“Tshivua mumanye malu a Nzambi a bungi to”

MUNTU mukuabu wa mu tshimenga tshia Kerala (mu ditunga dia Inde) wakafunda ne: “Bantemu ba Yehowa mbabange kulua kuntangila bua kungambila malu malenga a Bukalenge bua Nzambi katshia ku tshidimu tshishale. Nkavua muenze mu Katolike bidimu muanda-mukulu, kadi tshivua mumanye malu a Nzambi a bungi to. Anu mu tshidimu tshimue tshianana, ndi mulonge malu a bungi be!” Udi utungunuka wamba ne: “Ndi ne disanka divule bua kumanya ne: Tshibumba tshia Nsentedi tshidi tshipatuka mu miakulu 139 [mpindieu mu miakulu 146]. Bidi binkemesha bua kumona ne: bantu ba miakulu yonso badi benda bamanya mukenji wa Nzambi.”

Nansha mudi bena nkidi ba bungi bamba ne: kakuena mushindu wa kumanya Nzambi, mupostolo Paulo wakaleja bimpe ne: kudi mushindu wa kumumanya. Paulo wakambila bamue bena mu tshimenga tshia Atena (bavua ne bakuabu ba munkatshi muabu batendelela ku tshioshelu tshia ‘Nzambi udi kayi mumanyibue’) ne: ‘Unudi nutendelela kanuyi bamumanye bimpe, nyeye undi nnumanyisha. Nzambi wakafuka buloba ne bintu bionso bidipu, utu wapa bantu bonso muoyo ne mupuya ne bintu bionso. Yeye kabidi wakafuka bisamba bionso bia bantu, bafuma mu muntu umue bua kuikalabu pa buloba buonso.’​—Bienzedi 17:23-26.

Paulo wakambila bantu bavua bamuteleja bua kukeba bua kumanya Mufuki, bualu ‘kêna netu kule kudi muntu ne muntu.’ (Bienzedi 17:27) Bantemu ba Yehowa nebikale ne disanka dia kukuambuluisha bua wewe kumanya Nzambi mulelela ne ngikadilu yende ya tshitembu.