bikole. Pakapita matuku, ngakamona ne: etshi ke tshivua tshitendelelu tshilelela, meme kubanga kubuela mu bisangilu bia tshisumbu ne kulua kutambula mu ngondo muitanu wa mu 1940.

Mu Melbourne muvua nzubu wa bampanda-njila uvua bana betu bena mudimu ba ku dîba ne ku dîba batue ku 25 basombele. Ngakaya kusombelamu nabu. Dituku dionso, mvua nteleja malu avuabu bamona mu mudimu wa buambi ne ngakapeta dijinga dikole dia kulua panyi mpanda-njila. Ndekelu wa bionso, ngakalomba bua kuenza mudimu wa bumpanda-njila. Bakangitabila ne kumbikilabu bua kuenza mudimu ku biro bia filiale wa Bantemu ba Yehowa wa mu Australie. Meme e kulua muena mu dîku dia Betele.

Buloko ne dikandika dia mudimu wetu

Umue wa ku midimu ingakenza ku Betele uvua wa kupanda mabaya. Tuvua tupanda mabaya bua kuenza makala a kuenza nawu kasolonyi. Bavua benza mudimu ne kasolonyi aka bua kuendesha mashinyi ku Betele bualu kakuvua kasolonyi ka bungi ka kusumba to. Tuvua bantu 12 bavua benza mudimu au wa dipanda mabaya, bonso buetu bikale mu tshikondo tshia kukuatshibua ku busalayi. Abidi mmale asatu mmîpi, bakatufundila buloko bualu mu diumvuangana ne tshidi Bible ulongesha, tuakabenga bua kuya ku busalayi. (Yeshaya 2:4) Bakatutuma ku madimi a buloko kampanda bua kutuenzejabu midimu mikole. Mmudimu kayi wakatupeshabu? Bualu bua dikema, kuinaku tuvua ne bua kupanda mabaya, mudimu mene uvuabu batulongeshe ku Betele!

Bua mushindu utuvua tuenze mudimu au wa kupanda mabaya, mulombodi wa buloko wakatupesha Bible ne mikanda yetu ya malu a mu Bible, nansha muvuabu bakandike buosha ne munu muiku bua tuetu kuikala ne mikanda ayi. Ke tshikondo tshingakapeta dilongesha dia mushinga mukole pa malanda ne bantu. Pamvua ngenza mudimu ku Betele, kuvua muanetu mukuabu umvua tshiyi mpetangana nende to. Wende ngenzelu wa malu kavuaku upetangana ne wanyi nansha kakese. Kadi nudi bamanye uvuabu bangele nende mu kazubu ka buloko kamue anyi? Nyeye muanetu au. Mpindieu tuakapeta mushindu wa kumanyangana nende bimpe, malanda etu e kukolawu, tuakalua balunda banene ne bulunda buetu abu kulala kuboboka.

Mu kupita kua matuku, bakakandika mudimu wa Bantemu ba Yehowa mu Australie. Bakanyenga makuta onso, ne bana betu ba ku Betele bavua anu ne tukuta tukese. Dituku dikuabu, umue wa kudibu wakalua kundi ne kungambila ne: “Dick, ndi musue kuya kuyisha mu tshimenga, kadi tshiena ne bisabata to, ndi anu ne bisabata bia bikumba bia mudimu.” Ngakasanka bua kumuambuluisha, ne wakaya mu tshimenga muvuale bisabata bianyi.

Kunyima, mukenji wakalua ne: mbamukuate bamuele mu buloko bualu uvua uyisha. Tshiakadikanda bua kumutumina ka-mukanda kavua ne mêyi aa: “Bualu buebe budi buntonda. Ndi ne disanka bua mumvua tshiyi muele bisabata bianyi.” Kadi matuku ne apite, bakankuata tshiakabidi ne kungelabu mu buloko bualu ngakabenga bua kubuelakana mu malu a tshididi. Pakandekelabu, bakampesha mudimu wa kutangila madimi avua apatula biakudia bia dîku dia Betele. Mu tshikondo atshi, tukavua batshimune tshilumbu tshituvua natshi ku tubadi ne kuitabilabu Bantemu ba Yehowa bua kuenza midimu yabu.

Ndi nsela muambi wa lumu luimpe wa tshisumi

Pamvua ku madimi, ngakabanga kuela meji bua kusela ne ngakabanga kumona Coralie Clogan, muanetu wa bakaji uvua mpanda-njila unsankisha bikole. Kakuende wa Coralie (mamuende wa mamuende) ke uvua wa kumpala mu dîku diabu bua kuitaba mukenji wa mu Bible. Pakavuaye mikolo ku tshina, wakambila Mamu Vera, mamuende wa Coralie ne: “Kolesha bana bebe bua banange Nzambi ne bamusadile, dimue dituku netupetangane mu Mparadizu pa buloba.” Kunyima, pakalua mpanda-njila kampanda kumbelu kua Mamu Vera ne broshire wa Des millions de personnes actuellement vivantes ne mourront jamais, wakatuadija kumvua mêyi au akamuambilabu kudi kaku mukaji. Broshire au wakatuisha Mamu Vera ne: disua dia Nzambi didi dia se: bantu bapete  muoyo mu mparadizu pa buloba. (Buakabuluibua 21:4) Wakatambula ku ntuadijilu kua bidimu bia 1930 ne anu muvua mamuende mumukankamije, wakambuluisha bana bende ba bakaji basatu: Lucy, Jean ne Coralie bua kushalabu banange Nzambi. Kadi tatuende wa Coralie wakabenga kubengelamu bua dîku diende kadinangi malu a Nzambi to, anu muvua Yezu mudianjile kumanyisha ne: nebienzeke mu mêku.​—Matayo 10:34-36.

Dîku dia ba Clogan divua ne tshipedi tshia kuimba, muana yonso uvua ne tshiende tshisanji kampanda tshivuaye mumanye mua kuimba. Coralie uvua wimba tshisanji tshia violon, ne mu 1939 pavuaye ne bidimu 15 wakapeta dipoloma dia mijiki. Dibudika dia Mvita Mibidi ya Buloba bujima diakafikisha Coralie ku diela meji ne muoyo mujima bua matuku ende atshivua alua. Uvua mu tshikondo tshia yeye kusungula tshivuaye ne bua kuenza ne muoyo wende. Ku lumue luseke, kuvua mushindu wa yeye kupeta mudimu muimpe mu malu a mijiki. Bakavua bamane kumubikila bua kuimba mu tshisumbu tshinene tshia bimbi ba mijiki tshia mu Melbourne. Ku lukuabu luseke, uvua mua kufila dîba diende ku mudimu munene wa kuyisha mukenji wa Bukalenge. Panyima pa dielangana meji a bungi, Coralie ne ba yayende babidi bakatambula mu 1940 ne kudilongololabu bua kutuadija mudimu wa kuyisha lumu luimpe ku dîba ne ku dîba.

Anu matuku makese akatuadija Coralie kuela meji bua kuenza mudimu wa ku dîba ne ku dîba au, Muanetu Lloyd Barry, umue wa ku balombodi ba mudimu, uvua mufumine ku Betele wa mu Australie ne wakalua pashishe muena mu Kasumbu Kaludiki ka Bantemu ba Yehowa, wakayikila nende. Utshivua ufumina ku dienza muyuki mu Melbourne pakambilaye Coralie ne: “Ndi mpingana ku Betele. Bua tshinyi kuena mua kupingana nanyi diatshimue mu kawulu bua ulue pebe muena mu dîku dia Betele?” Coralie wakitaba ne disanka dionso.

Coralie ne bana betu bakuabu ba bakaji ba ku Betele bakambuluisha bikole bua kupetesha bana betu ba mu Australie mikanda yetu ya malu a mu Bible tshikondo tshivua mvita mikutuke atshi tshivuabu bakandike mudimu wetu. Bobu ke bakenza mudimu wa kupatula mikanda ku biamu, ku bulombodi bua Muanetu Malcolm Vale. Mukanda wa The New World (Bulongolodi bupiabupia) ne wa Children (Bana) yakapatuka, ne nimero yonso ya Tshibumba tshia Nsentedi yakapatuka munkatshi mua bidimu abi bipite pa bibidi bivuabu bakandike mudimu wetu.

Bakashintulula miaba ya kupatuila mikanda misangu mitue ku 15 bua kunyema bampulushi. Musangu mukuabu, bavua bapatula mikanda ya malu a mu Bible muinshi mua nzubu kampanda uvuabu bapatuila mikanda ya mushindu mukuabu bua kudingakaja. Muanetu wa bakaji uvua ku muaba wa kuakidila bantu uvua utua mbote uvua udidisha ngonga uvua muinshi mua nzubu pavuaku kumueka njiwu kampanda bua bana betu ba bakaji bavua muinshi amu kusokokabu mikanda kumpala kua muntu kubuela bua kukenketa bivuamu.

Dimue dituku pavua bampulushi munkatshi mua dikenketa mu nzubu amu, bamue bana betu ba bakaji bakumvua buôwa pakamonabu ne: kuvua tshibejibeji tshimue tshia Tshibumba tshia Nsentedi tshivua tshishale tshimueneke bimpe pa mesa. Mpulushi wakabuela e kuteka tshibuta tshiende anu pa mutu pa Tshibumba tshia Nsentedi atshi ne kutuadijaye dikalakasa mu nzubu amu. Pakapangilaye kupeta tshintu, wakambula tshibuta tshiende ne kupatukaye!

Kunyima kua bamane kutuanyishila tshiakabidi bua kuenza mudimu wetu ne bapingajile bana betu nzubu wa Biro bia filiale, bakatuma ba bungi ba kudibu mu bumpanda-njila bua pa buabu. Ke tshikondo tshiakitaba Coralie ku budisuile buonso bua kuya mu tshimenga tshia Glen Innes. Ngakamulondamu patuakaselangana mu dituku dimue dia ngondo wa kumpala, tshidimu tshia 1948. Patuakumukamu, mukavua tshisumbu tshinene.

 Pashishe bakatutuma mu tshimenga tshia Rockhampton, kadi katuakapeta nzubu wa kusombelamu to. Ke tuetu kuasa ntenta mu katupa ka buloba kavua mu madimi a muntu mukuabu uvua musankidile bulelela. Tuakasomba mu ntenta au ngondo tshitema. Tuvua mua kusombamu matuku a bungi, kadi pakalua tshikondo tshia mvula, tshipepele tshikole tshiakatula ntenta ne mvula mukole wakaya nende.

Badi batutuma mu ditunga dia ku babende

Patuvua mu Rockhampton, bakatubikila bua kubuela mu kalasa ka 19 ka Gilada, Tshilongelu tshia Watchtower bua kulonga mudimu wa bu-misionere. Ke mushindu uvuabu batutume (patuakajikija kalasa aku mu 1952) mu ditunga divuabu babikila ne: Sud-Ouest africain.

Diakamue, balombodi ba bitendelelu ba Bukua-Buena-Kristo bakaleja muvuabu kabayi banyishe mudimu wetu wa bu-misionere. Dia lumingu dionso pavuabu badisangisha, munkatshi mua mbingu isambombo mijima, bakadimuija bisumbu biabu bua bualu buetu. Bakambila bantu bua kabatukanguidi bibi ne kabatuitabidi bua kubabadila Bible to, bualu bavua mua kupambuka. Mu tshitupa kampanda, tuakashila bantu mikanda ya bungi, kadi mukulu wa tshitendelelu tshiabu wakatulonda ku nzubu ne ku nzubu ne yeye kuyangata. Dinga dituku patuvua tuyukila ne mukulu au mu nzubu wende wa kubadila mikanda, tuakamona ne: uvua ne mikanda yetu ya bungi.

Matuku makese panyima bamfumu ba mbulamatadi bakatuadija pabu kutuma ntema ku midimu yetu. Kakuyi mpata, balalula kudi balombodi ba bitendelelu, bakatubanda ne: tuvua mu luidi lumue ne ba-koministe. Ke bualu kayi bakangata mishonyi ya ku mitu ya minu yetu ya ku bianza ne kuelabu bamue ba ku bantu batuvua tuyukila nabu nkonko. Nansha muvuaku buluishi ebu, bungi bua bantu bavua babuela mu bisangilu bietu buvua buenda anu buvula.

Kutuadijila anu ku difika dietu, tuakapeta dijinga dikole dia kutangalaja mukenji wa mu Bible kudi bantu ba mu tshisa tshia ba-Ovambo, ba-Herero ne tshia ba-Nama. Kadi, kabivua bipepele to. Mu tshikondo atshi, ditunga dia Sud-Ouest africain diakashala ku bukokeshi bua mbulamatadi uvua kayi musue bafike wa ditunga dia Afrike wa ku Sud. Bu mutuvua batoke, kabakatuitabila bua kuyisha mu bitupa bia bafike kakuyi dianyisha dia mbulamatadi to. Tuakafundila bena mbulamatadi mikanda ya bungi, kadi bakabenga bua kutuanyishila.

Kunyima kua tuetu bamane kuenza bidimu bibidi mu ditunga divuabu batutume, bualu kampanda butuvua katuyi belele meji buakenzeka. Coralie wakimita. Mu ngondo wa dikumi mu 1955 muanetu wa bakaji Charlotte wakaledibua. Nansha mutuvua katuyi mua kutungunuka kabidi ne kuenza mudimu wa bu-misionere, ngakapeta mudimu wa mêba makese ne ngakatungunuka ne kuenza bumpanda-njila munkatshi mua matuku makese.

Diandamuna dia masambila etu

Tuakapeta lutatu lukuabu mu 1960. Coralie wakapeta mukanda uvua uleja ne: mamuende uvua usama bikole, ne yeye kayi muya kuabu bua kumona mamuende, kavua mua kumumona  kabidi to. Ke tuetu kudilongolola bua kumuka mu Sud-Ouest africain ne kupingana mu Australie. Anu lumingu lumue lutuvua ne bua kumuka alu, ngakapeta dianyisha dia kudi mbulamatadi dia kubuela mu tshitupa tshia Katutura muvua bafike basombele. Ntshinyi tshituvua mua kuenza mpindieu? Kupingaja mukanda wa dianyisha kunyima kua tuetu bamane kuluangana bidimu muanda-mutekete bua kuupeta anyi? Bivua bipepele bua kuela meji ne: bakuabu bavua mua kutungunuka ne mudimu utuvua batuadije. Kadi edi kadivua dibenesha dia kudi Yehowa, diandamuna ku masambila etu anyi?

Ngakangata dipangadika ne lukasa luonso. Meme mvua ne bua kushala, bualu bu tuetu mua kuya bonso mu Australie, tuvua mua kulua kupangila bua kupeta mikanda ivua mua kutuanyishila bua kushala basombele mu ditunga. Dituku diakalonda, ngakashipa muaba umvua mulamishe mu mazuwa ne kutuma Coralie ne Charlotte mu Australie mu dikisha dia matuku mavule.

Pavuabu kabayipu, ngakabanga kuyisha bena mu tshitupa tshia bafike atshi. Bakasankidila bulelela bikole. Pakapingana Coralie ne Charlotte, bantu ndambu ba mu tshitupa tshia bafike bakavua batuadija kubuela mu bisangilu bietu.

Dîba adi mvua ne vuatire wa kale mumvua ngambuila bantu bavua basankidila bulelela bua kuya nabu mu bisangilu. Mvua ngenza nya misangu inayi ta itanu bua tshisangilu tshionso, ngambula bantu muanda-mutekete, muanda-mukulu peshi tshitema ku musangu. Pavua muntu wa ndekelu upatuka, Coralie uvua ungembeja mu bilele ne: “Nkushale bantu bungi kayi muinshi mua nkuasa?”

Bua kuyisha bimpe bivua bikengela kuikala ne mikanda mu muakulu wa bena kalaba. Nunku ngakapeta diakalenga dia kulongolola mudimu wa dikudimuna trakte wa Life in a New World (Muoyo mu bulongolodi bupiabupia) mu miakulu ya mu ditunga edi: Herero, Nama, Ndonga ne Kwanyama. Bakudimunyi bavua bantu bamanye mukanda batuvua tulonga nabu Bible, kadi mvua ngenza nabu mudimu diatshimue bua kushindika se: bavua bakudimune tshiambilu tshionso bimpe. Muakulu wa Nama udi ne miaku mikese. Tshilejilu, mvua nteta mua kukudimuna miaku eyi: “Ku ntuadijilu Adama uvua muntu mupuangane.” Mukudimunyi wakadikuanya mu mutu ne kuamba ne: kavua uvuluka muaku wa mu muakulu wa Nama uvua umvuija “mupuangane” to. Ndekelu wa bionso wakamba ne: “Ngaupetshi. Ku ntuadijilu Adama uvua bu tshimuma tshipie.”

Tudi ne disanka mu ditunga divuabu batutume

Kukadi mpindieu bidimu bitue ku 49 katshia tuafika mu ditunga edi didibu babikila lelu ne: Namibie. Kabitshiena kabidi bikengela kupeta dianyisha bua kubuela miaba idi bafike basombele to. Mbulamatadi wa ditunga dia Namibie katu usunguluja batoke ne bafike to. Lelu eu, tudi ne bisumbu binene binayi mu Windhoek bidi bidisangishila mu Nzubu ya Bukalenge mimpe mitambe.

Tutu anu tuvuluka mêyi atuakumvua ku Gilada ne: “Nuvuije ditunga didibu banutume bu dienu.” Bua mushindu udi Yehowa mulombole malu, tudi bashindike ne: disua diende divua dia se: ditunga dia ku babende edi dilue dietu. Tudi bafike ku dinanga bana betu ne bibidilu biabu bishilashilangane. Tudi baseke nabu mu masanka abu ne badile nabu mu makenga abu. Bamue ba ku bapiabapia batuvua tufinya mu vuatire wetu bua kuya mu bisangilu bakadi mpindieu makunji mu bisumbu biabu. Patuakafika mu ditunga dinene edi mu 1953, muvua anu bamanyishi bashadile ku dikumi bavua bayisha lumu luimpe. Lelu bungi bukese butuakatuadija nabu ebu mbuvule bupite pa 1 200. Bilondeshile dilaya diende, Yehowa mmukoleshe bituvua tuetu ne bakuabu ‘bakune ne bamiamina mâyi.’​—1 Kolinto 3:6.

Patudi tutangila kunyima mu bidimu bungibi bia mudimu utudi benzela Nzambi, kumpala mu Australie ne mpindieu mu Namibie, meme ne Coralie tudi ne disanka dia bungi. Tudi batekemene ne tudi tusambila bua Yehowa atungunuke ne kutupesha bukole bua kuenza disua diende mpindieu ne bua kashidi.

[Tshimfuanyi mu mabeji 26, 27]

Batangile kuvuabu batutume mu tshimenga tshia Rockhampton, mu Australie

[Tshimfuanyi mu dibeji 27]

Ku tshitudilu tshia mazuwa tuya mu Tshilongelu tshia Gilada

[Tshimfuanyi mu dibeji 28]

Diyisha mu Namibie didi ditusankisha bikole