“Ngakapeta bintu bionso bimvua nabi dijinga”

BILONDESHILE Bulongolodi bua Malu a Makanda a mubidi bua Buloba bujima (OMS), tunyinganyinga ntukuate bantu bapite pa miliyo 120 pa buloba bujima matuku aa. Ku tshidimu tshionso, bantu muliyo mujima badi badishipa ne bantu miliyo 10 anyi mitue ku 20 batu bamba kudishipa. Ndiambuluisha kayi didiku bua badi bateketa ku muoyo ne tunyinganyinga? Manga adibu mua kufundila muntu adi mua kukepesha disama, ne dimukolesha ne mêyi mimpe didi padi ne mushinga wa bungi. Kabidi tshikuabu ntshia se: bamue badi ne nsombelu wa mushindu eu mbapete diambuluisha dikuabu dinene mu mikanda ya malu a mu Bible mipatula kudi Bantemu ba Yehowa, anu bu mudi mukanda (mufuma mu ditunga dia France) udi ulonda eu uleja.

“Matuku makese kumpala, tshivua mmuona mushinga wa kuikala ne muoyo nansha. Ngakasambila Nzambi bua se: mfue. Munda muanyi nkavua bu mufue mene. Bua kumona tshia kuenza, ngakasambila Yehowa ne muoyo mujima. Meme kuangata kabidi dipangadika dia kubala Annuaire 2002 wa Bantemu ba Yehowa ne kumujikija mu matuku asatu. Ndi ngamba nshindika ne: mmungambuluishe bikole menemene, munkoleshe ne mu ditabuja.

“Ngakakema bikole pangakenza makebulula mu bibejibeji bia Tshibumba tshia Nsentedi ne Réveillez-vous! Ndi mubale bibejibeji ebi kukadi bidimu bipite pa 15, kadi tshivua muanji kujingulula mushindu udi biena-bualu bidimu mua kukankamija muntu ne kumukolesha to. Mbiuwule tente ne dinanga, ngikadilu udi mulue kukola mu bantu lelu wa ba ndaya eu. Ngakapetamu bintu bionso bimvua nabi dijinga.”

Bible udi wamba ne: ‘Yehowa udi pa buipi ne bantu badi ne mitshima itamba kunyingalala, udi usungila badi ne mitshima ya majiya.’ (Musambu 34:18) Kakuyi mpata, bantu bonso badi ne “mitshima itamba kunyingalala” anyi badi ne ‘mitshima ya majiya’ badi mua kupeta mu Bible dikoleshibua ku muoyo ne ditekemena dimpe bua matuku adi ku mpala. Bantemu ba Yehowa batu babanyina bantu mikanda ya malu a mu Bible bua kuambuluisha aba badi dijinga ne busambi bua kudi Nzambi.