Nkonko ya babadi

Ntshinyi tshivua Paulo musue kumvuija pakambaye ne: “misangu yonso inudi nudia diampa edi ne nunua dikopo edi”?

Pavua Paulo wakula bua dibanjija dia Tshivulukilu tshia lufu lua Yezu, wakafunda ne: “Misangu yonso inudi nudia diamba edi ne nunua dikopo edi, nudi numanyisha lufu lua Mfumu too ne papinganaye.” (1 Kolinto 11:25, 26, MMM) Bamue badi bela meji ne: muaba eu tshiambilu tshia “misangu yonso” tshidi tshileja ne: badi ne bua kuvuluka lufu lua Kristo njila ne njila, mmumue ne: misangu ya bungi. Ke bualu kayi badi benza mufikilu walu misangu ya bungi pamutu pa musangu umue ku tshidimu. Atshi ke tshivua Paulo musue kumvuija anyi?

Kukadi mpindieu bidimu bitue ku 2 000 katshia Yezu wabanjija Tshivulukilu tshia lufu luende. Nunku, kusekelela Tshivulukilu tshia lufu lua Yezu nansha musangu umue ku tshidimu kudi kumvuija ne: bakadi batshisekelele misangu ya bungi katshia mu tshidimu tshia 33 mu bikondo bietu ebi. Kadi bilondeshile lungenyi ludi mu 1 Kolinto 11:25, 26, muaba eu Paulo uvua wakula ki mbua bungi bua misangu, kadi mbua mushindu udi Tshivulukilu ne bua kuenzeka. Mu tshiena-Gelika tshia ku ntuadijilu, kavua muangate muaku pollakis, udi umvuija “misangu mivule” anyi “njila ne njila” to. Kadi uvua muangate muaku hosakis, udi umvuija “misangu yonso” anyi “tshikondo tshionso,” “dîba dionso.” Paulo uvua usua kuamba ne: ‘Dîba dionso dinudi nuenza bualu ebu, nudi nutungunuka ne kumanyisha lufu lua Mfumu.’ *

Nanku mmisangu bungi kayi itudi ne bua kuikala tuenza Tshivulukilu tshia lufu lua Yezu? Mbimpe kutshienza anu musangu umuepele ku tshidimu. Bua kuamba bulelela, tshiotshi mene si ntshivulukilu, ne bivulukilu batu pa tshibidilu babienza ku tshidimu ku tshidimu. Kabidi, Yezu wakafua dituku dia Pasaka wa bena Yuda, uvuabu benza musangu umue ku tshidimu. Bivua biakanyine muvua Paulo muambe bua Yezu ne: ‘Kristo wetu [pasaka],’ bualu lufu lua Yezu lua mulambu luakunzuluila Isalele wa mu nyuma njila wa kupeta muoyo, anu muvua mulambu wa Pasaka wa kumpala mukube banabute ba bena Isalele wa ku mubidi mu Ejipitu ne munzuluile tshisamba etshi njila wa kupatuka mu bupika. (1 Kolinto 5:7, MML; Galatia 6:16) Diumvuangana ne Pasaka uvua bena Yuda benza ku tshidimu ku tshidimu edi ntshijadiki tshikuabu tshia se: Tshivulukilu tshia lufu lua Yezu tshidi ne bua kuikala tshienzeka anu musangu umue ku tshidimu.

Paulo wakaleja kabidi mudi lufu lua Yezu lumvuangana ne difesto dikuabu dia bena Yuda divua dienzeka ku tshidimu ku tshidimu: Dituku dia Dibuikidila. Tudi tubala mu Ebelu 9:25, 26 ne: ‘Ne [Yezu] kêna ne bualu bua kudifila ku musangu ne ku musangu, bu mudi muakuidi munene ubuela mu muaba mutambe tshijila ku tshidimu ku tshidimu ne mashi adi kaayi ende. Kadi katataka musangu umue ku nshikidilu kua bikondo, wakumueneshibua bua kujimijaye bubi ku kudifila kuende bu mulambu.’ Bu muvua mulambu wa Yezu mupingane pa muaba wa mulambu wa ku tshidimu ku tshidimu uvuabu bafila Dituku dia Dibuikidila, Tshivulukilu tshia lufu luende tshidi tshienzeka mudibi bikengela ku tshidimu ku tshidimu. Kakuena bualu nansha bumue bua mu Bible budi butubingisha bua kusekelela Tshivulukilu tshia lufu lua Yezu misangu ya bungi ku tshidimu to.

Mu diumvuangana ne malu aa, mufundi wa miyuki ya malu a kale John Laurence von Mosheim udi wamba ne: bena Kristo ba mu lukama luibidi lua bidimu ba mu Asia Mukese bavua ne tshibidilu tshia kusekelela Tshivulukilu tshia lufu lua Yezu “mu dituku dia dikumi ne dinayi dia ngondo wa kumpala wa bena Yuda [Nisana].” Anu mu bidimu bia ku ndekelu ebi ke mudi bena mu Bukua-buena-Kristo balue kupatula tshilele tshia kutshisekelela misangu ya bungi ku tshidimu.

[Mêyi adi kuinshi]