Wakapeta masanka bua dinanukila diende

Bantu bavule badi banange malu makane mbasue bua bananga babu balonge malu adi Nzambi mulongolole ne bapete nsombelu wa disanka. Padi muntu ufika ku didilambula kudi Nzambi, bakuabu (bana ne bantu bakole) badi mua kuikala bamufikishe ku diangata dipangadika dia meji edi bua ngikadilu wabu muimpe. Ke tshivua tshifikile Jearim, nsongakaji wa bidimu dikumi ne pamutu wa mu ditunga dia Mexique, wakapesha bana betu mukanda muikale ne mêyi adi alonda aa pavuabu mu mpuilu wa pa buende wa dituku dimue wa Bantemu ba Yehowa:

“Ndi musue bua numvue penu ne disanka ne ditshionkomoka bindi nabi. Lekelayi ndulondele tshindi ngambidila nunku. Baledi banyi mbalonge bulelela kukadi bidimu dikumi ne muanda-mukulu, pinapu kabavua banji kundela to. Mamu wakadiunda mu nyuma, ne pashishe muakunyanyi wa balume ne meme panyi tuakadiunda bia muomumue. Tuetu bonso tuvua tusambila Yehowa bua ambuluishe Tatu abuele pende mu njila udi ufikisha ku muoyo. Bidimu dikumi ne muanda-mukulu bikadi bipite, ne lelu ndituku dia pa buadi buetu tuetu. Tatu udi utambula. Ndi ngela Yehowa tuasakidila bua mudiye kayi mutume nshikidilu kumpala kua tshikondo tshile etshi tshituvua bindile katshia kuonso aku kufikatshi. Tuasakidila Yehowa!”

Munkatshi mua bidimu bia bungi, dîku dia ba nsongakaji eu divua ditumikila mubelu mufundisha ku nyuma wa Nzambi udi mu 1 Petelo 3:1, 2, udi wamba ne: ‘Muomumue, nuenu bakaji, nukokele babayenu; nunku bikala bakuabu kabayi bitabuja dîyi dia Nzambi, nebapetebue mu bualu bua Nzambi kabayi ne dîyi dia Nzambi, ku bienzedi bia bakaji babu: patangilabu bienzedi bienu bilengele bidi ne ditshina.’ Ne kakuyi mpata nsongakaji Jearim uvua mutumikile mêyi a mu Dutelonome 5:16 a ne: ‘Unemeke tatuebe ne mamuebe bu muakanuambila Yehowa, Nzambi webe.’ Kutumikila mêyi aa ne kuindila Yehowa ne lutulu nkupeteshe Jearim ne dîku diabu masanka.