Tshikondo tshilenga tshia kuikala ne muoyo

PAUDI upeta ntatu, utuku ujinga matuku a malu mimpe a kale anyi? Nanku tangila mêyi a Mukalenge Solomo aa: ‘Kudikonki ne: Matuku a diambedi adi mapite a mpindieu buakane bua tshinyi? Bualu bua kuena ukonka bualu ebu ne meji mimpe.’​—Muambi 7:10.

Bua tshinyi Solomo wakafila mubelu eu? Bualu uvua mumanye ne: kutangila matuku akadi mapite ne meji mimpe mbualu bua mushinga budi buambuluisha bua kumanya mua kutantamena ntatu idiku lelu. Aba badi bajinga matuku a malu mimpe a kale badi mua kupua muoyo ne: matuku au avua pawu mûle tente ne ntatu ne tunyinganyinga, ne nsombelu musangu au kavua anu mulenga menemene to. Amue malu a kale avua mua kuikala mimpe, kadi makuabu kaavua pamu’apa mimpe to. Anu muakamba Solomo, kujinga matuku a kale ki mmuanda wa meji to, bualu katuena mua kupingaja nsombelu ivuaku mu tshikondo tshia kale atshi to.

Kudiku mua kuikala bubi mu dijinga malu a kale anyi? Eyowa, dijinga adi ndibi padidi ditupangisha bua kuikala ne nkatshinkatshi ne bua kuibidilangana ne malu adiku lelu peshi padidi ditupangisha bua kuanyisha tshikondo tshitudi, kuanyisha kabidi ditekemena ditudi nadi.

Bulelela, mpindieu ke tshikondo tshitambe buimpe tshia kuikala ne muoyo nansha mudi ntatu yenda ivula pa buloba. Bua tshinyi? Bualu disua dia Nzambi pa bidi bitangila buloba ne dipeta dia mabenesha afila Bukalenge buende bua ditalala dikadi pa kukumbana. Bible udi ulaya ne: ‘Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ (Buakabuluibua 21:4) Mu tshikondo atshi, bu muikale nsombelu mimpe menemene, muntu nansha umue kakujinga matuku a malu mimpe a kale nansha.