Mushindu wa kuangata mudimu bimpe ne nkatshinkatshi

LELU udi diyumbakana mu malu a disumba ne disumbisha bintu mu buloba bujima, a ditembangana dikole ne a dienza dia bintu bia bungi, bantu ba bungi kabatshiena basue kuya ku mudimu dituku dionso to. Nansha nanku, mudimu wetu udi ne bua kutusankisha. Bua tshinyi? Bualu tuvua bafukibue mu tshimfuanyi tshia Nzambi, ne Nzambi utu usanka bua mudimu wende. Tshilejilu, pavua Nzambi utangila bintu bivuaye muenze ku ndekelu kua “matuku” asambombo a difuka bintu anyi bikondo bile menemene, Genese 1:31 udi wamba ne: ‘Nzambi wakamona bintu bionso biakenzaye ne: biakadi bimpe be!’

Kabiyi mpata, dinanga dia mudimu ke didibu babikidila Yehowa ne: “Nzambi wa disanka.” (1 Timote 1:11, NW) Nunku kabienaku bilelela bua se: patudi tutamba kumuidikija tudi tulua ne disanka divule anyi? Bua bualu ebu, Solomo Mukalenge wa Isalele wa kale, muibaki ne mulongolodi wa bintu wa kalanda musenga, wakafunda ne: ‘Muntu yonso adie biende, anue biende, asanke biende mu midimu yende yonso, bua eku nkupa kua Nzambi.’​—Muambi 3:13.

Bidi mua kuikala bikole bua kuikala ne nkatshinkatshi anyi kuangata mudimu bimpe pa kumona mushindu udi midimu ishintuluka anu kushintuluka lelu. Kadi Yehowa Nzambi udi ubenesha aba badi bateleja mibelu mimpe idiye ufila. (Musambu 119:99, 100) Bantu aba badi balua bena mudimu badibu bangata ne mushinga ne badibu beyemena, ne ke bua tshinyi kabatu batamba kujimija mudimu wabu to. Badi kabidi balonga mua kutangila nsombelu wabu ne mudimu wabu kabiyi anu ne dîsu dia ku mubidi to, kadi ne dîsu dia mu nyuma kabidi. Ebi bidi bibambuluisha bua kuangata mapangadika mimpe mu nsombelu ne kumona ne: disanka diabu ne nsombelu muimpe kabiena bisuikila ku mudimu wabu anyi ku malu a disumba anyi disumbisha adi kaayi kueyemena. (Matayo 6:31-33; 1 Kolinto 2:14, 15) Bidi bibambuluisha bua kuikala ne ngikadilu muimpe wa nkatshinkatshi ku mudimu.

Ikala ne ngikadilu muimpe udi usankisha Nzambi ku mudimu

Bamue bantu batu benza mudimu bamba kufuilaku, bateka mudimu wabu kumpala kua malu onso. Bakuabu pabu batu bajinga bua dituku dijike lukasa bua buobu kupingana kumbelu. Mmushindu kayi muimpe utudi ne bua kuangata mudimu?  Bible udi wandamuna ne: ‘Dianza diule tente ne ditalala didi dipita manza abidi muule tente ne mudimu mukole ne kuipata kua lupepele.’ (Muambi 4:6) Kuenza mudimu bikole menemene anyi kuwenza mêba mapitepite bungi kudi kukebesha ntatu ne ‘nkuipata kua lupepele’ kua patupu. Bua tshinyi? Bualu tudi mua kunyanga bintu bine bitu bitupetesha disanka dipite bunene: malanda etu ne bena dîku dietu ne balunda, makanda etu a mu nyuma, bukole buetu bua mubidi, ne nansha dishala dietu ne muoyo matuku a bungi. (1 Timote 6:9, 10) Mushindu wa kuangata mudimu bimpe ne nkatshinkatshi ngua kusanka ne bintu bikese bitudi nabi bikale ne ndambu wa ditalala pamutu pa kuikala bazengeja kudi mudimu mukole, bikale ne ndululu ne ntatu.

Padi Bible ukankamija bantu bua kuikala ne nkatshinkatshi wa nunku, kêna wanyisha bufuba to. (Nsumuinu 20:4) Bufuba budi bunyanga mushinga utudi nawu ne kanemu kadi bakuabu bantu mua kuikala naku kutudi. Tshidi tshitambe bubi menemene ntshia se: bufuba budi bunyanga malanda etu ne Nzambi. Bible udi wamba patoke ne: muntu udi ubenga kuenza mudimu kêna ne bua kudila mu maboko a bakuabu to. (2 Tesalonike 3:10) Kadi udi ne bua kushintulula bikadilu biende ne udi ne bua kuenza mudimu mukole bua kumonaye mua kudiambuluisha ne kuambuluisha badi ku bujitu buende. Bua dienza mudimu mukole, udi mua kufika mene ku diambuluisha badi mu dikenga dia bungi. Eu nngikadilu udi Dîyi dia Nzambi dikankamija bantu bua kuikala nende.​—Nsumuinu 21:25, 26; Efeso 4:28.

Balongesha katshia ku buana bua kuangata mudimu ne mushinga

Bibidilu bimpe bia ku mudimu kabatu babipeta mu mpukapuka to; batu babilonga ku buana. Ke bualu kayi Bible udi wambila muledi yonso ne: “Longesha muana bibidilu biakane bidiye mua kulonda, pakulakajaye kakubilekela to.” (Nsumuinu 22:6, Mukanda wa Mvidi Mukulu, [Katolike, MMM]) Pa kumbusha difila tshilejilu tshimpe tshia benji ba mudimu, baledi ba meji badi batuadija kulongesha bana babu bibidilu biakane buobu babapesha midimu ya ku nzubu ya tshipimu tshiabu. Nansha mudi bana mua kumona imue midimu ibatonda, nebafike ku didimona bikale bana badibu bangata ne mushinga mu dîku, nangananga padi Tatu ne Mamu babela kalumbandi bua mudimu udibu benze bimpe. Diakabi, bamue baledi batu benzela bana babu kalu ne kalu konso, pamuapa benda babanyanga bamanye ne: badi babenzela bimpe. Baledi aba badi ne bua kuelangana meji bua mêyi adi mu Nsumuinu 29:21, udi wamba ne: “Muntu wengeleka mupika wende [anyi muanende] utshidi muana, mupika  awu [anyi muana au] neashale muena kadiwu.”​—MMM.

Baledi ba tshitembu badi kabidi batangila malu a tulasa tua bana babu, badi babakankamija bua kulonga ne kuenza mudimu bikole patshidibu mu kalasa. Ebi nebilue kuambuluisha bana paluabu kubanga kuenza mudimu.

Ikala ne meji paudi usungula mudimu wa kuenza

Nansha mudi Bible kayi utuambila mudimu wa tuetu kuenza, udi utupesha mibelu mimpe bua didiunda dietu dia mu nyuma, bua mudimu wetu utudi tuenzela Nzambi ne malu makuabu a mushinga kabinyanguki to. Tshilejilu, mupostolo Paulo wakafunda ne: ‘Musangu udi mukepa. Bantu badi balonda malu a pa buloba bikale bu bantu badi kabayi bukuta nawu; bualu bua tshimuenekelu tshia malu a pa buloba netshijimine.’ (1 Kolinto 7:29-31) Kakuena tshintu tshidiku bua kashidi anyi tshidi tshishindame menemene mu ndongoluelu wa malu eu to. Kufilamu dîba dietu dionso ne bukole buetu buonso kudi amu bu kuteka biuma bietu bionso bitudi babumbe mu nzubu muibakila mu tshitupa tshitu mâyi apasalala. Etshi se ndiela bintu mu mpaya mutubuke!

Bible mikuabu idi ikudimuna tshiambilu tshia se: ‘kabayi bukuta nawu’ ne: “kabayi badituamu” anyi ne: “kabayi badinamu ne kasuki.” (The Jerusalem Bible; Today’s English Version) Bantu ba meji kabatu bapua muoyo muanda wa se: tshikondo ‘ntshikepe’ bua matuku adi mashadile bukua-panu ebu ne bua se: ‘kudituamu’ anyi ‘kudinamu ne kasuki’ nekutufuishe bundu ne nekutunyingalaje mu mishindu yonso.​—1 Yone 2:15-17.

‘Nzambi kakukulekela’

Yehowa mmumanye majinga etu kutupita ne tuetu. Udi kabidi mumanye muaba utukadi bua bidi bitangila dikumbana dia disua diende. Ke bualu kayi udi utuvuluija ne: ‘Mioyo yenu kayikadi ne lukuka lua biuma, nuikale ne disanka ne bintu binudi nabi, bualu bua Nzambi muine wakuamba ne: Tshiena nkulekela, nansha kakese, tshiena nkushiya tshianana.’ (Ebelu 13:5) Aa mmêyi adi akolesha ku muoyo! Bu muvua Yezu widikija mushindu udi Nzambi wambuluisha bantu bende ne dinanga, mu Muyuki wende muende lumu wakenzaye pa Mukuna wakakula tshitupa tshile bua kulongesha bayidi bende ngikadilu muimpe wa kuikala nende bua mudimu ne bintu.​—Matayo 6:19-33.

Bantemu ba Yehowa badi badienzeja bua kutumikila malongesha au. Tshilejilu, pavua mfumu wa mudimu mukuabu muambile Ntemu kampanda muena mudimu wa nzembu bua kuikalaye pa tshibidilu wenza mudimu mu mêba makuabu a pa mutu, muena mudimu eu wakabenga. Bua tshinyi? Bualu kavua musue bua mudimu wende wa bianza kudiawu dîba divuaye mulongoluele dîku diende ne malu a mu nyuma to. Bu muvuaye muena mudimu wa tshitembu uvuabu beyemena, mfumuende wa mudimu wakanemeka tshivuaye musue. Malu kaatu enzeka nanku misangu yonso to, ne pamuapa muntu udi mua kukeba mudimu mukuabu bua kumona mua kuikala ne nsombelu wa nkatshinkatshi. Nansha nanku, aba batu beyemena Yehowa ne muoyo mujima batu pa tshibidilu bamona ne: ngikadilu wabu muimpe ne ngenzelu wabu mulenga wa mudimu bitu bibanyishisha kudi bamfumu babu ba mudimu.​—Nsumuinu 3:5, 6.

Dîba dikala mudimu wonso usankisha

Lelu mu ndongoluelu eu mubi wa malu, mudimu ne diakalenga dia kupeta mudimu kabiakuikala kabiyi ne ntatu ne mpukapuka to. Nsombelu  udi mua kunyanguka bikole bua mudi malu a pa buloba ebu enda atenkakana ne malu a mpetu enda atatakana ne anyanguka. Kadi nsombelu eu ngua tshitupa tshîpi. Mu katupa kîpi emu, kakuakuikala muntu nansha umue wapangila mudimu to. Kabidi, mudimu wonso newikale muimpe ne utusankisha. Mmunyi mudi bualu ebu mua kuenzeka? Ntshinyi tshiashintulula malu nunku?

Yehowa wakadianjila kuakula bua tshikondo etshi mukana mua muprofete wende Yeshaya. Wakamba ne: ‘Bua monayi, ndi mfuka diulu dipiadipia ne buloba bupiabupia; malu a diambedi kaena avulukibua, ne malu aa kaena abuela mu mitshima kabidi.’ (Yeshaya 65:17) Uvua wakula bua mbulamatadi mupiamupia, mu mbulamatadi au bantu nebikale mua kusomba mu nsombelu mupiamupia.​—Danyele 2:44.

Mulayi udi utungunuka wamba bua mushindu wikala bantu ne bua kusomba ne kuenza mudimu tshikondo atshi ne: ‘Nebase nzubu, nebashikamemu; nebatentule mionji ya tumuma tua mvinyo mu madimi, nebadie tumuma tuayi. Kabena basa nzubu bua mukuabu abuelamu; kabena bakuna bintu bua mukuabu abidie; bualu bua bu mudi matuku a muoyo wa mutshi mbu mudi matuku a bantu banyi, ne bantu bangakusungula nebasanke musangu mule mu mudimu wa bianza biabu. Kabena bakuata mudimu wabu patupu, kabena balela bana bua kabutu kakuate bana lubilu; bualu bua buobu nebikale bana baledibue kudi badi Yehowa muvudijile disanka, ne bana babu badibu balela nebasankishibue nabu diatshimue.’​—Yeshaya 65:21-23.

Ndishilangana kayipu dikala mu bukua-panu abu bupiabupia budi Nzambi mulongolole! Kuenaku musue kusomba mu bukua-panu bua mushindu’eu, ‘muwikala kuyi mua kukuata mudimu webe patupu,’ kadi muwapeta ‘mamuma’ a mudimu webe anyi? Kadi tangila bantu bikala mua kupeta mabenesha aa: ‘Badi baledibue kudi badi Yehowa muvudijile disanka.’ Udi mua kuikala munkatshi mua bantu aba ‘badibu bavudijile disanka’ wewe mulonge bua kumanya Yehowa ne mukumbaje malu adiye ulomba. Yezu wakamba ne: ‘Eu udi muoyo wa tshiendelele, bua buobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ (Yone 17:3) Bantemu ba Yehowa nebikale ne disanka dia kukuambuluisha bua upete dimanya edi didi dipetesha muoyo ku diambuluisha dia dilonga dia Bible.

[Kazubu mu dibeji 6]

“BADI ANU BABAKEBA”

Bible udi wamba ne: ‘Malu onso anudi nuenza, nuenze ne mitshima yenu [yonso] bu nudi nuenzela Mukalenge; ki mbu nudi nuenzela bantu.’ (Kolosai 3:23) Bulelela, muntu udi ne ngikadilu wa ku mudimu mulombola kudi dîyi dilenga edi udi mua kuikala muena mudimu udibu bakeba bikole. Bua bualu ebu, mu mukanda wende kampanda, mukalenge Luna udi ubela aba badi bakeba kuangata bena mudimu bua kubakeba munkatshi mua bantu ba tshisumi ba mu bimue bitendelelu, kadi udi usakidila ne: “Bua kuamba bulelela, tutu pa tshibidilu tuangata Bantemu [ba Yehowa].” Munkatshi mua malu adi amusaka bua kuamba nunku mudi bua se: mbamanyike bimpe bua diamba diabu dia bulelela, ne muanda eu udi wenzeja bua se: ‘bikale anu babakeba’ bua kubangata ku midimu.

[Bimfuanyi mu dibeji 5]

Dienza mudimu ne dikumbaja malu a mu nyuma ne dijikija lutetuku ne nkatshinkatshi didi dipetesha disanka