Muananyi udi ne bua kuya mu kalasa anyi?

ANJI fuanyikijabi ne: kuena mumanye kubala malu adi mu dibeji edi to! Anyi ne: kuena mumanye kuakula muakulu wa bena mukanda wa mu ditunga dienu! Kadi wewe kuyi mumanye nansha muaba udi ditunga dienu pa karte ka matunga a buloba bujima? Pabi, mushindu eu ke wakola bana ba bungi. Kadi udi wamba tshinyi bua muanebe wewe?

Muanebe udi ne bua kuya mu kalasa anyi? Mu matunga a bungi batu benzeja bantu ku bukole bua kulonga tulasa tupuekele ne tua bikadilu ne mu makuabu batu balonga tulasa etu tshianana. Tshipungidi tshia bukua-matunga pa manême a bana (Convention internationale des droits de l’enfant) tshidi tshimona ne: kulongesha muana tulasa mbukenji buende bunene budi baledi ne bua kukumbaja. Ke mudibi kabidi bileja mu tunungu tua mêyi a Dimanyisha dia Manême a Bantu (Déclaration universelle des droits de l’homme). Pabi, mu matunga makuabu tulasa ki ntua dilonga tshianana ne tudi mua kuikala bujitu pa makaya a baledi. Tuanjayi kutangila bualu ebu pa kuangata tshilejilu tshia baledi bena Kristo badi basue bua bana babu bamanye mukanda, nansha mu tulasa anyi mu mishindu mikuabu.

Bilejilu bia mu Bible bia bantu bavua bamanye mukanda

Basadidi ba bungi ba Nzambi badibu batele mu Bible bavua bamanye kubala ne kufunda. Petelo ne Yone (bapostolo ba Yezu) bavua balobi bena Yuda, kadi bakafunda mikanda ya mu Bible mu tshiena Gelika, ki mmu muakulu wabu wa bena Galela to. * Mbimueneke ne: baledi babu bavua benze muabu muonso bua bana babu balonge bapetaku dimanya dia malu a nshindamenu. Davidi mulami wa mikoko, tshidima Amosa, ne Yuda muana wa Mariya uvua pamuapa muena mabaya, bavua pabu bafundi ba Bible bavua balonge mu mushindu wa muomumue eu.

Yobo uvua mumanye kubala ne kufunda, ne mukanda wa mu Bible udi ne dîna diende udi ujadika muvuaye mumanyeku malu kampanda a siyanse. Uvua kabidi mua kuikala ne dimanya mu malu a difunda, bualu mêyi ende adi mu mukanda wa Yobo mmafunda mfundilu wa mêyi a tusala. Tudi bamanye kabidi ne: bena Kristo ba kumpala bavua bamanye mukanda bualu lelu’eu mbasangane malu a mu Bible avuabu pamuapa bafunde mafunda pa bipese bia mabungu.

Tulasa tudi ne mushinga bua bena Kristo

Bena Kristo bonso badi ne bua kuya kumpala mu dimanya diabu dia Bible bobu basue kusankisha Nzambi. (Filipoi 1:9-11; 1 Tesalonike 4:1) Kuenza mudimu bikole ne Bible ne mikanda idi yambuluisha bua kumulonga kudi kuambuluisha bua kudiunda mu nyuma. Bu mudi Nzambi mutupeshe Dîyi diende dikale difunda, nanku udi utekemena ne: batendeledi bende bikale bamanye mukanda bimpe. Paudi ubala Bible ne umvua biudi ubala, nebikale bipepele bua kutumikila mibelu idimu. Kadi bidi mua kutulomba bua kuanji kubala bimue bitupa biende misangu ya bungi bua kushisha kumvua malu manene adimu bimpe ne kumona mua kuelelapu meji.​—Musambu 119:104; 143:5; Nsumuinu 4:7.

Tshidimu tshionso, basadidi ba Yehowa batu bapeta mabeji nkama ne nkama mikale ne malu adi ne diambuluisha dia bungi, mafunda ku bulombodi bua “mupika wa lulamatu ne wa budimu.” (Matayo 24:45-47, NW) Mikanda eyi itu yakula bua nsombelu wa dîku, bilele bia bantu, ntendelelu,  siyanse, ne biena-bualu bia bungi bikuabu. Bualu bua mushinga mukole mbua ne: itu ne mibelu ya mu Bible pa malu a mu nyuma. Bana bebe buobu kabayi bamanye kubala, nebapangile mamanyisha a bungi a mushinga muvule.

Dilonga dia miyuki ya bantu didi ne mushinga bualu didi dituambuluisha bua kumvua tshitudi tujingila Bukalenge bua Nzambi. Kuikala kabidi ne dimanya dikumbane dia malu a buloba kudi ne mushinga. Bible udi wakula bua miaba ya bungi, bu mudi: Isalele, Ejipitu ne Grèce. Muanebe udiku mua kumanya miaba eyi pa karte ka matunga a buloba bujima anyi? Udiku mua kumanya muaba udi ditunga diabu pa karte aka yeye muine anyi? Dipanga kumanya mua kubala malu adi pa karte ka teritware kampanda didi mua kupangisha muntu nansha mua kukumbajaye mudimu wende wa diyisha muaba udibu bamutuma bua kuwenza.​—2 Timote 4:5.

Midimu ya mu tshisumbu

Bakulu bena Kristo ne basadidi ba mudimu badi ne majitu a bungi adi abalomba bua kubala. Tshilejilu, kudi bitupa bia bisangilu bia tshisumbu bia kulongolola. Bidi bikengela kulama luapolo ya mikanda idi tshisumbu tshipeta ne luapolo lua mapa. Muntu udi kayi mulonge bilenga udi mua kumona bimukolela bua kukumbaja majitu onso aa bimpe.

Bena budisuile badi benza mudimu ku nzubu ya Betele pa buloba bujima. Bua bena mudimu aba kupetanganabu bimpe ne kukumbaja midimu yabu, bu mudi kukudimuna kua mikanda ne kulongolola kua biamu kampanda, badi ne bua kumanya kubala ne kufunda mu muakulu wa bena mukanda. Bikala muanebe musue kuya ku Betele anyi kuambula majitu a mu tshisumbu, udi ne bua kulonga mukanda mukumbane. Mmalu makuabu kayi adi muanebe ne bua kulongela kalasa?

Bupele ne bitabataba

Imue misangu kakutu mushindu wa bantu badi mu bupele kupeta diambuluisha to. Kadi mu nsombelu mikuabu, dilonga dikumbane didi mua kutuambuluisha tuetu ne bana betu balela bua kuepuka ntatu mikuabu ya tshianana. Bantu bakese patupu badi kabayi bamanye mukanda ke batu baditatshisha bua kuikalaku ne nsombelu mukumbane. Bana ne baledi misangu mikuabu batu bafua anu bua bukese bua makuta adibu bapeta kaayi mua kubapetesha mushindu wa kupeta luondapu ludi lukumbanyine. Misangu mivule, bantu badi balonge anu kakese anyi kabayi balonge batu ne didia dibi ne kabayi ne nzubu muimpe wa kulala. Kulonga kalasa anyi kumanyaku nansha kubala ne kufunda patupu kudi mua kuambuluisha ndambu mu malu a mushindu eu.

Kumanya mukanda kudi kabidi kukepesha bitabataba. Bushuwa, bantu bonso, ne badi balonge ne badi kabayi balonge batu anu ne bitabataba. Kadi mbipepele bua kushimakaja aba badi kabayi balonge ne kubendela mushinga pambidi kupita bantu bakuabu, bualu kabena mua kubala bintu bidi biela mashimi a mushindu eu patoke to. Nunku, buabu buobu badi mua kufika ne ku ditabakana ne buôwa buonso ne: nganga kampanda udi mua kubuondopa mu tshishima.​—Dutelonome 18:10-12; Buakabuluibua 21:8.

Kulonga kakuena anu bua kupeta mudimu to

Bantu ba bungi batu bela meji ne: kalongela kanene ka kalasa nka kupeta mfranga. Pabi, bantu bakuabu badi balonge kabena ne mudimu anyi bapeta difutu dikumbane to. Nunku baledi bakuabu badi mua kuela meji ne: kabiena ne mushinga bua kutuma muana mu kalasa to. Kadi kalasa kadi kambuluisha mu malu a bungi kupita kulongolola muntu patupu bua kupetaye mfranga. Kadi kambuluisha bana mu nsombelu wabu yonso mu kabujima. (Muambi 7:12) Padi muntu  mumanye kuakula, kubala ne kufunda muakulu wa bena mukanda udibu bakula mu ditunga diabu, kupetangana ne ba-minganga, ne bamfumu ba ditunga, anyi ne bena mudimu ba ku banke kudi kulua kupepele, kulua nansha tshibidilu pamutu pa kuikalaku kumutshingisha.

Mu miaba mikuabu, badi mua kufila bana badi kabayi balonge mu bianza bia muntu kampanda bua kubalongeshaye mua kuibaka nzubu, kuloba, kutela, anyi kuenza imue midimu mikuabu ya bianza. Kulonga mudimu nkuimpe, kadi bikala bana aba kabayi baye mu kalasa, kabena pamu’apa mua kumanya kubala ne kufunda bimpe to. Kakuyi mpata, nebikale bipepele bua kuepukabu dibendela mushinga pa mbidi ne bua kupetabu nsombelu muimpe bu buobu banji kulongaku mukanda mukumbane nunku pashishe kuluabu kulonga mudimu wabu wa bianza au.

Yezu wa mu Nazaleta uvua muena mabaya; pamuapa wakalongela mudimu eu kudi tatuende mudishi Yozefe. (Matayo 13:55; Mâko 6:3) Yezu uvua kabidi mumanye mukanda, bualu pavuaye ne bidimu 12, wakayukila malu a mushinga ne bantu bavua bamanye mukanda bikole ku ntempelo. (Luka 2:46, 47) Mu nsombelu wa Yezu, kulonga mudimu wa bianza kakuvua kumupangisha mua kulonga makuabu malu to.

Bana ba bakaji badi pabu mua kulonga anyi?

Baledi batu misangu mikuabu batuma bana babu ba balume mu kalasa kadi kabayi batuma ba bakaji to. Pamuapa baledi bakuabu badi bela meji ne: nebatule makuta a bungi bua kulongesha bana babu ba bakaji tulasa, ne bamona ne: bana ba bakaji badi mua kuikala bambuluisha bamamuabu  padibu bashala kumbelu dituku dionso. Kadi kupanga mukanda kudi kupangisha muana wa bakaji bua kukumbaja malu a bungi. Mukanda mukuabu wa bulongolodi bua UNICEF udi wamba ne: “Makebulula a bungi mmaleje ne: kulongesha muana wa bakaji kalasa ng’umue wa ku mishindu mitambe buimpe ya kuimanyika bupele.” (Poverty and Children: Lessons of the 90s for Least Developed Countries) Bana ba bakaji badi balonge mbamanye mua kupita ne ntatu ya mu nsombelu ne badi bangata mapangadika a meji bua diakalenga dia dîku dijima.

Bavua bakonkonone bualu bua lufu lua bana mu ditunga dia Bénin (ku Afrike wa ku Ouest) e kusanganabu ne: bamamu badi kabayi bamanye mukanda badi bafuisha bana 167 pa 1 000 ba bidimu bishadile ku bitanu padi eku bamamu badi bafike too ne mu tulasa tua bikadilu bafuisha bana 38 pa 1 000. Bena UNICEF badi bamba ne: “Nunku, bungi bua tulasa tudi bantu balonge ke bualu bunene budi mua kubandishisha anyi kupuekeshisha bungi bua bana badi bafua mu Bénin, kabidi ne mu buloba bujima.” Nenku, kulongesha bana benu ba bakaji kudi mua kuikala ne masanka a bungi.

Tulasa tua bakulumpe tulongayi ntukumbane anyi?

Muaba udibi bikengedibua, Bantemu ba Yehowa batu benza tulasa tua kulonga mua kubala ne kufunda bua bena mu tshisumbu badi kabayi mua kubala. * Kalasa aka kadi ne mushinga bualu katu kambuluisha bantu bua kumanya kubala, nangananga mu muakulu udibu bakula muaba udibu  basombele. Kadi kadiku mua kupingana pa muaba wa tulasa tulelela tutu bana balongi balonga anyi? Tshisumbu tshidi ne bua kulongesha bana benu nansha tulasa tulelela etu tuikaleku anyi?

Nansha mudi tulasa tua kumanya mua kubala ne kufunda tuikale bualu buimpe bulongolola mu bisumbu bia Bantemu ba Yehowa, ntulongoluela bakulumpe bavua kabayi bapete diakalenga dia kuya mu kalasa patshivuabu bana. Pamuapa, baledi babu kabavua bamanye mushinga wa kumanya mukanda, anyi kakuvua tulasa muaba uvuabu basombele to. Badi mua kuambuluisha bantu ba mushindu eu pa kubabueja mu tulasa tua kumanya mua kubala ne kufunda tudibu balombola mu bisumbu. Kadi tulasa etu katuena mua kupingana muaba wa tulasa tua nshindamenu to, ne ki ntulongolola bua kufila malongesha a nshindamenu to. Kabena balongeshamu malu bu mudi siyanse, makumi, anyi malu a mianda ya kale to. Kadi mmalongesha aa adi mu programe wa tulasa tulelela tua nshindamenu.

Mu Afrike, tulasa tua kumanya mua kubala ne kufunda tudi nangananga mu miakulu ya bisa ne katutu misangu mivule mu muakulu wa bena mukanda to. Kadi, mu tulasa tulelela tua bantu bonso, badi balongeshamu mu muakulu wa bena mukanda. Bualu ebu budi ne diambuluisha dia bungi kudi bana bualu mikanda ya bungi ne bintu bikuabu bia kubala bivule bitu mu muakulu eu. Nansha mudi tulasa tua kumanya mua kubala ne kufunda tua mu bisumbu mua kusakidila dimanya dia nshindamenu dia muana, tulasa etu katuena mua kuangata muaba wa bilongelu ebi to. Nanku au kabiena bimueneka patoke ne: bana badi ne bua kuya mu kalasa anyi?

Bujitu bua baledi

Bantu balume badi ku mutu kua tshisumbu badi ne bua kuikala bena Kristo ba tshitembu. Badi ne bua kulombola nzubu yabu ne bana babu “bimpe.” (1 Timote 3:4, 12,) Kulombola mu “mushindu muimpe” kudi kumvuija kuenza malu onso adi mua kuenjibua bua kuambuluisha bana betu bua kuepukabu malu onso adi mua kunyanga nsombelu wabu wa matuku atshilualua.

Nzambi mmupeshe baledi bena Kristo bujitu bunene. Badi ne bua kukolesha bana babu mu diumvuangana ne Dîyi diende ne kubambuluisha bua ‘kunangabu [dimanya].’ (Nsumuinu 12:1; 22:6; Efeso 6:4) Mupostolo Paulo wakafunda ne: “Padi muntu kayi ulama bena diende, nangananga badiye nabu mu nzubu umue, mmuvile ditaba. Udi mupite ku bubi muntu udi kayi mumanye [Nzambi].” (1 Timote 5:8, MMV) Tudi kabidi ne bua kulongesha bana betu tulasa tukumbanyine.

Mushindu udibu balongesha mu tulasa kampanda udi mua kuikala kauyi muimpe bualu bana mbapite bungi, makuta kaayi makumbane, anyi pamuapa bualu balongeshi kabena ne disanka bua padibu kabayi babafuta bimpe. Ke bualu kayi, baledi badi ne bua kutabalela bikole bidi bana babu balonga mu kalasa. Mbimpe kumanyangana ne balongeshi, nangananga ku mbangilu kua trimestre yonso, nansha kubalomba mibelu bua mushindu udi bana mua kulua balongi bimpe. Balongeshi badi mua kudiumvua ne mushinga ne bidi mua kubasaka bua kutabalela majinga a bana padibu babalongesha.

Kulonga kudi ne mushinga wa bungi mu dikola dia muana. Nsumuinu 10:14 udi wamba ne: “Bena meji badi bunguija dimanya.” (MMM) Bualu ebu mbulelela nangananga bua dimanya dia Bible. Basadidi ba Yehowa (bana ne bakulumpe) badi ne bua kumanya bintu bia bungi bua kuambuluisha bakuabu mu nyuma ne ‘bua kudileja bu bena mudimu badi kabayi ne bua kufua bundu, badi baludikila bantu dîyi dia Nzambi [dia bulelela].’ (2 Timote 2:15; 1 Timote 4:15) Ambaku tumone, bana bebe badi ne bua kuya mu kalasa anyi? Kakuyi mpata newambe ne: badi ne bua kuya, nansha mudi malu a bungi aya bilondeshile mushindu udi ditunga dienu. Kadi baledi bena Kristo badi ne bua kuandamuna lukonko lua mushinga mukole elu: ‘Bana banyi badi ne bua kumanya mukanda anyi?’ Nansha nuenu basombele muaba kayi wonso, kanuenaku nuitaba ne: diandamuna dishindika didi ne bua kuikala ne: “eyowa” anyi?

[Mêyi adi kuinshi]

[Kazubu/​Tshimfuanyi mu mabeji 12, 13]

TSHIA KUENZA PADIKU KAKUYI MUSHINDU WA KUYA MU KALASA

Mu nsombelu mikuabu kakutu mushindu wa kuya mu kalasa to. Tshilejilu, tshikandakanda tshikuabu tshiakaleja ne: pa bana 5 badi bakumbane mua kulonga mu tumponya tua bena tshimuangi, anu 1 ke udi mua kubuela mu kalasa. (Refugees) Mu nsombelu mikuabu, balongeshi batu banji babenga kulongesha munkatshi mua matuku a bungi. Mu imue miaba, tulasa tudi mua kuikala kule menemene anyi katuyiku mene to. Dikengesha bena Kristo didi mua kufika too ne ku dipata bana babu mu kalasa.

Mmunyi muudi mua kuambuluisha bana bebe mu nsombelu ya buena eyi? Udi mua kuenza tshinyi biwikala ne bana ba bungi ne usomba muaba udibu bafuta mushinga mukole mu tulasa, kuyi ne mushindu wa kubafundisha bonso mu kalasa? Udiku mua kufundisha muana umue anyi babidi mu kalasa kuyi ubateka mu njiwu ya mu nyuma anyi? Bikalabi nanku, badi mua kulongesha bana bebe bakuabu malu adibu balonga mu kalasa.

Mu matunga makuabu mutu tshidibu babikila ne: kalasa ka kumbelu. * Mu kalasa aka, muledi umue udi upitshisha mêba bungi kampanda mu dilongesha muana dituku dionso. Mu bikondo bia kale, baledi bavua bapiluke mu dilongesha bana babu. Bidi bimueneka ne: Yosefe (muana wa Yakoba) uvua ulombola bantu bimpe eku mutshikale nsonga bualu baledi bende bavua bamulongeshe bimpe.

Nansha mudibi mua kuikala bikole bua kupeta programe wa malongesha udibu benza nende mudimu mu tulasa mu muaba bu mudi mu kamponya ka bena tshimuangi, baledi badi mua kukuata mudimu ne mikanda idi Bantemu ba Yehowa bapatula bua kulongesha bana babu. Tshilejilu, mukanda wa Miyuki ya mu Mukanda wa Nzambi udi mua kukuambuluisha bua kulongesha bana bebe. Tshibejibeji tshia Réveillez-vous! tshidi ne biena-bualu bidi biakula bua malu mashilangane. Udi mua kubalongesha malu a siyanse ne mukanda wa La vie: comment est–elle apparue? Évolution ou création? Mukanda wa Annuaire des Témoins de Jéhovah utu ne karte kakese ka buloba ne utu wakula bua nsombelu ne mudimu wa buambi bia mu matunga mashilashilangane.

Udi mua kupeta bipeta bimpe biwikala udilongolola bilenga ne wakaja dilongesha pa ngumvuilu wa bana. Buobu batungunuke ne kubala ne kulonga, nebikale bakumbane bua kubuela mu kalasa biapeteka mushindu mu matuku atshilualua. Udi mua kuambuluisha bana bebe bua kulongabu bimpe wewe muikale ne lungenyi ne udienzeja mushindu kampanda. Neupete disanka dia bungi be!

[Mêyi adi kuinshi]

[Tshimfuanyi mu dibeji 13]

Udi ne bua kuenza tshinyi binuikala basombele muaba udi bana bebe kabayi mua kubuela mu kalasa?