Muyuki udi usankisha bikole

MUKEBULUDI Richard Evelyn Byrd wakenza luendu misangu itanu mu Antarktike kubangila mu tshidimu tshia 1928 too ne mu tshia 1956. Malu a ku dituku ne dituku avuaye yeye ne bakebuludi nende bakuabu bafunde misangu yonso yakenzabu luendu ayi ne mikanda mikuabu ya malu a ngendu ivuabu nayi biakambuluisha bua kujadika kuvua mpepele iya, kuenza tuarte ne kumanya malu a bungi adi atangila buloba bua Antarktike.

Ngendu ya Byrd idi ileja mushinga wa kuikala ne malu a ngendu mafunda. Bantu badi mua kulua kubala malu aa bua kumanya bivua bienzeke ne kumanya kabidi makuabu adi mua kulua kubambuluisha mu ngendu yenzeka matuku adi kumpala.

Mu Bible mudi muyuki muimpe wa Mvula wa kabutu wa mu matuku a Noa. Mâyi a mvula au akashala pa buloba bujima tshidimu ne ngondo. Bua kudilongolola ku Mvula wa kabutu au, Noa, mukajende ne bana bende ba balume basatu ne bakaji babu bakenza bidimu 50 anyi 60 bua kuenza buatu bunene buvua ne mupimbu wa metre 40 000. Bavua benza buatu abu bua tshinyi? Bua kukuba bamue bantu ne nyama ku Mvula wa kabutu au.​—Genese 7:1-3.

Nunku mu mukanda wa mu Bible wa Genese mudi tshitudi mua kubikila ne: muyuki wa Noa wa malu akenzeka kubangila ku ntuadijilu kua Mvula wa kabutu too ne pavua Noa ne dîku diende bapatuke mu buatu. Mu mukanda eu mudiku bualu kampanda bua mushinga budi bututangila tuetu lelu anyi?