Mmalu kayi audi musue kukonka Nzambi?

MU BULOBA bujima, bantu badi ne nkonko minene idi itangila muoyo. Udi pebe nayi anyi? Ba bungi mbaye ne nkonko yabu kudi balongeshi ba mu bitendelelu biabu kadi ki mbapete mandamuna mimpe to. Bakuabu mbakebe buobu nkayabu mandamuna a nkonko eyi . Bamue mbasambile bua kupeta mandamuna aa. Kudiku mushindu wa wewe kupeta mandamuna a kudi Nzambi a nkonko idi ikulubakaja mu lungenyi anyi? Munkatshi mua nkonko idi bantu ba bungi basue kuela Nzambi mudi idi ilonda eyi:

Nzambi, wewe udi nganyi menemene?

Mushindu udi bantu bangata Nzambi udi ulonda bilele biabu, tshitendelelu tshia baledi babu anyi tshidibu badisunguile buobu nkayabu. Bamue bantu batu babikila Nzambi mu dîna kampanda, kadi bakuabu batu anu bamubikila ne: Nzambi patupu. Ebi bidi ne bualu menemene anyi? Kutu Nzambi mulelela umuepele udi utuleja tshidiye, utuleja kabidi ne dîna diende anyi?

Bua tshinyi kudi makenga a bungi nunku?

Dipanga budimu anyi buenzavi bua muntu biobi mua kumunyanga mubidi anyi kumufikisha ku bupele, udi mua kutuadija kudiabila. Kadi pamuapa udi mua kuikala mumanye bimpe tshidi makenga aa mamufikidile.

Nansha nanku, bantu bakuabu ba bungi badi bakenga bikole kabiyi ku tshilema tshiabu buobu to. Bamue badi ne masama a munanunanu. Bakuabu badi baluangana ne ntatu idi imueneka bu idi kayiyi mua kujika: kupeta muaba wa kulala ne biakudia bua mêku abu. Bantu miliyo mivule badi babakengesha kudi babundianganyi, bakenga bua mvita, bua tshikisu katshiyi kuamba, batata bua bipupu bia ku bintu bifuka, ne bua kansungasunga ka bantu badi ne bukokeshi kampanda.

Kabiena bikemesha padi bantu ba bungi bakonka ne: ‘Bua tshinyi malu aa mmalue kutangalaka nunku? Nzambi mmulekele makenga onso aa bua tshinyi?’

 Bua tshinyi ndi ne muoyo? Muoyo udi ne kipatshila kayi?

Nkonko eyi itu itamba kufumina ku buôwa budi nabu bantu ba bungi badi kabayi bapeta disanka dilelela mu midimu yabu ya buatshia buila. Bantu bakuabu miliyo mivule batu bamba ne: mu mushindu kampanda anyi kansanga, Nzambi ukadi mumane kufundila muntu yonso tshikalaye. Bidi nanku anyi? Bikala Nzambi muikale ne dijinga kampanda dia pa buadi buebe wewe, kabiyi mpata udi ujinga kumanya dijinga edi.

Ku mikanda yonso idiku lelu, kudi umue udi wamba patoke ne: mmufundisha ku diambuluisha dia nyuma wa Nzambi. Anu muudi mua kutekemena bua mukenji udi Nzambi mutumine bukua-bantu, mukanda eu udiku lelu mu miakulu bungi tshianana kupita mukanda kayi wonso udibu bafunde. Mukanda eu m’Bible Munsantu. Munda muawu, Nzambi nkayende Mufuki wa diulu ne buloba udi uleja tshidiye ne tshidi dîna diende. Ukadi mumanye dîna dia Nzambi adi anyi? Udi mumanye tshidi Bible wamba bua ngikadilu ya Nzambi anyi? Udi mumanye tshidi Bible wamba bua malu adi Nzambi musue bua wenze anyi?

 [Mêyi a dianyisha bua tshimfuanyi mu dibeji 2]

TSHIZUBU: Chad Ehlers/​Index Stock Photography

[Mêyi a dianyisha bua tshimfuanyi mu dibeji 3]

Mukuna: Chad Ehlers/​Index Stock Photography