‘Nuikale ne kuondo ka muoyo kimpe’

BANTU ba bungi batu bamba ne: ‘Ndi ngenza tshidi muoyo wanyi musue.’ Kadi bua kuondo ketu ka muoyo kutulombolaku mudibi bikengela, tudi ne bua kukalongesha biakane bua kumanya mua kusunguluja tshidi tshimpe ne tshidi tshibi, ne kabidi tudi ne bua kuteleja bidiku katuambila.

Tangila tshilejilu tshia Zakayo tshidi mu Bible. Zakayo mmuntu uvua musombele mu Yeleko, uvua mubanji ne mfumu wa balambuishi ba bitadi. Bilondeshile mêyi ende yeye nkayende, bubanji buvuaye nabu uvua mubupetele ku dinyengangana dia bintu, ngenzelu uvua ubueja bakuabu mu dikenga. Kuondo ka muoyo ka Zakayo kavuaku kamutatshisha bua malu mabi avuaye wenza aa anyi? Bikalaku kavua kamutatshisha, bidi bimueneka ne: kavua ukateleja to.​—Luka 19:1-7.

Kadi muanda kampanda wakenzeka uvua mufikishe Zakayo ku dishintulula bienzedi biende. Yezu uvua mufike mu Yeleko. Zakayo uvua ujinga kumumona, kadi bu muvuaye muntu wa tshitupa, kakapeta mushindu wa kumona Yezu to, bualu tshisumbu tshia bantu tshivua tshimujike. Nunku wakanyema lubilu kupitaye bantu, e kubanda ku mutshi uvua kumpala bua kufikaye ku dimumona bilenga. Yezu wakakema bikole bua dijinga divua Zakayo nadi, ke kumuambilaye ne: uvua musue bua kuyabu nende kuende ku nzubu. Zakayo wakanyisha e kuakidila muengi wende mutambe bunene eu ne disanka.

Malu avua Zakayo mumone ne mumvue pavuabu ne Yezu akalenga mutshima wende ne kumusakabi too ne bua kushintulula bienzedi biende. Wakamba ne: “Mfumu, nempeshe bapele tshiabibidi tshia bintu bianyi; pangikala munyenge muntu bintu, nemmupingajile binayi pa tshimue.”​—Luka 19:8, MMM.

Kuondo ka muoyo ka Zakayo kavua kapete malongesha, e kukatelejaye ne kulonda tshivuaku kamuambila. Malu aa akapatula bipeta bilenga. Tshinkabi muvua Zakayo mua kuikala mudiumvue pavua Yezu mumuambile ne: “Lupandu ndubuele mu nzubu emu lelu”!​—Luka 19:9, MMM.

Ntshilejilupu kayi bulenga nunku! Tshilejilu etshi tshidi tshileja ne: nansha bienzedi bituvua nabi kale bikale bibi bia mushindu kayi, tudi mua kushintuluka. Anu bu Zakayo, tudi mua kuteleja dîyi dia Yezu difunde mu Bible nunku tuetu kumanya mua kuikala tujingulula tshidi tshimpe ne tshidi tshibi. Dîba adi netumone mua ‘kuikala ne kuondo ka muoyo kimpe,’ anu bu muakamba mupostolo Petelo. Tudi mua kuteleja kuondo ketu ka muoyo kalongesha bimpe ne kuenza malu makane.​—1 Petelo 3:16.