Nkonko ya babadi

Bilondeshile Buakabuluibua 20:8, tudi mua kuamba ne: nekuikale bantu ba bungi menemene bapambuishabu kudi Satana mu diteta dia ndekelu anyi?

Buakabuluibua 20:8 udi wakula bua mvita ya ndekelu yela Satana bantu bikala pa buloba ku ndekelu kua bukokeshi bua bidimu tshinunu bua Bukalenge bua Masiya. Mvese eu udi wamba bua Satana ne: ‘Nealupuke bua kudingaye bisamba bia ku matengu anayi a buloba, Goga ne Magoga, bua kubisangisha pamue ku mvita, bungi buabu budi bu nsenga ya ku mâyi manene.’

Nansha mudi malu a siyanse maye kumpala, kabatu banji kumanya bungi bua ‘nsenga ya ku mâyi manene’ to. Nanku tudi mua kuamba ne: tshiambilu etshi tshidi tshiumvuija bungi budi kabuyi bumanyike, bungi kabuyi bujingulula. Kadi, tshidi tshiumvuija bungi buvule bua menemene, bupitshidile, kabuyi kubala, peshi anu bungi budi kabuyi bumanyike kadi buikale bupite bungi anyi?

Mu Bible, mbatele tshiambilu tshia ‘bu nsenga ya ku mâyi’ mu mishindu mishilashilangane. Tshilejilu, tudi tubala mu Genese 41:49 ne: ‘Yosefe wakasangisha matete bu bungi bua nsenga ya ku kala kua mâyi manene; akatamba bungi, yeye wakalekela kuabala, kabakamanya mua kuabala.’ Muaba eu mbashindamene pa bungi budi kabuyi kuokesha bua kubala. Bia muomumue, Yehowa wakamba ne: ‘Bu mudibu kabayi mua kubala bintu bia mu diulu ne kabayi mua kuidikija nsenga ya ku mâyi manene, nunku nemvudije tunkanunuina tua Davidi muntu wanyi.’ Anu bu mudibu menemene kabayi mua kubala mitoto ya mu diulu ne nsenga ya ku mâyi manene, ke muikala Yehowa ne bua kukumbaja dilaya diende kudi Davidi.​—Yelemiya 33:22.

Misangu ya bungi tshiambilu tshia ‘nsenga ya ku mâyi manene’ tshitu tshiumvuija bungi buvule, bungi peshi bunene bua menemene budi bukemesha bikole. Ku Gilegala, bena Isalele bakumvua buôwa bua tshiluilu tshia bena Peleshete tshivua tshidisangishe ku Mikemasha, tshivua ne bantu bungi ‘bu nsenga ya ku muelelu kua mâyi manene.’ (1 Samuele 13:5, 6; Balumbuluishi 7:12) Ne ‘Nzambi wakapa Solomo ngenyi ya bungi be ne dijingulula ditambe ne bunene bua mutshima, biakadi bungi bua nsenga ya ku muelelu wa mâyi manene.’ (1 Bakelenge 4:29) Nansha muvua bungi buikale bubandile mu malu onso atudi bakonkone aa, kadi buvua anu ne mikalu.

‘Lusenga lua ku mâyi manene’ ludi kabidi mua kumvuija bungi budi kabuyi bujadika, kabiyi bileja ne: mbungi buvule bua menemene to. Yehowa wakambila Abalahama ne: “Nemvudije ndelanganyi yebe bu mitoto ya kulu ne lusenga lua ku muelelu wa mbu.” (Genese 22:17, MMM) Pakambuluilaye Yakobo (muikulu wa Abalahama) mulayi eu, Yehowa wakatela tshiambilu tshia ‘dimfuenkenya dia buloba,’ tshiakalua Yakobo kubikila kabidi ne: ‘nsenga ya ku kala kua mâyi manene.’ (Genese 28:14; 32:12) Anu bu muakamuenekabi, pa kumusha Yezu Kristo, “ndelanganyi” ya Abalahama anyi dimiinu didi ne bantu 144 000, bavua Yezu mubikile ne: ‘tshisumbu tshikese tshia mikoko.’​—Luka 12:32; Galatia 3:16, 29; Buakabuluibua 7:4; 14:1, 3.

Bilejilu ebi bidi bitulongesha tshinyi? Bidi bitulongesha ne: tshiambilu tshia ‘bu nsenga ya ku mâyi manene’ katshiena tshiumvuija anu bungi budi kabuyi mikalu, bupitshidile menemene to; ne kabatu batshitela misangu yonso anu bua kuakula bua tshintu tshinene peshi tshipite bunene to. Misangu mivule tshitu tshiumvuija bungi budi kabuyi bumanyike kadi buikale buvule. Nanku, kakuena bualu bubi bua kuitaba ne: musumba wa bantomboji bikala ne bua kutua Satana mu nyima mu mvita ya ndekelu yelaye tshisamba tshia Nzambi kawakuikala munene wa mupitshidile to, kadi mukumbanyine ne muvumvuke bua kukebesha njiwu. Nansha nanku, bungi ebu ki mbumanyike mpindieu to.