Kuitabuja Nzambi utudi katuyi mua kuikala bamanye

BANTU babidi pa basatu mu ditunga dia Allemagne badi bitabuja Nzambi. Pabi, pakebejabu bantu bapite pa tshinunu bua kumvuija tshidi Nzambi udibu bitabuja, pabuipi ne muntu yonso wakafila diandamuna dishilangane ne dia mukuabu. Tshikandakanda tshikuabu tshidi tshiamba ne: “Bena mu Allemagne badi muntu yonso ne yende ngenyi mishilangane pa bidi bitangila Nzambi anu mudi bantu bine bashilangane.” (FOCUS) Nansha mudi kuitabuja Nzambi kuikale ne mushinga, kabienaku bikuatshisha luse bua kumona bantu bitabuja muntu udibu kabayi bamanye tshidiye anyi?

Dielakana dia nunku pa bidi bitangila tshidi Nzambi anyi bumuntu buende kadiena anu mu Allemagne nkayamu to; didi miaba yonso mu matunga a ku Mputu. Mandamuna a nkonko ivuabu bele bantu mu ditunga dia Autriche, dia Grande-Bretagne ne dia Pays-Bas mmaleje ne: bantu ba miaba yonso badi bitaba bua se: Nzambi “mbukole budi butambe bunene anyi mbualu busokoka bukena kumvuija.” Nzambi udi nangananga bualu busokoka munkatshi mua bansonga, nansha munkatshi mua aba badi bamuitabuja.

Udiku mumanye Nzambi bimpe menemene anyi?

Kudi dishilangana dinene pankatshi pa kumanya patupu muntu ne kumumanya bimpe menemene. Kumanya patupu muntu (bu mudi mukalenge kampanda udi mutantshi mule, munayi wa manaya udi mupiluke bikole, munayi wa filme udi mutumbe) kudi kumvuija kuitaba tshianana ne: udiku. Kadi kumanya muntu bimpe menemene kudi kumvuija malu a bungi. Kudi kumvuija kumanya ngikadilu wa muntu au, bienzedi biende, meji ende, malu adiye musue ne adiye kayi musue, ne malu adiye mulongolole bua kuenza mu matuku atshilualua. Kumanya muntu bimpe kudi kufikisha ku didia nende malanda mashême.

Bantu nkama ya binunu mbafike ku dimona ne: kuikala ne lungenyi lubuitshidile pa bidi bitangila Nzambi anyi kumumanya patupu ki nkukumbane to. Mbele tshidia baye kumpala bua kumanya Nzambi bimpe menemene. Mbasanganeku ne: dimanya edi didi ne mushinga anyi? Muntu mukuabu diende Paul, udi musombele ku Nord kua Allemagne ne uvua kumpala witabuja Nzambi anu bua tshitabataba, wakapangadika bua kumumanya bimpe menemene. Paul udi umvuija ne: “Bua kufika ku dimanya Nzambi bimpe menemene, bidi bilomba dîba ne didienzeja, kadi bipeta bidi ne mushinga wa bungi. Kudia malanda mashême ne Mufuki kudi kuvuija dituku dionso dia muoyo dilenga dia dikema.”

Kufila dîba ne makanda bua kumanya Nzambi bimpe kudiku ne mushinga anyi? Suaku ubale tshiena-bualu tshidi tshilonda.

[Lungenyi lunene lua mu dibeji 3]

Kudi dishilangana dinene pankatshi pa kumanya patupu muntu ne kumumanya bimpe menemene