Yehowa udi uditatshisha bua bantu ba patupu

TUDI ne bua kuikala bantu ba dikema anyi bapite bakuabu mu malu kampanda bua Nzambi kushishaye kutumona bu bantu anyi? Abraham Lincoln (mfumu wa 16 wa ditunga dia États-Unis) wakamba ne: “Mukalenge mmunange bantu ba patupu. Ke bualu kayi mmubafuke bapite bungi.” Bantu ba bungi badi badimona bikale bantu tshianana badi kabayi nansha ne bualu bua nsongo bua kuenza panu. Kuikala muntu patupu kudi mua kufila lungenyi lua kuikala mulanda, muntu wa milongo mishadile. Bia diatshimue, muaku “patupu” udi mua kufila lungenyi lua dipanga kuikala ne muaba mubandile anyi ne mianzu kampanda minene mu bantu, kuikala mushadile too ne mu malu a makese makese, anyi mene kuikala wa tshianana ku bantu bonso. Kadi utu musue bua kusomba ne bantu ba mushindu kayi? Mbadi bikale baditumbishi ne bena tshikama ne badileji anyi? Kutu musue kusomba ne bantu badi ne nsombelu wa bulunda, wa budipuekeshi badi kabayi ne budiambi badi baditatshisha bua bakuabu ne muoyo mujima anyi?

Bu mudi difunyinangana ne dipuekeshangana milongo bikale bitangalake bikole pa buloba lelu wa ndaya, bamue bantu batu bamona bikole bua kuitaba se: Nzambi utu uditatshisha ne muoyo mujima bua bualu buabu. Mubadi mukuabu wa tshibejibeji etshi wakafunda ne: “Ndi muledibue mu dîku muvua bantu kabayi batamba kulejangana dinanga to. Bavua bampetula, bandembakaja ne banseka. Nunku, kubangila anu ku buana buanyi, tshivua ndiumvua ne mushinga nansha. Pandi mpeta ntatu ntshitu ndiumvua anu mumvua ndiumvua kale amu, bintekesha ne mu mikolo bibi.” Kadi kudi malu adi atusaka bua kuitaba ne: Nzambi utu utabalela bantu ba patupu.

Nzambi udi uditatshisha bua bantu ba patupu

Mukalenge Davidi wakafunda ne: “[Yehowa] udi munene ne wa kutumbisha bipite, buende bunene kabuena ne ndekelu.” (Musambu 145:3, MMM) Nansha nanku, bualu ebu kabuena bupangisha Yehowa bua kutangila majinga etu ne dinanga ne luse luonso nansha. (1 Petelo 5:7) Tshilejilu, mufundi wa Misambu wakamba ne: ‘Yehowa udi pa buipi ne bantu badi ne mitshima itamba kunyingalala, udi usungila badi ne mitshima ya majiya.’​—Musambu 34:18.

Bintu bidi bikoka ntema ya bantu pa buloba ebu, bu mudi buimpe bua mpala, lumu anyi bubanji, ki mbidi Nzambi wangata ne mushinga to. Mikenji ivua Nzambi mupeshe bena Isalele ivua ileja mudiye ne luse kudi bapele, bana ba nshiya, bakamba ne benyi. Nzambi wakambila bena Isalele bavuabu banuishile mâyi ku lusona mu Ejipitu ne: ‘Kuenzedi muenyi bualu bubi, kumukengeshi. Kanukengeshi bakaji ba mu lufuila anyi bana ba nshiya. Biwabakengesha ne biadilabo kundi, meme nengunvuile muadi wabo.’ (Ekesode 22:21-24) Kabidi, muprofete Yeshayi wakaleja ditabuja diende bua mutu Nzambi uditatshisha bua bantu bapuekele pakambaye ne: ‘Bualu uvua tshisokomenu tshia batekete, tshisokomenu tshia bena dikenga pavua makenga abakuata, uvua bu muaba wa kupengama dîba didi mvula uloka, bu dileji dia bantu kuikishila mu munya, bualu tshinyangu tshia bena tshikisu tshidi bu mvula wa tshipupu [udi udikuma ku tshimanu].’​—Yeshaya 25:4, MMM.

Ku mudimu uvuaye muenze pa buloba, Yezu Kristo (udi ‘tshimfuanyi [tshijalame] tshia Nzambi’) wakalua tshilejilu kudi balongi bende tshia mushindu wa ditabalela bantu patupu ne muoyo muololoke. (Ebelu 1:3, MMM) Pavua Yezu umona bisumbu bia bantu ‘bavua batata, bakadi bamuangalake  bu mikoko ivua kayiyi ne mulami, wakadi nabu luse.’​—Matayo 9:36.

Tangila kabidi bantu bavua Yezu musungule bu bapostolo bende: bantu bavuabu bamba muvuabu ‘kabayi bamanye mikanda ne bantu patupu.’ (Bienzedi 4:13) Panyima pa lufu lua Yezu, balongi bende bakabanga kubikila bantu ba mishindu yonso bua kumvua Dîyi dia Nzambi. Mupostolo Paulo wakafunda ne: ‘muntu udi kayi muena ditaba nansha muntu tshianana’ uvua mua kubuela mu tshisumbu tshia bena Kristo ne kulua muena kuitabuja. (1 Kolinto 14:24, 25, MMM) Pamutu pa kusungula anu bantu badibu batumbisha bilondeshile dimona dia malu dia bena buloba ebu, ba bungi bavua Nzambi musungule bavua bantu patupu, bantu tshianana, bua kumuenzelabu mudimu. Mupostolo Paulo wakamba ne: ‘Bana betu, tangilayi dibikidibua dienu ne: kakuena ba bungi babikidibue badi bena meji mu buntu buabu, kakuena ba bungi badi bakole, kakuena ba bungi badi baledibue bena butumbi. Kadi Nzambi wakasungula malu mapote a pa buloba bua kufuishaye nawu bena meji bundu; ne Nzambi wakasungula bintu bitekete bia pa buloba bua kufuishaye nabi bintu bikole bundu; ne Nzambi wakasungula malu mapuekele a pa buloba, ne malu adibu bapetula, ne bintu bidi kabiyiku, bua kuvuijaye nabi bintu bidiku tshianana; bua kakuikadi wa mu mubidi udi mua kutumba ku mêsu kua Nzambi.’​—1 Kolinto 1:26-29.

Lelu kabidi Nzambi udi ututabalela ne muoyo mujima bia muomumue. Disua dia Nzambi ndia se: “Bantu bonso basungidibue, bafike ku dimanya dia malu malelela.” (1 Timote 2:4) Bikala Nzambi munange bukua-bantu bikole e kufikaye too ne ku dituma Muanende pa buloba bua kutufuila, katuena ne tshintu tshidi mua kutusaka bua kudiumvua bu bantu badi kabayi ne udi mubanange anyi kabayi ne mushinga nansha. (Yonso 3:16) Yezu Kristo wakaleja balongi bende mudibi ne mushinga bua kuangatabu nansha udi muntu mutambe bukese ku bana babu ne Kristo ba mu nyuma bu muvuabu mua kumuangata yeye muine nkayende. Wakamba ne: ‘Bualu bua nuenu nuakenzela umue wa mu bana betu badi batambe kupuekela nunku, nuakangenzela meme.’ (Matayo 25:40) Pa kumusha mushindu udi bena panu mua kutumona, bituikala banange bulelela, tudi ne mushinga wa bungi kumpala kua Nzambi.

Ke muvua Francisco * (muan’a nshiya mukuabu wa mu ditunga dia Brésil) mudiumvue pakabuelaye mu malanda ne Nzambi. Udi umvuija ne: “Kumanya Yehowa ne bulongolodi buende nkungambuluishe bua kutshimuna lutatu lua buôwa bumvua ngumvua, ndiumvua tshiyi ne udi unkuba. Ngakamanya ne: Yehowa udi utabalela muntu yonso wa kutudi.” Yehowa wakalua tatu mulelela kudi Francisco.

Udi utabalela bansonga

Yehowa udi welela bansonga meji ne muoyo mujima nansha mu tshibungi anyi welela nsonga yonso meji pa nkayende. Bushuwa, nansha tuetu bikale bana anyi bantu bakole, katuena ne bua kudiangata ne mushinga mupitshidile nansha. Nansha bikale nanku, tudi anu mua kuikala pamuapa ne mamanya ne ngikadilu bikumbane bua Nzambi kuenza netu mudimu mu matuku adi kumpala. Yehowa mmumanye bimpe mushindu udiye mua kutulengeja ne kutulongesha bua kumonaye mua kuenza netu mudimu bimpe menemene bilondeshile tshituikala. Tshilejilu, tangila muyuki udi mu 1 Samuele nshapita wa 16. Pavua muprofete Samuele musue  kusungula bamue bantu bavua bamueneka bu bakumbane bua kuangata nkuasa wa bukalenge bua Isalele, Yehowa wakamumvuija tshivuaye Yeye musunguile Davidi uvua muana wa mukala wa Yishai bua kulua mukalenge wa Isalele, kumuambilaye ne: ‘Kutangidi mpala wende, anyi bule buende, bualu bua meme ngakamupidia [mukulu wa Davidi]; Yehowa kena utangila bu mudi bantu batangila, bualu bua bantu badi batangila anu mubidi, kadi Yehowa udi utangila mu mutshima.’​—1 Samuele 16:7.

Lelu’eu bansonga badiku pabu mua kushala ne dishindika dia se: Yehowa udi ubatabalela ne muoyo mujima anyi? Tangila tshilejilu tshia nsongakaji mukuabu wa mu ditunga dia Brésil, diende Ana. Anu bu mutu bansonga bakuabu ba bungi bumvua, uvua umvua pende bimutonda bikole bua kumona malu a nkosa-mishiku ne dipangika dia kulumbulula kuakane. Pashishe tatuende kubangaye kuya nende ne bana babu bakuabu ba bakaji mu bisangilu bia Bantemu ba Yehowa. Mu bungi bua matuku, kutuadijaye kunanga malu avuaye ulonga pa bidi bitangila Dîyi dia Nzambi. Ana wakabanga kubala Bible ne mikanda mikuabu ya Bantemu ba Yehowa ne kusambila Yehowa Nzambi. Ku kakese ku kakese, wakakolesha malanda ende ne Nzambi. Udi umvuija ne: “Mvua mbanda pa dikalu dianyi mutangile ku mukuna uvua pabuipi ne kumbelu kuetu, muaba umvua mbandila mudi kulu kulengela pakadi dîba dibuela. Mvua nsambila Yehowa bua kumuela tuasakidila bua bulenga buende ne kalolo, mmumvuija mundi mumunange bikole. Kumanya Yehowa Nzambi ne kumanya mudiye mulongolole malu ende mbimpeteshe ditalala mu lungenyi ne ndi ndiumvuaku muikale bimpe tshiyi ntshina tshintu.” Utuku pebe uteta bua kupeta dîba dia kuela meji a mushindu udi Yehowa uditatshisha ne dinanga bua bualu buebe anyi?

Diakabi, bikadilu bia muaba udi muntu mukolele bidi mua kumupangisha bua kudia malanda masheme ne Yehowa. Tangila tshilejilu tshia Lidia. Pakajinga nsongakaji eu bua kukuatshila tatuende bualu buvua bumutonde bikole, tatuende wakamukosa ku mêyi musangu umue umusamina ne: “Malu a butshimbakane.” Nansha muvua Lidia mujingulule ne: tatuende uvua musue bua alengulule malu au, Lidia udi wamba ne: “Dilonga dia Bible ndimpeteshe bintu bionso bimvua nabi dijinga ne malu makuabu a bungi. Ngikadilu milenga ya Yehowa yakamuvuija mulunda wanyi wa menemene. Mpindieu ndi ne Tatu wa dinanga udi mua kunteleja pandi mmuambila yanyi yonso indi nayi munda ne anyi malu onso adi antonda. Ndi mua kupitshisha mêba nyukila anu ne Muntu mutambe bunene udi ku mutu kua bionso, mutuishibue se: neikale ne bua kunteleja.” Mvese ya mu Bible, bu mudi wa Filipoi 4:6, 7, yakamuambuluisha bua kumvuaye mushindu udi Yehowa mumunange. Mvese eu udi wamba ne: ‘Lekelayi kuditatshisha ku bualu [nansha] bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’

Udi ukuambuluisha bua kukumbaja majinga ebe

Yehowa udi uditatshisha bua majinga a basadidi bende muntu ne muntu pa nkayende ne bua majinga abu kabidi mu tshibungi bu tshisumbu tshiende tshia buloba bujima. Tudi mua kuleja dinanga kudi Tatu wetu wa mu diulu pa kukebaku dîba dia kuyukila nende. Katuena ne bua kulengulula malanda etu nende nansha. Davidi uvua misangu yonso muvuluke tshivua malanda ende ne Yehowa. Wakamba ne: ‘Yehowa, ummanyishe bienzedi biebe, unyishe njila yebe. Undombole biebe mu bulelela buebe, unyishe; bualu bua wewe udi Nzambi wa lupandu luanyi; ndi nkuindila wewe dinda tô ne ku dilolo.’​—Musambu 25:4, 5.

Bidi mua kuikala diebe dia madiata mbala, diebe dia nzanzanza bua kumvua se: udi mua kudia bulunda ne Nzambi. Nansha wewe muikale ne bualu bua mushindu kayi, udi anu mua kutekemena ne dishindika dionso se: Mutambe Bunene neakuambuluishe  mu diumvuangana ne disua diende. (1 Yone 5:14, 15) Nunku, longa mua kusambila bua muanda kampanda musunguluke, kuyi upua malu audi nawu muoyo ne tshidi majinga ebe.

Mushinga wa dikala bamanye tshidi majinga etu mbauleje mu disambila dia Mukalenge Solomo divuaye muenze dituku dia dibanjija dia ntempelo, ne: ‘Bialua tshiyole [tshia nzala] nansha tshipupu [tshia masama], anyi biakuata bintu mamoma ne butu, nansha mikumbi nansha meshi, biatshintshimika bena lukuna misoko yabo; bialua makenga ne masama onso; biakutendelela ne biakutendekena muntu yonso, nansha bena Izalele bonso, bualu bua muntu yonso udi mumanye disama diende ne ntatu yende, umvue biebe mu muaba webe mu diulu; ubabuikidile mibi yabo, ufute muntu yonso bu muakadi bienzedi biende.’ (2 Kulondolola 6:28-30) Bushuwa, anu wewe nkayebe ke udi ‘mumanye disama diebe ne ntatu yebe.’ Nunku, mbia mushinga bua wewe kumanya tshidi majinga ebe ne tshiudi musue menemene. Wewe muenze nanku, ‘[Yehowa] neakupe milombu idi mutshima webe ulomba.’​—Musambu 37:4.

Kolesha malanda ebe ne Yehowa

Yehowa udi ne disanka bua kulekela bantu ba patupu badia nende malanda makole. Dîyi diende didi ditushindikila ne: ‘Nengikale kunudi bu Tatu, ne nuenu nenuikale kundi bu bana balume ne bana bakaji, mmudi muamba Nzambi wa Bukole Buonso.’ (2 Kolinto 6:18) Bushuwa, Yehowa ne Muanende mbasue bua tuetu kuya kumpala ne kupeta muoyo wa tshiendelele. Kabienaku bitamba kutukolesha ku muoyo patudi tumanya ne: Yehowa neatuambuluishe bua kukumbaja majitu etu mu dîku, ku mudimu ne mu tshisumbu tshia bena Kristo biakane anyi?

Nansha nanku tuetu bonso tutu anu tutuilangana ne matuku makole. Masama, ntatu ya mu dîku, bumonyi bukese bua bintu, anyi bualu bukuabu budi mua kutukengesha. Tudi mua kuikala katuyi bamanye mua kupita ne ntatu anyi ne matetshibua kampanda. Mutukebedi wa buluishi buvule bua buludiludi anyi ku butuangaji bua bantu bakuabu mmubandiangayi mubi eu, Satana Diabolo, utu uluisha bantu ba Nzambi mvita ya mu nyuma. Nansha nanku kudi muntu kampanda udi utumvuila ne utuambuluisha bua kulama malanda etu malenga ne Yehowa. Muntu au n’Yezu Kristo ukadi ne muanzu mubandile mu diulu. Tudi tubala ne: ‘Bualu bua katuena ne muakuidi munene udi kayi mumanye mua kukenga netu mu matekete etu, kadi tudi ne umue wakateyibua mu malu onso muomumue atudi tuteyibua nawu, kayi ne bubi. Nunku, tusemene ne dikima pepi ne nkuasa wa butumbi wa [bulenga budi kabuyi butuakanyine], bua tuetu tupete luse ne bua tusangane [bulenga budi kabuyi butuakanyine] bua kutukuatshisha mu tshikondo tshia dikengela dietu.’​—Ebelu 4:15, 16.

Ndishindikapu kayi dilenga nunku patudi tumanya se: katuena ne bua kuikala bantu badi bende lumu anyi bena kantu ku bianza bua Nzambi kushishaye kutuanyisha! Nansha paudi mu bikondo bikole bia dikenga, wikale ne meji bu a mufundi wa Misambu wakasambila ne: ‘Meme panyi ndi mupele ne mukengi, kadi [Yehowa] udi wela meji a bualu buanyi. Wewe udi mukuatshishi wanyi ne Musungidi wanyi.’ (Misambu 31:9-14; 40:17) Wikala ne dishindika dia se: Yehowa mmunange bantu bena budipuekeshi anyi bantu ba patupu. Bushuwa, ‘tudi mua kumupuila ntatu yetu yonso bualu yeye ke udi utulama.’​—1 Petelo 5:7, MMM.

[Mêyi adi kuinshi]

[Bimfuanyi mu dibeji 29]

Balongi ba Yezu ba bungi kabavua bamanye mukanda ne bavua bantu ba patupu

[Tshimfuanyi mu dibeji 30]

Bena Kristo badi baluangana bua kuikala ne ditabuja dikole

[Bimfuanyi mu dibeji 31]

Katuena ne bua kuikala bantu bende lumu bua Nzambi kushishaye kutuanyisha nansha