“Bena meji basatu” bavua banganyi?

Bimfuanyi bia diledibua dia Yezu bitu pa tshibidilu bileja bantu basatu bavuale mizabi bikale ne tumelo tuabu, bafika ku tshikumbi mudibu baladike muana mutoke Yezu mu tshidilu tshia nyama. Bantu aba bavuale bimpe menemene batu bababikila ne: bena meji basatu. Bible udi wamba tshinyi bua bualu buabu?

Bilondeshile Bible, bantu aba badibu babikila ne: bena meji bavua bafumine “ku esete” ne kuinaku ke kuvuabu bumvuile bua diledibua dia Yezu. (Matayo 2:1, 2, 9) Luendu elu luvua ne bua kuikala lubalombe matuku a bungi bua kufika mu Yudaya. Pakaluabu ndekelu wa bionso kusangana Yezu, katshivua kabidi muana uvuabu bafuma ku dilela muikale mu tshikumbi to. Kadi bantu aba bakasangana Mariya ne ‘muana’ bakadi basombele mu nzubu.​—Matayo 2:11.

Bible udi ubikila bantu aba ne: bena majimbu anyi “bena lubuku lua mitoto,” ne kêna uleja bungi buvuabu to. Mukanda mukuabu udi umvuija ne: “Diumvuangana pankatshi pa majimbu ne lubuku lua mitoto didi dimuenekela mu mushindu uvua bantu aba bakokibue kudi mutoto uvua mubalombole too ne ku Beteleheme.” (The Oxford Companion to the Bible) Bible udi ubenga patoke mishindu yonso ya majimbu ne tshilele tshia bena Babulona tshia kumanyina malu ku mitoto.​—Dutelonome 18:10-12; Yeshaya 47:13.

Malu akamanyina bantu aba ku mutoto au kaavua mafikishe ku tshipeta tshimpe nansha tshimue to. Akajula tshiji tshia mukawu tshia Helode Mukalenge mubi. Tshiji etshi ke tshiakafikisha Yozefe ne Mariya ne Yezu ku dinyemena mu Ejipitu ne ku dishipa dia bana bonso ba balume ba mu Beteleheme bavua ne “bidimu bibidi anyi bashadile ku bibidi.” Helode wakajadika bimpe menemene tshikondo tshivua Yezu muledibue ku diambuluisha dia malu avuabu bamuambile kudi bena lubuku lua mitoto. (Matayo 2:16, MMM) Pa kumona ntatu yonso ivua dilua diabu edi dikebeshe, mbia meji mua kuamba ne: mutoto uvuabu bamone au ne malu avuabu bumvue bua “mfumu wa bena Yuda [uvuabu] balele” biakafumina kudi muluishi wa Nzambi, Satana Diabolo, uvua musue kushipa Yezu.​—Matayo 2:1, 2, MMM.