Udi ne ditabuja dikole anyi?

“Nudi nujalama mu ditabuja.”​—2 KOLINTO 1:24.

1, 2. Bua tshinyi tudi ne bua kuikala ne ditabuja, ne mmunyi mudidi mua kukola?

 BASADIDI ba Yehowa mbamanye ne: badi ne bua kuikala ne ditabuja. Bushuwa, ‘bikalaku kakuyi ditabuja, muntu kêna mua kusankisha Nzambi’ to. (Ebelu 11:6) Ke bualu kayi bidi bia meji patudi tusambila, tulomba nyuma muimpe ne ditabuja, didi dikale tshitupa tshia dimuma dilenga dia nyuma eu. (Luka 11:13; Galatia 5:22, 23) Kuidikija ditabuja dia bena Kristo netu kudi kabidi mua kukolesha dietu ditabuja.​—2 Timote 1:5; Ebelu 13:7.

² Ditabuja dietu neditambe kukola bituatungunuka ne kulonda njila udi Dîyi dia Nzambi dilomba bena Kristo bonso bua kulonda. Ditabuja dikole didi mua kufumina ku dibala dia Bible pa tshibidilu ne dilonga Mukanda wa Nzambi ne tshisumi ku diambuluisha dia mikanda idi “mulami wa lulamatu” ufila. (Luka 12:42-44, NW; Yoshua 1:7, 8) Patudi tubuela mu bisangilu, mu mpuilu ne mu mpungilu pa tshibidilu, ditabuja dietu ne dia bakuabu didi ditukankamija. (Lomo 1:11, 12; Ebelu 10:24, 25) Ditabuja dietu didi kabidi dikola patudi tuyisha bantu.​—Musambu 145:10-13; Lomo 10:11-15.

3. Pa bidi bitangila ditabuja, ndiambuluisha kayi ditudi tupetela kudi bakulu bena Kristo ba dinanga?

³ Padi bakulu bena Kristo ba dinanga batubela  ne batukankamija ne Bible, batu batuambuluisha bua kukolesha ditabuja dietu. Badi ne meji a buena a mupostolo Paulo. Wakambila bena Kolinto ne: ‘Tudi bakuatshishanganyi nenu mu disanka dienu; bualu bua nudi nujalama mu ditabuja [dienu].’ (2 Kolinto 1:23, 24) Bible wa Muanda Mulenga Lelu udi wamba ne: “Bualu bua nuenu nudi bashindame mu ditabuja bikole; kadi tudi tujinga kuenza nenu mudimu bua nuenu nusanke.” Bantu bakane badi ne muoyo bua ditabuja. Kakuyi mpata, kakuena muntu udi mua kuikala ne ditabuja pamutu pebe anyi kukuvuija muena lulamatu to. Pa bualu ebu, tudi ne bua ‘kudiambuila bujitu buetu.’​—Galatia 3:11; 6:5.

4. Malu adi Bible ulonda a basadidi ba Nzambi bavua ne ditabuja adi mua kukolesha ditabuja dietu munyi?

⁴ Mu Mukanda wa Nzambi mudi miyuki bungi tshianana ya bantu bavua ne ditabuja. Tudi mua kuikala bamanye amue a ku malu abu a bungi a dikema, kadi tudi bamanye kabidi ditabuja diakalejabu dituku dionso, pamuapa mu nsombelu wabu mujima anyi? Dielangana meji mpindieu bua mushindu wakalejabu ngikadilu eu mu nsombelu wa buena wetu didi mua kutuambuluisha bua kukolesha ditabuja dietu.

Ditabuja didi ditupa dikima

5. Ntshijadiki kayi tshia mu Bible tshidi tshileja ne: ditabuja didi ditukolesha bua kumanyisha dîyi dia Nzambi ne dikima?

⁵ Ditabuja didi ditukolesha bua kumanyisha dîyi dia Nzambi ne dikima. Hanoka wakadianjila kumanyisha dilumbuluisha dia Nzambi. Wakamba ne: ‘[Yehowa] wakalua ne mbombo ya bantu bende ba tshijila, bua kuenzejaye dipisha kudi bonso, ne bua kutuishaye bonso badi kabayi ba Nzambi bua midimu yabu idi ibenga Nzambi, yakenzabu mu bupidia buabu bua Nzambi, ne bua malu onso makole adi bantu babi babengi ba Nzambi bamudiula nawu.’ (Yuda 14, 15) Pakumvua baluishi ba Hanoka benji ba malu mabi abu mêyi aa, bakajinga kumushipa menemene. Kadi yeye wakakula ne dikima, ne Nzambi “wakamuangata” pa kumuladika tulu mu lufu, kubengaye pamuapa bua kukengaye ne lufu. (Genese 5:24; Ebelu 11:5) Katuena tumona bishima abi lelu to, kadi Yehowa udi wandamuna masambila etu bua tumone mua kumanyisha dîyi diende ne ditabuja ne dikima.​—Bienzedi 4:24-31.

6. Mmushindu kayi uvua ditabuja ne dikima bivua Nzambi mupeshe Noa bimuambuluishe?

⁶ Bua ditabuja, Noa ‘[wakibaka] buatu bua kusungila nabu ba mu nzubu muende.’ (Ebelu 11:7; Genese 6:13-22) Noa uvua kabidi “mulongeshi wa buakane” wakamanyisha bantu ba tshikondo tshiende ne dikima dionso muvua Nzambi ubadimuisha. (2 Petelo 2:5, MMM) Bantu bavua ne bua kuikala bamuseke bua mukenji wende uvua utangila Mvula wa Kabutu, anu mutu bamue bantu batuseka patudi tubapesha bijadiki bia mu Mukanda wa Nzambi bidi bileja ne: mu katupa kîpi emu, ndongoluelu wa malu eu neabutudibue. (2 Petelo 3:3-12) Nansha nanku, anu bu Hanoka ne Noa, tudi mua kumanyisha mukenji eu bua ditabuja ne dikima bidi Nzambi utupesha.

Ditabuja didi ditupesha lutulu

7. Mmunyi muvua Abalahama ne bakuabu baleje ditabuja ne lutulu?

⁷ Tudi dijinga ne ditabuja ne lutulu, nangananga bu mutudi bindile nshikidilu wa ndongoluelu eu mubi. Munkatshi mua aba ‘badi bapiana milayi bua ditabuja ne lutulu’ mudi Abalahama, muntu uvua utshina Nzambi. (Ebelu 6:11, 12) Ku ditabuja, wakashiya tshimenga tshia Ula ne masanka amu onso, ne kuluaye  muenyi mu buloba bua bende buvua Nzambi mumulaye. Isaka ne Yakoba bavua ne bua kupiana pabu buloba abu. Kadi ‘bakafua mu ditabuja kabayi banji kuangata biakabalayabu.’ Bua ditabuja, ‘bakajinga muaba mutambe buimpe, udi muaba mene wa mu diulu.’ Ke bualu kayi Nzambi ‘mmubalongoluele musoko.’ (Ebelu 11:8-16) Bulelela, Abalahama ne Isaka ne Yakoba ne bakaji babu bavua batshina Nzambi bakindila ne lutulu luonso Bukalenge bua Nzambi bua mu diulu, muikalabu ne bua kubishibua ku lufu ne kusomba pa buloba.

8. Abalahama ne Isaka ne Yakoba bakaleja lutulu ne ditabuja nansha muvua bualu kayi kabuyi buenzeke?

⁸ Ditabuja dia Abalahama ne Isaka ne Yakoba kadiakapueka ne mâyi to. Kabakapiana Buloba Bulaya to, ne kabakamona bantu ba bisamba bionso badibenesha ku diambuluisha dia dimiinu dia Abalahama to. (Genese 15:5-7; 22:15-18) Nansha muvua ‘musoko muasa kudi Nzambi’ au kauyi muledibue munkatshi mua nkama ya bidimu yakapita, bantu aba bakatungunuka ne kuikala ne ditabuja ne lutulu mu matuku a muoyo wabu onso. Ke tshitudi ne bua kuenza mpindieu udi Bukalenge bua Masiya butuadije kukokesha mu diulu.​—Musambu 42:5, 11; 43:5.

Ditabuja didi ditupesha bipatshila bilenga

9. Mbukole kayi budi nabu ditabuja pa bipatshila bitudi nabi?

⁹ Bantu ba lulamatu aba kabakalonda nsombelu mubi uvua nende bena Kanana nansha. Buobu bavua ne bipatshila bilenga be! Ditabuja didi kabidi ditupesha bipatshila bia mu nyuma bidi bitusaka bua kuepuka diditua ne kasuki mu malu a bukua-panu budi ku bukokeshi bua Satana Diabolo.​—1 Yone 2:15-17; 5:19.

10. Ntshinyi tshidi tshituleja ne: Yosefe uvua ne tshipatshila tshitambe buimpe kupita dikeba lumu lua panu?

¹⁰ Ku diambuluisha dia Nzambi, Yosefe muana wa Yakoba wakalua mutangidi wa malu a biakudia, kadi tshipatshila tshia Yosefe katshivua tshia kulua muntu munene wa panu to. Bua muvuaye ne ditabuja mu dikumbana dia malu avua Yehowa mulaye, Yosefe (muikale ne bidimu 110) wakambila bana babu ne: ‘Mfuafua, kadi Nzambi neikale nenu, neanumushe mu buloba ebu, neanupingaje ku buloba buakalayaye Abalahama ne Isaka ne Yakoba.’ Yosefe wakalomba bua kumujikabu mu buloba buvua Nzambi mulaye. Pakafuaye, bakumisha mubidi wende, kuulamabu mu mushete mu Ejipitu. Kadi pakapatuka bena Isalele mu bupika mu Ejipitu, muprofete Mose wakangata mifuba ya Yosefe kuyaye nayi mu Buloba Bulaya. (Genese 50:22-26; Ekesode 13:19) Ditabuja dia buena dia Yosefe didi ne bua kutusaka bua kuikala ne bipatshila bipite buimpe pamutu pa lumu lua panu.​—1 Kolinto 7:29:31.

11. Mmu mushindu kayi muvua Mose muleje ne: uvua ne bipatshila bia malu a mu nyuma?

¹¹ Mose ‘wakasungula bua kukengeshibua pamue ne bantu ba Nzambi kumpala kua masanka a malu mabi a tshitupa tshipi’ ne dikala muena  dîku dia mfumu wa mu Ejipitu ne dikala kabidi muntu mumanye mukanda wa bungi. (Ebelu 11:23-26; Bienzedi 7:20-22) Biakamupangisha masanka a panu ne pamuapa ne dijikibua dia lumu mu mushete muimpe, muaba kampanda muende lumu wa mu Ejipitu. Kadi abi bivua ne mushinga kayi kumpala kua diakalenga dia kuikala “muntu wa Nzambi [mulelela],” mutuangaji wa tshipungidi tshia Mikenji, kuikala muprofete wa Yehowa ne umue wa ku badi bafunde Bible? (Ezela 3:2) Udi munange kupeta muanzu panuapa anyi peshi ditabuja ndikupeteshe bipatshila bia malu a mu nyuma bitambe bulenga?

Ditabuja didi difila nsombelu wa disanka

12. Mbukole kayi buvua nabu ditabuja kudi Lahaba?

¹² Ditabuja kadiena anu dipesha bantu bipatshila bimpe to, kadi kabidi ne nsombelu wa disanka. Tshilejilu, Lahaba nsongakaji wa mu Yeleko kavua umona mushinga wa muoyo wende pavuaye mukaji wa ndumba to. Bulelela, malu akashintuluka bikole pakalejaye ditabuja! “Wakabadibua muakane kudi [Nzambi] bua bienzedi biende [bia ditabuja], yeye wakadi muakidile batumibue ba Bena Yuda, kubambuluisha bua kuyabo mu njila mukuabo,” bua kuepuka baluishi babu bena Kanana. (Yakobo 2:24-26, MML) Lahaba wakaleja kabidi ditabuja pa kulekela bundumba bualu uvua mumanye ne: Yehowa udi Nzambi mulelela. (Yoshua 2:9-11; Ebelu 11:30, 31) Bakamusela kudi musadidi wa Yehowa, kadi ki nkudi muena Kanana to. (Dutelonome 7:3, 4; 1 Kolinto 7:39) Lahaba wakapeta diakalenga dinene dia kulua nkambua wa Masiya. (1 Kulondolola 2:3-15; Luta 4:20-22; Matayo 1:5, 6) Anu bu bamue ba ku bakuabu bantu badi bele buendenda nyima, Lahaba neapete difutu dikuabu: neabishibue ku lufu mu mparadizu pa buloba.

13. Mmunyi muvua Davidi muenze mpekatu ne Beta-sheba, kadi wakenza tshinyi?

¹³ Bidi bimueneka ne: kunyima kua Lahaba mumane kulekela nsombelu wende wa mubi, wakatungunuka ne ngikadilu mulenga. Kadi bamue bavua benzele Nzambi mudimu munkatshi mua matuku a bungi bakenza mpekatu minene. Tshilejilu, Mukalenge Davidi wakenda ne Beta-Sheba, kushipeshaye bayende mu mvita ne kumuvuijaye mukajende wa nzubu. (2 Samuele 11:1-27) Pakanyingalala Davidi ne kanyinganyinga kakole, wakasambila Yehowa ne: ‘Kungumbushidi nyuma webe muimpe.’ Davidi kakajimija  nyuma wa Nzambi to. Uvua muitabuje ne: bu mudi Yehowa muikale ne luse, kavua mua kulengulula ‘mutshima wa majiya’ bua mpekatu to. (Musambu 51:11, 17; 103:10-14) Bua ditabuja diabu, Davidi ne Beta-sheba bakapeta diakalenga dia kuikala munkantshi mua bankambua ba Masiya.​—1 Kulondolola 3:5; Matayo 1:6, 16; Luka 3:23, 31.

Ditabuja dikolesha kudi tshijadiki

14. Mbijadiki kayi bivua Gideona mupete, ne mmushindu kayi udi bualu ebu butangila ditabuja dietu?

¹⁴ Nansha mutudi tuenda mu ditabuja, misangu mikuabu tudi mua kuikala dijinga ne tshijadiki tshia se: Nzambi neatuambuluishe. Ke tshiakafikila Gideona, eu wa ku bantu ‘bakatekesha makalenge.’ (Ebelu 11:32, 33) Pavua bena Midiyana ne matunga avua madisangishe nabu bakuate Isalele, nyuma wa Nzambi wakabuikila Gideona. Gideona wakalomba bua tshishima tshienzekele miosa ya nyama ivua pa muaba wa dipepuila bintu butuku bujima anu bua kujadika ne: Yehowa uvua nende. Mu tshivuaye mulombe kumpala, lumume luakakuata anu ku miosa, kadi buloba kushalabu buume. Wakalomba ne: malu ashilangane musangu muibidi. Bishima ebi biakakolesha Gideona muena budimu mu maboko, ke yeye kuenza malu ne ditabuja dionso ne kutshimunaye bena lukuna ba bena Isalele. (Balumbuluishi 6:33-40; 7:19-25) Tuetu bakebe tshijadiki kampanda patudi dijinga ne kuangata dipangadika kansanga, kabiena bileja ne: katuena ne ditabuja to. Tudi tuleja ne: tudi ne ditabuja menemene patudi tukonkonona Bible ne mikanda ya bena Kristo ne patudi tusambila bua kupeta bulombodi bua nyuma muimpe patudi tuangata mapangadika.​—Lomo 8:26, 27.

15. Dielangana meji pa ditabuja dia Balaka didi mua kutuambuluisha munyi?

¹⁵ Ditabuja dia Mulumbuluishi Balaka diakakoleshibua pakamukoleshabu ku muoyo. Muprofete mukaji Debola wakamukankamija bua kuenza bua kusungila bena Isalele kudi Yabina Mukalenge wa bena Kanana uvua ubakengesha. Bu muvuaye ne ditabuja ne dijadika dia diambuluisha dia Nzambi, Balaka wakalombola bantu 10 000 bavua kabayi ne bia mvita bivule, buobu kutshimuna biluilu binene bia Yabina bivua bilombola kudi Sisela. Bakasekelela ditshimuna adi mu musambu mulenga wa Debola ne Balaka. (Balumbuluishi 4:1–5:31) Debola wakakankamija Balaka bua kuenza malu bu mulombodi wa Isalele uvua Nzambi muteke, ne uvua wa ku basadidi ba Yehowa ‘wakipata bisumbu bia bena mvita bia bende.’ (Ebelu 11:34) Patudi tuelangana meji pa mushindu uvua Nzambi mubeneshe Balaka bua muvuaye muenze malu ne ditabuja, bidi mua kutusaka bua kuenza malu bituikala pamuapa tuelakana bua kuenzela Yehowa mudimu kampanda.

Ditabuja didi dilela ditalala

16. Ntshilejilu tshilenga kayi tshiakashiya Abalahama mu dikeba ditalala ne Lota?

¹⁶ Bu mudi ditabuja dituambuluisha bua kuenzela Nzambi midimu idi imueneka mikole, didi difila ditalala ne bupole. Tshilejilu, nansha muvua Abalahama muikale muntu mukole, wakalekela bua Lota muana wa muanabu kusungula miaba mimpe ya kumunyina nyama pakakokangana balami babu ba bimuna ne kukengelabi bua batapuluke. (Genese 13:7-12) Abalahama uvua ne bua kuikala musambile ne ditabuja dionso bua Nzambi abambuluishe bua kujikija tshilumbu atshi. Pamutu pa kudisankisha amu yeye, wakakosa tshilumbu mu ditalala. Bituikala bakokangane ne muena Kristo netu, tusambile ne ditabuja dionso ne ‘tukebe ditalala,’ katuyi tupua muoyo tshilejilu tshia Abalahama tshia diangata bakuabu ne mushinga.​—1 Petelo 3:10-12.

17. Bua tshinyi tudi mua kuamba ne: matapuluka avua majuke pankatshi pa Paulo, Banaba ne Mâko akajika mu ditalala?

¹⁷ Tangila mudi ditumikila malu a bena Kristo mua kutuambuluisha bua kusomba mu ditalala. Pavua Paulo pabuipi ne kubanga luendu luende luibidi lua bumisionere, Banaba wakitaba bua se: bakumbule kabidi bisumbu bia mu Kupulio ne Asia wa Mukese. Kadi Banaba wakajinga bua kuya ne muanabu Mâko. Paulo wakabenga, bualu Mâko uvua mubashiye mu Pampulia. ‘Bakatandangana [bikole]’ ne buobu kutapuluka. Banaba wakangata Mâko kuyaye nende mu Kupulio, kadi Paulo wakangata Sila e kuyaye nende ne “kupitshila mu Siriya ne mu Silisiya, wenda ukolesha [bisumbu].” (Bienzedi 15:36-41, MMM) Mu bule bua matuku, matapuluka au  akajika; bualu tudi tusangana Mâko ne Paulo mu Lomo, ne Paulo umuanyisha bikole. (Kolosai 4:10; Filemona 23, 24) Pavua Paulo mu lukanu mu Lomo (mu tshidimu bu tshia 65 B.B.), wakambila Timote ne: ‘Wangate Mâko, ulue nende bua yeye udi mukumbane mua kunkuatshisha mu mudimu wa Nzambi.’ (2 Timote 4:11) Paulo uvua pamuapa mua kuikala mutele bualu bua malanda ende ne Banaba ne Mâko mu masambila ende a ditabuja, ne ebi biakafikisha ku bupole budi buenda pamue ne ‘ditalala dia Nzambi.’​—Filipoi 4:6, 7.

18. Ntshinyi tshiakenzeka pamuapa mu tshilumbu tshia Ewodia ne Suntunke?

¹⁸ Kadi bu mutudi bapange bupuangane, “buonso buetu tudi tulenduka mu malu a bungi.” (Yakobo 3:2) Bilumbu biakajuka pankatshi pa bantu bakaji bena Kristo babidi bena bualu buakafundila Paulo ne: ‘Ndi nsengelela Ewodia ne ndi nsengelela Suntuke bua kuikalabu ne meji amue mu Mukalenge. Ukuatshishangane ne bakaji aba, bua bobo bakenza nanyi mudimu wa lumu luimpe.’ (Filipoi 4:1-3) Bidi bitamba kusua kumueneka ne: bantu bakaji aba batshinyi ba Nzambi bakajikija bilumbu biabu mu ditalala pa kutumikila mibelu bu eu udi mu Matayo 5:23, 24. Ditumikila ne ditabuja dionso mêyi a mu Mukanda wa Nzambi nedituambuluishe bikole bua kuikala ne ditalala lelu.

Ditabuja didi dituambuluisha bua kutantamana

19. Nnsombelu kayi wa diteta uvua kayi muele ditabuja dia Isaka ne Lebeka mu mâyi?

¹⁹ Tudi kabidi mua kutantamena makenga bua ditabuja. Pamuapa tudi mua kuikala tunyingalala bualu muena mu dîku dietu kampanda udi mutambule mmubenge kutumikila Nzambi pa kuselangana ne muntu udi kayi muena Kristo. (1 Kolinto 7:39) Isaka ne Lakele bakatata bua muvua muanabu Esau musele bakaji bavua kabayi batshina Nzambi. Bakaji bende bena Hiti ‘bakanyingalaja mutshima’ wabu bikole, kufikishabi too ne Lebeka ku diamba ne: ‘Bana bakaji ba bena Hete badi batondesha muoyo wanyi; biabaka Yakoba bana bakaji badi mu buloba ebu, muoyo wanyi newikale ne mushinga kayi?’ (Genese 26:34, 35; 27:46) Kadi, nsombelu mukole eu kakatekesha ditabuja dia Isaka ne Lebeka to. Tuikalayi ne ditabuja dikole padi ntatu ikola.

20. Mbilejilu kayi bia ditabuja bidi Naomi ne Luta batushile?

²⁰ Naomi uvua mukaji mukamba muena Yuda ukavua mukulakaje. Uvua mumanye bimpe ne: bamue bakaji bena Yuda bavua ne bua kulela bana bavua ne bua kuikala bankambua ba Masiya. Kadi bu muvua bana bende ba balume bafue kabayi balele, ne bu mukavuaye mupitshishe tshikondo tshia kulela, kakuvua kabidi mushindu wa bena mu dîku diende kuikalabu munkatshi mua bankambua ba Masiya to. Nansha nanku, Luta (mukaji wa muanende) wakalua mukaji wa Boaza (ukavua muele bidimu), kulelaye muana, ne kuluaye nkambua wa Yezu Masiya. (Genese 49:10, 33; Luta 1:3-5; 4:13-22; Matayo 1:1, 5) Naomi ne Luta bakashala ne ditabuja mu makenga ne bakapeta disanka. Netuikale petu ne disanka dia bungi bituashala ne ditabuja mu makenga.

21. Ditabuja didi dituambuluisha bua kuenza tshinyi, ne tudi ne bua kuikala ne dipangadika kayi?

²¹ Nansha mutudi katuyi bamanye tshidi mua kutufikila malaba, tudi mua kutantamena lutatu luonso patudi ne ditabuja. Ditabuja didi ditupesha dikima ne lutulu. Didi ditupetesha bipatshila bimpe ne nsombelu wa disanka. Ditabuja didi dipatula bipeta bimpe mu malanda etu ne bantu bakuabu ne mu dikandamena makenga. Nunku, tuikalayi ‘munkatshi mua badi ne ditabuja too ne ku dipeta dia muoyo.’ (Ebelu 10:39) Ku bukole bua Nzambi wetu wa dinanga Yehowa, ne bua butumbi buende, tutungunukayi ne kuleja ditabuja dikole!

Newandamune munyi?

• Ntshijadiki kayi tshia mu Bible tshidi tshileja ne: ditabuja didi mua kutupesha dikima?

• Tudi mua kuamba ne: ditabuja didi ditupesha nsombelu wa disanka bua tshinyi?

• Mmunyi mudi ditabuja dilela ditalala?

• Tshidi tshituleja ne: ditabuja didi dituambuluisha bua kukolela makenga ntshinyi?

[Nkonko ya dilonga]

[Bimfuanyi mu dibeji 16]

Ditabuja diakapesha Noa ne Hanoka dikima dia kumanyisha mikenji ya Yehowa

[Bimfuanyi mu dibeji 17]

Ditabuja dia buena dia Mose didi ditusaka bua kuipatshila malu a mu nyuma

[Bimfuanyi mu dibeji 18]

Dijadika dia diambuluisha dia Nzambi diakakolesha ditabuja dia Balaka, Debola ne Gideona