Malu a mu nsombelu

Kakanda kakashintulula nsombelu wanyi

MALONDA KUDI IRENE HOCHSTENBACH

Biakenzeka mu Dibidi dikuabu ku dilolo mu 1972. Mvua ne bidimu 16 ne mvua muye ne baledi banyi mu tshisangilu tshia tshitendelelu kampanda mu Eindhoven, mu tshimenga tshia mu provense wa Brabant, mu ditunga dia Pays-Bas. Tshivua mudiumvue bimpe ne tshivua musue kuikalamu to. Pashishe, bansongakaji bakuabu babidi kumpeshabu kakanda kikale ne mêyi aa: “Wa kunanga Irene, tudi basue kukuambuluisha.” Tshivua mumanye ne: kakanda aku kavua mua kushintulula nsombelu wanyi bikole nansha. Kadi kumpala kua meme kunulondela tshiakenzeka pashishe, ndi musue kuanji kunuambila bumue bualu bua mu nsombelu wanyi.

BAVUA bandelele mu tshidiila tshia Belitung, mu ditunga dia Indonésie. Ntshidi muvuluke imue mitoyi imvua ngumvua mu tshidiila tshia luya lukole atshi bu mudi: mutoyi wa malala a mabue pavua lupepele lututa, muadi wa musulu wa mâyi uvua pabuipi apu, tuseku tua bana bavua banaya kumpenga kua nzubu wetu, ne mijiki ivua imba mu nzubu muetu. Mu 1960, pamvua ne bidimu binayi, tuakamuangala dîku dietu dijima, tuetu kumuka mu Indonésie bua kuya kusombela mu Pays-Bas. Tuakenza luendu alu lule mu mazuwa a mâyi. Mutoyi untshidi nangananga muvuluke ngua kantu kamvua mutambe kusua ka dinaya naku kamvua muambule: ka-muntu kikale ne ngoma ya kuimba. Pangakakumbaja bidimu muanda-muteke, ngakasama disama diakamvuija mpudi-matshi, ne katshia anu pinapu tshiena mua kumvua kabidi mutoyi nansha mukese to. Anu mitoyi indi muvuluke ayi ke intshidi mukuate.

Ndi nkola muikale mpudi-matshi

Bua mushindu uvua baledi banyi bandame ne dinanga, kumpala tshivua mumanye menemene lutatu lutu nalu mpudi-matshi nansha.  Pantshivua muana, mvua ngela meji ne: biamu binene bivua bingambuluisha bua kudiundisha mêyi amvua ngumvua bivua bu bintu bia kunaya nabi, nansha muvuabi kabiyi bitambe kungambuluisha. Bua bana bena mutumba kuyukila nanyi, bavua bamfundila malu onso panshi kumpenga kua njila, ne meme mvua mbandamuna, nansha mumvua tshiyi ngumvua dîyi dianyi meme muine.

Pangakakola, ngakajingulula ne: mvua mushilangane ne bakuabu. Ngakabanga kumona kabidi se: bamue bantu bavua banseka bualu mvua mpudi-matshi, ne bakuabu bavua bangipata bua tshisombi nabu to. Ngakabanga kudimona nkaya. Ngakabanga kumvua tshivua kuikala mpudi-matshi kumvuija, ne pamvua ngenda nkola ngakabanga kuenda kutshina bikole bantu bavua bumvua.

Baledi banyi bakumbuka ku musoko mu provense wa Limburg ne kuyabu ne dîku dijima mu tshimenga tshia Eindoven bua kumbueja mu tshilongelu tshia bampudi-matshi. Mu tshimenga atshi, tatu wakakeba mudimu, ke muakunyanyi wa balume ne bayayanyi babidi kushisha kubuelabu mu tshilongelu tshipiatshipia. Ndi ne dianyisha bua malu onso avuabu benze bua kungambuluisha. Mu kalasa, bavua bandongesha mushindu wa kuakaja dîyi dianyi ne wa kushindumuna miaku bimpe. Ne nansha muvua balongeshi kabayi bakula muakulu wa tumama, balongi betu bakandongesha muakulu eu.

Ndi ndimona mutapuluke ne bakuabu

Pamvua ngenda nkola, baledi banyi bavua bayukila nanyi ne lutatu lua bungi, kadi kuvua malu a bungi amvua tshiyi ngumvua to. Tshilejilu, tshivua ngumvua ne: baledi banyi bavua balonga Bible ne Bantemu ba Yehowa to. Kadi ndi mvuluka amu ne: dimue dituku tuakaya dîku dietu dijima muaba mukuabu nunku muikale bantu ba bungi basombe mu nkuasa. Bonso bavua basombe batangile anu kumpala, imue misangu bavua batuta bikashi, ne mutantshi eu bajuka kuulu; kadi tshivua mumanye tshivuabu benzela bionso ebi to. Matuku a bungi panyima, ngakalua kumanya ne: tuvua baye kubuela mu mpungilu wa Bantemu ba Yehowa. Baledi banyi bavua ne tshibidilu tshia kuya nanyi mu nzubu kampanda mukese mu tshimenga tshia Eindhoven. Mvua ndiumvua bimpe patuvua mu nzubu amu, bualu bantu bonso bavua bena malu malenga ne dîku dietu divua dimueneka dikale ne disanka, kadi tshivua mumanye tshituvua tuyilamu misangu yonso to. Mpindieu ndi mumanye ne: nzubu mukese au uvua Nzubu wa Bukalenge wa Bantemu ba Yehowa.

Diakabi, kakuvua muntu nansha umue mu bisangilu amu uvua mua kunkudimuina malu mu muakulu wa tumama to. Mpindieu ndi njingulula ne: bantu bavuamu bavua basue kungambuluisha, kadi kabavua bamanye tshia kuenza nanyi to. Mu bisangilu ebi mvua ndimona mutapuluke ne bakuabu ne mvua ndiambila ne: ‘Mvua mua kuikala nansha mu kalasa pamutu pa kuikala muaba eu.’ Kadi anu pavua ngenyi ayi yenda imvuila mu mutu, bansongakaji bakuabu babidi bakamfundila miaku pa kabeji lukasa ne buobu kukampesha. Ke kakanda kandi muambe ku ntuadijilu kua tshiena-bualu etshi. Tshivuaku mumanye bua se: kakanda aka kavua mua kuikala ntuadijilu wa bulunda bua mushinga mukole buvua mua kungumbusha mu nsombelu wa diditola pa nkaya to.

Ndi mpeta balunda ba mushinga mukole

Colette ne Hermine, bavua bantumine kakanda aku, bakavua ne bidimu makumi abidi ne pa mutu. Panyima, ngakalua kumvua ne: bavua balue mu tshisumbu tshimvua mbuela atshi bua kuenza bumpanda-njila bua kashidi, mmumue ne: bua kuyisha ku dîba ne ku dîba. Bu muvua Colette ne Hermine kabayi bamanye muakulu wa tumama bimpe menemene, bua kumvua bivuabu bangambila mvua ndienzeja bua kuikala ntangila muvua mishiku yabu inyunga, ne tuvua tuyikila anu bimpe mushindu’eu.

Baledi banyi bakasanka pavua Colette ne Hermine balombe bua kulonga nanyi Bible, kadi bansongakaji aba bakangenzela malu a bungi kupita ne dindongesha patupu. Bakenza mudimu wa bungi wa kuikala kunkudimuina bisangilu bionso mu muakulu wa tumama mu Nzubu wa Bukalenge  ne bua kumfikisha ku disomba ne bakuabu bantu ba mu tshisumbu. Bavua bambulula nanyi malu a mu Bible a kuya kuyisha, ne bavua bangambuluisha kabidi bua kulongolola midimu ya balongi ya kuenza mu Kalasa ka Mudimu wa Teokrasi. Anji kuelabi meji, lelu ndi mene ne dikima dia kuenza muyuki kumpala kua tshisumbu tshia bantu badi kabayi bampudi-matshi!

Kabidi, Colette ne Hermine bakenza bua mfike ku diumvua ne: mvua mua kubeyemena. Bavua ne lutulu ne bavua banteleja bimpe. Nansha mutuvua misangu mivule tuseka bua bilema bimvua ngenza, katshia kabavuaku banji kumvuija meme bu tshintu tshia kunaya natshi nansha; anyi kumvua bibi pamvua munkatshi muabu to. Bavua badienzeja bua kumvua ngenyi yanyi ne bavua bammona meme muikale mumue nabu. Bansongakaji aba ba malu malenga bakampesha dipa dilengele: dinanga diabu ne bulunda kabidi.

Bualu bua mushinga wa bungi menemene mbua se: Colette ne Hermine bakandongesha ne: mvua ne bua kuangata Nzambi wetu Yehowa bu mulunda wa kueyemena. Bakangumvuija ne: Yehowa uvua mummone meme musombe mu Nzubu wa Bukalenge ne uvua mumanye lutatu ludi nalu muntu udi mupate matshi. Ndi ne dianyisha bua mudi dinanga dietu ditudi banange Yehowa dituvuije bonso basatu balunda! Biakandenga ku muoyo pa kumona mushindu uvua Yehowa ungambuluisha, nunku bua mushindu umvua mumunange, ngakaleja mumvua mudilambule kudiye pangakatambula batismo mu mâyi mu ngondo wa muanda-mutekete, mu 1975.

Ndi ku luseke lua mulunda wa pa muoyo

Mu bidimu biakalonda, ngakalua kumanyangana ne bana betu bena Kristo ba bungi balume ne bakaji. Muanetu wa balume mukuabu (Harry) wakalua mulunda wanyi wa pa muoyo, ne tuakaselangana mu 1980. Matuku makese panyima, ngakabanga mudimu wa bumpanda-njila, ne mu 1994, bakatutuma meme ne bayanyi bua kuikala bampanda-njila ba pa buabu mu tshitupa tshivuabu bakula muakulu wa tumama mu Pays-Bas. Tshidimu tshiakalonda, ngakapeta mudimu mukole. Mvua ne bua kuikala nya ne bayanyi (udi yeye umvua bimpe) mu mudimu wa dikumbula bisumbu bu mutangidi wa tshijengu mupinganyi.

Monayi mushindu umvua ngenza: Patudi tukumbula tshisumbu tshimue bua musangu wa kumpala, mvua nya diakamue muaba udi bana betu ba balume ne ba bakaji ba bungi bua kudimanyisha kudibu. Mvua mbambila ne: ndi mpudi-matshi ne mbalomba bua bikale bantangile padibu bayukila nanyi bitekete-bitekete. Ntu kabidi ndienzeja bua kufila diakamue diandamuna mu bisangilu bia tshisumbu. Ne ntu ngebeja bikalaku kudi muntu udi mua kuitaba bua kunkudimuina bisangilu bia tshisumbu ne bisangilu bia mudimu wa buambi munkatshi mua lumingu alu.

Dienza nunku ndiambuluishe bikole imue misangu, kadi bana betu ba balume ne ba bakaji batu bapua muoyo bua se: ndi mpudi-matshi, ke tshitu tshifikisha ku amue malu a tuseku. Tshilejilu, badi  bangambila ne: padibu bammona ngenda ngendakana mu tshimenga, badi bela mpungi wa mashinyi bua kungela muoyo, kadi tshiyi ngumvua to. Meme panyi ntu imue misangu mpua muoyo lutatu luntu nalu, bu mudi pandi nkeba kunungena bayanyi bualu ku ditshi. Pandi mmona upapuka diakamue, ndi mmanya ne: “bualu bundi mmunungena ku ditshi” ndi mubuambe ne dîyi dikole.

Bana batu bangambuluisha pabu mu mishindu idi kayiyi mielela meji. Mu tshimue tshisumbu tshituvua bakumbule bua musangu wa kumpala, muana mukuabu wa balume wa bidimu tshitema wakamona ne: bamue bantu mu Nzubu wa Bukalenge bavua benze bu bavua belakana bua kuyukila nanyi, ke yeye kuangata dipangadika dia kuenza bualu kampanda. Wakalua kundi, kunkuataye ku tshianza, kuyaye nanyi munkatshinkatshi mua Nzubu wa Bukalenge, ne kuambaye ne dîyi diende dionso ne: “Ndi musue kunuleja Irene, udi muikale mpudi-matshi!” Bawetu bavuapu bakalua kundi ne kubangabu kudimanyisha kundi.

Bua diya ne bayanyi mu mudimu wa tshijengu, bungi bua balunda banyi budi buenda anu buvula. Nsombelu wanyi mmushilangane bikole lelu ne umvua nende bidimu bimvua ndiumvua mulekela ne mutapuluke ne bakuabu! Kubangila anu ku dilolo dia dituku divua Colette ne Hermine bampeshe kakanda aku, ndi mudimuene bukole budi nabu bulunda ne ndi mupete bantu badi balue ba pa buabu kundi. Bualu bua mushinga wa bungi menemene budi se: ndi mufike ku dimanya Yehowa, Mulunda mutambe bakuabu bonso. (Lomo 8:38, 39) Kakanda aku kakashintulula nsombelu wanyi be!

[Tshimfuanyi mu dibeji 24]

Ntshidi anu muvuluke muadi wa kantu ka dinaya naku kamvua mutambe kusua

[Bimfuanyi mu dibeji 25]

Ndi mu buambi, ne pashishe meme ne bayanyi Harry