Nkonko ya babadi

Bua tshinyi Yeshaya 30:21 udi wamba ne: dîyi dia Yehowa didi difumina ‘kunyima’ padi eku mvese wa 20 uleja ne: Yehowa udi kumpala bualu udi wamba ne: ‘Mêsu ebe neamone Muyishi webe’?

Yeshaya 30:20, 21 udi wamba ne: ‘Muyishi webe kêna usokoma kabidi, mêsu ebe neamone Muyishi webe. Pawakeba kusesuka ku tshianza tshia balume, anyi ku tshianza tshia bakaji, matshi ebe neumvue dîyi difuma kunyima kuebe, diamba ne: Njila kayeu, endelamu.’

Patudi tuangata malu aa ku muaku ku muaku, muntu udi ubala udi umona Yehowa Muyishi Munene kumpala kuende, kadi umvuila dîyi diende panyima. Kadi miaku eyi idi mu ngakuilu wa tshimfuanyi ne tudi mua kuyumvua nanku.

Ngakuilu udi mu mvese wa 20 udi utuvuluija muena mudimu udi muikale kumpala kua mfumuende, mudilongolole bua kuenza tshionso tshidi mfumuende mua kumuambila. Anu bu muena mudimu udi utangila tshianza tshia mfumuende ne lubatshi lua bungi bua kumona tshidiye ukeba, basadidi ba Yehowa lelu mbatangije mêsu abu ku mibelu miangatshila mu Bible idi Yehowa wenda ufila ku diambuluisha dia bulongolodi buende bua pa buloba. (Musambu 123:1, 2) Eyowa, badi balonda tshidiye ubambila, bakeba kumanya tshionso tshidiye ubambila ku butuangaji bua “mupika wa lulamatu ne wa budimu.”​—Matayo 24:45-47, NW.

Kadi netuambe tshinyi bua dîyi didi basadidi bende bumvua panyima pabu? Bidi bia meji bua kuamba ne: dîyi didi difuma panyima edi ndîyi dia Nzambi divuaye muakule mu bikondo bishale, wakuila mu Dîyi diende didibu bafunde ne didi ‘mulami wa bintu wa lulamatu’ umvuija. (Luka 12:42) Basadidi ba Nzambi ba matuku etu aa badi bumvua dîyi edi padibu balonga Bible ne muoyo umue ne batumikila mikenji idimu ku diambuluisha dia mikanda mipatula kudi “mupika wa lulamatu ne wa budimu,” mubikila kabidi ne: ‘mulami wa bintu wa lulamatu.’ Padibu beyemena anyi bateya ntema mikole ku bulombodi budi bufika pa dîba diakanyine budi Muyishi Munene ufila ne padibu balonga Dîyi dia Nzambi difunda kukadi bidimu nkama ne nkama, mu ngakuilu wa mu tshimfuanyi, basadidi bende badi bamumona kumpala kuabu ne bumvua dîyi diende panyima pabu.​—Lomo 15:4.