Bupele buadiakujikaku anyi?

SOLOMO Mukalenge wa meji wa Isalele wa kale wakamba ne: ‘Monayi binsonji bia bakadi bakengeshibua kabayi ne musambi! Bakabakengesha bakadi ne bukole, [kadi] buobu kabakadi ne musambi.’ (Muambi 4:1) Bulelela, bavule bavuabu bakengesha bavua Solomo nabu mu lungenyi bavua bapele.

Kabena mua kumuenena bupele bua bantu anu ku bukepele bua makuta adibu nawu patupu to. Bilondeshile malu adibu baleje mu luapolo lua Banke wa Buloba bujima (Banque mondiale) mu ngondo muisambombo wa tshidimu tshia 2002, “mbatshinke e kumona ne: mu 1998, bungi bua makuta avua bantu 1 200 000 000 mu buloba bujima batula bua kudia buvua bushadile ku dolare 1 ku dituku [pa muntu] . . . ne bantu 2 800 000 000 bavua badia makuta bungi bushadile ku dolare 2 ku dituku ku muntu.” Bavua bambe se: nansha muvua bungi bua bantu badibu baleje mu bisumbu bibidi ebi buikale bushadile ku bungi butshinka bua misangu mikuabu, “butshidi anu bubandile bikole bitambe pa kumona mudi dikenga didi nadi bantu.”

Bupele buadiakujikaku anyi? Yezu Kristo wakambila bayidi bende ne: ‘Nudi ne bapele matuku onso munkatshi muenu.’ (Yone 12:8) Kadi abi bidi biumvuija ne: bulanda ne malu mabi onso adibu bulela nebitungunuke anu bitekangane kashidi anyi? Tòo, bualu nansha muvua Yezu kayi mulaye balongi bende se: buonso buabu bavua mua kulua babanji ba bintu bia panu, mêyi ende aa kaena ne bua kutusaka bua kukosa ne: bapele kabena ne bua nsongo bua kutekemena to.

Nansha mutu kudienzeja kua bantu ne kulaya kuabu bua kujikija bupele kupangile misangu mivule, Bible udi utujadikila se: mu katupa kîpi emu, bakengi kabakuikalaku to. Bushuwa, Yezu wakambila ‘bantu bapele lumu luimpe.’ (Luka 4:18) Lumu luimpe elu ludi kabidi ne dilaya dia se: bulanda nebubutudibue butubutu. Muanda eu newenzeke padi Bukalenge bua Nzambi bujadika nsombelu muakane pa buloba.

Nsombelu neikale mushilangane ne udi pa buloba lelu’eu dikema! Yezu Kristo wikala Mukalenge mu diulu “neafuile mukengeledi ne mupele luse, neapandishe muoyo wa bapele.” Bulelela, “neabasungidile ku binyangu ne makolela.”​—Musambu 72:13, 14, MM.

Mika 4:4 udi wamba bua tshikondo atshi ne: ‘Nebashikame, muntu ne muntu, muinshi mua muonji wende wa tumuma tua mvinyo ne muinshi mua mutshi wende wa mfigi; kakuena muntu wabakuatshisha buôwa; bualu bua mukana mua Yehowa wa misumba muakuamba nunku.’ Bukalenge bua Nzambi nebujikije ntatu yonso idi ikengesha bantu, bujimija mene ne masama ne lufu. Nzambi ‘neamine lufu tshiendelele; ne Mukalenge Yehowa neakupule binsonji ku mêsu kua bantu bonso.’​—Yeshaya 25:8.

Mbimpe wewe kutekemena malu aa ne dieyemena dionso, bualu Nzambi nkayende ke udi mualaye. Bua tshinyi kuenaku mua kukonkonona malu adi ajadika se: milayi ya mu Bible mmikumbanyine kuyindila ne dieyemena?

[Mêyi a dianyisha bua tshimfuanyi mu dibeji 32]

Foto wa FAO/​M. Marzot