Kristo udi wambila bisumbu malu

‘Udi ukuata mitoto muanda-mutekete mu tshianza tshiende tshia balume udi wamba malu aa.’​—BUAKABULUIBUA 2:1.

1, 2. Bua tshinyi tudi ne bua kumanya malu avua Kristo muambile bisumbu muanda-mutekete bia mu Asia Mukese?

 YEZU KRISTO Muana mulela umue wa Yehowa ke Mfumu wa tshisumbu tshia bena Kristo. Bua kulama tshisumbu tshia bayidi bende bela manyi katshiyi katoba, Yezu udi ubela kalumbandi ne ubapesha mibelu. (Efeso 5:21-27) Bilejilu bia muanda eu bidi mu Buakabuluibua nshapita 2 ne 3, mutudi tusangana mikenji ya bukole ne ya dinanga idi Yezu mutumine bisumbu muanda-mutekete bia mu Asia Mukese.

² Kumpala kua kumvuaye mêyi avua Yezu ne bua kuambila bisumbu muanda-mutekete, mupostolo Yone wakanji kupeta tshikena-kumona tshia ‘dituku dia Mukalenge.’ (Buakabuluibua 1:10) “Dituku” adi diakabanga pakajadikabu Bukalenge bua Masiya mu tshidimu tshia 1914. Nunku malu avua Kristo muambile bisumbu adi ne mushinga wa bungi menemene mu matuku a ku nshikidilu aa. Dikankamija ne mibelu yende bidi bituambuluisha bua kumanya tshia kuenza ne malu atudi tupeta mu bikondo bikole ebi.​—2 Timote 3:1-5.

3. Ntshinyi tshidi diumvuija dia mu tshimfuanyi dia “mitoto,” dia “banjelo” ne dia ‘bitekelu bia minda bia ngolo’ bivua mupostolo Yone mumone?

³ Yone wakamona Yezu Kristo mutumbishibue, muikale ‘mukuate mitoto muanda-mutekete mu tshianza tshiende tshia balume’ ne wenda ‘wenda munkatshi mua bitekelu bia minda muanda-mutekete’ anyi bisumbu. “Mitoto” eyi ‘mbanjelu ba [bisumbu] muanda-mutekete.’ (Buakabuluibua 1:20; 2:1) Imue misangu mitoto itu ileja banjelu badi bikale bifukibua bia mu nyuma, kadi Kristo kavua mua kuangata muntu wetu wa pa buloba eu bua kufundilaye banjelo mikenji nansha. Nunku mbiumvuike ne: “mitoto” eyi idi ileja batangidi bela manyi anyi tusumbu tua bakulu. Muaku “banjelo” udi umvuangana ne mudimu wabu wa bamanyishi ba mikenji. Bu mudi bulongolodi bua Nzambi budiunde, “mulami wa bulamate” mmuteke kabidi balume badi bakumbaje malu malomba ba munkatshi mua “mikoko mikuabo” bua kuikalabu batangidi.​—Luka 12:42-44, MMM; Yone 10:16.

4. Mmunyi mudi diteleja malu adi Kristo wambila bisumbu diambuluisha bakulu?

⁴ “Mitoto” idi mu tshianza tshia balume tshia Yezu, mbuena kuamba ne: idi ku bukokeshi buende, udi uyilombola, uyanyisha ne uyikuba. Ke bualu kayi idi ne bua kumubadila malu. Padi lelu bakulu bateleja mêyi avua Yezu muambile tshionso tshia ku bisumbu muanda-mutekete, badi bamanya mua kujandula ntatu ya muomumue. Bushuwa, bena Kristo bonso badi ne bua kuteleja  Muana wa Nzambi. (Mâko 9:7) Nunku ntshinyi tshitudi mua kulonga patudi tuteleja malu adi Kristo wambila bisumbu?

Kudi muanjelo wa mu Efeso

5. Efeso uvua tshimenga tshia mushindu kayi?

⁵ Yezu wakela tshisumbu tshia mu Efeso kalumbandi ne wakatshikanyina kabidi. (Bala Buakabuluibua 2:1-7) Ntempelo munene wa nzambi-mukaji Atemise uvua muaba eu wa bubanji bua bungi uvuabu bendela mishinga ne benzela malu a ntendelelu ku muelelu wa ku Ouest kua Asia Mukese. Nansha muvua Efeso muwule ne buendenda ne bitendelelu bia dishima ne malu a majimbu, Nzambi wakabenesha mudimu wa mupostolo Paulo ne wa bantu bakuabu wakenzabu mu tshimenga atshi.​—Bienzedi, nshapita wa 19.

6. Mmunyi mudi bena Kristo ba lulamatu lelu bafuane ba mu Efeso wa kale?

⁶ Kristo wakela tshisumbu tshia mu Efeso kalumbandi wamba ne: ‘Ndi mumanye bienzedi biebe, ne mudimu webe mukole, ne ditantamana diebe, ne kuena mua kuitabuja bantu babi, ne wakateta badi badiamba ne: Tudi bapostolo, kadi kabena bapostolo, ne wakabasangana bena mashimi.’ Lelu, bisumbu bia bayidi balelela ba Yezu mbiende lumu lua muomumue bua bienzedi bimpe, mudimu mukole ne ditantamana. Kabiena bitaba bana betu ba dishima badi basue kudileja bu bapostolo nansha. (2 Kolinto 11:13, 26) Anu bu bena Efeso, lelu bena Kristo ba lulamatu ‘kabena bitabuja bantu babi’ to. Nunku bua kulama bukezuke bua ntendelelu wa Yehowa ne bua kukuba tshisumbu, kabena badisangisha ne batontolodi badi kabayi badilengeja to.​—Galatia 2:4, 5; 2 Yone 8-11.

7, 8. Mbualu kayi bunene buvua mu tshisumbu tshia mu Efeso, ne mmunyi mutudi mua kupita ne bualu bua muomumue?

⁷ Nansha nanku, bena Kristo ba mu Efeso bavua ne bualu kampanda bunene. Yezu wakamba ne: ‘Kadi ndi nebe bualu ebu ne: wakalekela dinanga diebe dia kumudilu.’ Bena mu tshisumbu etshi bavua ne bua kujululula dinanga diabu dia kumpala divuabu nadi kudi Yehowa. (Mâko 12:28-30; Efeso 2:4; 5:1, 2) Tuetu bonso tudi ne bua kuenza muetu muonso bua katujimiji dinanga dietu dia kumpala dituvua nadi kudi Nzambi. (3 Yone 3) Kadi netuambe tshinyi bikala malu bu mudi dijinga dia kupeta biuma anyi masanka, enda alua ne mushinga wa bungi mu nsombelu wetu? (1 Timote 4:8; 6:9, 10) Nanku tudi ne bua kusambila ne muoyo mujima bua kulomba Nzambi atuambuluishe bua tumbushe meji aa ne tupingajapu dinanga dikole dia Yehowa ne dianyisha bua malu onso adiye yeye ne Muanende batuenzele.​—1 Yone 4:10, 16.

⁸ Kristo wakabela bena mu Efeso ne: ‘Uvuluke kuwakupona, ukudimune mutshima webe, ne enza midimu ya kumudilu.’ Ntshinyi tshivua mua kubafikila pavuabu babenga bua kuenza nanku? Yezu wakamba ne: ‘[Tshianana] nendue kuudi, nengumushe tshitekelu tshiebe tshia muinda mu muaba watshi.’ Pavua mikoko yonso ijimija dinanga diayi dia ku ntuadijilu, “tshitekelu tshia muinda” anyi tshisumbu katshivua mua kuikalaku kabidi to. Nunku mutudi bena Kristo ba lukunukunu, tuenzayi muetu muonso bua kulama tshisumbu bua tshikale anu tshikenka mu nyuma.​—Matayo 5:14-16.

9. Mmunyi mutudi ne bua kumona dienza anyi dilonda tusumbu?

⁹ Tshimpe tshivuabu benze ntshia se: bavua bakine “bienzedi bia bena [kasumbu ka] Nikalao.” Pa kumbusha malu adibu bambe mu Buakabuluibua, katuena bamanye malu masunguluke adi atangila ntuandijilu, malongesha ne bienzedi bia kasumbu aka to. Kadi bu muvua Yezu mubenge dilonda dia bantu, tudi ne bua kutungunuka ne kukina dienza anyi dilonda tusumbu, anu muakenza bena Kristo ba mu Efeso.​—Matayo 23:10.

10. Bantu badi bateleja tshidi nyuma wamba nebapete masanka kayi?

¹⁰ Kristo wakamba ne: ‘Udi ne matshi umvue budi nyuma wambila [bisumbu].’ Pavua Yezu pa buloba, uvua wamba malu ku bukole bua nyuma wa Nzambi. (Yeshaya 61:1; Luka 4:16-21) Nunku tudi ne bua kuteleja malu adi Nzambi wamba mpindieu mukana muende ku diambuluisha dia nyuma muimpe. Ku bulombodi bua nyuma, Yezu wakalaya ne: ‘Kudi udi upita bukole, kudi yeye mene, nemmupe bua kudiaye mutshi wa muoyo udi mu mparadizu wa Nzambi.’ Bua bela manyi badi bumvua tshidi nyuma wamba, bualu ebu budi bumvuija dipeta muoyo udi kauyi ufua mu ‘mparadizu wa Nzambi’ wa mu diulu anyi kumpala menemene kua Yehowa. Bantu ba mu “musumba munene” badi bateleja pabu tshidi nyuma wamba nebikale ne muoyo mu mparadizu pa buloba muikalabu mua kunua mâyi a mu ‘musulu wa mâyi a muoyo’ ne ‘mabeji a mitshi’ idi  kumpenga kuawu neabuondape.​—Buakabuluibua 7:9; 22:1, 2; Luka 23:43.

11. Mmunyi mutudi mua kukankamijangana bua kunanga Yehowa?

¹¹ Bena Efeso bakavua bajimije dinanga divuabu nadi ku ntuadijilu. Kadi tshia kuenza ntshinyi bikala bualu bua muomumue buenda buenzeka mu tshisumbu kampanda lelu? Tuetu bonso tukankamijangane bua kunanga Yehowa pa kuakula bua njila yende ya dinanga. Tudi mua kuleja dianyisha bua dinanga divua Nzambi muleje pakafilaye mulambu wa tshia-bupikudi ku diambuluisha dia Muanende munanga. (Yone 3:16; Lomo 5:8) Padibi biakanyine, tudi mua kuakula bua dinanga dia Nzambi mu mandamuna atudi tufila ne mu miyuki idi yenzeka mu bisangilu. Tudi mua kuleja dinanga kudi Nzambi patudi tutumbisha dîna diende mu mudimu wa buambi. (Musambu 145:10-13) Bushuwa, mêyi etu ne bienzedi bietu bidi mua kuambuluisha bikole bua kujululula ne kukolesha dinanga divua nadi tshisumbu ku ntuadijilu.

Kudi muanjelo wa mu Semuna

12. Mianda ya kale idi ileja tshinyi bua Semuna ne bilele bia ntendelelu bivuamu?

¹² Bakela tshisumbu tshia mu Semuna kalumbandi kudi Kristo, ‘Wa Ku mudilu ne Wa Ku nshikidilu, wakadi mufue ne udi muikale ne muoyo kabidi’ pakamubishibu ku bafue. (Bala Buakabuluibua 2:8-11) Semuna (mpindieu Izmir, mu ditunga dia Turquie) uvua muibakila ku muelelu wa ku Ouest kua Asia Mukese. Bena Gelika bavua basombele mu tshimenga etshi, ne bena Ludia bakalua kutshibutula bu mu tshidimu tshia 580 kumpala kua bikondo bietu ebi. Bapinganyi ba Aleksandre Munene bakibakulula Semuna muaba mukuabu. Semuna wakalua tshitupa tshia provense wa Lomo wa mu Asia, ne uvua muaba uvuabu bendela mushinga bikole, muende lumu bua nzubu ya bantu milenga ivuamu. Ntempelo uvuamu wa mukalenge Tibelio Kaisa wakavuija tshimenga etshi muaba wa ntendelelu wa amperere. Batendeledi ba amperere bavua buosha musenga wa manananshi muambuila ku minu ibidi ne bamba ne: “Kaisa udi Mukalenge.” Bena Kristo kabavua mua kuenza muanda eu to, bualu “Yezu [ke] udi Mukalenge” wabu buobu. Ke bualu kayi bakabakengesha bikole.​—Lomo 10:9.

13. Nansha muvua bena Kristo ba mu Semuna bapele ku mubidi, mmu ngumvuilu kayi muvuabu babanji?

¹³ Pa kumbusha makenga, bena Kristo ba mu Semuna bakatantamena bupele, imue misangu bavua batata bua kupeta mfranga bua imue mikandu ivuabu babelele bualu kabavua batendelela amperere. Basadidi ba Yehowa lelu batu bapeta pabu ntatu ya muomumue. (Buakabuluibua 13:16, 17) Nansha buobu bapele ku mubidi, aba badi bafuane bena Kristo ba mu Semuna mbabanji mu nyuma, ne atshi ke tshidi menemene ne mushinga!​—Nsumuinu 10:22; 3 Yone 2.

14, 15. Mbusambi kayi budi bela manyi mua kupeta mu mêyi adi mu Buakabuluibua 2:10?

¹⁴ Bena Yuda ba bungi ba mu Semuna bavua “nsunagoga wa Satana” bualu bavua balonda bilele bivua Bible ubenga, bakapidia Muana wa Nzambi ne bakapenda bayidi bende bela manyi a nyuma. (Lomo 2:28, 29) Kadi mêyi a Kristo adi alonda aa adi mua kusamba bela manyi bikole! Udi wamba ne: ‘Kutshinyi malu audi wamba kukenga nawu. Mona, Diabolo udi wamba kuela bakuabu ba munkatshi muenu mu lukanu bua nuenu nutetshibue, ne nenuikale ne dikenga dia matuku dikumi. Wikale biebe ne dieyemena too ne ku lufu, nunku nenkupe tshifulu tshia butumbi tshia muoyo.’​—Buakabuluibua 2:10.

 ¹⁵ Yezu kavua utshina bua kufua bua kubingisha bumfumu bua Yehowa to. (Filipoi 2:5-8) Nansha mudi Satana uluisha bashadile bela manyi mvita mpindieu, kabena batshina malu adi ne bua kubafikila mu tshibungi bu mudi: dibakengesha, dibela mu buloko anyi dibashipa ne tshikisu. (Buakabuluibua 12:17) Nebatshimune bukua-panu. Ne pamutu pa tshikata tshia lumu tshidi tshifubidila tshienza ne bilongo, tshivuabu bavuala bu tshifulu tshia butumbi kudi bantu bavua bapatuka ba kumpala mu manaya a bena mu bisamba bia bende, Kristo udi ulaya bela manyi babishibua ku lufu “tshifulu tshia butumbi tshia muoyo” bua kuikalabu bifukibua bia mu nyuma mu diulu bidi kabiyi bifua. Ndipa kayipu edi dia mushinga kauyi kuamba!

16. Bituikala mu tshisumbu tshifuane tshia mu Semuna wa kale, ntshilumbu kayi tshitudi katuyi ne bua kupua muoyo?

¹⁶ Tshia kuenza ntshinyi bituikale mu tshisumbu tshifuane tshia mu Semuna wa kale, nansha tuetu bikale ne ditekemena dia kupeta muoyo mu diulu anyi pa buloba? Nanku tuambuluishayi bena Kristo netu bua kabapu muoyo muanda munene udi Nzambi mulekele makenga: tshilumbu tshia bumfumu butambe bunene. Ntemu wa Yehowa yonso udi ne lulamatu udi ujadika ne: Satana mmuena mashimi ne udi uleja ne: nansha muntu udibu bakengesha udi mua kuikala mubingishi mukole wa bukenji bua Nzambi bua kuikala Mukokeshi Mutambe Bunene. (Nsumuinu 27:11) Tukankamijayi bena Kristo bakuabu bua kutantamenabu makenga, nunku bua batungunuke ne kuikala ne diakalenga dia ‘kuenzela [Yehowa] mudimu [wa tshijila] kabayi ne buôwa, [ne lulamatu ne buakane] kumpala kuende matuku onso a muoyo wetu,’ kashidi ne tshiendelele.​—Luka 1:68, 69, 74, 75, Muanda Mulenga Lelu.

Kudi muanjelu wa mu Pêgamo

17, 18. Pêgamo uvua muaba wa ntendelelu wa mushindu kayi, ne ntshinyi tshivua mua kuenzekela muntu uvua ubenga kubuelakana mu ntendelelu wa mpingu wa nunku?

¹⁷ Tshisumbu tshia mu Pêgamo bakatshiela kalumbandi ne bakatshipesha mibelu. (Bala Buakabuluibua 2:12-17.) Tshimenga tshia Pêgamo tshivua mutantshi wa kilometre bu 80 ku Nord kua Semuna, ne tshivua tshidine bikole mu ntendelelu wa bantu ba bisamba bia bende. Bidi bimueneka ne: bena majimbu bena Kasada (bena lubuku lua mitoto) bavua banyemenamu bafumina mu Babulona. Babedi bavua batshimukila mu ntempelo uvuabu balongolole wa mu Pêgamo, wa Ascléopios, nzambi wa dishima wa luondapu. Batu babikile Pêgamo ne ntempelo uvuabu bibakamu bua ntendelelu wa Kaisa Augusto ne: “muaba munene wa ntendelelu wa amperere mu ampire wa kale [wa bena Lomo].”​—Encyclopædia Britannica, 1959, Tshitupa tshia 17, dibeji 507.

¹⁸ Mu Pêgamo muvua tshioshelu tshivuabu benzele Zewuse. Tshimenga etshi tshivua kabidi muaba uvua Diabolo usakangana bua kutendelela bantu. Ke bualu kayi bakamba tshisumbu tshivuamu ne: tshivua mu ‘nkuasa mene wa bukalenge bua Satana’! Kubenga mua kutendelela amperere kuvua mua kukebela muntu yonso uvua mulamate bukokeshi bua Yehowa lufu. Bukua-panu butshidi anu ku bukokeshi bua Diabolo, ne lelu bantu batshidi batendelela mabendele a matunga. (1 Yone 5:19) Kubangila mu bidimu lukama bia kumpala too ne lelu, batu bashipe bena Kristo bavule ba lulamatu, anu muakashipabu mukuabu uvua Kristo mubikile ne: ‘Antipa, mumanyishi wanyi wa kueyemena, wakashipibua munkatshi  muenu.’ Kakuyi mpata, Yehowa Nzambi ne Yezu Kristo badi bavuluka bena lulamatu ba nunku.​—1 Yone 5:21.

19. Ntshinyi tshiakenza Belâma, ne mmalu kayi adi bena Kristo bonso ne bua kudimukila?

¹⁹ Kristo wakakula kabidi bua “diyisha dia Belâma.” Bu muvuaye uzuka bua kupeta biuma, Belâma muprofete wa dishima wakakeba bua kuela Isalele mulawu. Pakavuija Nzambi mulawu wende dibenesha, Belâma wakumvuangana ne Balaka Mukalenge wa bena Moaba bua kukuluisha bena Isalele ba bungi mu ditendelela dia mpingu ne mu tshiendenda tshia masandi. Bakulu bena Kristo badi ne bua kuikala ne dîsu dikole bua buakane anu bu muvua Pinehasa, wakatompakaja mayele avua nawu Belâma. (Nomba 22:1–25:15; 2 Petelo 2:15, 16; Yuda 11) Bushuwa, bena Kristo bonso badi ne bua kudimukila ntendelelu wa mpingu ne dibuela dia tshiendenda tshia masandi munda mua tshisumbu.​—Yuda 3, 4.

20. Muena Kristo yeye mubange kuitaba ngenyi ya batontolodi, ntshinyi tshidiye ne bua kuenza?

²⁰ Tshisumbu tshia mu Pêgamo tshivua mu njiwu minene bualu tshivua tshilekele bantu “[bavua] balamata diyisha dia bena Nikalao” munda muatshi. Kristo wakambila tshisumbu etshi ne: ‘Ukudimune mutshima webe; [tshianana] nendue kuudi lubilu, nenduangane nabu mvita ne muele wa mvita wa mukana muanyi.’ Benji ba tusumbu mbasue kuenzela bena Kristo bibi mu nyuma, ne aba badi bakeba matapuluka ne tusumbu kabakupiana Bukalenge bua Nzambi to. (Lomo 16:17, 18; 1 Kolinto 1:10; Galatia 5:19-21) Muena Kristo kampanda yeye mubange kuitaba ngenyi ya batontolodi ne kukeba bua kuyitangalaja, mbimpe ateleje didimuija dia Kristo edi! Bua yeye kupanduka, udi ne bua kudilengeja ne kulomba diambuluisha dia mu nyuma kudi bakulu ba tshisumbu. (Yakobo 5:13-18) Udi ne bua kuenza lukasa, bualu Yezu udi ulua lubilu bua kubutula.

21, 22. Mbanganyi badi badia “mana masokoka,” ne ntshinyi tshidiwu umvuija?

²¹ Bena Kristo bela manyi ne balunda babu ba lulamatu kabena ne bua kutshina dilumbuluisha dilualua to. Mabenesha mmindile bonso badi bateleja mibelu ya Yezu mifila ku bulombodi bua nyuma wa Nzambi. Tshilejilu, bela manyi batshimuna bukua-panu nebababikile bua kudia ndambu wa “mana masokoka” ne nebabapeshe “dibue ditoke” dikale ne ‘dîna dipiadipia.’

²² Nzambi wakafila mana bua kudisha bena Isalele mu luendu lua bidimu 40 luakenzabu mu tshipela. Bavua balame ndambu wa “bidia” ebi mu dibungu dia ngolo munda mua mushete wa tshipungidi, ne bavua babisokoke mu Mutambe Munsantu wa tabernakle, muvua butoke bua mu tshishima buleja ne: Yehowa uvuamu. (Ekesode 16:14, 15, 23, 26, 33; 26:34; Ebelu 9:3, 4) Kabavua banyishile muntu nansha umue bua kudia mana masokoka au to. Kadi padibu bababisha ku lufu, bayidi ba Yezu bela manyi badi bapeta muoyo udi kauyi ufua, muleja mu tshimfuanyi kudi didia dia “mana masokoka.”​—1 Kolinto 15:53-57.

23. “Dibue ditoke” ne ‘dîna dipiadipia’ bidi ne diumvuija kayi?

²³ Ku tubadi tua bena Lomo, dibue difike divua dileja dipila ku tshilumbu, kadi dibue ditoke divua dileja dibinga. Padi Yezu upesha bena Kristo bela manyi badi batshimune “dibue ditoke” bidi bileja ne: udi ubamona babinge, bakezuke ne bapeluke. Bu muvua bena Lomo pabu bangata mabue bua kubuela nawu miaba ivuabu benzela mianda kampanda minene, “dibue ditoke” didi mua kuikala dileja dipesha muela manyi muaba mu diulu mu dibaka dia Muana wa mukoko. (Buakabuluibua 19:7-9) ‘Dîna dipiadipia’ didi bushuwa diumvuija diakalenga didibu nadi dia kudisangisha ne Yezu bua kupiana nende Bukalenge bua mu diulu. Malu onso aa kaenaku akankamija bela manyi ne balunda babu badi ne ditekemena dia kuikala ne muoyo mu mparadizu pa buloba, mu mudimu udibu benzela Yehowa anyi?

24. Mmunyi mutudi ne bua kumona butontolodi?

 ²⁴ Mbimpe kuvuluka ne: batontolodi ke bavua bateke tshisumbu tshia mu Pêgamo mu njiwu. Bikala bualu bua muomumue buteka tshisumbu tshitudi mu njiwu, tupidiayi butontolodi ne muoyo mujima ne tutungunukayi ne kuenda mu bulelela. (Yone 8:32, 44; 3 Yone 4) Bu mudi balongeshi ba dishima anyi bantu badi basue butontolodi mua kunyanga tshisumbu tshijima, tudi ne bua kudikuba bikole ku butontolodi, ne katuena ne bua kulekela malu mabi atupangisha bua kutumikila bulelela nansha kakese.​—Galatia 5:7-12; 2 Yone 8-11.

25. Mmikenji idi Kristo mutumine bisumbu kayi ituamona mu tshiena-bualu tshidi tshilonda?

²⁵ Mmêyi kayipu aa adi alenga ku muoyo a kalumbandi ne mibelu avua Yezu Kristo mutumbishibue muambile bisatu bia ku bisumbu muanda-mutekete bia mu Asia Mukese atudi bamone! Kadi anu mudi nyuma muimpe muleje, Yezu udi kabidi ne malu a bungi a kuambila bisumbu binayi bidi bishale. Netumone mikenji eyi mitumina tshisumbu tshia Tuatila, tshia Sâdi, tshia Filadelefia ne tshia Laodikiya mu tshiena-bualu tshidi tshilonda.

Newandamune munyi?

• Bua tshinyi tudi ne bua kuteleja malu adi Kristo wambila bisumbu?

• Mmunyi mutudi mua kuambuluisha bakuabu bua kujululula dinanga divua nadi tshisumbu ku ntuadijilu?

• Bua tshinyi tudi mua kuamba ne: bena Kristo ba mu Semuna bapele ku mubidi bavua babanji menemene?

• Patudi tuela meji bua nsombelu uvua mu tshisumbu tshia mu Pêgamo, mmunyi mutudi ne bua kumona meji a batontolodi?

[Nkonko ya dilonga]

[Karte mu dibeji 10]

(Bua kumona malu bimpe, tangila mu mukanda)

GELIKA

ASIA MUKESE

Efeso

Semuna

Pêgamo

Tuatila

Sâdi

Filadelefia

Laodikiya

[Tshimfuanyi mu dibeji 12]

“Musumba munene” neupete muoyo mu mparadizu pa buloba

[Bimfuanyi mu dibeji 13]

Bena Kristo badibu bakengesha mbatshimune bukua-panu