Bua tshinyi batu bakengesha bantu bua tshitendelelu tshiabu?

UDIKU wela meji ne: badi ne bua kukengesha bantu bua tshitendelelu tshiabu anyi? Pamu’apa kuena wela meji nanku to, nangananga pikala malu abu kaayi adiata manême a bantu bakuabu. Kadi dikengesha bantu bua tshitendelelu tshidibu ndia kale ne nditungunuke too ne lelu. Tshilejilu, bakabenga kunemeka manême a Bantemu ba Yehowa ba bungi ku Mputu ne mu matunga makuabu, kubakengeshabu ne tshikisu munkatshi mua bidimu bia 1900.

Tshikondo atshi, bakakengesha Bantemu ba Yehowa bikole ne tshikisu tshia matuku mulongo mu bukokeshi bua mishindu ibidi minene ya makalenge a kalume nkaya ku Mputu. Ntshinyi tshidi malu akabenzekela atulongesha pa bidi bitangila dikengesha bantu bua tshitendelelu tshiabu? Ne ndilongesha kayi ditudi mua kupetela ku tshiakenzabu bua dibakengesha adi?

‘Kabena ba pa buloba’

Bantemu ba Yehowa badi badienzeja bua kuikala batumikidi ba mikenji ya mbulamatadi, bena ditalala ne bantu bena bikadilu bimpe. Kabena baluisha mbulamatadi anyi bakeba kubundangana nayi to, peshi benza bualu budi buenza ne: bantu babakengeshe bua bashale bu bantu bafuile ditabuja nansha. Bena Kristo aba kabatu babuelakana mu malu a tshididi to, bualu badi balonda mêyi a Yezu a se: ‘[Bayidi banyi] kabena ba pa buloba, bu mundi meme tshiyi wa pa buloba.’ (Yone 17:16) Mbulamatadi ya bungi idi yanyishila Bantemu bua kubenga kubuelakana mu malu a tshididi. Kadi bena bukalenge bua kalume nkaya kabatu bitaba padi Bible ulomba bena Kristo bua kabikadi ba pa buloba to.

 Tshitubu benzela nunku tshivua tshiumvuija mu tshisangilu kampanda tshivua tshienzekele mu iniversite wa ku Heidelberg, mu ditunga dia Allemagne mu ngondo wa dikumi ne umue, tshidimu tshia 2000. Tshisangilu atshi tshivua ne tshiena-bualu tshia ne: “Dikengesha Bantemu ba Yehowa ne dilomba diabu dia manême mu bukalenge bua kalume nkaya bua ba-Socialiste ne ba-Koministe.” Mulongeshi Clemens Vollhhals wa mu tshilongelu tshia Hannah-Arendt tshia Makebulula a malu a Bukokeshi bua kalume nkaya wakamba ne: “Makalenge a kalume nkaya kaatu ashikija midimu yawu ku malu a tshididi to. Atu alomba bua muntu yonso kuakokela mu malu onso nkong.”

Bena Kristo balelela kabena ne bua kukokela mbulamatadi mu “malu onso nkong” to, bualu Yehowa Nzambi nkayende ke udibu balamate muabu muonso. Bantemu badi basombele mu matunga adi ne mbulamatadi ya kalume nkaya mbafike ku dimona ne: misangu mikuabu malu atu mbulamatadi ibalomba kaatu apetangana ne ditabuja diabu to. Ntshinyi tshidibu benze bua dibenga kupetangana edi? Misangu ya bungi kale, Bantemu ba Yehowa bakatumikila dîyi diambile bayidi ba Kristo edi: ‘Butudi nabu mbua kutumikila mêyi a Nzambi kumpala kua mêyi a bantu.’​—Bienzedi 5:29.

Bantemu ba bungi bakashala ne lulamatu ne kubenga kubuelakana mu malu a tshididi, nansha muakabakengeshabu ne tshikisu tshitambe bukole. Tshiakenza ne: bananukile ntshinyi? Nkuepi kuakapetelabu bukole bua kunanukila nunku? Tutelejayi mudibu bandamuna buobu nkayabu. Ne tumonayi tshidi yonso wa kutudi (udi Ntemu ne udi kayi Ntemu) ne bua kulongela ku malu akabafikila.

[Lungenyi lunene lua mu dibeji 4]

Bakakengesha Bantemu ba Yehowa ba mu Allemagne ne tshikisu tshikole tshia matuku mulongo mu makalenge onso abidi a kalume nkaya a mu bidimu bia 1900

[Lungenyi lunene lua mu dibeji 4]

“Makalenge a kalume nkaya kaatu ashikija midimu yawu ku malu a tshididi to. Atu alomba bua muntu yonso kuakokela mu malu onso nkong.”​—Dr. Clemens Vollhals

[Tshimfuanyi mu dibeji 4]

Bena dîku dia Kusserow kabavua ne budikadidi bualu bakabenga bua kulekela ditabuja diabu

[Tshimfuanyi mu dibeji 4]

Bakashipa Johannes Harms mu buloko bua bena Nazi bua tshitendelelu tshiende