Tusambayi badi mu ntatu

‘Yehowa [mmungele] manyi pa mutu bua kusamba bonso badi mu madilu.’​—YESHAYA 61:1, 2.

1, 2. Mbanganyi batudi ne bua kusamba, ne mbua tshinyi?

 YEHOWA NZAMBI wa busambi buonso udi utulongesha bua kuditatshisha bua bakuabu padi dikenga dibakuata. Udi utulongesha bua kuikala ne mêyi adi ‘akuatshisha badi batekete’ ne bua kusamba bonso badi mu madilu. (1 Tesalonike 5:14) Padibi bikengedibua, tutu tuambuluisha bena Kristo netu nunku. Tutu kabidi tuleja dinanga kudi aba badi kabayi mu tshisumbu, tudileja kabidi nansha ne kudi aba bavua kumpala kabayi batunange.​—Matayo 5:43-48; Galatia 6:10.

² Yezu Kristo wakabala mulayi udi ulonda eu ne kuleja ne: uvua utangila mudimu wende wa tshiprofete wamba ne: ‘Nyuma wa Mukalenge Yehowa udi pambidi panyi, bualu bua Yehowa [mmungele] manyi pa mutu panyi bua meme kuambila badi mu dikenga lumu luimpe; wakuntuma bua kusangaja mitshima ya badi batamba kunyingalala, bua kusamba bonso badi mu madilu.’ (Yeshaya 61:1, 2; Luka 4:16-19) Bena Kristo bela manyi ba matuku etu aa mbamanye bimpe ne: mudimu eu udi ubankumbanyina pabu, ne “mikoko mikuabo” idi idisangisha nabu ne disanka dionso mu mudimu eu.​—Yone 10:16.

3. Padi bantu bakonka ne: “Bua tshinyi Nzambi udi ulekela makenga atukuata?,” mmushindu kayi utudi mua kubambuluisha?

 ³ Padi makenga akuata bantu ne bashala mu tunyinganyinga, misangu ya bungi batu bebeja ne: “Nzambi mmulekele makenga aa alua bua tshinyi?” Bible udi wandamuna lukonko elu bimpe. Kadi bidi mua kuanji kulomba matuku bua muntu utu kayi muanji kulonga Bible bua kumvua diandamuna dia lukonko elu bimpe menemene. Mikanda ya Bantemu ba Yehowa idi mua kutuambuluisha. * Tshilejilu, bamue bantu mbapete busambi anu pa kumona patupu (mu Bible) mvese bu eu udi mu Yeshaya 61:1, 2, bualu udi uleja patoke dijinga dia Nzambi dia kumona bantu bapeta busambi.

4. Mmunyi muvua munga Ntemu wa mu Pologne muambuluishe nsongakaji mulongi uvua ne malu mamutonde bikole, ne mmunyi mudi tshilejilu tshiende mua kukuambuluisha bua wewe pebe kuambuluisha bakuabu?

⁴ Bansonga ne bantu bakole bonso badi dijinga ne busambi. Nsongakaji kampanda wa mu ditunga dia Pologne wakalomba muntu mukaji mukuabu uvuaye mumanyangane nende mibelu. Pakatangila mulunda wende (udi Ntemu wa Yehowa) bimpe, wakamona ne: nsongakaji au uvua welakanangana ne kabidi uvua ne nkonko ivua mimupite mutu bu mudi: “Bua tshinyi kudi malu mabi a bungi nunku? Bua tshinyi bantu badi bakenga? Muakunyanyi udi mutshibukile panshi udi ukenga bua tshinyi? Bua tshinyi ndi ne disama dia muoyo? Ekeleziya udi wamba ne: Nzambi mmusue bua kuikalabi bienzeka anu mushindu eu. Biobi bikale nunku, tshiakumuitabuja kabidi to!” Ntemu eu wakasambila Yehowa mundamunda ne kuambaye pashishe ne: “Ndi nsanka bua muudi mungebeje bualu ebu. Nentete bua kukuambuluisha.” Wakamulondela ne: uvua pende ne dielakana dia bungi patshivuaye muana, kadi Bantemu ba Yehowa bakamuambuluisha. Wakamba ne: “Ngakalonga ne: Nzambi katu ukengesha bantu to. Mmubanange, ne mmusue bua bikale bimpe, ne mu katupa kîpi emu neashintulule malu a bungi pa buloba. Masama, bukulakaje ne lufu kabiakuikalaku kabidi to, ne bantu bena butumike nebapete muoyo wa tshiendelele panu pa buloba apa.” Wakabadisha nsongakaji au Buakabuluibua 21:3, 4; Yobo 33:25; Yeshaya 35:5-7 ne 65:21-25. Kunyima kua bamane kuyukila mutantshi mule, nsongakaji au wakamba ne ditalala ku muoyo bidimuenekela patoke ne: “Mpindieu ndi mumanye bua tshinyi ndi ne muoyo. Ndiku mua kulua kumonangana nebe kabidi anyi?” Bakatuadija kulonga nende Bible misangu ibidi ku lumingu.

Tusambayi bakuetu ne busambi budi Nzambi ufila

5. Patudi tuditatshisha bua bakuetu, ntshinyi tshidi mua kufila busambi bua bushuwa?

⁵ Patudi tujinga kusamba bakuabu, bitu bimpe kuikala ne mêyi a buwetu. Tutu tuenza muetu muonso bua kuleja muntu udi mu lutatu ne: bidi petu bitutonda bua nsombelu wende ku mêyi etu ne ku ngakuilu wetu. Katuena tuenza nunku pa kuamba mêyi a dilabidila adi kaayi ne bulelela munda muawu to. Bible udi utuambila ne: ‘Tuikale ne ditekemena bua ditantamana dietu ne bua busambi bua mu Mukanda wa Nzambi.’ (Lomo 15:4) Nunku tudi tukeba tshikondo tshiakanyine bua kumvuija muntu tshidi Bukalenge bua Nzambi buikale, ne kabidi tudi mua kuangata Bible ne kumuleja mushindu waluabu kujikija ntatu yonso idiku lelu. Pashishe tudi mua kuelangana nende meji bua tshidi tshileja menemene ne: ditekemena edi ndia kueyemena. Tuetu benze nunku, netusambe bantu.

6. Mbualu kayi butudi mua kuambuluisha bantu bua kumvuabu bua bamone mua kupeta busambi bua bungi mu Mukanda wa Nzambi?

 ⁶ Bua busambi butudi tufila kukuatshishabu muntu bimpe menemene, muntu au udi ne bua kumanya Nzambi mulelela, Bumuntu buende ne kabidi kumanya se: malaya ende nga kueyemena. Patudi tujinga kuambuluisha muntu udi kayi utendelela Yehowa, mbimpe kumumvuija malu adi alonda aa: (1) Busambi budi mu Bible budi bufumina kudi Yehowa, Nzambi mulelela. (2) Yehowa udi Wa-Bukole-Buonso, Mufuki wa diulu ne buloba. Udi Nzambi wa dinanga ne muule ntente ne luse lujalame ne bulelela. (3) Tudi mua kupeta bukole bua kutantamena ntatu itudi tupeta tuetu basemene kudi Nzambi pa kupeta dimanya dijalame dia Dîyi diende. (4) Mu Bible mudi mvese idi yumvuangana ne nsombelu mishilangane idi nayi bantu bashilashilangane.

7. (a) Kuimanyina pa lungenyi lua ne: busambi budi Nzambi ufila budi ‘buvulangana bua Kristo’ kudi mua kupatula tshinyi? (b) Mmunyi muudi mua kusamba muntu udi umona ne: ngikadilu wende uvua mubi?

⁷ Bamue bavua bakankamije bantu bavua babungame bakadi bamanye Bible pa kubala 2 Kolinto 1:3-7. Pavuabu babala mvese eyi bavua batamba kuimanyina pa tshiambilu tshia ne: ‘bua Kristo busambi buetu budi [buvulangana].’ Mvese eyi idi mua kuambuluisha muntu bua kumanya ne: Bible udi ufila busambi budi muntu au ne bua kuangata ne mushinga wa bungi. Mvese eyi idi kabidi mua kuikala tshishimikidi tshia miyuki mikuabu, imue misangu dituku dikuabu. Muntu yeye mumone ne: ntatu yende idi ifumina ku malu mabi avuaye muenze, tudi mua kumuambila, katuyi tumupisha ne: mêyi adi mu 1 Yone 2:1, 2 ne mu Musambu wa 103:11-14 adi mua kumusamba. Patudi tuenza nunku, bulelela tudi tusamba bakuabu ne busambi budi Nzambi ufila.

Tusambayi badibu bakengeshe anyi badi ne lutatu lua makuta

8, 9. Mmushindu kayi utudi mua kusamba bimpe bantu badi bakenga bua tshikisu?

⁸ Tshikisu tshia bantu ba muoyo mubi ba muaba kampanda ne mvita, mbikengeshishe bantu bungi kabuyi kubala. Kadi mmunyi mutudi mua kubasamba?

⁹ Bena Kristo balelela badi bepuka bua kuditeka ku luseke kampanda anyi kansanga lua bisumbu bidi biluishangana mvita lelu. (Yone 17:16) Kadi badi benza mudimu ne Bible mu mushindu muimpe bua kuleja ne: ntatu idiku lelu kayakutungunuka kashidi nansha. Badi mua kubala Musambu wa 11:5 bua kuleja mushindu udi Yehowa umona bantu badi banange tshikisu, anyi Musambu wa 37:1-4 bua kuleja ne: Nzambi udi utuambila bua katudisombuedi, kadi kumueyemena. Mêyi adi mu Musambu wa 72:12-14 adi aleja mushindu udi Solomo Munene, Yezu Kristo udi mpindieu Mukalenge mu diulu, umona bantu badi kabayi ne budibu benze bikale bakenga bua tshikisu tshidiku lelu.

10. Biwikala musombe bidimu bia bungi munkatshi mua mvita, mmushindu kayi udi mvese idi mu tshikoso eyi ne bua kukusamba?

¹⁰ Bantu bakuabu mbasombele miaba idi mvita ya bungi mienzeke padi bisumbu bidi biluishangana, etshi tshikeba mua kutshimuna tshikuabu. Buabu buobu mvita ne malu adiyi ikebesha mmalu a mu nsombelu. Ditekemena dimuepele didibu nadi ndia se: malu adi mua kuya bimpe bu bobu mua kunyemena mu ditunga dikuabu. Kadi ba bungi ba kudibu kabatu banji kunyemena mu ditunga dikuabu to, ne aba badi batete bua kuya mbajimije mioyo yabu. Aba batu baya mu ditunga dikuabu batu misangu mivule bamone amu ne: bavua bapanduke mbalanga kadi kuya kufua mankubungu. Tudi mua kuangata Musambu wa 146:3-6 bua kuambuluisha bantu ba nanku bua kutekabu ditekemena diabu mu tshintu tshishindame pamutu pa kumuangala ne kuya mu ditunga dikuabu. Mulayi udi mu Matayo 24:3, 7, 14 anyi mu 2 Timote 3:1-5 udi mua kubambuluisha bua kumona tshimfuanyi tshijima ne diumvuija dia nsombelu idibu batantamena, mbuena kuamba ne: mpindieu tudi ku ndekelu kua ndongoluelu wa kale wa malu. Mvese bu mudi wa Musambu wa 46:1-3, 8, 9 ne Yeshaya 2:2-4 idi mua kubambuluisha bua kumona ne: bulelela kudi ditekemena dia ditalala mu matuku atshilualua.

11. Mvese kayi ivua misambe muntu mukaji kampanda mu Afrike wa ku Ouest, ne bua tshinyi?

¹¹ Mu tshikondo kampanda tshia mvita ya kayiyi ikoseka mu Afrike wa ku Ouest, muntu mukaji kansanga wakanyema kuende bingoma bienda bidila. Wakalua kushala ne buôwa, dibungama ne kanyinganyinga. Pashishe, pakavua dîku diende disombele mu ditunga dikuabu, bayende  wakapangadija bua kuosha mukanda wa dibaka diabu wa kudi mbulamatadi, kumuipata ne difu munda ne muanende wa bidimu 10, ne kuluaye nsaserdose. Pakamubadilabu Filipoi 4:6, 7 ne Musambu wa 55:22 pamue ne biena-bualu bidi biakula malu a mu Bible bia mu Tshibumba tshia Nsentedi ne Réveillez-vous!, ndekelu wa bionso wakapeta busambi ne kumvuaye mushinga udi nawu muoyo.

12. (a) Ndisulakana kayi didi Mukanda wa Nzambi utuadila aba badi ne ntatu ya mfranga? (b) Mmunyi muvua Ntemu kampanda mu Asia muambuluishe kilian wende kansanga?

¹² Dinyanguka dia malu a mfranga ndinyange nsombelu wa miliyo mivule ya bantu. Malu aa atu ezenka imue misangu bua mvita ne malu atu alonda panyima. Misangu mikuabu, mikenji mibi ya mbulamatadi, lukuka ne dibenga kuamba bulelela bia bakokeshi badi ku mutu mbidie mfranga ya bantu ne mbijimijije bintu biabu ku bukole. Bakuabu kabatu nansha banji kupeta bintu bia bungi bia panu to. Malu onso aa adi mua kutusaka bua kumanya ne: Nzambi mmulaye dikisha bua aba badi bamueyemena ne mmubalaye kabidi bukua-panu buakane muikala bantu benza midimu yabu ya bianza ne disanka. (Musambu 146:6, 7; Yeshaya 65:17, 21-23; 2 Petelo 3:13) Pakumvua Ntemu mukuabu wa mu ditunga kampanda dia mu Asia munga kilian udiabakena bua nsombelu wa malu a mfranga mu ditunga adi, wakamumvuija ne: malu avua enzeka mu ditunga adi avua amue a ku mianda idi yenzeka pa buloba bujima. Bakayikila pa mvese wa Matayo 24:3-14 ne Musambu wa 37:9-11, kubangabu too ne kulonga nende Bible pa tshibidilu.

13. (a) Padi bantu banyingalala bua malaya a patupu, mmushindu kayi utudi mua kubambuluisha ne Bible? (b) Bikala bantu bamone ne: nsombelu mibi idi ijadika ne: Nzambi katuku, mmushindu kayi uudi mua kudienzeja bua kueleshishangana nabu meji?

¹³ Padi bantu bakenge munkatshi mua bidimu bia bungi anyi babashime ne malaya mavule a patupu, badi mua kulua anu bu bena Isalele mu Ejipitu bavua kabayi bateleja bua “kanyinganyinga ka mutshima.” (Ekesode 6:9) Mu nsombelu ya nunku, bidi mua kuikala bimpe bua kuleja mishindu idi Bible mua kubambuluisha bua kutantamena malu adiku mpindieu ne kuepuka mateyi atu anyanga nsombelu ya ba bungi. (1 Timote 4:8b) Bamue badi mua kumona nsombelu mibi ya ntatu idibu nayi bu tshijadiki tshia se: Nzambi katuku anyi katu ubatabalela to. Udi mua kueleshishangana nabu meji pa mvese idi mikumbanyine bua kubambuluisha bua kumonabu ne: Nzambi mmufile diambuluisha kadi ba bungi mbadibenge.​—Yeshaya 48:17, 18.

Padi mpepele mikole idituta anyi bikumina bienzeka

14, 15. Pavua malu a tshinyangu mashiye bantu ba bungi mu dibungama, mmushindu kayi uvua Bantemu ba Yehowa baditatshishe bua bakuabu?

¹⁴ Tshipepele tshikole, tshikumina, mudilu, anyi ditudika dia tshintu kampanda bidi mua kukebesha makenga. Bidi mua kulela kanyinganyinga kakole kudi ba bungi. Ntshinyi tshitudi mua kuenza bua kusamba badi bapanduka?

¹⁵ Bantu batu basue kumanya bua ne: kudi muntu kampanda udi uditatshisha bua bualu buabu. Kunyima kua bena tshinyangu bamane kubunda ditunga kampanda, bantu ba bungi bakashala ne dibungama dikole. Ba bungi bakajimija bena mêku abu, bantu bavua bambule bujitu buabu, balunda, midimu anyi bia kudikuatshisha nabi bionso. Bantemu ba Yehowa bakambuluisha bantu ba nunku aba bavua miaba ivuabu basombele, babaleja muvuabi bibatonde pabu bua bantu ne bintu bivuabu bajimije ne babasamba ne mêyi a mu Bible. Bantu ba bungi bakanyisha bua mutuvua baditatshishe bua bualu buabu.

16. Pavua tshipupu tshiditute mu tshinga tshitupa tshia ditunga dia Salvador, bua tshinyi mudimu wa buambi wa Bantemu ba muaba au wakapatula bipeta bimpe menemene?

¹⁶ Mu ditunga dia Salvador tshikumina tshikole tshiakadituta mu tshidimu tshia 2001, e kubungulula mushiki wa bitotshi biakashipesha bantu ba bungi. Nsongalume kampanda wa bidimu 25, (muana wa munga Ntemu wa Yehowa) wakafua ne bakunyi ba mubangila wende ba bakaji babidi. Mamuende wa nsongalume au ne mubangila wende bakaditua diakamue mu mudimu wa kuyisha. Bantu ba bungi bakabambila ne: Nzambi ke uvua muangate bantu bavua bafue abu anyi se: tshivua tshienzeke atshi tshivua disua dia Nzambi. Bantemu abu bakatela Nsumuinu 10:22 bua kuleja ne: Nzambi ki ngudi utukebela makenga to. Bakabala Lomo 5:12 bua kuleja ne: lufu luakalua bualu bua mpekatu wa muntu, kadi ki mbua ndisua dia Nzambi to. Bakaleja kabidi mukenji udi usambangana  udi mu Musambu wa 34:18, Musambu wa 37:29, Yeshaya 25:8 ne Buakabuluibua 21:3, 4. Bantu bakabateleja bimpe, nangananga bualu buobu bana betu ba bakaji babidi abu bavua bajimije pabu bena mu dîku diabu mu tshivua tshienzeke atshi; bakatuadija kulonga Bible ne bantu ba bungi.

17. Mu bikondo bia dikenga, ndiambuluisha dia mushindu kayi ditudi mua kufila?

¹⁷ Padi dikenga dimueneka, udi mua kupeta muntu udi ukeba bua bamuambuluishe pa lukasa. Ebi bidi mua kulomba bua kumubikidila munganga, kuambuluisha muntu bua kufikaye ku lupitadi, anyi kuenza muetu muonso bua kufila biakudia ne muaba wa kulala. Mu tshidimu tshia 1998 pavua tshipupu tshia mushindu eu tshienzeke mu ditunga dia Italie, kamona-kamba mukuabu wakamba ne: Bantemu ba Yehowa “badi benza mudimu mu mushindu muimpe, bambuluisha aba badi dikenga dikuata, nansha buobu bikale ba tshitendelelu kayi anyi tshitendelelu kayi.” Imue miaba, malu avuabu badianjile kumanyisha bua matuku a ku nshikidilu adi atuadilangana makenga manene. Mu miaba ayi, Bantemu ba Yehowa badi baleja bantu milayi ya mu Bible ne babasamba ne babambila mudi Bible ujadika ne: Bukalenge bua Nzambi nebukube bantu.​—Nsumuinu 1:33; Mika 4:4.

Padi muena mu dîku kampanda mufue

18-20. Padiku lufu mu dîku kampanda, udi mua kuamba anyi kuenza tshinyi bua kusamba benamu?

¹⁸ Dituku dionso bantu ba bungi batu mu tshinyongopelu bua lufu lua muntu kampanda udibu banange. Udi mua kupetangana ne badi mu madilu paudi mu mudimu wa buambi anyi paudi mu malu ebe makuabu. Udi mua kuamba anyi kuenza tshinyi bua kubasamba?

¹⁹ Muntu eu mmumueneke muikale ne dibungama dikole anyi? Mu nzubu mmuule tente ne bena dîku badi babungame anyi? Kudi malu a bungi audi mua kuamba, kadi bidi bikengela kuikala ne budimu. (Muambi 3:1, 7) Pamuapa mbimpe wewe kusamba muntu au, kumushila mukanda kampanda udi umvuangana ne nsombelu wende (broshire, tshibejibeji, anyi trakte), ne kulua  kumutangila kunyima kua matuku bua kumona ni udi mua kufila diambuluisha dikuabu. Mu tshikondo tshiakanyine, udi mua kufila ngenyi kampanda ya mu Bible idi ikankamija. Idi mua kusanguluja muntu ne kumukankamija. (Nsumuinu 16:24; 25:11) Wewe kuena mua kujula mufue bu muvua Yezu mujule bafue nansha. Kadi udi mua kuleja tshidi Bible wamba bua tshidi tshienzekela bantu padibu bafua, kadi wamanya edi ki ndîba dia kukeba bua kutonkola malongesha a dishima to. (Musambu 146:4; Muambi 9:5, 10; Yehezekele 18:4) Nudi mua kubala pamue milayi ya mu Bible idi itangila dibika dia bantu ku lufu. (Yone 5:28, 29; Bienzedi 24:15) Udi mua kuleja tshidi bualu ebu bumvuija pa kubala muyuki kampanda wa mu Bible udi ulonda muvuabu babishe muntu kampanda ku lufu. (Luka 8:49-56; Yone 11:39-44) Utume kabidi ntema yabu ku ngikadilu ya Nzambi wa dinanga udi mutupeshe ditekemena dia nunku. (Yobo 14:14, 15; Yone 3:16) Umvuija mushindu udi malongesha aa makuambuluishe wewe ne kabidi bua tshinyi udi mueyemene.

²⁰ Kubikila muntu ku Nzubu wa Bukalenge kudi mua kuambuluisha eu udi mu tshinyongopelu bua kumanya bantu badi banange bantu nabu bushuwa ne badi bamanye mua kukankamijangana. Muntu mukaji mukuabu wa mu ditunga dia Suède wakamona ne: atshi ke tshintu tshivuaye wenda ukeba mu nsombelu wende mujima.​—Yone 13:35; 1 Tesalonike 5:11.

21, 22. (a) Ntshinyi tshitudi ne bua kuenza patudi basue kusambangana? (b) Mmunyi muudi mua kusamba muntu ukadi mumane kumanya Bible bimpe?

²¹ Paudi umanya ne: muntu kampanda udi mu dibungama munda mua tshisumbu tshia bena Kristo anyi pambelu, utuku misangu mikuabu welakana pa tshiudi mua kuamba peshi kuenza anyi? Muaku wa tshiena-Gelika utubu bakudimune misangu ya bungi ne: “busambi” mu Bible udi umvuija “kubikila muntu bua kuikalaye ku luseke luebe.” Kuikala musambi mulelela kudi kumvuija kusemena pabuipi ne bantu badi mu dibungama.​—Nsumuinu 17:17.

²² Kadi newenze tshinyi bikala muntu uudi ukeba bua kusamba mudianjile kumanya tshidi Bible wamba bua lufu, bua mulambu wa tshia-bupikudi, ne dibishibua dia bantu ku lufu? Dikalaku nkayadi dia muena Kristo nende muaba au didi mua kusamba muntu. Padiye wakula, muteleje bimpe. Kumonyi ne: bidi bikengela wewe kuenza muyuki to. Nuenu babale mvese, nuyimone anu bu se: mêyi a Nzambi au adi anukankamija nuenu bonso babidi. Leja ditekemena dikole dinudi nuenu bonso babidi nadi mu dikumbana dia mvese eyi. Pa kuleja luse lua Nzambi ne kuambilangana malelela adi mu Dîyi diende, udi mua kuambuluisha aba badi mu dibungama bua kupetabu busambi ne bukole kudi Yehowa “Nzambi wa busambi buonso.”​—2 Kolinto 1:3.

[Mêyi adi kuinshi]

Udi mua kuandamuna tshinyi?

• Nnganyi utu bantu ba bungi bamba ne: yeye ke udi ukebesha makenga, ne mmunyi mutudi mua kubambuluisha?

• Tudi mua kuenza tshinyi bua kuambuluisha bakuabu bua kupetabu busambi budi Bible ufila?

• Mmalu kayi atu akengesha bantu ba bungi mu ditunga dienu, ne udi mua kubasamba mushindu kayi?

[Nkonko ya dilonga]

[Bimfuanyi mu dibeji 23]

Badi bafila mukenji wa busambi bulelela mu bikondo bia dikenga

[Mêyi a dianyisha]

Kamponya ka bena tshimuangi: UN PHOTO 186811/​J. Isaac

[Tshimfuanyi mu dibeji 24]

Dikalaku dia mulunda patupu didi mua kusamba muntu