Luse lujalame ludi ne mushinga kayi?

BIBLE udi wamba ne: “Bantu batu bajinga bua muntu ikala ne luse.” (Nsumuinu 19:22, MMM) Bushuwa, malu malenga adi enzeka bua dinanga atu mimpe menemene. Kadi mu Bible muaku “luse lujalame” udi uleja bulenga budi bushindamene pa malanda akavuaku kumpala, bu mudi ebu budi bushindamene pa bualu kampanda bulenga buvua muntu muenzele mukuabu kumpala. Nunku, muaku eu udi ne lungenyi lua lulamatu munda muawu.

Mukalenge Yoasha wa mu Yuda uvua mupangile ngikadilu eu muimpe. Uvua ne dibanza dinene dia kuleja dianyisha kudi tatuende mukaji ne Yehoyada bayende wa tatuende mukaji eu. Pavua Yoasha kayi muanji kukumbaja nansha tshidimu tshijima, kakuende mukaji wa muoyo mubi wakadienza nkayende mukalenge-mukaji ne wakashipa bana babu ne Yoasha ba balume bonso bavua ne bua kupiana bukalenge. Kadi wakapangila kushipa muana mutekete Yoasha bualu tatuende mukaji ne bayende bavua bamusokoke. Bakamulongesha kabidi Mikenji ya Nzambi. Pakakumbaja Yoasha bidimu muanda-mutekete, bayende wa tatuende mukaji wakenza mudimu ne bukokeshi buvuaye nabu bualu uvua muakuidi munene bua kushipesha mukalenge-mukaji mubi au ne kuteka Yoasha mu nkuasa wa bukalenge.​—2 Kulondolola 22:10–23:15.

Nsonga Yoasha wakakokesha mu mushindu muimpe too ne pakafua bayende wa tatuende mukaji, kadi pashishe wakabangisha kutendelela mpingu. Nzambi wakatuma Zekâya muana wa Yehoyada bua kudimuija Yoasha bua butomboji buende abu. Yoasha wakashipesha Zekâya ne mabue. Ndipanga lulamatu kayi dibi bua dîku divua dimuenzele malu bungi kabuyi kubala!​—2 Kulondolola 24:17-21.

Bible udi wamba ne: ‘Mukalenge Yoasha kakavuluka luse luakamuleja tatuende [wa Zekâya]; kadi wakashipa muanende.’ Kumpala kua kufuaye, Zekâya wakamba ne: “Yehowa atangile bualu ebu, anufute.” Bilondeshile mêyi a Zekâya, Yoasha wakapeta disama dikole ne bakamushipa kudi bena mudimu bende.​—2 Kulondolola 24:17-25.

Pamutu pa kufuana Mukalenge Yoasha, bantu bonso badi balonda mubelu udi ulonda eu nebapete mabenesha kumpala eku: ‘Luse ne lulamatu lua [malu a] bushuwa kabiumuki kuudi. Nenku neusangane diakalengele ku mêsu kua Nzambi ne kua bantu.’​—Nsumuinu 3:3, 4.