Bena Kristo badi bambuluisha bapele

BIDI bimueneka ne: bupele buvua butangalake bikole munkatshi mua bena Yuda mu bidimu lukama bia kumpala. Dibakokesha kudi ditunga dikuabu diakabanga mu tshikondo tshiakayabu mu bupika mu Babulona, diakapangisha ditumikila dia Mikenji ya Mose, ivua ikuba bintu bia kupiana. (Tangila Nehemiya 9:36, 37.) Balombodi ba bitendelelu, nangananga Bafalese bavua badifile bikole ku bilele bia bankambua pamutu pa kulongesha bena Isalele dinanga dia muntu nabu ne mushindu muimpe wa kuangata baledi babu bakulakaje bavua bakenga. (Matayo 15:5, 6; 23:23; tangila Luka 10:29-32.) Bafalese banangi ba makuta kabavua batabalela bapele to.​—Luka 16:14.

Kadi Kristo Yezu yeye ‘luse luvua lumukuata, bualu bavua bapungile, bakengakana bu mikoko kayiyi ne muyilami.’ (Matayo 9:36) Dimanyisha diende dia lumu luimpe kudi bapele ne bakengi diakaleja muvuaku dishilangana dinene pankatshi pende ne ngikadilu wa balombodi ba tshitendelelu tshia bena Yuda, kufikadi too ne ku dikala tshijadiki tshia se: uvua Masiya. (Matayo 11:5; Luka 4:18; 7:22) Diakunzuluila kabidi bantu bakamuteleja njila wa diakalenga dinene dia kupiana Bukalenge bua mu diulu.​—Matayo 5:3; Luka 6:20.

Bu muvua bena Yuda badie tshipungidi ne Nzambi, bavua ne bukenji bua kuambuluisha bena Isalele bavua bakenga. (Nsumuinu 14:21; 28:27; Yeshaya 58:6, 7; Yehezekele 18:7-9) Zakayo uvua mumanye bualu ebu bimpe bualu pakitabujaye Yezu bu Masiya, wakamba ne: “Mfumu, nempeshe bapele tshiabibidi tshia bintu bianyi.” (Luka 19:8, MMM) Bua bualu bumue ebu, Kristo Yezu wakamba ne: ‘Kadi pawalambishila bantu bidia, ubikile bapele ne batapa ne balema ne bafofo; nebakutumbishe, bua bobu kabena ne bia kukupingajila kabidi.’ (Luka 14:13, 14) Dituku dikuabu wakambila nsonga mubanji kampanda mumanyi wa mikenji ne: ‘Upane biudi nabi bionso, ubiabanyine bantu bapele, newikale ne bintu mu tshibutshilu mu diulu; ulue kundonda meme.’ (Luka 18:22) Bu muvua muntu eu kayi musue kuabanyina bantu bakuabu bintu biende bua kubambuluisha, wakaleja ne: kavua uditatshisha bua bakengi to, ne nanku kavua ne ngikadilu milomba bua kuikala muyidi wa Yezu nansha.​—Luka 18:23.

Dikankamija dia Yezu dia kuambuluisha bapele divua dipetangana ne bivuaye yeye nkayende muenze. Bu muvuaye Muana wa Nzambi mu diulu, uvua ne bionso. Nansha muvuaye ‘mubanji, kadi wakalua mupele.’ Nansha muvuaye mulue pa buloba bu muntu mupele, wakapikula bantu ne kufilaye biuma bia mushinga mukole, mbuena kuamba ne: ditekemena dia bayidi bende dia kulua bana ba Nzambi. (2 Kolinto 8:9) Bakapeta kabidi biuma bivule bia mu nyuma.​—Tangila 2 Kolinto 6:10; Buakabuluibua 2:9; 3:17, 18.

Kabidi, pavua Yezu pa buloba, uvua utabalela yeye nkayende bantu bavua bapele ku mubidi. Yeye ne bapostolo bende bavua ne makuta avuabu bambuluisha nawu bena Isalele. (Matayo 26:9-11; Mâko 14:5-7; Yone 12:5-8; 13:29) Mu bidimu biakalonda, bena Kristo bakambuluisha kabidi bana babu bavua bapele ne bintu. (Lomo 15:26; Galatia 2:10) Kadi bamue bakapua muoyo, kufikishabi muyidi Yakobo ku dibakanyina bua diangata babanji ne mushinga ne dipetula bapele.​—Yakobo 2:2-9.

Bushuwa, anu aba bavua bakumbanyine bua kubambuluishabu ne bintu abi ke bakabipeta. Kadi kakasaka bena Kristo ku dikala bena lulengu to. Mupostolo Paulo wakafundila bena Tesalonike ne: ‘Bikala muntu kayi witabuja kuenza mudimu, kadi biende tshintu.’​—2 Tesalonike 3:10.