Kufila ne tshitudi katuyi mua kukokesha

“NUDI mua kumbikila ne: mulombi wa ka-pa-luse; kabiena bintonda to. Ndi ndombangana makuta bua Yezu.” Mêyi aa a muambi kampanda muena Mishonyi adi aleja dikokangana ditu dijuka bua malu a mfranga ya bitendelelu. Bitendelelu bikadi bishindame bidi bimueneka bikale ne mushindu wa kupeta mueyelu anu padibu belamu mfranga ya bungi. Bidi bikengela kufuta badi babenzela mudimu, kuibaka bitanda ne kubilama, kufila mfranga ya kuenzeja nayi midimu ya dienda diyisha bantu. Mmunyi mudibu mua kupeta mfranga idi ikengedibua bua malu aa?

Bua bitendelelu bia bungi, badi bayipetela mu tshia-dikumi tshidi bantu bafila. Muambi Norman Robertson udi wamba ne: “Difila tshia-dikumi ke mushindu udi Nzambi upetesha makuta a kuenzeja nawu mudimu wa bukalenge buende pa buloba. Ke Wende mushindu udiye ubuejija mpetu idi yambuluisha bua kuyisha Evanjeliyo.” Kayi welakana bua kuvuluija bena kuitabuja bende bujitu budibu nabu bua kufila, udi ubambila ne dishindika dionso ne: ‘Tshia-dikumi ki tshintu tshinudi mua kufila anu bualu nudi natshi to. Mbualu budi buleja butumike. Kubenga kufila tshia-dikumi nkushipa mikenji ya Nzambi patoke. Kudi mumue ne kutula mfranga ya bende.’​—La dîme: le plan de financement de Dieu. (angl.)

Pamu’apa udi witaba ne: kufila mfranga mbualu budi bulombibue mu ntendelelu wa bena Kristo. Kadi, bidiku bikutonda peshi bikubungamija mene padibu balomba anu kulomba mfranga anyi? Inácio Strieder, muena teoloji wa mu ditunga dia Brésil udi ubanda bitendelelu bua mudibi bilomba tshia-dikumi bua “kujikija ntatu yabu” ne udi wamba kabidi ne: tshilele etshi “ntshibengangane ne mikenji, ntshibi ne ndisesuka ku malongesha a ekeleziya.” Udi wamba ne: bua muanda eu: “balofua, bakaji bakamba, bapele badi basombele mu nzubu ya bisasasa, ne aba badi kabayi ne mushindu wa kumona bubi bua muanda eu badi bafika ku diamba se: Nzambi mubalekele ne mbenzejibue bua kupesha ‘muyishi’ wabu mfranga mipite bungi, kadi eku mêku abu buobu atokoka ne nzala.”

Udi mua kudiebeja ne: ‘Bitendelelu bidi bienzeja bantu bua kufila tshia-dikumi bidiku bilonda tshidi Bible wamba bimpe menemene anyi? Peshi bimue bitendelelu bidiku mua kuikala biambila mikoko bua kutshina dinyoka dia kudi Nzambi, bionso abi bua kumona mua kuyinyenga mfranga anyi? Bushuwa, Nzambi udiku muindile bua tuetu kufila ne tshitudi katuyi mua kukokesha anyi?