Utu umona mushinga wa Didia dia Mukalenge anyi?
Utu umona mushinga wa Didia dia Mukalenge anyi?
“Padi muntu udia diampa dia Mfumu, unuina mu dikopu diende, kayi mubiakanyine, nebamuase tshilumbu tshia mubidi ne mashi bia Mfumu.”—1 KOLINTO 11:27, Mukanda wa Mvidi Mukulu [Mishonyi, MMV].
1. Ntshibilu kayi tshipite bikuabu ku mushinga tshienzeka mu tshidimu etshi tshia 2003, ne tshiakabanga munyi?
TSHIBILU tshipite bikuabu ku mushinga mu 2003 emu netshienzeke panyima pa dibuela dia dîba mu dia matuku 16 a ngondo muinayi. Dituku adi Bantemu ba Yehowa nebenze musekelelu wa Tshivulukilu tshia lufu lua Yezu Kristo. Anu mudibu baleje mu tshiena-bualu tshia kumpala, Yezu wakabanjija musekelelu eu (udibu babikila kabidi ne: Didia dia Mukalenge) kunyima kua yeye ne bapostolo bende bamane kusekelela difesto dia Pasaka mu dia matuku 14 a ngondo wa Nisana, mu tshidimu tshia 33 bikondo bietu. Mvinyo ne diampa kadiyi diela luevene (bimanyishilu bia mu Tshivulukilu) bitu biumvuija mubidi kauyi mpekatu wa Kristo ne mashi ende akaya panshi (mulambu umuepele udi mua kumbushila bantu mpekatu ne lufu bidibu bapiane).—Lomo 5:12; 6:23.
2. Ndidimuisha kayi didi mu 1 Kolinto 11:27?
2 Bantu badi badia diampa ne banua mvinyo mu Tshivulukilu etshi badi ne bua kuenza nunku mu mushindu muakanyine. Mupostolo Paulo wakumvuija bualu ebu bimpe mu mukanda wakafundilaye bena Kristo ba mu Kolinto wa kale, muvua bantu basekelela bibi Didia dia Mukalenge. (1 Kolinto 11:20-22) Wakabafundila ne: “Padi muntu udia diampa dia Mfumu, unuina mu dikopu diende, kayi mubiakanyine, nebamuase tshilumbu tshia mubidi ne mashi bia Mfumu.” (1 Kolinto 11:27, MMV) Mêyi aa adi asua kumvuija tshinyi?
Bamue bavua badisekelela mu mushindu mubi
3. Bena Kristo bavule ba mu Kolinto bavua benza tshinyi mu misekelelu ya Didia dia Mukalenge?
3 Bena Kristo ba bungi ba mu Kolinto bavua basekelela Tshivulukilu mushindu uvua kauyi muakanyine to. Kuvua ditapuluka munkatshi muabu, ne misangu mipite pa umue bamue bavua balua ne biakudia biabu bia dilolo bua kubidia kumpala anyi dîba dia tshisangilu etshi, ne misangu mivule bavua badia ne banua bapitshisha. Kabavua batabale ni mmu lungenyi ni mmu nyuma. Ke tshivua tshienze ne: ‘babase tshilumbu tshia mubidi ne mashi bia Mfumu.’ Mpindieu bavua kabayi ne biakudia dilolo adi bavua ne nzala ne meji abu avua aya kua tshianana. Nenku ba bungi bavua badia diampa ne banua mvinyo kabayi bamona bunême bua musekelelu eu to. Ke mushindu uvuabu badiela nkayabu muonji mu nshingu nanku!—1 Kolinto 11:27-34.
4, 5. Bua tshinyi bidi ne mushinga bua batu badia diampa mu Tshivulukilu kudikonkononabu?
4 Batu badia diampa ne banua mvinyo pa tshibidilu badi ne bua kudikonkonona tshidimu tshionso padi Tshivulukilu tshienda tshisemena pabuipi. Bua kunua ne kudia biakudia bia kuvuija nabi ditalala ebi mu mushindu muakanyine, badi ne bua kuikala ne ngikadilu mulenga wa mu nyuma. Muntu yonso udi kayi uleja kanemu anyi udi upepeja mulambu wa Yezu udi mua ‘kumushibua munkatshi mua bantu ba Nzambi’ anu bu muvuabu benza muena Isalele uvua udia biakudia bia kuvuija nabi ditalala kayi mudikezule.—Lewitiki 7:20; Ebelu 10:28-31.
5 Paulo wakafuanyikija Tshivulukilu ne biakudia bia kuvuija nabi ditalala bia mu Isalele wa kale. Wakakula bua bavua badia pamue mu Kristo e kulua kuamba ne: ‘Kanuena mua kunua lupanza lua Mukalenge ne lupanza lua bademon popamue; kanuena mua kudisanga ku mesa a Mukalenge ne ku mesa a bademon popamue.’ (1 Kolinto 10:16-21) Padi muntu utu udia diampa mu Tshivulukilu wenza mpekatu munene, udi ne bua kumutondela Yehowa ne kukeba diambuluisha dia mu nyuma kudi bakulu ba mu tshisumbu. (Nsumuinu 28:13; Yakobo 5:13-16) Yeye munyingalale bulelela ne mukuame mamuma adi aleja mudiye munyingalale, padiye udia diampa, udi udidia mu mushindu muakanyine.—Luka 3:8.
Kubuela mu Tshivulukilu bu babandidi bena kanemu
6. Badi Nzambi mupeshe diakalenga dia kudia diampa mu Didia dia Mukalenge mbanganyi?
6 Aba badi benzela bashadila ba ku bana babu ne Yezu 144 000 malu mimpe badi ne bua kudia diampa ne kunua mvinyo mu Didia dia Mukalenge anyi? (Matayo 25:31-40; Buakabuluibua 14:1) Tòo. Anu bantu badi Nzambi muele manyi a nyuma muimpe bua kuikala ‘bapianyi tshiapamue ne Kristo’ ke badiye mupeshe bukenji abu. (Lomo 8:14-18; 1 Yone 2:20) Kadi mpindieu mmuaba kayi udi nawu aba badi ne ditekemena dia kusomba kashidi pa buloba bua mparadizu bulombola kudi Bukalenge? (Luka 23:43; Buakabuluibua 21:3, 4) Bu mudibu kabayi bapianyi tshiapamue ne Kristo ne kabayi ne ditekemena dia kuya mu diulu, badi babuela mu Tshivulukilu bu babandidi bena kanemu.—Lomo 6:3-5.
7. Bua tshinyi bena Kristo ba mu bidimu lukama bia kumpala bavua bamanye ne: bavua ne tshia kudia ne kunua bimanyishilu bia mu Tshivulukilu?
7 Bena Kristo balelela ba mu bidimu lukama bia kumpala bavua bela manyi a nyuma muimpe. Bavule bavua ne tshipedi tshia nyuma tshia bishima tshimue peshi bia bungi bu mudi tshia kuakula mu miakulu. Nenku, kabivua bibakolele bua kumanya ne: bavua bela manyi a nyuma ne bavua ne bua kudia diampa to. Kadi bua mu tshietu tshikondo etshi, mêyi bu mudi adi alonda aa, ke adi ajadika mudi muntu muikale muela manyi a nyuma: ‘Buobu badi balombodibua kudi nyuma wa Nzambi, buobu badi bana ba Nzambi. Bua kanuakuangata nyuma wa bupika tshiakabidi bua kutshina; kadi nuakuangata nyuma wa bumpianyi bua bana utudi tubikila nende Nzambi ne: Aba, Tatu.’—Lomo 8:14, 15.
8. ‘Mamiinu mimpe’ ne ‘lupela’ bidibu batele mu Matayo nshapita wa 13 mbanganyi?
8 Katshia ku bikondo bia bena Kristo ba kumpala, bela manyi balelela bavua bakola bu ‘mamiinu mimpe’ anyi blé mu budimu bua ‘lupela’ anyi bena Kristo ba dishima. (Matayo 13:24-30, 36-43) Katshia ku bidimu bia 1870, ‘mamiinu mimpe’ akabanga kumueka bikole, ne ndambu wa bidimu panyima, bakambila batangidi bela manyi bena Kristo ne: “Bakulu . . . badi ne bua kuleja badi babuela [mu Tshivulukilu] malu aa: (1) ditabuja mu mashi [a Kristo]; ne (2) kudilambula kudi Mukalenge ne mudimu wende, nansha ne ku lufu. Badi mua kulomba mpindieu aba bonso badi bakumbaja malu aa (badi badilambule) bua kusekelela lufu lua Mukalenge.”—Studies in the Scriptures, Tshitupa tshia VI, The New Creation, dibeji dia 473. *
Dikeba “mikoko mikuabu”
9. Mmunyi muakatokeshabu diumvuija dia “musumba munene” mu 1935, ne tshiakenza bamue bavua badia diampa mu Tshivulukilu ntshinyi?
9 Mu kupita kua matuku, bulongolodi bua Yehowa buakabanga kuteya ntema mikole ku bakuabu pa kumbusha bayidi ba Kristo bela manyi. Malu a bungi pa muanda eu akenzeka munkatshi mua bidimu bia 1930. Kumpala kua bidimu abi mene, basadidi ba Nzambi bavua bamona “musumba munene” wa mu Buakabuluibua 7:9 (MMM) bu tshisumbu tshibidi tshia mu nyuma tshivua ne bua kudisangisha ne bela manyi 144 000 bamana kujula ku lufu bakadi mu diulu: badi bu bambuluishi ba mukaji musela anyi balunda ba mukaji wa Kristo. (Musambu 45:14, 15; Buakabuluibua 7:4; 21:2, 9) Kadi mu dia matuku 31 a ngondo muitanu, mu 1935, mu muyuki uvuabu benze mu mpungilu wa Bantemu ba Yehowa mu États-Unis (mu Washington, D.C.), bakumvuija ku diambuluisha dia Bible ne: “musumba munene” (anyi “tshisumbu tshinene,” Mukanda wa Nzambi) udi uleja “mikoko mikuabo” badi ne muoyo mu matuku a ku nshikidilu. (Yone 10:16) Panyima pa mpungilu au, bamue bantu bavua badia diampa ne banua mvinyo kumpala bakalekela bualu bakajingulula ne: bavua ne ditekemena dia kuikala ne muoyo pa buloba, ki mmu diulu to.
10. Umvuijabi ditekemena ne majitu a “mikoko mikuabo” ya matuku aa.
10 Nangananga kubangila mu 1935 ke muvuabu babange kukeba bantu bavua mua kulua “mikoko mikuabo,” badi ne ditabuja mu tshia-bupikudi, badilambule kudi Nzambi, ne batue “tshisumbu tshikese” tshia mikoko mu nyima mu mudimu wa diyisha Bukalenge. (Luka 12:32) Mikoko mikuabo eyi idi ne ditekemena dia kuikala ne muoyo wa tshiendelele pa buloba, kadi mu malu makuabu onso mmifuanangane ne bashadile ba bapianyi ba Bukalenge badi kuoku lelu. Amu bu benyi ba mu Isalele wa kale bavua batendelela Yehowa ne batumikila mikenji yende, mikoko mikuabu ya lelu idi itaba majitu a bena Kristo, bu mudi kuyisha lumu luimpe pamue ne bena Isalele wa mu nyuma. (Galatia 6:16) Kadi anu bu muvua muenyi nansha umue kayi mua kulua mfumu anyi muakuidi mu Isalele, muena mu mikoko mikuabu nansha umue kêna mua kukokesha mu Bukalenge bua mu diulu anyi kuikala muakuidi to.—Dutelonome 17:15.
11. Bua tshinyi dituku didi muntu utambula didi ne mushinga bua ditekemena diende?
11 Nunku biakabanga kumueneka patoke mu bidimu bia 1930 ne: mu tshibungi kasumbu ka bavua baya mu diulu kakavua kasungula. Kukadi kupite bidimu bia bungi mpindieu, badi benda bakeba mikoko mikuabu idi ne ditekemena dia kuikala ne muoyo pa buloba. Padi muela manyi umue upanga lulamatu, bidi bitamba kumueneka se: muntu umue wa mu mikoko mikuabu ukadi mukuatshile Nzambi mudimu mutantshi mule udi mua kupingana pa muaba udi mushale mutupu mu bantu 144 000.
Tshitu bamue bafikila ku ditupakena
12. Mmalu kayi adi mua kuenza ne: muntu alekele kudia diampa mu Tshivulukilu, ne mbua tshinyi?
12 Bena Kristo bela manyi mbamanye kakuyi mpata nansha mikese ne: badi ne bua kuya mu diulu. Kadi netuambe tshinyi bua bamue batu badia diampa kadi kabayi bababikile mu diulu to? Bu mudibu mpindieu bamanye ne: kabavua ne ditekemena edi, kakuyi mpata, kuondo kabu ka muoyo nekabakande bua kudia kabidi diampa. Nzambi kakusanka bua muntu udi wamba mudibu bamubikile mu diulu bua kulua mukalenge ne muakuidi pende yeye mumanye ne: kabavua bamubikile to. (Lomo 9:16; Buakabuluibua 20:6) Yehowa wakashipa Kola (muena Lewi) bualu uvua ukeba ne tshimbambila tshionso buakuidi bua Alona. (Ekesode 28:1; Nomba 16:4-11, 31-35) Padi muena Kristo kayi yonso umona se: uvua mutupakane mudie diampa, udi ne bua kulekela kudia ne kulomba Yehowa luse ne budipuekeshi buonso.—Musambu 19:13.
13, 14. Bua tshinyi bamue badi mua kutupakana ne kuela meji ne: mbababikile mu diulu?
13 Tshidi tshifikisha bamue ku diela meji bibi ne: badi ne bua kuya mu diulu ntshinyi? Lufu lua muena dibaka nabu peshi bualu bukole bukuabu budi mua kuenza ne: balekele kunanga muoyo pa buloba. Anyi badi mua kukeba bua kuikala ne ditekemena dimue ne mulunda wabu wa pa muoyo udi udiamba mudiye muena Kristo muela manyi. Tshidibi, Nzambi kêna mupeshe muntu nansha umue mudimu wa kubikila bakuabu bua kuya mu diulu to. Ne katu wenza bua bapianyi ba Bukalenge bumvue mêyi abambila mudiye mubasungule to.
14 Dilongesha dia bitendelelu dia dishima dia ne: bantu bakane bonso badi baya mu diulu didi mua kufikisha bamue ku diela meji ne: mbababikile mu diulu. Ke bualu kayi tudi ne bua kudikanda bua malongesha a dishima a kale ne malu makuabu kabitusesuishi to. Tshilejilu, bamue badi ne bua kudiebeja ne: ‘Ntu ngangata manga adi alenga buongo buanyi anyi? Mushindu untu ndiumvua pa tshibidilu udi mua kumfikisha ku diela meji bibi ne: nenye mu diulu anyi?’
15, 16. Tshitu banga bantu bambidila ne: mbela manyi ntshinyi?
15 Bakuabu badi ne bua kudiebeja ne: ‘Ntu musue kuikala ne lumu anyi? Ntu nkeba bumfumu ne muoyo mujima mpindieu peshi nkeba bua kulua mupianyi pamue ne Kristo anyi?’ Pakabikilabu bapianyi ba Bukalenge mu bidimu lukama bia kumpala, buonso buabu kabavua ne majitu kampanda a mu bulombodi bua tshisumbu to. Kabidi bantu badi bapete dibikila edi kabena bakeba ne: babamone babambe bualu mbela manyi to. Badi ne budipuekeshi budi badi ne ‘meji a Kristo’ ne bua kuikala nawu.—1 Kolinto 2:16.
16 Banga bavua mua kuikala bele meji ne: badi ne dibikila dia mu diulu bualu badi ne dimanya dia Bible divule. Pabi kuedibua manyi a nyuma kakuena kupesha muntu ngumvuilu wa malu wa pa buende to, bualu tudi tusangana Paulo ulongesha ne ubela bamue bela manyi. (1 Kolinto 3:1-3; Ebelu 5:11-14) Kudi mushindu udi Nzambi mulongolole bua kupesha basadidi bende biakudia bia mu nyuma. (Matayo 24:45-47) Nanku muntu nansha umue kêna mua kuamba ne: dikala muedibue manyi didi dimupesha meji mapite a badi ne ditekemena dia kushala pa buloba to. Diedibua manyi a nyuma kadiena dimuenekela ku dimanya kuandamuna nkonko ya pa Bible, diyisha anyi dienza miyuki bimpe to. Bena Kristo badi ne ditekemena dia kuikala pa buloba batu pabu benza malu aa bimpe.
17. Diedibua manyi a nyuma didi dilondeshila tshinyi ne nganyi?
17 Padi muena Kristo netu kampanda wela tshilumbu tshia diya mu diulu panshi, mukulu ta muena Kristo mukuabu mupie udi mua kuyukila nende. Kadi muntu nansha umue kêna mua kuangatshila mukuabu dipangadika edi to. Muntu udi mubikila bulelela kêna ne dijinga dia kuebeja bakuabu pa ditekemena edi to. Bela manyi ‘ki mbabalele tshiakabidi ku diminu didi dibola to, mbabalele ku diminu didi kadiyi dibola: ku muaku wa [Nzambi] wa muoyo wa kashidi.’ (1 Petelo 1:23, MMM) Ku diambuluisha dia nyuma wende ne Dîyi diende, Nzambi udi ukuna “diminu” didi divuija muntu eu ‘tshifukibua tshipia-tshipia’ tshikale ne ditekemena dia kuya mu diulu. (2 Kolinto 5:17) Ne Yehowa ke udi usungula. Kuedibua kua manyi kakutu kuenzeka ‘bua disua dia muntu, anyi bua bienzedi bia muntu, kadi bua Nzambi.’ (Lomo 9:16) Kadi mpindieu mmunyi muamanya muntu ne: mbamubikile mu diulu?
Tshidibu bikale bajadikile nanku
18. Nyuma wa Nzambi udi umanyishangana munyi ne nyuma wa bela manyi?
18 Nyuma wa Nzambi udi utuisha bena Kristo bela manyi ne: badi ne ditekemena dia kuya mu diulu. Paulo wakafunda ne: ‘Nuakapeta nyuma wa bumpianyi bua bana utudi tubikila nende Nzambi ne: Aba, Tatu. Nyuma muimpe muine udi mumanyishangane ne nyuma yetu ne: Tuetu tudi bana ba Nzambi. Ne, bituikala bana, tudi bapianyi kabidi; bapianyi ba Nzambi, ne bapianyi tshiapamue ne Kristo: bituakenga nende, mbua tuetu tutumbishibue nende.’ (Lomo 8:15-17) Nyuma muimpe udi wenzeja nyuma ta lungenyi luonso lua bela manyi bua buobu kumvua ne: malu adi Mifundu yamba bua bana ba Yehowa ba mu nyuma adi abatangila buobu. (1 Yone 3:2) Nyuma wa Nzambi udi ubasaka bua kudiumvuabu bu bana ba Nzambi ne ulela munda muabu ditekemena dia pa buadi. (Galatia 4:6, 7) Eyowa, kuikala bapuangane ne kuikala ne muoyo wa tshiendelele pa buloba pamue ne bena dîku ne balunda kudi kufila disanka, kadi atshi ki nditekemena didibu nadi to. Ku diambuluisha dia nyuma wende, Nzambi mmukuamishe munda muabu ditekemena dikole dia kuya mu diulu, dibasaka too ne bua kulekela malanda ne masanka onso a pa buloba.—2 Kolinto 5:1-5, 8; 2 Petelo 1:13, 14.
19. Mmudimu kayi udi nawu tshipungidi tshipiatshipia mu nsombelu wa muena Kristo muela manyi?
19 Bena Kristo bela manyi mbashindike bua ditekemena diabu dia kuya mu diulu ne bua dibuela diabu mu tshipungidi tshipiatshipia. Yezu wakakula bua tshipungidi etshi pavuaye ubanjija Tshivulukilu e kuambaye ne: “Dikopu edi ntshiovu tshipiatshipia tshia [Nzambi], tshidibu bashindika ne mashi anyi, adibu bapumuna bualu buenu.” (Luka 22:20, MMV) Nzambi ne bela manyi ke badi badie tshipungidi etshi. (Yelemiya 31:31-34; Ebelu 12:22-24) Yezu ke mutuangaji watshi. Katshia mashi avua Yezu mupuekeshe adishisha tshipungidi etshi, mu tshipungidi tshipiatshipia etshi muakabuela ki ng’anu bena Yuda nkayabu to, kadi kabidi ne bantu ba bisamba bikuabu bavua balue tshisamba bua dîna dia Yehowa ne bakalua tshitupa tshia “dimiinu” dia Abalahama. (Galatia 3:26-29, NW; Bienzedi 15:14) “Ndondu wa tshiendelele” anyi tshipungidi tshia tshiendelele etshi tshidi tshifikisha bena Isalele ba mu nyuma ku dibishibua ku lufu bua kuikala ne muoyo udi kauyi kufua mu diulu.—Ebelu 13:20, MMV.
20. Mmu tshipungidi kayi mudi bela manyi ne Kristo?
20 Bela manyi mbamanye kakuyi dielakana ditekemena diabu. Mbababueje mu tshipungidi tshikuabu tshidibu babikila ne: tshipungidi tshia Bukalenge. Yezu wakamba bua bidi bitangila dienza mudimu diabu pamue nende ne: ‘Nuenu mbakunanukila nanyi mu makenga anyi; [ne ndi ndia nenu tshipungidi, bu mudi Tatu wanyi mudie nanyi tshipungidi, bua bukalenge, NW].’ (Luka 22:28-30) Tshipungidi etshi tshidi Kristo mudie ne bakalenge nende netshishale kashidi.—Buakabuluibua 22:5.
Tshikondo tshia Tshivulukilu ntshikondo tshia mabenesha
21. Tudi mua kupeta masanka a bungi mu tshikondo tshia Tshivulukilu bishi?
21 Tshikondo tshia Tshivulukilu tshidi ne mabenesha a bungi. Dibala dia Bible dilongolola bua tshikondo etshi didi dituambuluisha. Ntshikondo tshilenga menemene tshia kuenza masambila, kuelangana meji bua muvua Yezu pa buloba ne muakafuaye, ne bua kuenza mudimu wa kuyisha Bukalenge. (Musambu 77:12; Filipoi 4:6, 7) Tshibilu etshi tshiotshi nkayatshi tshidi tshituvuluija dinanga didi Nzambi ne Kristo batunange nadi pa kufila mulambu wa tshia-bupikudi wa Yezu. (Matayo 20:28; Yone 3:16) Tshia-bupikudi etshi tshidi tshitupesha ditekemena ne tshitukankamija, ne tshidi ne bua kukolesha dipangadika dietu dia kulonda dikasa dia Kristo. (Ekesode 34:6; Ebelu 12:3) Tshivulukilu tshidi kabidi ne bua kutukolesha bua kukumbaja mutshipu wetu wa kuikala basadidi ba Nzambi ne bayidi ba lulamatu ba Muanende munanga.
22. Ndipa kayi dinene ditu Nzambi mupeshe bukua-bantu, ne mmushindu umue kayi utudi mua kuleja dianyisha bua dipa edi?
22 Bulelela, Yehowa udi utupa bintu bilenga be! (Yakobo 1:17) Dîyi diende didi ditulombola, nyuma wende utuambuluisha, ditekemena dia muoyo wa tshiendelele ne: kadishadidi. Dipa ditambe bunene dia Nzambi mmulambu wa Yezu mufila bua mibi ya bela manyi ne ya bakuabu bonso badi ne ditabuja. (1 Yone 2:1, 2) Mpindieu amba tumone, lufu lua Yezu ludi ne mushinga kayi buebe wewe? Bua kuleja dianyisha, neudisangishe pebe panyima pa dibuela dia dîba mu dia matuku 16 a ngondo muinayi, mu 2003 emu, bua kusekelela mufikilu wa Didia dia Mukalenge anyi?
[Mêyi adi kuinshi]
^ tshik. 8 Mipatula kudi Bantemu ba Yehowa, kadi kabatshitu bayipatula kabidi to.
Mandamuna ebe adi tshinyi?
• Badi ne bua kudia diampa mu Tshivulukilu mbanganyi?
• Tshidi “mikoko mikuabo” ibuelela mu Tshivulukilu bu babandidi bena kanemu ntshinyi?
• Mmunyi mudi bela manyi bamanya ne: badi ne bua kudia diampa ne kunua mvinyo mu Tshivulukilu tshia lufu lua Yezu?
• Bua tshinyi tshikondo tshia Tshivulukilu ntshikondo tshilenga?
[Nkonko ya dilonga]
[Tablo/Bimfuanyi mu dibeji 18]
(Bua kumona malu bimpe, tangila mu mukanda)
Bavua babuele mu Tshivulukilu
MU MILIYO
15 597 746
15
14
13 147 201
13
12
11
10
9
8
7
6
5
4 925 643
4
3
2
1
878 303
63 146
1935 1955 1975 1995 2002
[Tshimfuanyi mu dibeji 18]
Neubuele mu Didia dia Mukalenge dia tshidimu etshi anyi?
[Bimfuanyi mu dibeji 21]
Tshikondo tshia Tshivulukilu ntshikondo tshimpe tshia kubala Bible bikole ne kumanyisha Bukalenge