Malongesha atudi tupeta mu muyuki wa diledibua dia Yezu

MALU a diledibua dia Yezu atu asankisha bikole bantu miliyo mivule. Bitu bimuenekela ku bimfuanyi bia diledibua dia Yezu bitubu baleja ne manaya atubu banaya pa buloba bujima pabuipi ne tshikondo tshia Nowele. Nansha mudiwu asankisha bantu, malu a diledibua dia Yezu kabavua baafunde mu Bible bua kumana bantu mukodi patupu to. Kadi, adi munkatshi mua mêyi onso avua Nzambi mufundishe ku diambuluisha dia nyuma wende bua kulongesha ne kululamija malu.​—2 Timote 3:16.

Bu Nzambi musue bua bena Kristo kuikalabu basekelele mufikilu wa diledibua dia Yezu, Bible uvua mua kuikala mumanyishe dituku dijalame divuaye muledibue. Kadi Bible mmufile dituku dia diledibua dia Yezu anyi? Kunyima kua yeye mumane kuleja ne: Yezu uvua muledibue mu tshikondo tshivua balami ba mikoko bikale pambelu butuku balama mikoko yabu, Albert Barnes, mukebuludi wa malu a mu Bible wa mu bidimu bia 1800 udi wamba ne: “Bualu ebu budi buleja patoke ne: Musungidi wetu uvua muledibue kumpala kua dituku dia 25 ngondo wa Tshisua-munene . . . Mu tshikondo atshi kutu mashika makole, nangananga mu bitupa bidi bitumbuke ne bia mikuna bidi pabuipi ne Beteleheme. Nzambi mmusokoke dituku dia diledibua dia [Yezu]. . . . Peshi kabivua ne mushinga bua kumanya dituku adi to; bualu bu biobi bikale ne mushinga, Nzambi uvua mua kuikala mudifundishe.”

Pabi bafundi ba Evanjeliyo inayi badi batuleja bimpe dituku divua Yezu mufue. Wakafua dituku dia Pasaka, uvuabu benza mu dia 14 dia ngondo wa bena Yuda wa Nisana, mu muvu wa printemps. Kabidi, Yezu wakambila bayidi bende bua kuikalabu bamuvuluka dituku adi. (Luka 22:19)  Mu Bible ki mbambe bua kuikala kusekelela mufikilu wa dituku dia diledibua dia Yezu, peshi dia muntu mukuabu nansha. Bia dibungama, makokangana pa bidi bitangila dituku dia diledibua dia Yezu adi mua kujibakaja malu a mushinga wa bungi akenzeka bu mu tshikondo atshi.

Baledi basungula kudi Nzambi

Munkatshi mua mêku binunu ne binunu a mu Isalele, mbaledi ba mushindu kayi bavua Nzambi musungule bua kukoleshabu Muanende? Uvuaku muangate malu bu lumu ne bubanji ne mushinga bua kumonaye mua kubasungula anyi? Tòo. Kadi Yehowa wakatangila ngikadilu ya mu nyuma ya baledi. Bala musambu uvua Mariya muimbe (udi mu Luka 1:46-55) bua kutumbisha Nzambi panyima pa bamane kumuambila diakalenga dia pa buadi divuaye nadi bua kulua mamuende wa Masiya. Tshilejilu, wakamba ne: ‘Muoyo wanyi udi utumbisha Mukalenge. Yeye wakatangila bupuekele bua mukaji mupika wende.’ Ne budipuekeshi buonso uvua udimona bu muena ‘bupuekele,’ muntu mukaji mupika wa Yehowa. Bualu bua mushinga menemene mbua se: mêyi malenga adi mu musambu wakimba Mariya adi aleja patoke ne: uvua muntu wa ngikadilu ya mu nyuma milenga uvua mumanye Mukanda wa Nzambi bimpe. Nansha muvuaye muena mpekatu ne wa mu ndelanganyi ya Adama, yeye ke muntu mukaji mutambe buimpe wa pa buloba apa uvuabu basungule bua kuikala mamuende wa Muana wa Nzambi.

Netuambe tshinyi bua bayende wa Mariya, wakalua tatuende mudishi wa Yezu? Yozefe uvua muntu uvua mumanye bimpe mudimu wa mabaya. Mudimu mukole wa bianza uvuaye wenza wakamuambuluisha bua kukumbaja majinga a dîku diende diakalua ndekelu wa bionso kuikala ne bana ba balume batanu ne ba bakaji bu babidi nanku. (Matayo 13:55, 56) Yosefe kavua mubanji to. Pakakumbana tshikondo tshia Mariya kuya kuleja muanende muanabute ku ntempelo wa Nzambi, bivua ne bua kuikala bitonde Yozefe bikole bua muvuaye kayi mua kufila mulambu wa mukoko. Pamutu pa mulambu wa nunku, bavua ne bua kufila bivuabu balongolole bua bapele. Mikenji ya Nzambi ivua yamba bua mamuende wa muana mutoke wa balume ne: ‘Bikalaye kayi ne mushinga wa muana wa mukoko, alue biende ne nyunyu ya nkutshi ibidi anyi mputu nyunyu ibidi; umue bu mulambu wa kuosha pa kapia ne mukuabu bu mulambu wa kubuikila nawu bubi; muakuidi munene neayifile bua kumubuikidila nawu bubi, ne yeye neikale mulengejibue.’​—Lewitiki 12:8; Luka 2:22-24.

Bible udi wamba ne: Yozefe uvua “muntu muakane.” (Matayo 1:19) Tshilejilu, wakamanyangana ne mukajende utshivua kamama anu panyima pa diledibua dia Yezu. Bualu ebu buakapangisha dibuejakaja dionso dia malu pa bidi bitangila uvua Tatuende mulelela wa Yezu. Bua mulume ne mukaji bavua bafuma ku diselangana, kudikanda bua kusangila eku basombele mu nzubu umuepele kakuvua bualu bupepele to, kadi kuakaleja ne: bonso babidi bavua banyishe diakalenga diabu edi dia muvuabu babasungule bua kukolesha Muana wa Nzambi.​—Matayo 1:24, 25.

Yozefe uvua muntu wa ngikadilu ya mu nyuma milenga anu muvua Mariya. Uvua wimanyika mudimu wende tshidimu tshionso bua kuenza luendu lua matuku asatu ne dîku diende kumbuka mu Nazaleta batangile ku Yelushalema bua kubuela mu tshibilu tshia ku tshidimu tshia mufikilu wa Pasaka. (Luka 2:41) Yozefe uvua ne bua kuikala kabidi mulongeshe Yezu bituadijile anu patshivuaye mupuekele bua kuikala ne tshilele tshia kubuela mu ntendelelu wa ku lumingu luonso mu nsunagoga wa mu Nazaleta, muvuabu babala Dîyi dia Nzambi ne badiumvuija. (Luka 2:51; 4:16) Ke bualu kayi kakuena mua kuikala mpata nansha mikese bua se: Nzambi uvua musunguile Muanende mamu ne tatu mudishi bavua bakumbane pa buloba.

Dibenesha dinene bua balami ba mikoko bena bupuekele

Nansha muvua mukajende ne lutatu, bualu difu diende dikavua dikumbaje ngondo tshitema, Yozefe  wakaya mu musoko wa bakakuende bua kudifundisha dîna ku mikanda ya mbulamatadi bilondeshile mukenji uvua Kaisa muele. Pakafika Yosefe ne mukajende mu Beteleheme, kabakapeta nzubu mu tshimenga to, bualu tshivua tshiûle ne bantu. Muanda eu wakabasaka bua kuya kusombela mu tshikumbi tshia nyama, muakalelelabu Yezu ne kumuladikabu mu tshidilu. Bua kukolesha ditabuja diabu, Yehowa wakajadikila baledi bena bupuekele aba muanda wa se: diledibua edi divua dia ku disua dia Nzambi. Uvuaku mubatumine bakulu bende lumu ba mu Beteleheme bua kubakankamija anyi? Tòo. Yehowa Nzambi wakasokoluela balami ba mikoko benji ba mudimu mukole aba bualu ebu, bavua balala pambelu butuku bua kulama mikoko yabu.

Muanjelu wa Nzambi wakabamuenekela ne wakabambila bua kuya ku Beteleheme, kuvuabu mua kusangana muana mutoke Masiya “mulale mu tshidilu tshia nyama.” Balami ba mikoko aba bena bupuekele bakakemaku peshi bakumvua bibi pakamanyabu ne: Masiya uvua ufuma ku diledibua uvua mu tshikumbi tshia nyama anyi? Nansha kakese! Diakamue bakashiya bisumbu biabu bia mikoko ne kuyabu batangile ku Beteleheme. Pakapetabu Yezu, bakalondela Yozefe ne Mariya malu avua muanjelu wa Nzambi muambe. Kakuyi mpata, bualu ebu buakakolesha ditabuja dia mulume eu ne mukajende bua kumonabu se: malu onso avua enzeka anu bu muvua Nzambi mualongolole. Ku lukuabu luseke, ‘balami bakapingana, batumbisha Nzambi bamutendelela, bualu bua malu onso akumvuabu ne akamonabu.’ (Luka 2:8-20) Bushuwa, Yehowa uvua muenze bimpe pavuaye musokoluele balami ba mikoko batshinyi ba Nzambi malu a diledibua dia Muanende.

Malu atudi tufuma ku dimona aa adi atulongesha ngikadilu itudi ne bua kuikala nayi bua Yehowa kutuanyishaye. Katuena ne bua kukeba lumu anyi bubanji. Kadi anu bu Yozefe, Mariya ne balami ba mikoko, tudi ne bua kutumikila Nzambi ne kuleja mutudi bamunange pa kuteka malu a mu nyuma kumpala kua bintu bia ku mubidi. Bulelela, kudi malongesha mimpe atudi mua kupeta tuetu tuelangana meji pa malu akenzeka pabuipi ne mu tshikondo tshia diledibua dia Yezu.

[Tshimfuanyi mu dibeji 7]

Mulambu wa Mariya wa tunkudimba tubidi udi uleja tshinyi?

[Tshimfuanyi mu dibeji 7]

Nzambi wakanyisha bua kusokoluela balami bakese ba mikoko bena bupuekele diledibua dia Yezu