Bansonga, nudiku nudiunda mu nyuma anyi?

PADI Hideo uvuluka tshikondo tshivuaye mu tulasa tua bikadilu, udi wamba ne: “Nansha mumvua mbuela mu bisangilu bia bena Kristo, tshivua ne dijinga dikole dia kusadila Yehowa to. Mvua misangu ya bungi ndifuanyikija muikale muntu mumanyike bikole kudi balongi betu, ngenda ne maditambisha mu njila ne mulunda wanyi wa bakaji. Tshivua ne bipatshila bisunguluke to, ne tshivua ne dijinga nansha dikese dia kuya kumpala mu nyuma to.” Anu bu Hideo, bansonga ba bungi batu bamueneka baya patupu kumpala kabayi ne dijinga dia kukumbaja tshipatshila nansha tshimue tshia mushinga anyi kabayi baya kumpala mu nyuma.

Biwikala udi nsonga, utu pamuapa ne disanka pautu unaya anyi ujikija lutetuku. Kadi pa bidi bitangila midimu ya mu nyuma, kuena mua kuikala umvua nanku to. Kudiku mushindu wa wewe kuikala ne disanka mu malu a mu nyuma anyi? Tangila mêyi a mufundi wa Misambu aa: ‘Tshimanyishilu tshia Yehowa tshidi mua kueyemenyibua, tshidi tshivuija muntu udi mudibakane muena meji. Mukenji wa Yehowa udi mulengele, udi utandula mêsu a bantu.’ (Musambu 19:7, 8) Dîyi dia Nzambi didi mua kulombola “muntu udi mudibakane” ta muena lungenyi lutekete bua kuenza malu ne meji, ‘ditandula mêsu ende.’ Bulelela, malu a mu nyuma adi mua kukusankisha. Kadi ntshinyi tshiudi ne bua kuenza bua kuikala ne disanka adi? Nkuepi kuudi ne bua kutuadijila?

Ikala ne dijinga dia kusadila Nzambi

Tshia kumpala, udi ne bua kuikala ne dijinga. Tangila tshilejilu tshia Yoshiya Mukalenge wa Yuda utshivua nsonga. Pakangulabu mukanda wa Mikenji ya Yehowa mu ntempelo, Yoshiya wakaubadisha ne malu akatelejaye akamulenga. Ke bualu kayi ‘Yoshiya wakumusha malu a bundu onso akadi mu maloba a bena Isalele.’ (2 Kulondolola 34:14-21, 33) Dibala dia Dîyi dia Nzambi diakasaka Yoshiya ku dienza bia bungi bua kujula ntendelelu mulelela kuulu.

Wewe pebe udi mua kupeta dijinga dia kusadila Yehowa biwikala ubala Bible pa tshibidilu ne welangana meji bua malu audi ubalamu. Ke tshiakapesha Hideo dijinga adi. Wakabanga kudia bulunda bushême ne mpanda-njila mukuabu (muyishi wa ku dîba ne ku dîba) mukulakaje. Mpanda-njila au uvua mulongi wa tshisumi wa Bible ne uvua udienzeja bua kutumikila malongesha adimu. Tshilejilu tshia mpanda-njila au tshiakakankamija Hideo bikole, yeye kubanga kulonga pende Bible nanku, kupetaye dijinga dikole dia kusadila Nzambi ne bantu bakuabu. Didiunda diende dia mu nyuma diakapetesha muoyo wende tshipatshila.

 Dibala Bible dituku dionso didi mua kupesha bansonga dijinga dimpe. Takahiro udi umvuija ne: ‘Pamvua nya kulala ne pashishe mvuluka ne: tshivua muanji kubala Bible dituku adi, mvua mbika bua kumubala. Nunku mvua mmona mushindu uvua Yehowa undombola. Dibala Bible dituku dionso diakangambuluisha bikole bua kukola mu nyuma. Bu mumvua mudisuike bua kuenza mudimu wa Nzambi bikole, ngakangata bumpanda-njila bua pa tshibidilu matuku makese kunyima kua meme mumane kujikija tulasa tua bikadilu. Ne ndi ne disanka dia bungi dia kuenza mudimu eu.”

Pa kumusha dibala dia Bible, ntshinyi tshikuabu tshidi mua kukuambuluisha bua kukolesha dijinga diebe dia kutumbisha Yehowa? Mamuende wa Tomohiro wakamulongesha Bible. Tomohiro udi wamba ne: “Anu pangakalonga mu buondoke mukanda wa La vie a bien un but pamvua ne bidimu 19 ke pangakumvua dinanga dia Yehowa ne mulambu wa Yezu udi upikula bantu bilenga mu mutshima wanyi bikole. Dianyisha dimvua nadi bua dinanga didi Nzambi mutunange diakampesha dijinga dia kuenza bia bungi mu mudimu wa Yehowa.” (2 Kolinto 5:14, 15) Anu bu Tomohiro, lelu batu bakankamija bansonga ba bungi bua kutungunukabu ne kudilongela Bible ne tshisumi bua kumonabu mua kukola mu nyuma.

Nansha nanku, tshiakuenza ntshinyi biwikala nansha bia munyi kuyi anu ne dijinga mu mutshima webe dia kusadila Yehowa? Kudiku muntu uudi mua kueyemena bua kukuambuluisha anyi? Mupostolo Paulo wakafunda ne: ‘Nzambi udi wenzeja munda muenu bua kusua ne bua kuenza kabidi.’ (Filipoi 2:13) Wewe mulombe Yehowa diambuluisha mu disambila, neakupeshe nyuma muimpe kayi welakana, ne nyuma eu neakupeshe bukole ki ng’anu bua “kuenza” malu to, kadi ne bua “kusua” kabidi. Ebi bidi bileja ne: nyuma wa Nzambi neakoleshe dijinga diebe dia kuenza biebe bionso mu mudimu wa Yehowa ne neakuambuluishe bua kukola mu nyuma. Mu mishindu yonso, eyemena bukole bua Yehowa ne kolesha mutshima webe!

Difundila bipatshila biebe wewe nkayebe

Paudi udisuika diakamue bua kusadila Yehowa bimpe menemene, udi ne bua kudifundila bipatshila biebe nkayebe bua wewe kumona mua kudiunda mu nyuma. Nsongakaji muena Kristo udi dîna ne: Mana udi wamba ne: “Kudifundila bipatshila kuakangambuluisha bikole. Pamutu pa kupingana tshianyima, ngakaya mutangile kumpala ne dikima. Meme muikale ne bipatshila bianyi mu lungenyi, ngakasambila Yehowa ne muoyo mujima bua andombole, ne ngakaya kumpala tshiyi njingakana to.”

Mbimpe bipatshila biebe bikale bia meji ne biudi mua kukumbaja. Tshilejilu, kubala nshapita umue wa mu Bible ku dituku kudi mua kuikala tshipatshila tshia meji. Udi kabidi mua kubanga kuenza makebulula. Udi mua kulonga tshilejilu ngikadilu ya Yehowa idi muinshi mua mutu wa bualu wa “Qualités par leur nom” udi muinshi mua tshiena-bualu tshia “Jéhovah” mu mukanda wa Index. Mudi mumvuija matue ku 40 audi mua kubala, ne makebulula aa neakusemeje pabuipi ne Yehowa ne neakusake ku dienza bia bungi. Bipatshila bikuabu biudi mua kukumbaja bidi mua kuikala bia kufila diandamuna nansha dimue mu tshisangilu tshionso tshia bena Kristo mudibu balomba bateleji bua kuandamuna, kukeba bua kumanyangana bimpe ne muena mu tshisumbu nansha umue mu tshisangilu tshionso, ne kubenga kupitshisha dituku kuyi musambile Yehowa ne muambile bantu bakuabu bualu buende.

Biwikala kuena muanji kudifundisha mu Kalasa ka Mudimu wa Teokrasi, kudifundishamu kudi mua kuikala tshipatshila tshimpe buebe wewe. Utu wenza mudimu wa kuyisha patoke anyi? Bikalabi kabiena nanku, ikala ne dijinga dia kulua muyishi udi kayi muanji kutambula. Pashishe, newangate malanda ebe ne Yehowa ne mushinga wa bungi ne neudilambule kudiye. Bansonga ba bungi batu baditatshisha bua kuenza malu adi  umvuangana ne didilambula diabu pa kuipatshila bua kuenza mudimu wa ku dîba ne ku dîba.

Nansha mudibi bimpe bua kuikala ne bipatshila kampanda mu nsombelu webe, dimukila lungenyi lua ditembangana. Neupete disanka dia bungi mu malu audi wenza biwikala kuyi udifuanyikija ne bakuabu.​—Galatia 5:26; 6:4.

Pamuapa udi mua kuikala udimona kuyi mumanye malu a bungi ne bikukolele bua kudifundila bipatshila bikumbanyine. Nanku londa mubelu wa mu Bible eu: ‘Teleja matshi ebe, umvue mêyi a bena meji.’ (Nsumuinu 22:17) Keba diambuluisha dia baledi bebe anyi bena Kristo bapie. Bushuwa, baledi ne bantu bakuabu badi ne bua kuikala ne nkatshinkatshi padibu bakankamijangana. Padi bansonga bamona babafimpakaja bua kudienzeja bua kukumbaja tshipatshila kampanda tshidi bakuabu babafundile, bidi mua kujimija disanka ne mene dijinga diabu dia kudifundila bipatshila. Ke tshiakenzekela nsongakaji mukuabu, wakamba ne: “Baledi banyi bakamfundila tshipatshila tshimue ku tshimue, bu mudi kudifundisha mu Kalasa ka Mudimu wa Teokrasi, kuya kuyisha, kutambula ne kulua mpanda-njila. Ngakenza muanyi muonso bua kukumbaja tshionso tshia ku bipatshila ebi. Pamvua nkumbaja tshipatshila tshimue, baledi kabavua banganyisha to, kadi bavua bampesha tshipatshila tshikuabu tshia meme kukumbaja. Nunku mvua anu ndiumvua muenzejibue bua kukumbaja bipatshila. Ngakatshioka ne tshivua ndimona bu mukumbaje bualu kampanda to.” Bua tshinyi? Bualu bipatshila bionso abi bivua bimpe, kadi kabivua bipatshila biende yeye nkayende to. Bua kubikumbaja, udi ne bua kuikala ne dijinga dia kukeba mushindu wa kudifundila tshipatshila kampanda buebe wewe nkayebe!

Vuluka Yezu Kristo. Pakaluaye pa buloba, uvua mumanye tshivua tatuende Yehowa mutekemene kudiye. Yezu kavua anu ne tshipatshila tshia kuenza disua dia Nzambi to, kadi uvua kabidi ne tshipatshila tshia kukumbaja mudimu wende uvuaye muluile. Mmunyi muvuaye wangata mudimu wende? Wakamba ne: ‘Bidia bianyi bidi kuenza bu mudi wakuntuma musue ne kujikija mudimu wende.’ (Yone 4:34) Yezu Kristo uvua ne disanka dia kuenza disua dia Yehowa ne wakakumbaja malu avua Tatuende muindile kudiye. Disua adi divua anu bu biakudia biende bualu uvua ne disanka dia kujikija mudimu uvuabu bamulombe. (Ebelu 10:5-10) Wewe pebe udi mua kupeta disanka paudi pamuapa ne dijinga dia kuenza malu adi baledi bebe bakukankamija bua kuenza.

Kupungidi mu kuenza kua malu mimpe

Paudi diakamue ne tshipatshila mu lungenyi, dienzeje bua kutshikumbaja. Galatia 6:9 udi wamba ne: ‘Katupangi mu kuenza kua malu mimpe; bualu bua palua tshikondo tshia kupuola, netupuole bituikala katuyi tupanga.’ Kueyemenyi bukole buebe anyi dimanya diebe nansha. Pamuapa udi nansha mua kupeta ntatu ne malu a mu lupitapita adi mua kukufikisha ku didiumvua ne: udi mupangile bualu. Kadi Bible udi utujadikila ne: ‘Umanye [Nzambi] bimpe mu bienzedi biebe bionso, yeye neakululamijile njila yebe.’ (Nsumuinu 3:6) Wewe wenda udienzeja bua kukumbaja bipatshila biebe bia mu nyuma, Yehowa neakukuatshishe.

Eyowa, paudi ukuama dijinga dia kusadila Yehowa ne wewe muikale ne bipatshila bia mu nyuma, newenze bua “kudiunda kuebe kumueneke kudi bonso.” (1 Timote 4:15) Nunku, newikale ne nsombelu muimpe mu mudimu wa Nzambi.

[Tshimfuanyi mu dibeji 9]

Kubala Bible ne kuelangana meji bua malu audi ubalamu nekukusake bua kuenzela Yehowa mudimu

[Tshimfuanyi mu dibeji 10]

Yezu wakakumbaja malu avua tatuende mumulombe