‘Nzambi, bua tshinyi uvua mulekele bualu ebu buenzeka?’
‘Nzambi, bua tshinyi uvua mulekele bualu ebu buenzeka?’
RICARDO utshidi muvuluke pavuaye musombe ne mukajende Maria mu nzubu mutubu bindila ba-minganga. * Nansha umue wa kudibu kavua ne bukole bua kubala bipeta bia mateta avua munganga muenze Maria. Pashishe, Ricardo wakunzulula amvelope, ne buobu kuela dîsu ne lukasa pa bivua munganga mufunde. Bakamona muaku “kansere,” ne buobu bonso babidi kutuadijabu kudila muadi pakelabu meji bua diumvuija dia muaku au.
Ricardo udi uvuluka wamba ne: “Munganga uvua ne muoyo muimpe be, kadi ntshia bushuwa se: uvua mumone bukole bua lutatu luetu, bualu wakatungunuka ne kutuambila bua tueyemene Nzambi.”
Kumpala kua kutuadijabu ngondapilu udibu babikila mu Mfualansa ne: radiothérapie, munganga wa Maria wakamona ne: dikasa diende dia balume divua dizakala nkayadi. Pakenzabu kabidi mateta, buobu kusangana ne: kansere kakavua kafike too ne mu buongo. Kunyima kua lumingu lumue tshianana, bakimanyika ngondapilu au. Maria wakafua tshipuka ne kunyima kua ngondo ibidi kuluaye kufua kashidi. Ricardo udi umvuija ne: “Ngakasanka bua muvua makenga ende majike, kadi bua mushindu umvua mmujinga bikole, meme panyi ngakadimona nkadi njinga bua kufua. Misangu ya bungi mvua ndidila Nzambi ne: ‘Bua tshinyi uvua mulekele bualu ebu buenzeka?’”
Padi lutatu lutukuata, nkonko idi ijuka mivule
Anu bu Ricardo, bantu bungi kabuyi kubala pa buloba bujima mbenzejibue bua kuitaba makenga. Misangu ya bungi, bantu badi kabayi ne bualu ke batu bakenga. Elabi meji bua tunyinganyinga tukole tukebesha kudi mvita idi kayiyi ijika idi ikengeshisha bantu. Anyi ela meji bua kanyinganyinga kadi naku bantu bavule badibu bakuate ku bukole bua kuenda nabu masandi, bana batekete badibu banyange, bantu badibu bakisa mu dîku ne bua malu makuabu mabi adi bantu benze. Pa kumona malu adi menzeke mu bantu, mbienze anu bu se: kakuena ndekelu wa malu mabi ne makenga bidi balume ne bakaji basue kuenzelangana. (Muambi 4:1-3) Pashishe kudi ntatu idi nayi bantu badi bipupu bikuate anyi badi ne masama a mpala anyi a mubidi. Kabiena bikemesha bua mudi bantu ba bungi badiebeja ne: “Bua tshinyi Nzambi mmulekele makenga a mushindu’eu?”
Nansha bua bantu badi batendelela, kabitu bipepele bua kutantamena makenga to. Wewe pebe udi mua kudiebeja tshidi Nzambi wa dinanga ne wa-bukole-buonso mulekele makenga a bantu atungunuka. Kupeta diandamuna dimpe ne dilelela dia lukonko elu lukole kudi kuambuluisha bikole bua ditalala dietu dia mu mutshima ne bua malanda etu ne Nzambi. Bible udi ufila diandamuna dia nunku. Anyisha ubala tshidi Bible wamba mu tshiena-bualu tshidi tshilonda.
[Mêyi adi kuinshi]
^ tshik. 2 Tudi bashintulule mêna.
[Bimfuanyi mu dibeji 3]
Munganga wakatungunuka ne kutuambila bua tueyemene Nzambi