Nkonko ya babadi

Mukanda wa Nzambi udi wanyisha bua muena Kristo kuteka tshianza pa Bible ne kuditshipa bua kuamba anu bulelela pa bulelela ku kabadi anyi?

Muntu yonso udi ne bua kudiangatshila dipangadika yeye nkayende pa bualu ebu. (Galatia 6:5) Kadi Bible kêna ukandika bua kuditshipa bua kuamba anu bulelela pa bulelela ku kabadi to.

Kuditshipa ntshilele tshidi tshitangalake bikole katshia kuonso eku. Tshilejilu, mu bikondo bia kale, bena Gelika bavua bela tshianza mulu anyi balenga ku tshioshelu pavuabu baditshipa. Pavua muena Lomo uditshipa, uvua ukuata dibue mu tshianza tshiende ne uditshipa ne: “Bingikala nshima ku bukole, [nzambi] Jupiter antume kule ne malu mimpe onso pikaleye ukuba tshimenga ne lumbu luatshi, anu bu mundi nsumbula dibue edi.”​—Cyclopedia of Biblical, Theological, and Ecclesiastical Literature, mufunda kudi John McClintock ne James Strong, Volime VII, dibeji dia 260.

Malu aa avua ajadika mudi bantu mua kuitaba bilondeshile tshifukilu tshiabu mudiku nzambi kampanda udi ne bukole bua kukonkonona bantu ne udi bantu aba ne bua kubadila malu. Kubangila mu bikondo bia kale, batendeledi balelela ba Yehowa mbajadike ne: uvua mumanye bivuabu bamba ne benza. (Nsumuinu 5:21; 15:3) Bavua bu bavua baditshipa ku mêsu kua Nzambi anyi bamuangata bu ntemu wabu. Tshilejilu, ke tshiakenza Boaza, Davidi, Solomo ne Sedekiya. (Luta 3:13; 2 Samuele 3:35; 1 Bakelenge 2:23, 24; Yelemiya 38:16) Batendeledi ba Nzambi mulelela bakanyisha kabidi bua bantu bakuabu kuditshipabu. Ke tshiakenza Abalahama ne Yezu Kristo.​—Genese 21:22-24; Matayo 26:63, 64.

Muntu uvua uditshipa kumpala kua Yehowa uvua pamuapa unyungisha mubidi mushindu kampanda. Abalama (anyi Abalahama) wakambila mukalenge wa Sodoma ne: ‘Ngakamana [kujula] tshianza tshianyi [mulu] bua kuditshipa kudi Yehowa, Nzambi Mutambe Bunene wa mu diulu, mufuki wa diulu ne buloba.’ (Genese 14:22) Muanjelu wakayikila ne muprofete Danyele ‘wakajula tshianza tshia balume ne tshia bakaji mulu, wakaditshipa mu dîna dia Udi ne muoyo tshiendelele.’ (Danyele 12:7) Nansha Nzambi pende mbamuambe mu tshimfuanyi se: udi uditshipa muele tshianza tshiende mulu.​—Dutelonome 32:40; Yeshaya 62:8.

Kakuena muaba nansha umue udi Mukanda wa Nzambi ukandika diditshipa to. Kadi muena Kristo kêna ne bua kuditshipa bua kalu ne kalu konso kadiye wamba nansha. Yezu wakamba ne: ‘Diyi dienu pikaladio dia ne: “Eyo”, dikale anu “eyo”; diodi dia ne: “To”, dikale anu “to”.’ (Matayo 5:33-37, MMM) Muyidi Yakobo wakamba pende mêyi a muomumue pakambaye ne: ‘Kanuditshipi nansha,’ uvua wakula bua diditshipa bua malu adi kaayi ne mushinga. (Yakobo 5:12) Ni n’Yezu, ni n’Yakobo, kakuena wakamba ne: mbibi bua kuditshipa bua kuamba bulelela ku kabadi to.

Kadi ntshinyi tshienza muena Kristo biamulombabu bua kuditshipa ku kabadi bua kujadika ne: mêyi ende mmalelela? Udi mua kuditshipa bua muanda eu. Anyi badi mua kumuanyishila bua kuamba mêyi adi ajadika ne: kêna ushima to.​—Galatia 1:20.

Padi banzuji balomba muntu udi uditshipa bua ele tshianza mulu peshi atshiteke pa Bible, muena Kristo udi pamuapa mua kuanyisha bua kuenza nanku. Udi mua kuvuluka pamuapa bilejilu bia mu Bible bia kuditshipa ne dinyungisha dia mubidi mu mushindu kampanda. Bua muena Kristo, tshidi ne mushinga kupita dinyungisha mubidi padi muntu uditshipa ntshia kuvuluka ne: udi uditshipa kumpala kua Nzambi bua kuamba bulelela. Mutshipu eu ki mbualu bua bilele to. Bikala muena Kristo umona ne: udi mua (peshi udi ne bua) kuandamuna lukonko ludibu bamuela mu nsombelu wa buena eu, udi ne bua kuikala muvuluke ne: udi uditshipa bua kuamba bulelela; bulelela mene ke bualu budi muena Kristo ujinga bua kuikala upatula mukana muende dîba dionso.