Ku mesa a kapitene
Ku mesa a kapitene
BANTU ba malu malenga, biakudia bimpe ne mayuki malenga bitu bivuija didia biakudia ku mesa a kapitene mu mazuwa a mâyi bualu budi busankisha bikole. Kadi diyuki kampanda ku mesa a Kapitene Robert Smith, muendeshi wa mazuwa a kumpanyi wa White Star Line, diakambuluisha bua kumvua tshidi didia dinene dia mu nyuma.—Yeshaya 25:6.
Mu 1894, pavuaye ne bidimu 24, Robert wakabanga kuendesha mazuwa a mâyi a mu ditunga dia Écosse (Kinclune of Dundee) bua kuenza luendu luende lua kumpala lua dinyunguluka buloba bujima. Pashishe wakalua muendeshi wa mazuwa a mâyi a kumpanyi wa White Star, bu mudi a Cedric, a Cevic, ne a Runic. * Pavuaye upitshila mu mbuu wa Atlantike ufumina ku New York mutangile ku Liverpool (mu ditunga dia Angleterre) mu amue a ku mazuwa aa, Robert wakakidila Charles Taze Russell ku mesa a kapitene a mu mazuwa aa. Malu akayikilabu ne Russell akajula Robert dijinga dia kumanya mukenji wa mu Bible. Wakangata ne disanka mikanda ya Études des Écritures yakamupeshabu kudi Russell bua kumuambuluisha bua kulongaye malu a bungi.
Russel wakashala anu umufundila mikanda, ke tshiakakolesha dijinga dia Robert dia kumanya malu a bungi a mu Bible. Robert wakamanyisha mukajende dimanya edi divuaye ufuma ku dipeta. Mutantshi eu bonso babidi kuluabu Balongi ba Bible ba tshisumi, ke muvuabu babikila Bantemu ba Yehowa tshikondo atshi. Pashishe Robert wakapeta diakalenga dia kuenza miyuki ya mu Bible. Tshilejilu, mu tshimenga tshia Brisbane (mu ditunga dia Australie), wakakula bua “Buanga [bua] mu Gilada” ne wakaleja mudi Dîyi dia Nzambi dikale ne mukenji udi “ujikija masama onso adi pa buloba.” Pakapinganaye mu Angleterre, mukajende ne bana bende batekete bakamuambuluisha bua kuenda kuleja “Foto-Drama wa bufuki,” bela matadi a mumvuija a Russell pamue ne bimfuanyi bivuabu baleja.
Robert wakashila bana bende bumpianyi bua bulelela bua Bukalenge buvuaye mupete. Lelu, kunyima kua bipungu bitanu, bena mu dîku diende 18 mbadifile mu dimanyisha bantu bakuabu lumu luimpe, bikale ne dianyisha bua biakudia bivuabu bateke ku mesa a kapitene.
Mu mikanda yabu ne mu mudimu wabu wa dilongesha Bible, Bantemu ba Yehowa badi bambuluisha bantu pa buloba bujima bua kulongabu malu a mu Bible akasankisha Kapitene Smith. Wewe pebe udi mua kumanya malu au mimpe menemene avua ku mesa a kapitene.
[Mêyi adi kuinshi]
^ tshik. 3 Mazuwa makuabu a mâyi a Titanic, bavua baendesha kudi Kapitene Edward Smith (kavua mulela wa Robert Smith to) pakayawu kudina mu mâyi mu luendu luawu lua kumpala.
[Tshimfuanyi mu dibeji 8]
Robert Smith
[Tshimfuanyi mu dibeji 8]
Charles Russell