Dituku dia kuvuluka

DIVUA dituku diakashintulula nsombelu wa bantu bua kubapetesha ditekemena dia kupeta masanka a tshiendelele. Kakuena dituku dikuabu divua ne bukole bua buena abu bua kuikala ne mushinga kampanda pa matuku atshilualua a bantu to. Divua dituku divua Yezu mukumbaje bionso bivuaye mulue kuenza pa buloba. Mupopela pa mutshi, wakapola muoyo ne kuelaye lubila ne: “Bionso mbikumbane.” (Yone 19:30, Mukanda wa Mvidi Mukulu [Katolike, MMM]) Yezu wakalua pa buloba bua tshipatshila kayi?

Bible udi wamba ne: ‘Muana wa muntu kakuluila bua bantu bamukuatshile mudimu, wakuluila bua kubakuatshila mudimu ne bua kufila muoyo wende bua kupikula nawu bantu ba bungi.’ (Matayo 20:28) Yezu wakafila muoyo wende bua kupikula bantu ku mpekatu ne lufu bivuabu bapiane. Eyowa, ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Mulambu wa Yezu udi ne mushinga mukole be!

Dituku dia lufu lua Yezu ndituku dia kuvuluka bua bualu bukuabu kabidi. Mu dituku adi Muana wa Nzambi wakalongesha bapostolo bende malu avua mua kubambuluisha bua kushala ne lulamatu. Mmunyipu muvua mêyi ende a ndekelu ne bua kuikala malenge mitshima ya bayidi bende abu! Malongesha ende avua tshinyi? Mmunyi mudi malu akalongesha Yezu mua kutuambuluisha? Nkonko eyi mmiandamuna mu tshiena-bualu tshidi tshilonda.