‘Semenayi pabuipi ne Nzambi ne yeye neasemene pabuipi nenu’

Kumpala ne panyima: Nsombelu wende wakashintuluka bikole

MATSEPANG wakamona muoyo wende mulue kauyi usankisha ne kauyi ne tshipatshila to! Matsepang uvua nsongakaji wa mu Lesotho, ditunga didi munkatshi mua dia Afrique du Sud. Matsepang uvua mukolele mu Katolike. Kadi pamutu pa kumuambuluishabu bua kusemena pabuipi ne Nzambi, bakamunyanga kudi bamansere munkatshi mua bidimu bia bungi, kumukosabu mishiku bua kudituaye mu buendenda.

Bua bualu abu, malu a Nzambi akumbuka ku mutshima wa Matsepang ne kavua kabidi witabuja ne: Mufuki kampanda wa dinanga udi uditatshisha bua bantu badiye mufuke to. Matsepang uvua ne bibangu binene ku muoyo bua mushindu uvuaye mulekelela ne uvuabu bamunyange, udimona kayi ne mushinga to. Wakakola ne lungenyi lukole lua tshikisu ne lua mvita. Ebi biakamufikisha ku dibunda bilumbu.

Ndekelu wa bionso Matsepang wakalua umue wa mu babandi bavua biba bantu mu tuwulu. Bakamukuata ne kumutumabu mu buloko mu Afrique du Sud. Pashishe, bakamupingaja mu ditunga diabu dia Lesotho, muakatungunukaye ne kubunda bilumbu, kukuatshika maluvu, kuenza malu a tshikisu ne kuenda buendenda.

Pavuaye mu lutatu lukole, Matsepang wakalomba Nzambi diambuluisha ne mutshima mushikile. Wakamulaya ne: “Nzambi wanyi, bingashala ne muoyo, nengenze muanyi muonso bua kukukuatshila mudimu.”

Diakamue, ba-misionere Bantemu ba Yehowa buobu kuyikila nende. Bakamulomba bua kulonga nende Bible. Mu dilonga diende, wakafika ku dimanya ne: Nzambi kêna ulengulula bantu ne ubenga kuditatshisha bua bualu buabu to. Bushuwa, wakajingulula ne: Satana ‘tatu wa mashimi’ udi wenza malu ne budimu ne mayele bua kusaka bamue bantu ku didimona kabayi ne mushinga ne kubitabijija ne: Yehowa kêna mua kubamona bu bantu ba kunanga to.​—Yone 8:44; Efeso 6:11.

Kadi Matsepang wakakola ku muoyo bikole pakamanyaye ne: tudi mua kulua bantu ba kunemeka bituanyingalala bua mpekatu yetu ya kale, bitualomba Nzambi luse ne bituadienzeja bua kumusankisha! Bakamuambuluisha bua kumanya ne: ‘Nzambi udi upita mitshima yetu bunene’ ne udi utumona mu mushindu udi pamu’apa mua kuikala mushilangane ne utudi tuetu bine tudimona.​—1 Yone 3:19, 20.

Matsepang wakasanka bikole bua kubala mêyi a mufundi wa Misambu Davidi aa: ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’ (Musambu 34:18) Anu bu umue wa ku aba ‘badi ne mitshima ya majiya,’ wakafika ku dimona ne: Yehowa kêna ulekela basadidi bende, nansha bamue ba kudibu mua kuikala ne tunyinganyinga ne badimona  kabayi ne mushinga. Wakasanka pakalongaye ne: Nzambi udi uditatshisha bua mikoko yende yonso ne udi uyikuatshisha mu ntatu. (Musambu 55:22; 1 Petelo 5:6, 7) Nangananga mêyi aa akalenga mutshima wende: ‘Semenayi pabuipi ne Nzambi, ne yeye neasemene pabuipi nenu.’​—Yakobo 4:8.

Bukole budi nabu Bible buakamueneka diakamue mu nsombelu wa Matsepang. Wakabanga kubuela mu bisangilu bia bena Kristo pa tshibidilu, kulekelaye bilele biende bivua kabiyi biumvuangana ne Mukanda wa Nzambi. Ntshinyi tshiakenzeka? Kêna kabidi udimona kayi mukumbanyine dinanga ne dianyisha dia Nzambi to. Katshia watambula bu Ntemu wa Yehowa, mmuenze mêba nkama ne nkama mu mudimu wa bena Kristo wa kuyisha lumu luimpe lua Bukalenge. Nansha mudiye ne bibangu bia kale, Matsepang udi mpindieu ne nsombelu wa disanka ne udi ne tshipatshila kampanda. Ebi bidi bileja bulelela ne: Bible udi ne bukole bua kulengeja nsombelu ya bantu.​—Ebelu 4:12.

[Lungenyi lunene lua mu dibeji 9]

“Nzambi wanyi, bingashala ne muoyo, nengenze muanyi muonso bua kukukuatshila mudimu”

[Kazubu mu dibeji 9]

Mêyi a mu Bible adi ashintulula nsombelu wa bantu

Amue a ku mêyi a mu Bible adi makoleshe bantu badibu banyange ku muoyo ngowu aa:

“Mu ntatu mipite bungi idi imvuila, dinsamba diebe didi disankisha muoyo wanyi.” (Musambu 94:19, MMM) ‘Disamba’ dia Yehowa didi mu Dîyi diende didi mpokolo wa busambi bukole. Kuelanganapu meji patudi tusambila kudi kutuambuluisha bua kuikala ne meji mapole ne kueyemena Nzambi bu Mulunda udi utumvuila.

‘[Yehowa] udi ukolesha badi ne mitshima minyingalale, udi ujingila bilulu pa mputa yabu.’ (Musambu 147:3) Bituikala tuanyisha luse lua Yehowa ne tshidiye mufile bua kubuikila mibi yetu: mulambu wa tshia-bupikudi wa Yezu, tudi mua kusemena kudi Nzambi ne dieyemena, katuyi tudiumvua kabidi bapile mu mutshima. Ebi bidi mua kusamba ne kufila ditalala dia bungi menemene mu mutshima.

‘Kakuena muntu udi mumanye mua kudivuila kundi [Yezu Kristo], bikala Tatu wakuntuma kayi mumukoke, ne meme nemmubishe dituku dia ku nshikidilu.’ (Yone 6:44) Ku diambuluisha dia nyuma muimpe wende ne mudimu wa diyisha Bukalenge, Yehowa udi utukoka kudi Muanende ne utupesha ditekemena dia muoyo wa tshiendelele.