Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku anji tangilabi ni udi mua kuandamuna nkonko idi ilonda eyi:

• Mmushindu kayi udi ‘bukole bua kupangadija malu’ mua kutukuba? (Nsumuinu 1:4)

Bukole ebu budi mua kutudimuija bua kuepuka njiwu ya mu nyuma ne kutusaka bua kudilongoluela njila wa meji, bu mudi wa mua kuepuka mateyi a tshiendenda a miaba ya mudimu. Budi butuambuluisha bua kumvua se: bakuetu bena Kristo mbantu bapange pabu bupuangane, ne dimanya edi didi mua kutusaka bua kubenga kubenzela bualu bubi diakamue padibu batufikisha munda. Bukole ebu budi kabidi mua kutupetesha mushindu wa kuepuka mitoyi ya badi batusaka ku nkuka ya bintu idi mua kutumbusha mu njila wa mu nyuma.​—15/8, dibeji 21-24.

• Mmushindu kayi udi muntu mua kulua muena mutumba muimpe?

Mishindu ibidi ya mua kuikala muena mutumba mulenga nya kuikala ne muoyo muimpe wa dipeshangana bintu ne kuikala ne mutshima wa kusakidila padibu batupeshabi kudi bakuabu. Kuikala muena mutumba muimpe kudi ne mushinga wa bungi padi ntatu imueneka. Bantemu ba Yehowa badi badienzeja bua kuikalabu bena mutumba bimpe, ke padibu badimuija bantu nabu bua muanda ukadi pa kudikuma mu bantu abidi aa, muanda wenza Nzambi bua kujikija malu mabi.​—1/9, dibeji 4-7.

• Bilondeshile Bible, bansantu balelela mbanganyi, ne mmunyi muambuluishabu bantu?

Bena Kristo ba kumpala bonso bavua bansantu balelela, bantu ba tshijila bavuija bansantu kudi Nzambi nkayende, kadi ki nkudi bantu anyi malongolodi kampanda nansha. (Lomo 1:7) Padi bansantu babika ku lufu bapiana muoyo mu diulu, badi diakamue batuadija pamue ne Kristo mudimu wa dibenesha bena lulamatu ba pa buloba. (Efeso 1:18-21)​—15/9, dibeji 5-7.

• Dimanya dia mianda kampanda ya manaya a ditembangana avua enzeka mu ditunga dia kale dia Grèce didi mua kukuatshisha bena Kristo ku tshinyi?

Mikanda yakafunda mupostolo Petelo ne mupostolo Paulo idi ne mifuanu ya manaya a tshiena-kale anyi itela bualu buawu mu mishindu mikuabu. (1 Kolinto 9:26; 1 Timote 4:7; 2 Timote 2:5; 1 Petelo 5:10) Bua muena manaya a ditembangana wa kale, kuikala ne mulongeshi muimpe, kuikala kudikanda, ne kudienzeja ne kipatshila kimpe kuvua malu a mushinga wa bungi. Mbia muomumue kabidi bua mishindu idi bena Kristo badienzeja mu nyuma lelu’eu.​—1/10, dibeji 28-31.

• Dikoleshila bana mu ditunga dia ku ba-bende didi ne ntatu ne masanka kayi?

Bana bavule batu balonga muakulu mupiamupia ne lukasa luvule kupita baledi babu, nunku baledi badi pamuapa mua kumona bikale bikole bua kumvua meji ne bienzedi bidi nabi bana babu. Kabidi bidi mua kuikala bikole bua bana kumvuabu bimpe malongesha a mu Bible adibu babalongesha mu muakulu wa bankambua kudi baledi babu. Kadi bena mu dîku badi mua kutamba kunangangana padi baledi balongesha bana babu muakulu wabu udibu bakula, nunku bana badi pamuapa mua kumanya miakulu ibidi ne kuangata bibidilu bia bilele bionso bia miaba ibidi.​—15/10, dibeji 22-26.

• Bua tshinyi kulombangana luse kudi ne mushinga?

Kulomba luse mu bulelela kutu misangu mivule mushindu wa kupingajilula malanda avua manyanguke pankatshi pa bantu. Bible udi ne bilejilu bidi bileja bukole budi kulombangana kua luse mua kuikala nabu. (1 Samuele 25:2-35; Bienzedi 23:1-5) Misangu mivule patuku bilumbu pankatshi pa bantu babidi, yonso wa kudibu utu anuku ne tshilema kampanda. Nunku, ditaba dia bilema ne dilombangana luse pankatshi pabu bonso didi ne mushinga.​—1/11, dibeji 4-7.

• Bua tshinyi manaya a mfranga mmabi nansha owu mikale a makuta makese?

Manaya a mfranga adi mua kusakangana ku madisu, ku lungenyi lua ditembangana, ne ku lukuka ludi Bible kayi wanyisha. (1 Kolinto 6:9, 10) Bantu ba bungi badi bamba kufua ne dinanga dia manaya a mfranga bualu bavua batuadije nawu anu ku buana ne diela dia mfranga mikese ya mpiku ivuabu badiangana ne bakuabu.​—1/11, dibeji 31.

• Bu muvua mikanda mivule ya mu Bible mifunda mu tshiena Gelika, bua tshinyi bivua bikengela kabidi kukudimuna Bible mu tshiena Gelika, ne mbipeta kayi biakapatuka?

Tshiena Gelika tshia lelu ntshishilangane bikole ne tshiena Gelika tshia mu nkudimuinu wa Septante wa Mikanda minsantu ya mu tshiena Ebelu ne wa Mikanda minsantu ya mu tshiena Gelika ya bena Kristo. Mu nkama ya bidimu mishale eyi bantu bavule bakapima bua kukudimuna Bible mujima anyi bimue bitupa biende mu tshiena Gelika tshidi bantu bakula. Lelu’eu, kudi nkudimuinu ya Bible (mujima anyi mu bitupa biende) mitue ku 30 mu tshiena Gelika tshidi bantu bonso mua kubala; umue wa kudiyi nkudimuinu wa Bible wa Les Saintes Écritures​—Traduction du monde nouveau mupatula mu 1997.​—15/11, dibeji 26-29.

• Bua tshinyi bena Kristo kabena benzejibue bua kufila tshia-dikumi?

Mu Mikenji yakapeshabu bena Isalele wa kale, tshia-dikumi tshivua mushindu wa kukuatshisha nawu tshisa tshia bena Lewi ne wa kukuatshisha bavua mu dikenga. (Lewitiki 27:30; Dutelonome 14:28, 29) Lufu lua mulambu lua Yezu luakashipa Mikenji ya Mose pamue ne mukenji uvuamu wa tshia-dikumi. (Efeso 2:13-15) Mu tshisumbu tshia bena Kristo ba kumpala, tshilejilu tshivuabu bashiye tshivua tshia muena Kristo yonso ufila bilondeshile bukokeshi buvuaye nabu ne bu muvuaye mudisunguile mu muoyo wende nkayende. (2 Kolinto 9:5, 7)​—1/12, dibeji 4-6.

• Buakabuluibua 20:8 udi umvuija ne: dîba dia diteta dia ndekelu Satana neapambuishe bantu bapite bungi menemene anyi?

Mvese eu udi wamba se: bungi bua bantu badingaye nebuikale bu bua ‘nsenga ya ku mâyi manene.’ Mu Bible, ngakuilu eu utu umvuija misangu mivule bungi budi kabuyi bumanyike kadi kêna umvuija bungi bupitshidile to. Dimiinu dia Abalahama anyi ndelanganyi yende ivua milayidila bua kuikala bungi ‘bu nsenga ya ku kala kua mâyi manene’ yakalua kupatula bantu 144 000, pa kumbusha Yezu. (Genese 22:17; Buakabuluibua 14:1-4)​—1/12, dibeji 29.